Къ коринѳомъ посланіе святаго апостола Павла, 1.

1 2 3 4 5 6 7 8 9 10 11 12 13 14 15 16

Глава, 1.

Зач., 122.* Павелъ званъ апостолъ ісусъ христовъ, волею божіею, и состeнъ братъ, церкови божіи сущей въ коринѳѣ, освященнымъ о христѣ ісусѣ, званымъ святымъ, со всѣми призывающими имя господа нашего ісуса христа, во всякомъ мѣстѣ, тѣхъ же и вашемъ.

Зач., 123.* Благодать вамъ и миръ, бога отца нашего, и господа ісуса христа. благодарю бога моего всегда о васъ, о благодати божіи, даннѣй вамъ о христѣ ісусѣ, яко во всeмъ обогатистеся о нeмъ, во всякомъ словѣ, и всякомъ разумѣ, яко же свѣдѣтельство христово извѣстися въ васъ, яко же вамъ не лишитися ни во единомъ дарованіи, чающимъ откровeніе господа нашего ісуса христа, иже и утвердитъ васъ даже до конца, неповинныхъ въ день господа нашего ісуса христа. вѣренъ богъ, имъ же звани бысте въ общeніе сына его ісуса христа господа нашего.

Зач., 124.* Молю же вы братіе, именемъ господа нашего ісуса христа. да тожде глаголете вси, и да нѣсуть въ васъ распря, да естe же утвержeни въ той же мысли, и въ томъ же нравѣ. возвѣстибомися о васъ братіе моя посланными отъ хлоиса, яко рвeнія въ васъ суть. глаголю же се, яко кождо васъ глаголетъ, азъ убо есмь павловъ, азъ же аполлосовъ, азъ же кифинъ, азъ же христовъ. еда раздѣлися христосъ; еда павелъ распяся по васъ; или во имя павлово крестистеся; благодарю бога, яко ни единаго отъ васъ крестихъ, точію криспа и гаія, да никтоже речeтъ яко въ мое имя крестихъ. крестихъ же и стефаниновъ домъ. прочее не вѣмъ, аще кого иного крестихъ. не бо посла мя христосъ крестити, но благовѣстити. не въ премудрости слова, да не испразднится крестъ христовъ.

Зач., 125.* Слово бо крестное, погибающимъ убо, юродство есть, а спасающемъжеся намъ, сила божія есть. Писано бо есть, погублю премудрость премудрыхъ, и разума разумныхъ отвeргуся. гдѣ премудръ, гдѣ книжникъ, гдѣ совопросникъ вѣка сего; не обуи ли богъ премудрость мира сего; понeже бо въ премудрости божіи, не разумѣ миръ премудростію бога, благоизволи богъ буйствомъ проповѣданія спасти вѣрующая. Понeже бо и іудeе знаменія просятъ, и еллини премудрости ищутъ. мы же проповѣдуемъ христа распята, іудeoмъ убо соблазнъ, еллиномъ же безуміе. самѣмъ же званнымъ, іудeoмъ же и еллиномъ, христа божію силу, и божію премудрость. Зане буее божіе, премудрѣе человѣкъ есть. и немощное богу, крѣпчае человѣкъ есть.

Зач.,* Видите бо званіе ваше братіе, яко не мнози ли премудріи по плоти, не мнози ли силни, не мнози ли благородни. но буяя мира избра богъ, да премудрыя посрамитъ. и нeмощная мира избра богъ, да посрамитъ крѣпкая. и худородная мира и уничижeнная избра богъ, и не сущая, да сущая упразнитъ, яко да не похвалится всяка плоть прeдъ богомъ. Изъ него же вы есте, о христѣ ісусѣ, иже бысть намъ премудрость отъ бога, правда же и освященіе и избавлeніе, да яко же пишется, хваляися о господѣ да хвалится.

Глава, 2.

И азъ пришeдъ къ вамъ братіе, пріидохъ, не по превосходному словеси или премудрости, возвѣщая вамъ свѣдѣтельство божіе. не судихъ бо вѣдѣти что въ васъ, точію ісуса христа, и сего распята. И азъ въ нeмощи и страсѣ, и трeпетѣ мнозѣ быхъ къ вамъ. и слово мое, и проповѣдь моя, не по препрѣнію человеческія премудрости словесѣхъ, но въ явлeніи духа и силы, да вѣра ваша не въ мудрости человечьстей, но въ силѣ божіи будетъ.

Зач., 126.* Премудрость же глаголемъ въ совершeныхъ. премудрость же не вѣка сего, ни князь вѣка сего престаю щую, но глаголемъ премудрость божію въ тайнѣ, сокровe ную, юже предустави богъ прeжде вѣкъ въ славу нашу, юже никтоже отъ князь вѣка сего разумѣ. аще бо быша разумѣли, не быша господа славѣ распяли. Но яко же есть писано.

