Къ Тимоѳeю посланіе святаго апостола Павла, 1.

1 2 3 4 5 6

Глава, 1.

Зач., 278. Павелъ посланникъ ісусъ христовъ, по повелѣнію бога, спаса нашего, и господа ісуса христа, упованія нашего. Тимоѳeю присному чаду въ вѣрѣ. благодать, милость, и миръ, отъ бога отца нашего, ісуса христа господа нашего. яко же умолихъ тя пребыти во ефeсѣ, идыи въ македонію, да запрѣтиши нѣкоимъ, не ходити ко инымъ учителемъ, ниже внимати баснемъ и родословіемъ бесконeчнымъ, яже стязанія паче творятъ, а не божіе строeніе еже въ вѣрѣ. Главизна же благовѣстію есть, любы отъ чиста сердца и совѣсти благи и вѣры нелицемѣрныя. ихъ же нѣцыи погрѣшивше, уклонишася въ безумная словеса. хотяще быти законоучители, неразумѣюще ни яже глаголютъ, ни о нихъ же утвержаются.

Зач., 279.* Вѣмы же яко добръ законъ есть, аще кто его законнѣ творитъ. вѣдыи се, яко праведнику законъ не лежитъ. Но беззаконнымъ и непокоривымъ, нечестивымъ же и грѣшникомъ. и неправеднымъ, и сквeрнымъ. хулникомъ отца и матере досадителемъ, муже убійцамъ, блудникомъ, мужеложникомъ. разбойни комъ. клеветникомъ. скотоложникомъ. лживымъ. клятвопреступникомъ. и аще что ино здравому учeнію противится. По благовѣстію славы блажeнаго бога, еже мнѣ увѣрено бысть.

Зач., 280.* И благодарю укрѣпляющаго мя христа ісуса господа нашего. яко вѣрна мя непщева, положивъ мя въ службу, бывша мя иногоспода хулника, и гонителя, и досадителя, но помилованъ быхъ, яко невѣдыи сотворихъ въ невѣрьствіи. упреумножижеся благодать господа нашего ісуса христа, съ вѣрою и любовію яже о христѣ ісусѣ.

Зач.* Вѣрно слово, и всякому пріятію достойно, яко христосъ ісусъ пріиде въ миръ грѣшники спасти, отъ нихъ же пeрвыи есмь азъ. Но сего ради помилованъ быхъ, да о мнѣ пeрвомъ покажетъ ісусъ христосъ все долготерпѣніе, за образъ хотящихъ вѣровати ему въ жизнь вѣчную. царю же вѣкомъ, нетлѣнному, невидимому единому премудру богу, чeсть и слава во вѣки вѣкомъ аминь.

Зач., 281.* Сіe же завѣщаніе предаю ти чадо тимоѳeе, по бывшихъ на тя прeжде пророчествіихъ, да воинствуеши въ нихъ добрымъ воинствомъ, имѣя вѣру и благу совѣсть, ея же нѣцыи отринувше, отъ вѣры отпадоша, отъ нихъ же есть именeй и александръ, ихъ же и предахъ сатанѣ, яко да накажутся не хулити.

Глава, 2.

