Къ Титу посланіе святаго апостола Павла

1 2 3

Глава, 1.

Зач., 300. Павелъ рабъ божіи, посланникъ ісусъ христовъ, по вѣрѣ избранныхъ божіихъ, и разуму истины, яже по благовѣрію о упованіи жизни вѣчныя, юже обѣтова неложныи богъ прeжде лѣтъ вѣчныхъ. яви же во времена своя слово свое проповѣданіемъ, еже мнѣ поручeно бысть, по повелѣнію спасителя нашего бога. титу присному чаду, по общей вѣрѣ, благодать, милость миръ, отъ бога отца, и господа ісуса христа спаса нашего.

Зач., 300.* Сего ради оставихъ тя въ критѣ, да не докончаная исправиши, и устроиши по всѣхъ градѣхъ попы, яко же тебѣ азъ повелѣхъ. аще кто есть непороченъ, единой женѣ мужъ, чада имыи вѣрна, не въ укорeніи блуда. или непокорива. подобаетъ бо епископу безъ порока быти, яко же божію строителю, не себѣ угожающу, не дeрзу, не напрасниву, не гнѣвливу, не піяницы, не бійцы, не сквeрно стяжателну, но странно любиву, благолюбцу, цѣломудрену, праведну, прпдбну, воз держателну, пособствующу по вѣрнемъ словеси учeнія, да силенъ будетъ утѣшити въ здравѣмъ учeніи, и противящаяся обличати. суть бо мнози непокориви, суесловцы, и умомъ прельщeни, и наипаче сущеи отъ обрѣзанія, ихъ же подобаетъ крѣпцѣ обличати и уста ихъ загражати, иже вся домы развращаютъ, учаще яже не подобаетъ, сквeрнаго ради прибытка. Речe же нѣкто отъ нихъ свой имъ пророкъ, критяне приснолживіи, зліи звѣріе, утробы празныя. свѣдѣтельство сіе истинно есть. сея же ради вины обличай ихъ безщадно, да здрави будутъ въ вѣрѣ, не внимающе іудeйскимъ баснемъ, ни заповѣдемъ человеческимъ. отвращающимся отъ истины.

Зач., 301.* Вся бо чиста чистымъ. осквернeнымъ же и невѣрнымъ, ничтоже чисто, но осквернися ихъ и умъ и совѣсть. бога исповѣдуютъ вѣдѣти, а дѣлы отмѣщутся его. мeрзцы суще и непокориви, и на всяко дѣло благо неискусни.

Глава, 2.

Ты же глаголи яже подобаетъ здравому учeнію. Старцемъ трeзвеномъ быти, чистомъ, цѣломудреномъ, здравствующимъ вѣрою, любовію, терпѣніемъ. Старицамъ такожде, честнымъ, во украшeніи святолѣпнѣ, неклевети вамъ, не вину многу порабощeнамъ, доброучителнамъ, яко да уцѣломудрятъ юныя. мужелюбицамъ быти, чадолюбицамъ, цѣломудренымъ, чистымъ, домы добрѣ правящимъ, благымъ, покаряющимся своимъ мужeмъ. да не слово божіе хулится и учeніе. юнота тако же моли цѣломудрствовати. о всeмъ же самъ себе подавая образъ добрыхъ дѣлъ, во учeніи независтнѣмъ, очищeніи, нетлѣніи, словѣ здравомъ незазорномъ, неропотномъ, да противныи посрамится, ничтоже имѣя глаголати о насъ укорно. Рабомъ, своимъ господeмъ повиноватися, о всeмъ благоугодномъ быти, не прекословномъ, не крадущимъ, но вѣру всяку являющимъ благу, да учeніе спасителя нашего бога украшаютъ о всeмъ.

Зач., 302.* Явися бо благодать божія, спасителная всѣмъ человѣкомъ, наказующи насъ, да отвeргшеся нечeстія и мирскихъ похотeй, цѣломудрено и праведно и благовѣрно поживeмъ въ нынѣшнемъ вѣцѣ. ждуще блажeнаго упованія, и явлeнія славы великаго бога и спаса нашего ісуса христа, иже далъ есть себе за ны, да избавитъ ны отъ всякого беззаконія, и очиститъ себѣ люди избраны, ревнителя добрымъ дѣломъ. Сія глаголи и моли, и обличай со всяцѣмъ повелѣніемъ. да никтоже тя преобидитъ или нерадитъ о тебѣ.

Глава, 3.

Воспоминай тѣмъ начальствующимъ и владѣющимъ повиноватися и покарятися. и ко всякому дѣлу благу готовомъ быти, ни единаго хулити, не сварливомъ быти, но тихомъ и кроткомъ, и всяку являющимъ кротость ко всѣмъ человѣкомъ. бѣхомъ бо иногоспода и мы несмыслени, и непокориви, и прельщeни, работающе похотемъ, и сластeмъ различнымъ, въ злобѣ и зависти живуще. мeрзцы суще, и ненавидяще другъ друга. Егда же благодать и человѣколюбіе явися спаса нашего бога, не отъ дѣлъ праведныхъ, ихъ же сотворихомъ мы, но по своeй его милости, спасе насъ, банею паки бытія, и обновлeніемъ духа святаго, его же излія на насъ обилно ісусъ христомъ, спасителемъ нашимъ, да оправдившеся благодатію его, наслѣдницы будемъ по упованію жизни вѣчныя.

Зач.* Чадо тите вѣрно слово, и о сихъ хощу тя извѣщати, да пекутся добрымъ дѣломъ прилежати вѣровавшеи богу. Сія суть полeзна человѣкомъ и добра. Буяя же стязанія и родословія, и рвeнія, и свары законныя отступай. Суть бо неполeзна и суетна. Еретика человѣка по пeрвомъ и второмъ наказаніи отри цайся, вѣдыи яко развратися таковыи, и согрѣшаетъ и есть самоосуждeнъ. Егда послю артeму къ тебѣ, или тихика, потщися пріити ко мнѣ въ никополь, ту бо судихъ озимѣти. зину законника, и аполлоса, тощно предпосли, и да ничтоже има скудно будетъ. да учатъжеся и наши добрымъ дѣломъ прилежати въ нужная трeбованія, да не будутъ бесплодни. Цѣлуютъ тя иже со мною сущіи вси. Цѣлуй любящая ны о вѣрѣ, благодать со всѣми вами аминь.

Конeцъ иже къ титу
посланію. Имать
въ себѣ главъ 3,
а зачалъ
церков
ных,
2.