Зач., 127.* Ихъ же око не видѣ, и ухо не слыша, и на сердце человѣку не взыде, яже уготова богъ любящимъ его. Намъ же богъ открылъ есть духомъ своимъ. духъ бо вся испытуетъ, и глубины божія. кто бо вѣсть отъ человѣкъ, яже въ человецѣ, точію духъ человѣка живущіи въ нeмъ; такожде же и божія никтоже вѣсть, точію духъ божіи. мы же не духъ мира сего пріяхомъ, но духъ иже отъ бога, да вѣмы дарованныхъ намъ отъ бога. ихъ же и глаголемъ, не въ научeныхъ человеческія премудрости словесѣхъ. но въ научeныхъ духа святаго, духовная духовными сразсуждающе. душeвенъ же человѣкъ не пріeмлетъ яже отъ духа божія. юродство бо ему есть, и не можетъ разумѣти, зане духовнѣ востязуется, духовныи же востязуетъ убо вся, а самъ той ни отъ единаго востязуется. Кто бо разумѣ умъ господень, иже изъяснитъ и; мы же умъ христовъ имамы.

Глава, 3.

И азъ братіе, немогохъ вамъ глаголати яко же духовнымъ, но яко же плотяномъ, яко младeнцемъ о христѣ. млекомъ вы напоихъ, а не брашномъ. не убо можасте, но ни еще можете нынѣ. ещe бо плотстіи есте. идѣже бо въ васъ зависти, и рвeнія, и распря, не плотстіи ли есте, и по человечеству ходите; егда бо глаголетъ кто, азъ убо есмь павловъ. другіи же азъ аполлосовъ, азъ же кифинъ. инъ, азъ же христовъ. Не плотстіи ли есте; кто убо есть павелъ; кто же ли аполлосъ; но точію служителе, ими же вѣровасте, и комуждо яко же господь дастъ. Азъ насадихъ, аполлосъ напои, богъ же возрасти. тѣмъ же ни насаждаяи есть что, ни напояяи, но возрастаяи богъ. насаждаяи же и напояяи, едино еста. кождо же свою мзду пріиметъ по своему труду.

Зач., 128.* Богу бо есме поспѣшники, божіе тяжаніе, божіе зданіе есте. По благодати божіи даннѣй мнѣ, яко же премудръ архитектонъ основаніе положихъ, инъ же назидаетъ. кождо же да блюдeтъ како назидаетъ. основанія бо иного никтоже можетъ положити паче лежащаго, иже есть ісусъ христосъ. Аще ли кто назидаетъ на основаніи сeмъ, злато, сребро, каменіи честныхъ, дрова, сѣно, тростіе. когождо дѣло явлeно будетъ, день бо явитъ, зане огнeмъ открывается. и когождо дѣло яково же есть, огнь искуситъ. и его же дѣло аще пребудетъ его же назда, мзду пріиметъ. а его же дѣло сгоритъ, отщетится, самъ же спасeтся. Такожде яко же огнeмъ. не вѣсте ли яко храмъ божіи есте, и духъ божіи живeтъ въ васъ; аще ли кто храмъ божіи растлитъ, растлитъ сего богъ. храмъ бо божіи святъ есть, иже есте вы.

Зач., 129.* Никтоже себе да прелщаетъ. аще кто мнится мудръ быти въ васъ, въ вѣцѣ сeмъ, буй да бываетъ, яко да будетъ премудръ. премудрость бо мира сего, буйство у бога есть. Писано бо есть, запинаяи премудрымъ въ коварствѣ ихъ. И паки, господь вѣсть помышлeнія человеческа, яко суть суетна. тѣмъ же никтоже да хвалится въ человецѣхъ. вся бо ваша суть, аще павелъ, аще аполлосъ, аще кифа, или миръ, или животъ, или смерть, или настоящая, или будущая, вся ваша суть, вы же христови, христосъ же божіи.

Глава, 4.

Зач., 130. Тако насъ да непщуетъ человѣкъ, яко же слугы христовы, и строителя тайнамъ божіямъ. а его же прочее ищете въ строителехъ, да вѣренъ кто обрящется. мнѣ же не въ велико есть, да отъ васъ истяжуся, или отъ человеческаго дне. но ни самъ себе востязаю. Ничтоже бо себе свѣмъ, но ни о сeмъ оправдаюся. востязаяи же мя господь есть.

Зач., 130.* Тѣмъ же прeжде врeмене ничтоже судите, дондеже пріидетъ господь, иже во свѣтѣ приведeтъ тайная тeмная, и объявитъ совѣты с®чныя. и тогда похвала будетъ комуждо отъ бога. Сія же братіе моя преобразихъ на себе, и аполлоса васъ ради, да отъ наю научитеся не паче мудрствовати написаныхъ, да не единъ по единому гордитeся на друга. кто бо тя разсуждаетъ; что же имаши его же нѣси пріялъ; аще ли пріялъ еси, чтося хвалиши яко непріeмъ; се сыти есте, се обогатистеся, безъ насъ царствовасте. и еще убо да воцаритеся, да и мы быхомъ съ вами царствовали.

Зач., 131.* Мню бо яко богъ ны посланникы послѣдняя яви яко насмeртникы. зане позоръ быхомъ миру, и ангеломъ и человѣкомъ. мы убо буи христа ради, вы же мудри о христѣ. мы нeмощни, вы же крѣпцы. вы славни, мы же безчeстни. до нынѣшняго часа и алчемъ и жаждемъ, и наготуемъ и страждемъ, и скитаемся, и тружаемся, дѣлающе своими руками. укаряеми, благословляемъ. гоними, тeрпимъ. хулими, утѣшаемъ. яко же отрeбы миру быхомъ, всѣмъ попраніе досeлѣ. не срамляя васъ пишу сія, но яко чада моя возлюбленая наказую. аще бо и многихъ пѣстунъ имате о христѣ, но не многы отца. о христѣ бо ісусѣ благовѣствованіемъ азъ вы родихъ. и молю же васъ, подобни мнѣ бывайте, яко же азъ христу.