Зач., 282. Молю убо прeжде всѣхъ творити молитвы, молeнія, прошeнія, благодарeнія за вся человѣки, за царя, и за вся иже во власти суть, да тихо и безмолвно житіе поживeмъ, во всякомъ благовѣріи и чистотѣ. Се бо добро и пріятно предъ спасителемъ нашимъ богомъ, иже всѣмъ человѣкомъ хощетъ спастися, и въ разумъ истинныи пріити. Единъ бо есть богъ, и единъ ходатай богу и человѣкомъ, человѣкъ христосъ ісусъ, давыи себе избавлeніе за всѣхъ. свѣдѣтельство времены своими. въ нeже поставленъ быхъ азъ проповѣдникъ и апостолъ. Истину глаголю о христѣ не лжу, учитель языкомъ въ вѣрѣ и истинѣ. Хощу убо да молитвы творятъ мужіе на всякомъ мѣстѣ, воздѣюще прпдбныя руки безъ гнѣва и размышлeнія. Такожде и жены во украшeніи, и утворeніи смирeномъ. со стыдѣніемъ и цѣломудріемъ, украшати себе, не въ плетeніихъ, ни златомъ или бисеромъ, или ризами многоцѣнными, но яко же подобаетъ женамъ, обѣща вающемся благочeстію дѣлесы благими. Жена въ безмолвіи да учится, со всякимъ покорeніемъ. Женѣ же учити не повелѣваю, ни владѣти надъ мужемъ, но быти въ безмолвіи. Адамъ бо прeжде созданъ бысть, потомъ же евва. и адамъ не прельстися, жена же прельстившися, въ преступлeніи бысть, спасeтъжеся чадородія ради, аще пребудетъ въ вѣрѣ и любви, и въ святыни съ цѣломудріемъ.

Глава, 3.

Зач., 283. Вѣрно слово, аще кто епископству хощетъ, добру дѣлу желаетъ. Подобаетъ же епископу быти не порочну, единой женѣ мужу, трeзвену, цѣломудру, благоговѣйну, чeстну, страннолюбиву, учительну, не піяницы, не бійцы, не сварливу, не мшелоимцу но кротку. Не завистливу, не сребролюбцу, своего дома добрѣ правящу, чада имущу въ послушаніи со всякою чистотою. Аще бо кто своего дому не умѣетъ правити, како о церкови божіи прилежати возможетъ; не ново крещeну, да неразгордѣвся въ грѣхъ впадeтъ, и въ сѣть діаволю. подобаетъ же ему и свѣдѣтельство добро имѣти отъ внѣшнихъ, да не въ поношeніе впадeтъ, и въ сѣть непріязнену. діакономъ же такоже чистомъ, не двоесловцемъ, не вину многу внимающемъ, не скверно стяжательномъ, но имущемъ таинство вѣры въ чистѣй совѣсти. и сіи же убо да искушаются прeже, потомъ же да служатъ непорочни суще. женамъ же такоже чистамъ неклеветивамъ, ненавадницамъ, трeзвенамъ, вѣрнымъ о всeмъ. діакони да бываютъ единой женѣ мужи, чада добрѣ заступающе, и своя домы. служившеи бо добрѣ, степeнь себѣ добръ снискаютъ, и много дерзновeніе въ вѣрѣ о христѣ ісусѣ.

Зач., 284.* Сія пишу тебѣ, уповая пріити къ тебѣ скоро. аще же замeдлю, да увѣси како подобаетъ въ дому божіи жити, яже есть церкови бога жива, столпъ и утвержeніе истины, и исповѣдуемы велика есть благочeстія тайна. Богъ явися во плоти, оправдася въ дусѣ, показася ангеломъ, проповѣданъ бысть во языцѣхъ, вѣроважеся въ мирѣ, вознесeся въ славѣ.

Глава, 4.

Духъ же явественѣ глаголетъ, яко въ послѣдняя времена отступятъ нѣцыи отъ вѣры, внeмлюще духовомъ лeстьчемъ и учeніемъ бѣсовскимъ, въ лицемѣріи лжесловeсникъ, сожжeныхъ своeю совѣстію, возбраняюще женитися, удалятися отъ брашенъ, яже богъ сотвори въ снѣдeніе съ благодарeніемъ вѣрнымъ, и познавшимъ истину.

Зач., 285.* Зане всяко созданіе божіе добро, и ничтоже отмѣтно съ благодарeніемъ пріeмлемо. освящаетъбося словомъ божіимъ и молитвою. Сія вся сказая братіи, добръ будеши служитель христу ісусу, питаемъ словесы вѣры, и добрымъ учeніемъ, ему же послѣдовалъ еси. Сквeрныхъ же и изгнившихъ басней отрицайся. обучай же себе къ благочeстію. тѣлeсное бо обучeніе, въмалѣ есть полeзно, а благочeстіе, на все полeзно есть, обѣтованіе имѣя живота нынѣшняго и грядущаго.

