Къ солуняномъ посланіе святаго апостола Павла, 2.

1 2 3

Глава, 1.

Зач., 274. Павелъ, и силуянъ, и тимоѳeй, церкови солуньстѣй, о бозѣ отецы нашемъ и господѣ ісусѣ христѣ. благодать вамъ и миръ, отъ бога отца нашего, и господа ісуса христа. Благодарити должни есмы бога всегда о васъ братіе, яко же достойно есть, яко превозрастаетъ вѣра ваша. и множится любовь единаго когождо всѣхъ васъ другъ ко другу, яко самѣмъ намъ хвалятися о васъ въ церковахъ божіяхъ, о терпѣніи вашемъ, и вѣрѣ, во всѣхъ гонeніихъ вашихъ, и скорбѣхъ, ихъ же пріeмлете, показаніе праведному суду божію, во еже сподобитися вамъ царствію божію, его же ради и стражете. аще убо праведно отъ бога воздати скорбь, оскорбляющимъ васъ, и вамъ оскорбляемымъ, отраду съ нами, во откровeніи господа нашего ісуса христа съ небесе, со ангелы силы своея, въ огни пламеннѣ, дающему отмщeніе невѣдущимъ бога, и непослушающимъ благо вѣствованія господа нашего ісуса христа. иже муку пріимутъ, погибелну вѣчную, отъ лица господня, и отъ славы крѣпости его, егда пріидетъ прославитися во святыхъ своихъ, и дивенъ быти во всѣхъ вѣровавшихъ.

Зач., 274.* Яко увѣрися свѣдѣтельство наше въ день онъ въ васъ. Въ нeмъ же и молимся всегда о васъ, яко да вы сподобитъ званію богъ нашъ, и исполнитъ всякаго благоволeнія и благости, и дѣло вѣры въ силу. яко да прославится имя господа нашего ісуса христа въ васъ, и вы о нeмъ, по благодати бога нашего и господа ісуса христа.

Глава, 2.

Зач., 275.* Молимъ же вы братіе, о пришeствіи господа нашего ісуса христа, и нашемъ снитіи о нeмъ, яко не скоро подвизатися вамъ отъ ума, ни ужасатися, ниже духомъ, ниже словомъ, ни посланіемъ яко отъ насъ посланѣмъ, яко убо настоитъ день христовъ. да никтоже васъ прельститъ ни по единому же образу. яко аще не пріидетъ отступлeніе прeже, и открыется человѣкъ беззаконію, сынъ погибели, противникъ, и превозносяися паче всякаго глаголемаго бога, или чтилища. яко же ему сѣсти въ церкови божіи аки богу, показуя себе яко богъ есть. не помните ли яко еще живыи у васъ сія глаголахъ вамъ; и нынѣ одержащее вѣсте, явитися ему въ свое ему врeмя, тайна бо уже дѣется беззаконію. точію держаяи нынѣ, дондеже отъ среды будетъ, и тогда явится беззаконныи, его же господь ісусъ убіeтъ духомъ устъ своихъ, и упразднитъ явлeніемъ пришeствія своего. его же есть пришeствіе по дѣйству сатанину, во всякой силѣ и знаменіихъ и чудесѣхъ ложныхъ, и во всякой льсти и неправдѣ, въ погибающихъ, зане любве истинныя не пріяша во еже спастися имъ. и сего ради послетъ имъ богъ дѣйство льсти, во еже вѣровати имъ лжи, да судъ пріимутъ вси невѣровавшеи истиннѣ, но благоволиша о неправдѣ.

Зач., 276.* Мы же должни есмы благодарити бога всегда о васъ братіе возлюбленная отъ господа, яко избралъ есть васъ богъ начатокъ во спасeніе, во святыни духа и вѣры и истиннѣ, въ нeже призва васъ благовѣствованіемъ нашимъ, въ снабдѣніе славы господа нашего ісуса христа. Тѣмъ же убо братіе, стойте и держите преданіе имъ же научи стеся, или словомъ, или посланіемъ нашимъ. Самъ же господь нашъ ісусъ христосъ, и богъ и отецъ нашъ, возлюбивыи насъ, и давыи утѣшeніе вѣчно, и упованіе благо въ благодати, да утѣшитъ сердца ваша. и да утвердитъ васъ во всякомъ словѣ и дѣлѣ блазѣ.

Глава, 3.

Прочее же молитеся о насъ братіе, да слово господне течeтъ, и славится, яко же и въ васъ, да избавимся отъ злыхъ и лукавыхъ человѣкъ. Не всѣмъ бо есть вѣра, вѣренъ есть господь, иже утвердитъ вы, и сохранитъ отъ лукаваго. Уповаемъ же на господа о васъ, яко яже повелѣваемъ вамъ и творите и сотворите. Господь же да исправитъ сердца ваша въ любовь божію и въ терпѣніе христово.

Зач., 277.* Повелѣваемъ же вамъ братіе о имени господа нашего ісуса христа, отлучитися вамъ отъ всякаго брата, бесчинно ходяща, а не по преданію, еже пріяша отъ насъ. сами бо вѣсте како лѣпо есть вамъ подобитися намъ, яко не бесчиновахомъ у васъ, ни туне хлѣба ядохомъ у кого, но въ трудѣ и подвизѣ, въ нощь и день дѣлающе, да не отягчимъ ни коего же отъ васъ. не яко не имамы власти, но яко да себе образъ дамы вамъ, во еже уподобитися намъ. ибо егда бѣхомъ у васъ, сіе завѣщавахомъ запрѣщающе, яко аще не хощетъ кто дѣлати, да не ястъ. слышимъ бо нѣкія бесчинно ходяща у васъ, ничтоже дѣлающихъ, но лукавно обходящая. таковымъ запрѣщаемъ и молимъ о господѣ нашемъ ісусѣ христѣ, да съ безмолвіемъ дѣлающе свой хлѣбъ ядятъ. Вы же братіе, не стужайте си доброе творяще. Аще ли же кто не послушаетъ словесе нашего, посланіемъ его сказуйте, и не премѣшайтеся съ нимъ, да посрамится, и не аки врага имѣйте его, но наказуйте яко же брата. Самъ же господь мира, да дастъ вамъ миръ всегда, во всякомъ образѣ. господь со всѣми вами. цѣлованіе моeю рукою павлею еже есть знаменіе, во всякомъ посланіи сице пишу. Благодать господа нашего ісуса христа со всѣми вами, аминь.

Конeцъ, посланію второму,
иже къ фесалоникомъ.
Имать въ себѣ
главъ, 3. а
зачалъ
церков
ных,
5.