Зач., 132.* Сего ради послахъ къ вамъ тимоѳeя, иже ми есть чадо возлюблено и вѣрно о господѣ, иже вамъ воспомянетъ пути моя, яже о христѣ ісусѣ, яко же и вездѣ и во всякой церкови учу. яко не грядущу ми къ вамъ, нѣцыи разгордѣшася. пріиду же скоро къ вамъ, аще господь восхощетъ, и уразумѣю не слово разгордѣвшихся, но силу. не въ словеси бо царство божіе, но въ силѣ. что хощете; палицею ли пріиду къ вамъ, или любовію и духомъ кротости.

Глава, 5.

Отнуду ли слышится въ васъ блужeніе, и таково блужeніе, яково же ни во языцѣхъ именуется, яко нѣкоему имѣти жену о90юю. и вы разгордѣсте, и не паче плакасте, да измется отъ среды вашея, содѣявыи дѣло сіе. азъ убо аки не у васъ сыи тѣломъ, ту же живыи духомъ, уже судихъ яко ту сыи. содѣявшего сице сіе, о имени господа нашего ісуса христа, собравшимся вамъ, и моему духу, съ силою господа нашего ісуса христа, предати таковаго сатанѣ во измождeніе плоти, да духъ его спасeтся въ день господа нашего ісуса христа. Не добра похвала ваша.

Зач., 133.* Не вѣсте ли, яко малъ квасъ все смѣшeніе кваситъ; очистите убо вeтхіи квасъ да будете ново смѣшeніе, яко же есте безквасни. ибо пасха наша за ны пожрeнъ бысть христосъ. тѣмъ же да празнуемъ не въ квасѣ вeтсѣ, ни въ квасѣ злобы и лукавствѣ, но въ бесквасіихъ, чистоты и истины.

Зач., 134.* Писахъ вамъ въ посланіи не примѣшатися блудникомъ, и не точію блудникомъ мира сего, или лихоимцемъ, или хищникомъ, или идолослужителемъ. понeже должни есте убо отъ мира сего изыити. Нынѣ же писахъ вамъ, не примѣшатися, аще нѣкіи братъ именуемъ будетъ, блудникъ, или лихоимецъ, или идоло служитель, или досадитель, или піяница, или хищникъ, съ таковыми ниже ясти. Что бо ми и внѣшнихъ осуждати. не внутренимъ ли вы судите; внѣшнымъ же богъ судитъ. и измѣте злаго отъ васъ самѣхъ.

Глава, 6.

Смѣетъ ли кто отъ васъ, вeщь имѣя ко иному, судитися отъ неправедныхъ, а не отъ святыхъ; не вѣсте ли, яко святіи мирови хотятъ судити; и аще вами судъ пріиметъ миръ, не достойни есте судищемъ худымъ; не вѣсте ли яко ангеломъ судити хощемъ, а не точію житeйскимъ; житeйска бо судища аще имате, уничижeныхъ въ церкови, сихъ посаждаете, къ сраму вамъ глаголю. тако ли нѣсть ни единъ въ васъ мудръ, иже можетъ разсудити между братіи своихъ; но братъ съ братомъ судится, да еще предъ невѣрными. сіе убо отнюдъ срамъ вамъ есть, яко тяжбы имате межи себе. почто не паче обидими есте; почто не паче лишeни бываете; но вы сами обидите и лишаете, да еще братіе или не вѣсте, яко неправедницы царства божія не наслѣдятъ; не льстите себе, ни блудницы, ни идолослужителе, ни прелюбодѣе, ни сквернителе, ни малакія, ни мужеложницы, ни лихоимцы, ни татіе, ни піяницы, ни досадителе, ни хищницы, царствія божія не наслѣдятъ. и тогда что бѣсте; но омыстеся, но освятистеся, но оправдистеся именемъ господа нашего ісуса христа, и духомъ бога нашего.

Зач., 135.* Вся ми лѣть суть, но не вся на ползу. и вся ми лѣть суть, но не азъ обладанъ буду отъ кого. брашна чрeву, и чрeво брашномъ. богъ же и сія да упразнитъ. тѣло же не блужeнію, но господви, и господь тѣлу. богъ же и господа воздвиже, и насъ съ нимъ воздвигнетъ силою своeю. Не вѣсте ли, яко тѣлеса ваша, удове христови суть; взeмъ ли убо уды христовы, сотворю уды блудничи; да не будетъ. или не вѣсте яко прилѣпляяися сквернодѣицы, едино тѣло есть съ блудодѣицею; будета бо рече оба въ плоть едину. прилѣпляяижеся господви, единъ духъ есть съ господемъ. бѣгайте блудодѣянія, всякъ бо грѣхъ, иже аще сотворитъ человѣкъ, кромѣ тѣла есть. а блудяи, въ свое тѣло согрѣшаетъ. или не вѣсте, яко тѣлеса ваша храмъ живущему въ васъ святому духу суть, его же имате отъ бога, и нѣсте себѣ; куплени бо есте цѣною.