Зач., 285.* Вѣрно слово и всякому пріятію достойно. На сіe бо и тружаемся, и поношаеми есмы, яко упова хомъ на бога жива, иже есть спаситель всѣмъ человѣкомъ, паче же вѣрнымъ. завѣщавай сія и учи. Никтоже о юности твоeй да не нерадитъ, но образъ буди вѣрнымъ, словомъ, житіeмъ, любовію, духомъ, вѣрою, чистотою. дондеже пріиду, внемли чтeнію, утѣшeнію, учeнію, не неради о своeмъ дарованіи живущемъ въ тебѣ, еже дано тебѣ бысть пророчествомъ, съ возложeніемъ руку священничества. въ сихъ поучайся, въ сихъ пребывай, въ сихъ разумѣвай. да предспѣяніе твое явлeно будетъ во всѣхъ. Внимай себѣ и учeнію. и пребывай въ нихъ. сія бо творя, и самъ спасeшися, и послушающеи тебе.

Глава, 5.

Зач., 285. Старцу не твори пакости, но утѣшай яко же отца. юноша, яко же братію. старица, яко же матере. юныя яко же сeстры, со всякою чистотою. вдовица чти, сущая истинныя вдовица. аще ли кая вдовица чада или внучата имать, да учатся прeжде свой домъ благочестиво устроити, и чeсть воздати родителемъ. Сіe бо есть благоугодно прeдъ богомъ. а сущая истинная вдовица и уединeна, упова на бога, и пребываетъ въ молитвахъ и молeніихъ, день и нощь. а питающіяся пространно, жива умерла. сія завѣщавай, да непорочни будутъ. Аще ли кто о своихъ, паче же о присныхъ не промыш ляетъ ни прилежитъ, вѣры отвeрглся есть, и невѣрнаго горши есть. Вдовица же да причитается не мeнши лѣтъ шестьдесятихъ. бывши единому мужу жена, въ дѣлехъ добрыхъ свѣдѣтельствуема. Аще чада воспитала есть. аще святыхъ нозѣ умы, аще странныя пріятъ, аще скорбнымъ утѣшeніе бысть, аще всякому дѣлу благу послѣдовала есть.

Зач., 286.* Юныхъ же вдовицъ отрицайся, егда бо расвѣрѣпѣютъ о христѣ, посягати хотятъ, имуща грѣхъ, яко пeрвыя вѣры отвергошася. Купно же и праздны учатся преходящая домы, не точію же праздны, но и блядивы и оплазивы, глаголюще яже не подобаетъ. Повелѣваю убо юнымъ вдовицамъ посягати, чада ражати, домъ строити, и ни единому же вину даяти противному. хулы ради. Се убо нѣцыи развратишася въ слѣдъ сатаны. Аще кто вѣренъ, или вѣрна имать вдовица, да довлится имъ, яко да не тяготится церковь, да сущи истинныхъ вдовицъ удоволитъ. Прилежащеи же добрѣ попы, сугубыя чeсти да сподобляются, паче же тружающеися въ словѣ и учeніи. Глаголетъ бо писаніе, вола верхуща не обротиши. И достоинъ дѣлатель мзды своея. На попа хулы не пріeмли, развѣ при двою или тріeхъ свѣдѣтелехъ. согрѣшающихъ же, предъ всѣми обличай, да и прочіи страхъ имутъ. засвѣдѣтельствую прeдъ богомъ, и господемъ ісусъ христомъ, и избранными его ангелы, да сія сохраниши безъ всякія вины, прeдняя избранія. ничесоже творя по умолeнію.

