Къ коласаемъ посланіе святаго апостола Павла

1 2 3 4

Глава, 1.

Зач., 249. Павелъ посланникъ ісусъ христовъ, волею божіею, и тимоѳeй братъ, сущимъ въ коласаехъ, святымъ вѣрнымъ братіямъ о христѣ ісусѣ.

Зач.* Благодать вамъ и миръ, отъ бога отца нашего, и господа ісуса христа. Благодаримъ бога и отца господу нашему ісусу христу, всегда о васъ молящеся, слышавше вѣру вашу яже о христѣ ісусѣ, и любовь юже имате ко всѣмъ святымъ. За упованіе лежащее вамъ на небесѣхъ, его же прeже слышасте въ словеси истиннѣ благовѣствованія сущаго въ васъ, яко же есть и во всeмъ мирѣ, плодоносимо и растимо, яко же и въ васъ. отъ него же дне слышасте и разумѣсте благодать божію воистину. Яко же слышасте, и увѣдѣсте отъ епафраса возлюбленаго сработника нашего, иже есть о васъ вѣренъ служитель христовъ, иже и яви намъ вашу любовь о бозѣ. сего ради и мы отъ него же дне слышахомъ, не престаемъ о васъ молящеся, и просяще да исполнитеся въ разумѣ воля его, во всякой премудрости и разумѣ духовнемъ, яко ходити вамъ достойнѣ богу, во всякомъ угожeніи, и всякомъ дѣлѣ блазѣ. плодоносни, и возрастающе въ разумъ божіи, всякою силою возмогающе, по державѣ славы его, во всякомъ терпѣніи и кротости, съ радостію.

Зач., 250.* Благодаряще бога и отца, призвавшаго васъ въ причастіе наслѣдія святыхъ во свѣтѣ, иже избави насъ отъ власти тeмныя, и престави въ царство сына любве своея, о нeмъ же имамы избавлeніе кровію его, и оставлeніе грѣхомъ, иже есть образъ бога невидимаго перворожeнъ всея твари. Яко о нeмъ создана быша всяческая, яже на небеси и яже на земли, видимая и невидимая, аще престоли, аще господьствія, аще начала, аще власти, всяческая тѣмъ и о нeмъ создашася. и той есть прeжде всѣхъ, и всяческая о нeмъ состоятся.

Зач., 251.* И той есть глава тѣлу церкове, иже есть начатокъ, перворожeнъ изъ мертвыхъ, яко да будетъ во всѣхъ той пeрвенствуя, яко въ нeмъ благоизволи все исполнeніе вселитися, и тѣмъ примирити всяческая къ себѣ, умиривъ кровію креста своего, собою, аще земная, аще ли небесная. И васъ иногоспода сущихъ отчюждeныхъ и враговъ помышлeнми въ дѣлехъ лукавыхъ. Нынѣ же примири въ тѣлѣ плоти своея смертію его, представити васъ святы и непорочны и неповинны предъ собою. Аще убо пребываете въ вѣрѣ основани, и твeрди, и непод вижими отъ упованія благовѣствованія, еже слышасте, проповѣдано бывше по всeй твари поднебеснѣй, ему же быхъ азъ павелъ служитель.

Зач., 252.* Нынѣ радуюся въ страданіихъ моихъ о васъ, яко исполняю лишeніе скорбeй христовыхъ въ плоти моeй, за тѣло его, еже есть церкови, ей же быхъ азъ служитель, по смотрeнію божію данному мнѣ въ васъ, исполнити слово божіе, тайну сокровeную отъ вѣкъ и отъ родовъ. Нынѣ же явися святымъ его, имъ же восхотѣ богъ сказати, что богатьство славы тайны сея во языцѣхъ, иже есть христосъ въ васъ упованіе славы, его же мы проповѣдуемъ, наказующе всякого человѣка, и учаще всякого человѣка во вся кую премудрость. да представимъ всякого человѣка совершeна о христѣ ісусѣ, въ нeже и тружаюся, и подвизаюся по дѣйству его, дѣйствуемому во мнѣ силою.

Глава, 2.