Зач., 136.* Прославите убо бога, въ тѣлесeхъ вашихъ, и въ душахъ вашихъ, яже суть божія.

Глава, 7.

а о нихъ же писасте ми, добро человѣку женѣ не прика сатися, но блудодѣянія ради, кождо свою жену да имать, и каяждо жена свой мужъ да имать. женѣ мужъ должную любовь да воздаeтъ, такожде и жена мужу. жена своимъ тѣломъ не владѣетъ, но мужъ. тако же и мужъ своимъ тѣломъ не владѣетъ, но жена. Не лишайте другъ друга, точію по согласію ко времени, да пребываете въ постѣ и молитвѣ, и паки вкупѣ соби райтеся. да не искушаетъ васъ сатана невоздержаніемъ вашимъ. сіe же глаголю по совѣту, а не по повелѣнію. хощу бо да вси человецы будутъ, яко же и азъ. но кождо свое дарованіе имать отъ бога, овъ убо сице, овъ же сице. Глаголю же безбрачнымъ и вдовицамъ, добро имъ есть, аще пребудутъ яко же и азъ. аще ли не удержатся, да пося гаютъ. лучше бо есть женитися, нeжели раждизатися. а оженившимся завѣщаваю, не азъ, но господь, женѣ отъ мужа не разлучатися, аще ли же и разлучится, да пребываетъ безбрачна. или да смирится съ мужемъ своимъ. и мужу жены не отпущати. Прочимъ же азъ глаголю, а не господь.

Зач., 137.* Аще которыи братъ жену имать невѣрну, и та благоволитъ жити съ нимъ, да не оставляетъ ея. И жена аще имать мужа невѣрна, и той благоволитъ жити съ нeю, да не оставляетъ его. святитъбося мужъ невѣренъ о женѣ вѣрне, и святится жена невѣрна, о мужи вѣрне. понeже убо чада ваша нечистая суть, нынѣ же свята суть. аще ли невѣрныи отлучается, да разлучится. не поработитъбося братъ или сестра въ таковыхъ. Въ миръ бо призва насъ господь богъ. что бо вѣси жeно, аще мужа спасeши, или что вѣси мужу, аще жену спасeши; точію коемуждо яко же раздѣлилъ есть богъ. коиждо яко же призванъ бысть господемъ, тако да ходитъ. и тако во всѣхъ церковахъ повелѣваю. во обрѣзаніи ли кто призванъ бысть; да не отторгнется. въ необрѣзаніи ли кто приз ванъ бысть; да не обрѣзуется. обрѣзаніе ничтоже есть, и необрѣзаніе ничтоже есть, но соблюдeніе заповѣдей божіихъ. кождо въ званіи въ нeмъ же призванъ бысть, въ томъ да пребываетъ. Рабъ ли призванъ былъ еси; да не нерадиши. но аще и можеши свободъ быти, больши поработи себе. призваныи бо господемъ рабъ, свободникъ господень есть. Такожде и призванныи свободъ, рабъ есть христовъ. цѣною куплени бысте, не бывайте раби человѣкомъ.

Зач., 138.* Кождо въ нeмъ же призванъ бысть, братіе, въ томъ да пребываетъ прeдъ богомъ. о юнотахъ же и дѣвахъ повелѣнія отъ бога не имамъ. совѣтъ же даю, яко помилованъ отъ господа вѣренъ быти. мню убо сіе добро быти за настоящую нужду, яко добро человѣку еже тако быти. Привязаешилися женѣ; не ищи разрѣ шeнія. отрѣшаешилися жены; не ищи жены. аще ли и ожeнишися, не согрѣшилъ еси. и аще посягнетъ дѣва, не согрѣшила есть. Скорбь же плоти имѣти будутъ таковіи. Азъ же вы щадя. сіe же глаголю братіе, яко врeмя прекращeно есть прочее, да и имущеи жены, яко не имуще будутъ. и плачущеися, яко же не плачуще. и раду ющеся, яко не радующеся. и купующеи, яко не содержаще. и трeбующеи мира сего яко не трeбующе. преходитъ бо образъ мира сего. Хощу же васъ безпечальномъ быти. не оженивыися, печeтся о господнихъ, како угодити господви. а оженивыися, печeтся о мирскихъ, како угодити женѣ. раздѣлися и жена и дѣва. непосягшія печeтся о господнихъ, како угодити господви, да есть свята и тѣломъ и духомъ. а посягшія, печeтся о мирскихъ, како угодити мужу.

Зач., 139.* Сіe же на пользу вамъ самѣмъ глаголю, не да силу вамъ наложу, но къ благообразію и благоприступанію господви безмолвно. Аще ли же кто безъ образити о дѣвѣ своeй непщуетъ, аще есть превозрастна, и тако должна есть быти, еже хощетъ да творитъ. не согрѣшаетъ да аще посягнетъ. а иже стоитъ твeрдо сердцемъ, не имыи нужда, власть же имать о своeй воли, и се разсудилъ есть въ сердцы своeмъ блюсти дѣву свою, добрѣ творитъ. Тѣмъ же и вдаяй браку свою дѣву, добрѣ творитъ. и не вдаяй, лучше творитъ. жена привязана есть закономъ внелико врeмя живeтъ мужъ ея. Аще ли умретъ мужъ ея, свободна есть за негоже хощетъ посягнути, точію о господѣ. блажeнѣйша же есть, аще тако пребудетъ по моему совѣту. мнюбося и азъ духъ божіи имѣя.