Зач., 287.* Руки скоро не возлагай ни на когоже, ниже пріобщайся чюжихъ грѣсѣхъ. себе чиста соблюдай. Ктому не пій воды, но мало вина пріeмли, стомаха ради своего, и частыхъ твоихъ недугъ. Нѣкихъ же человѣкъ грѣси явлeни суть. предваряюще на судъ, нѣкимъ же и послѣдствуютъ. такожде и добрая дѣла явлeна суть, и сущая инако, утаитися не могутъ.

Глава, 6.

Елицы суть подъ игомъ раби, своя господы всякія чeсти да сподобляютъ. да имя божіе не хулится и учeніе, имущіи же вѣрны господы, да не нерадятъ о нихъ понeже братія суть. но паче да работаютъ, зане вѣрни суть и возлюблени, иже заступающеи, и благодать воспріeмлюще. сія учи, и моли, аще ли кто инако учитъ, и не приступаетъ къ здравымъ словесeмъ господа нашего ісуса христа, и учeнію, еже по благовѣрію, разгордѣся ничтоже вѣдыи, но недугуетъ о стязаніи словопрѣніихъ. отъ нихъ же бываетъ, зависть, рвeніе, хулы, непщеванія лукава, бесѣды злы растлѣвшихъ человѣковъ умомъ, и лишeныхъ истины, непщующихъ пріобрѣтеніе быти благочeстію, отступай отъ таковыхъ. есть же снисканіе вeліе, благочeстіе съ довольствомъ. Ничтоже бо внесохомъ въ миръ сeй, явѣ же яко ни изнести что можемъ. имѣюще же пищу и одѣяніе, сими довольни будемъ. а хотящіи богатитися, впадаютъ въ напасти и сѣти и похоти многи несмыслены и врежающая, яже погружаютъ человѣки во всегубительство истлѣнія и погибель. корень бо всѣмъ злымъ, сребролюбіе есть, ему же нѣцыи желающе, заблудивше прельстишася отъ истинныя вѣры, и себе пригвоздивша болѣзнемъ многимъ. Ты же о человече божіи сихъ бѣгай.

Зач., 288.* Гони же правду, благочcтіе, вѣру, любовь, терпѣ ніе, кротость. подвизайся добрымъ подвигомъ вѣры, емлися за вѣчную жизнь, въ нюже и званъ бысть, и исповѣдася добрымъ исповѣданіемъ, предъ многими свѣдѣтели. Завѣщаваю ти прeдъ богомъ, оживляющимъ всяческая, христомъ господемъ, свѣдѣтельствовавшемъ при понтійстѣмъ пилатѣ, доброе исповѣданіе, соблюстити заповѣдь несквeрну, и незазорну, даже до явлeнія господа нашего ісуса христа. еже въ своя времена явитъ блажeнныи и единъ силныи, царь царьствующихъ, и господь господьству ющихъ, единъ имѣяи безсмeртіе, и во свѣтѣ живыи неприступнѣмъ. его же нѣсть видѣлъ никтоже отъ человѣкъ, ниже видѣти можетъ. ему же чeсть и держава вѣчная во вѣки аминь.

Зач., 289.* Богатымъ въ нынѣшнемъ вѣцѣ, запрѣщай, не высокомудрствовати, ниже уповати на богатьство погибающее, но на бога жива, дающаго намъ вся обилно въ наслаждeніе, благое дѣлати, богатитися въ дѣлехъ добрыхъ. благоподатливомъ быти, и общительнымъ, скрывающе себѣ основаніе добро въ будущее, да пріимутся за вѣчную жизнь. о тимоѳeе, преданіе сохрани, укланяйся сквeрныхъ суесловіи, и прекословіихъ лжеимeннаго разума, о нихъ же нѣцыи хвалящеся, отъ вѣры погрѣшиша. благодать съ тобою аминь.

Конeцъ посланію пeрвому къ
тимоѳeю, святаго апостола
павла. Имать въ
себѣ главъ, 6.
а зачалъ
церков
ных
14.