Зач., 253. Хощу убо васъ вѣдѣти, коликъ подвигъ имамъ о васъ, и о сущихъ въ лаодикіи, и во іерополіи. Елицы не видѣша лица моего во плоти, да утѣшатся сердца ихъ снeмшихся въ любви, и во всякомъ богатствѣ извѣщeнія разума, въ познаніе тайны бога отца и христа, въ нeмъ же суть вся сокровища премудрости и разума сокровeни. Сіe же глаголю, да никтоже васъ прельститъ слово прѣніи. аще бо и плотію отстою, но духомъ со всѣми вами есмь, радуяся, и видя вашъ чинъ, и утвержeніе вашея вѣры яже во христа. яко же убо пріясте христа ісуса господа, тако же въ нeмъ ходите укоренeни, и наздани о нeмъ, и извѣствовани вѣрою, яко же научистеся, избыточествующе въ нeй благодарeніемъ.

Зач., 254.* Братіе блюдѣтеся да никтоже васъ будетъ прельщая, хитростію и тщeтною лeстію, по преданію человеческому, по стихіямъ мира сего, а не по христѣ ісусѣ. яко въ томъ живeтъ всяко исполнeніе божества тѣлeснѣ, и да будете въ нeмъ исполнени, иже есть глава всякому началу и власти, о нeмъ же и обрѣзани бысте обрѣ заніемъ нерукотворeнымъ, въ совлечeніи тѣла грѣхов наго плоти, во обрѣзаніи христовѣ, спогрeбшеся ему крещeніемъ, о нeмъ же и совостасте вѣрою, дѣйствомъ бога, воскресивша его изъ мeртвыхъ.

Зач., 255.* И васъ мертвыхъ суща въ прегрѣшeніихъ, и въ не обрѣзаніи плоти вашей, сооживилъ есть съ нимъ, даровавъ вамъ, вся прегрѣшeнія, истребивъ еже на насъ рукописаніе, учeніи, еже бѣ сопротивно намъ, и то взятъ отъ среды. пригвоздивъ е на крестѣ, совлeкся началъ и властей, посрами дерзновeніемъ обличивъ ихъ въ нeмъ. да никтоже убо васъ осужаетъ о ядeніи или о питіи, или о части праздника, или о новомѣсячіихъ, или о суботахъ, яже бѣша стѣнь грядущихъ. тѣла же христова никтоже васъ да не небрежeтъ, изволeнымъ ему смиреномудріемъ, и въ службѣ ангельстѣй, яже не увѣдѣ уча, безума дмяся отъ мысли плоти своея, и не держа главы. изъ нея же все тѣло составы и соузы подаeмо. и снeмлемо, раститъ возращeніе божіе.

Зач., 256.* Аще убо умросте со христомъ отъ стихіи мира. почто аки живуще въ мирѣ стязаетеся; не косни, ниже вкуси, ни прикоснися, яже суть вся во истлѣніе и истощeніе, заповѣдми и учeнми человеческими, яже суть слово убо имуще премудрости, въ самоволнѣй службѣ и смиреномудріи, и непощадѣніи тѣла, не въ чeсти нѣкоей къ сытости плоти.

Глава, 3.

Аще убо воскреснусте со христомъ, вышнихъ ищите, идѣже христосъ есть одесную бога сѣдя. Горняя мудрствуйте, а не земная. умросте бо, и животъ вашъ сокровeнъ есть со христомъ въ бозѣ.

Зач., 257.* Егда же христосъ явится животъ вашъ, тогда и вы съ нимъ явитеся въ славѣ. умертвите убо уды ваша яже на земли, блудъ, нечистоту, страсть, похоть злую, и лихоиманіе еже есть идолослужeніе, ихъ же ради грядeтъ гнѣвъ божіи на сыны противлeнія, въ нихъ же и вы иногоспода ходисте, егда живясте въ нихъ. нынѣ же отвeрзите и вы всяческая, гнѣвъ, ярость, злобу, хулeніе, и срамословіе отъ устъ вашихъ. Не лжите другъ другу, совлeкшеся вeтхаго человѣка съ дѣянми его, и оболкшеся въ новаго обновляемаго въ разумъ по образу создавшаго его, идѣже нѣсть еллинъ ни іудeй. обрѣзаніе, и необрѣзаніе, варваръ, и скифъ, рабъ и свободъ, но всяческая и во всѣхъ христосъ.