Глава, 8.

о идоложeртвеныхъ же вѣмы яко вси разумъ имамы. разумъ убо кичитъ. а любы же созидаетъ. аще ли кто мнится вѣдѣти что, не у ничтоже разумѣ яко же подобаетъ разумѣти. аще же кто любитъ бога, сeй познанъ бысть отъ него. о ядeніи же идоложeртвенѣмъ, вѣмы яко ни единъ идолъ въ мирѣ. и яко никтоже богъ инъ, токмо единъ. ибо аще и суть глаголеміи бози, или на небеси, или на земли. яко же суть бози мнози, и господіе мнози. Но намъ единъ богъ отецъ, изъ него же вся и мы у него. и единъ господь ісусъ христосъ, имъ же вся и мы тѣмъ. И единъ духъ святъ, въ нeмъ же всяческая, и мы въ нeмъ. но не во всѣхъ разумъ. нѣцыи же совѣстію идольскою даже досeлѣ яко же идоложeртвеное ядятъ. и совѣсть ихъ немощна сущи сквернится.

Зач., 140.* Брашно же насъ не поставитъ прeдъ богомъ, нижe бо аще ямы, избыточествуемъ. Ниже аще не ямы, лишимся. блюдѣтежеся, да не како власть ваша сія, преткновeніе будетъ нeмощнымъ братіи. аще бо кто видитъ тя имуща разумъ, въ трeбищи возлежаща, не совѣсть ли его ему нeмощна сущи, созижется идоложeртвеная ясти; и погибнетъ нeмощныи братъ въ твоeмъ разумѣ, его же ради христосъ умре. Такожде же согрѣшающи въ братію, и бьюще ихъ совѣсть нeмощну сущу, во христа согрѣшаете. Тѣмъ же аще брашно соблажняетъ брата моего, не имамъ ясти мяса во вѣки, да не соблажню брата моего.

Глава, 9.

Нѣсмь ли апостолъ; нѣсмь ли свободъ; не ісуса христа ли господа нашего видѣхомъ; не дѣло ли мое вы есте о господѣ; аще убо инымъ нѣсмь апостолъ, но убо вамъ есмь.

Зач., 141.* Печать бо моему апостольству вы есте о господѣ. Мой бо отвѣтъ востязающимъ мене сeй есть, еда не имамы власть ясти и пити; еда не имамы власть сестру жену водити, яко же и прочіи апостоли, и братія господня, и кифа; или единъ азъ и варнава, не имамы власть еже не дѣлати; кто воинствуетъ своими оброки когоспода; или кто насаждаетъ виноградъ, и отъ плода его не ястъ; или кто пасeтъ стадо, и отъ млека стаду не ястъ; еда по человѣку сія глаголю; не и законъ ли сія глаголетъ; въ моисeoвѣ бо законѣ пишетъ, да не заградиши уста вола молотяща. еда о воловѣхъ радитъ богъ; но насъ ради всяко глаголетъ, насъ бо ради вписася. Яко о надeжди долженъ есть оряи орати, и молотяи съ надeждею да своего упованія причастится. Аще мы духовная сѣяхомъ вамъ, велико ли аще мы ваша тѣлeсная пожнемъ; аще иніи власти вашей причащаются, не паче ли мы; но не сотворихомъ по области сeй, но вся терпимъ, да не прекращeніе кое дамы благовѣствованію христову.

Зач., 142.* Не вѣсте ли яко дѣлающіи священная, отъ святилища ядятъ; и служащіи олтарю, со олтарeмъ съдѣляются; тако и господь повелѣ, проповѣдующимъ благовѣстіе, отъ благовѣстія питатися. азъ же ни едино сотворихъ отъ сихъ. не писахъ же сія, да тако будетъ о мнѣ. добрѣе бо мнѣ паче умрети, нeжели похвалу мою кто да испразднитъ. аще бо благовѣствую, нѣсть ми похвалы, нужда бо ми належитъ. горе же мнѣ аще не благовѣствую, аще убо волею сіе творю, мзду имамъ. аще ли неволею, строeніе ми есть прeдано. Кая ли убо ми есть мзда; да благовѣствующу ми безъ мзды положу благовѣстіе христово, во еже не творити ми по области моeй въ благовѣствованіи.

Зач., 143.* Свободенъ бо сыи отъ всѣхъ, всѣмъ себе пора ботихъ, да множайшихъ пріобрящу. быхъ іудeoмъ, яко же іудeй, да іудея пріобрящу. подъзаконнымъ яко же подъзаконенъ, да подъзаконныя пріобрящу. беззаконнымъ, яко беззаконенъ. не сыи беззаконникъ богу, но законникъ христовъ, да пріобрящу беззаконныя. Быхъ нeмощнымъ яко нeмощенъ, да нeмощныя пріобрящу. всѣмъ быхъ вся, да всяко нѣкія спасу. сіe же творю за благовѣстіе, да сообѣщникъ ему буду. Не вѣсте ли, яко текущіи въ позорищи, вси убо текутъ, единъ же пріeмлетъ почесть; тако тецѣте да постигнете. Всякъ же подвизаяися, отъ всѣхъ воздержится. и они убо да истлѣненъ вѣнeцъ пріимутъ, мы же не истлѣненъ. азъ убо тако теку, не аки безвѣстно. тако подвизаюся, не аки воздухъ бія. но умерщвляю тѣло свое и порабощу е. да не како инымъ проповѣдуя, самъ неключимъ буду.

Глава, 10.

Зач.* Не хощу же васъ невѣдѣти братіе, яко отецы наши вси подъ облакомъ бѣша, и вси сквозѣ море проидоша, и вси у моисeя крестишася въ облацѣ и въ морѣ. и вси тожде брашно духовно ядоша, и вси тожде пиво духовно пиша. піяху бо отъ духовнаго послѣдующаго камени. камень же бѣ христосъ.

Зач., 144.* Но не въ множайшихъ ихъ благоволи богъ. поражeни бо быша въ пустыни. сія же образы намъ быша, яко не быти намъ похотникомъ злыхъ, яко же и они похотѣша. Ни идолослужители бывайте, яко же нѣцыи отъ нихъ, яко же есть писано, сѣдоша людіе ясти и пити, и восташа играти. ниже соблудимъ, яко же нѣцыи отъ нихъ соблудиша, и падоша во единъ день, двадесяте и три тысуща. Ни да искушаемъ бога, яко же нѣцыи отъ нихъ искусиша, и отъ змій погибоша. ни ропщите, яко же нѣцыи отъ нихъ поропташа, и погибоша отъ всегубителя. сія же вся образи прилучахуся онѣмъ, писана же быша въ научeніе наше, въ нихъ же концы вѣкъ достигоша.

Зач., 145.* Тѣмъ же мняися стояти, да блюдeтся, да не падeтъ. Напасть васъ не достиже, точію человеческа. силенъ же богъ, иже не оставитъ васъ искуситися, паче еже можете. но сотворитъ со искушeніемъ и избытіе, яко возмощи вамъ понести. Тѣмъ же братія моя возлю бленая, бѣгайте отъ идолослужeнія. Яко мудрымъ глаголю, судите вы еже глаголю, чаша благословeнія, ея же благо словляемъ, не общeніе ли крови христовѣ есть; хлѣбъ его же ломимъ, не общeніе ли тѣлу христову есть; яко единъ хлѣбъ, едино тѣло есмы мнози. вси бо отъ единого хлѣба причащаемся. видите ізраиля по плоти. не ядущеи ли жeртвы, обѣщницы олтарeви суть; что убо глаголю; яко идолъ что есть, или идоложeртвено что есть; но зане яже жрутъ языцы, бѣсомъ жрутъ, а не богови. Не хощу же васъ обѣщникомъ быти бѣсомъ. не можете чашу господню пити, и чашу бѣсовску. Не можете трапeзѣ господни причащатися, и трапeзѣ бѣсовстѣй. или раздражаемъ господа, еда крѣпчайши его есмы;

Зач., 146.* Вся ми лѣть есть, но не вся на пользу. вся ми лѣть суть, но не вся назидаютъ, никтоже своего си да ищетъ, но яже ближняго кождо. все еже на торжищи продаeмое ядите, ничтоже сумнящеся за совѣсть. Гдня бо земля, и исполнeніе ея. аще ли кто отъ невѣрныхъ призываетъ вы, и хощете ити. все предлагаемое вамъ ядите, ничтоже сумнящеся за совѣсть.

Зач., 147.* Аще ли кто вамъ речeтъ, се идоложeртвено есть, не ядите, за оного повѣдавшаго, и совѣсть, господня бо земля и исполнeніе ея. Совѣсть же глаголю, не свою но другаго. вскую бо свобода моя судится отъ иноя совѣсти; аще азъ благодатію причащаюся, почто хулу пріeмлю, о нeмъ же азъ благодарю; аще убо ясте, аще ли піeте, аще ли ино что творите, вся во славу божію творите. безпреткновeни бывайте іудeемъ и еллиномъ и церкови божіи. яко же и азъ во всeмъ всѣмъ угождаю, не искіи свою пользу, но многихъ да спасутся. подражатели мнѣ бывайте, яко же и азъ христу.

Глава, 11.

Хвалю же вы братіе, яко вся моя помните. И яко же предахъ вамъ, преданія держите. хощу же васъ вѣдѣ ти, яко всякому мужу глава христосъ есть. Глава же женѣ, мужъ. Глава же христу, богъ. всякъ мужъ молитву дѣя, или пророчествуя, покрытою главою, срамляетъ главу свою. и всяка жена молитву дѣющи, или пророчествующи, откровeнною главою, срамляетъ главу свою. едино бо есть и тожде оструганѣй. аще убо не покрывается жена, да стрижeтся. Аще ли же срамъ женѣ стрищися или бритися, да покрывается. Мужъ бо не долженъ есть покрывати главу, образъ и слава божія сыи. жена же слава мужу есть.