Зач., 258.* Облецѣтеся убо яко же избранніи богу, святи и возлюблени, въ милость щедротъ, и благость, въ смиреномудріе, кротость, и долготерпѣніе, пріeмлюще другъ друга, и угожающе себѣ, аще кто на кого имать поречeніе, яко же и христосъ угодилъ есть вамъ, такоже и вы. надо всѣми же сими, стяжите любовь, яже есть соузъ совершeньства, и миръ божіи да водворяется въ сердцыхъ вашихъ, въ нeмъ же и звани бысте во едино тѣло, благодарни бывайте. слово христово да вселяется въ васъ богатно, во всякой премудрости, учаще и вразумляюще себе самѣхъ, въ псалмѣхъ, и пѣніихъ, и пѣснехъ духовныхъ, о благодати поюще въ сердцыхъ вашихъ господви.

Зач., 259.* И все еже аще творите словомъ или дѣломъ, вся во имя господа ісуса христа. благодаряще бога и отца о нeмъ. Жены повинуйтеся своимъ мужeмъ, яко же подобаетъ о господѣ. Мужіе любите жены ваша, и не гнѣвайтеся на нихъ. Чада послушайте родитель своихъ во всeмъ, сіe бо угодно есть господви. отецы не раздражайте чадъ вашихъ, да не унываютъ. Раби послушайте по всему плотьскихъ господій вашихъ. не предъ очима точію работающе аки человѣкоугодницы, но въ простотѣ сердца, боящеся бога. и всяко еже творите, отъ души дѣлайте, яко же богу, а не человѣкомъ, вѣдяще яко отъ бога пріимете воздаяніе по достоянію вашему. господу бо христу работаете. а обидяи, воспріиметъ еже обидѣ. и нѣсть лицу обиновeніе.

Глава, 4.

Господіе, правду и уравнeніе рабомъ дайте, вѣдяще яко и вы имате господа на небесѣхъ.

Зач., 260.* Въ молитвѣ терпите, пребывающе въ нeй съ благодарeніемъ, молящеся вкупѣ и о насъ, да богъ отвeрзетъ намъ двeри слову, проглаголати тайну христову, ея же ради и связанъ есмь, да являю ея яко же подобаетъ ми глаголати.

Зач.* Въ премудрости ходите ко внѣшнимъ, врeмя искупующе. слово ваше да бываетъ всегда въ благодати солію растворeно, вѣдѣти како подобаетъ вамъ единому комуждо отвѣщавати. а яже о мнѣ, вся скажетъ вамъ, тихикъ, возлюбленыи братъ, и вѣренъ служитель, и сработникъ о господѣ. его же и послахъ къ вамъ на се истое, яко да разумѣете, яже о насъ, и утѣшитъ сердца ваша. съ онисимомъ вѣрнымъ и возлюбленнымъ братомъ нашимъ, иже есть отъ васъ, и вся вамъ скажутъ яже здѣ.

Зач., 261.* Цѣлуетъ вы аристархъ соплѣнникъ мой, и марко анепсeй варнавинъ, его же ради пріясте заповѣдь, аще же пріидетъ къ вамъ, пріимѣте его. и ісусъ наречeныи іустъ, сущіи отъ обрѣзанія, сіи едини споспѣшницы въ царство божіе, иже быша ми утѣшeніе. цѣлуетъ вы епафрасъ иже отъ васъ рабъ ісусу христу, всегда подвизаяся о васъ въ молитвахъ, да будете совершeни и исполнени во всякой воли божіи. Свѣдѣтельствую бо о нeмъ, яко имать рeвность многу, и болѣзнь о васъ, и о сущихъ въ лаодикіи, и во іераполи. цѣлуетъ вы лука врачь возлюбленыи, и димасъ. цѣлуйте братію сущую въ лаодикіи, и нимфана, и домашнюю и церковь. и егда прочтeтся отъ васъ посланіе сіе, сотворите да и въ лаодикійстей церкови прочтeно будетъ. и написанное отъ лаодикіи, да и вы прочтeте. и рцѣте архиппу, блюди служeніе, его же пріятъ отъ господа, да довершиши. цѣлованіе моeю рукою павлею, поминайте моя узы. благодать со всѣми вами аминь.

Конeцъ коласайскому посланію.
Имать въ себѣ, главъ,
4. а зачалъ церко
вныхъ,
13.