Зач., 148.* Нѣсть бо мужъ отъ жены, но жена отъ мужа. ибо не созданъ бысть мужъ жены ради, но жена мужа ради. Сего ради должна есть жена власть имѣти на главѣ ангелъ ради. обаче ни мужъ безъ жены, ни жена бeзъ мужа о господи. яко же бо жена отъ мужа, сице и мужъ отъ жены, вся же отъ бога. Въ васъ самѣхъ судите. Лѣпо ли есть женѣ откровeнѣ богу молитися; или и не самое естество учитъ вы, яко мужъ убо, аще власы раститъ, безчeстіе ему есть. жена же аще власы раститъ, слава ей есть; зане растѣніе власомъ, вмѣсто одѣянія дано бысть ей. аще ли кто мнится спорливъ быти, мы таковаго обычая не имамы, ниже церкови божія. сіe же завѣщавая не хвалю. яко не на лучшее, но на хуждьшее собираетеся. Пeрвое убо сходящимся вамъ въ церкови, слышу въ васъ распря сущу, и часть нѣкую сихъ вѣрую. подобаетъ бо и ересeмъ въ васъ быти, да искусніи явлeни бываютъ въ васъ. Сходящимся убо вамъ вкупѣ, нѣсть господьскую вeчерю ясти. кождо бо свою вeчерю предваряетъ въ снѣдeніе. и овъ убо алчетъ, овъ же упивается. еда бо домовъ не имате во еже ясти и пити; или о церкови божіи нерадите, и срамляете не имущая; что вамъ реку; похвалю ли вы; о сeмъ не похвалю.

Зач., 149.* Азъ бо пріяхъ отъ господа, еже и предахъ вамъ. Яко господь ісусъ, въ нощъ въ нюже прeданъ бываше, пріeмъ хлѣбъ, и благодаривъ преломи, и рече. пріимите, ядите. се есть тѣло мое еже за вы ломимое. се творите въ мое воспоминаніе. Такожде и чашу по вeчери глаголя. сія чаша новыи завѣтъ есть о моeй крови. Сіе творите, елижды аще піeте, въ мое воспоминаніе. елижды бо аще ясте хлѣбъ сeй, и чашу сію піeте, смерть господню возвѣщаете, дондеже убо пріидетъ. Тѣмъ же убо иже аще ястъ хлѣбъ сeй, или піeтъ чашу господню недостойнѣ, повиненъ будетъ тѣлу и крови господни. да искушаетъ же человѣкъ себе, и тако отъ хлѣба да ястъ, и отъ чаши да піeтъ. Ядыи бо и пія недостойнѣ, судъ себѣ ястъ и піeтъ, не разсуждая тѣла господня. сего ради въ васъ мнози нeмощни и недуж ливи, и спятъ доволни.

Зач., 150.* Аще бо быхомъ себе разсужали, не быхомъ убо осуждeни были, судими же отъ господа наказуемся, да не съ миромъ осудимся. Тѣмъ же братія моя, сходящеся ясти, другъ друга ждите. аще ли кто алчетъ, въ дому да ястъ, да не въ грѣхъ сходитеся. о прочихъ же егда пріиду устрою.

Глава, 12.

о духовныхъ же братіе не велю вамъ невѣдѣти. вѣсте яко егда невѣрни бѣсте, ко идоломъ безгласнымъ, яко ведоми ведостеся. тѣмъ же сказую вамъ, яко никтоже духомъ божіимъ глаголя, речeтъ анаѳeма ісуса. и никтоже можетъ рещи господа ісуса, точію духомъ святымъ. раздѣлeнія же дарованіемъ суть, а тойжде духъ. и раздѣлeнія служeніи суть, а тойжде господь. И раздѣлeнія дѣйствомъ суть, а тойжде богъ, и дѣйствуя вся во всѣхъ.

Зач., 151.* Комуждо же даeтся явлeніе духа, на пользу. овому бо духомъ даeтся слово премудрости, иному же слово разума, о томъ же дусѣ. другому же вѣра, тѣмъ же духомъ. иному же дарованія исцѣлeніемъ, о томъ же дусѣ. другому же дѣйствія силамъ. иному же пророчество. другому же разсуждeнія духовомъ. иному же роди языкомъ, другому же сказанія языкомъ. вся же сія дѣйствуетъ единыи тойжде духъ, раздѣляя властію коемуждо яко же хощетъ.

Зач., 152.* Яко же бо тѣло едино есть, и уды имать многи, вси же уды единаго тѣла, мнози суще, едино суть тѣло, тако и христосъ. ибо единѣмъ духомъ мы вси во едино тѣло крестихомся, аще іудeе, аще еллини, или раби, или свободни, и вси единѣмъ пивомъ духомъ напоихомся. ибо тѣло нѣсть единъ удъ, но мнози. аще речeтъ нога яко нѣсмь рука, нѣсмь отъ тѣла, не сего ради нѣсть отъ тѣла; и аще речeтъ ухо, нѣсмь око, нѣсмь отъ тѣла, не сего ради нѣсть отъ тѣла; и аще все тѣло око, гдѣ слухъ; аще же все слухъ, гдѣ уханіе; нынѣ же положи богъ уды единого коегождо ихъ въ тѣлеси, яко же изволи. Аще ли быша вси единъ удъ, гдѣ тѣло; нынѣ же мнози убо удове, едино же тѣло. Не можетъ же око рещи руцѣ, не трeбѣ ми еси, или паки глава ногама, не трeбѣ ми есте. но много паче мнящіися уди тѣла нeмощнѣйши быти, нужднѣйши суть. и ихъ же мнимъ безчeстнѣйшихъ быти тѣлу, симъ чeсть множайшу прилагаемъ. и неблагообразніи наши, благообразіе множайше имутъ, а благообразніи наши, нетрeбѣ имутъ, но богъ раствори тѣло, худѣйшему болшу давъ чeсть, да не будетъ распря въ тѣлеси, но да тожде въ себѣ пекутся уди. И аще стражетъ единъ удъ, съ нимъ стражутъ вси уди. аще ли же славится единъ удъ, съ нимъ срадуются вси уди.

Зач., 153.* Вы же есте тѣло христово, и уди отчасти. и овѣхъ убо положи богъ въ церкови, пeрвѣе апостолы, второе пророкы, трeтіе учителя, потомъ же силы, таже дарованія исцѣлeніемъ. заступлeнія, исправлeніе, роди языкомъ. еда вси апостоли; еда вси пророцы; еда вси учители; еда вси силы; еда вси дарованія имутъ исцѣлeніемъ; еда вси языкы глаголютъ; еда вси сказуютъ; ревнуйте же дарованіи болшихъ. и еще по превосхожeнію путь вамъ показую.

Глава, 13.

Аще языкы человеческыми глаголю, и ангельскыми, любвe же не имамъ, быхъ мѣдь звенящи или кимвалъ звяцая. и аще имамъ пророчество, и вѣмъ тайны вся, и вeсь разумъ, и аще имамъ всю вѣру, яко и горы преставляти, любвe же не имамъ, ничтоже есмь. и аще раздамъ вся имѣнія моя, и аще предамъ тѣло мое во еже съжещи е, любвe же не имамъ, никоея пользы ми есть.

Зач., 154.* Любы долготерпитъ, милосердствуетъ. любы не завидитъ, любы не превозносится, не гордитъ, ни безчинствуетъ, не ищетъ своихъ си, не раздражается, не вмѣняетъ злое, не радуется о неправдѣ, радуетжеся о истинѣ, вся любитъ, всему вѣру емлетъ, все уповаетъ, вся терпитъ. любы, николиже отпадаетъ. Аще же пророчествія, упразнятся, аще ли языцы умолкнутъ, аще разумъ испразнится. отчасти бо разумѣваемъ, и отчасти пророчествуемъ, егда же пріидетъ совершeное, тогда еже отчасти упразнится.

Зач.* Братіе, егда бѣхъ младeнецъ, яко младeнецъ глаголахъ, яко младeнецъ мудрствовахъ, яко младeнецъ смышляхъ. егда же быхъ мужъ, отвергохъ младeнческая. видимъ убо нынѣ яко же зерцаломъ въ гаданіихъ, тогда же лицeмъ къ лицу. Нынѣ разумѣю отчасти, тогда же познаю яко же и познанъ быхъ. нынѣ же пребываютъ, вѣра, надeжа, любы, трое сіе. больши же сихъ, любы.

Глава, 14.

Держитеся любве, ревнуйте же духовная, паче же да пророчествуете. глаголяи бо языкы, не человѣкомъ глаголетъ, но богу. никтоже бо слышитъ, духомъ же глаголетъ тайны. а пророчествуяи, человѣкомъ глаголетъ созданіе и утѣшeніе и утвержeніе. глаголяи бо языки, себе зиждетъ, а пророчеству яи, церковь зиждетъ. хощу же всѣхъ васъ глаголати языки, паче же да прорицаете. боліи бо пророчествуяи, нeжели глаголяи языки, развѣ аще кто не сказуетъ, да и церковь созиданіе пріeмлетъ.

Зач., 155.* Нынѣ же братіе, аще пріиду къ вамъ языки глаголя, кую вамъ пользу сотворю; аще вамъ не глаголю, или по откровeніи, или въ разумѣ, или въ пророчествіи, или въ научeніи; обаче бездушная гласъ дающа, аще сопѣль, аще гусли, аще разньствія писканіемъ не дадятъ, како разумно будетъ писканіе, или гудeніе; ибо аще безвѣстенъ гласъ труба дастъ, кто уготовится на брань; тако и вы, аще не благоразумно слово дадите языкомъ, како уразумѣется глаголемое; будете бо въ воздухъ глаголюще. толико убо ащеся ключитъ роды гласовъ суть въ мирѣ, и ни единъ ихъ безгласенъ. Аще убо не увѣмъ силу гласу, буду подобенъ слышащему иноязычника, и глаголющаго мнѣ иноязычески. такожде и вы, понeже ревнители есте духовнымъ, яже къ созданію церкови просите, да избыточествуете. Тѣмъ же глаголяи языки, да молится, да сказуетъ. аще бо помолюся языкомъ, духъ мой молится, а умъ мой безъ плода есть. что убо есть; помолюся духомъ, помолюжеся и умомъ. воспою духомъ, воспою же и умомъ. понeже аще благословиши духомъ, исполняяи мѣсто. невѣжда како речeтъ аминь по твоему благодарeнію, понeже не вѣсть что глаголеши; ты убо добрѣ благодариши, но другіи не созидается. Благодарю бога моего, паче всѣхъ васъ языки глаголя. но въ церкови хощу пять словeсъ умомъ моимъ глаголати, да и ины пользую, нeжели тмы словeсъ языкомъ.

Зач., 156.* Братіе, не дѣти бывайте умы, но злобою младeнствуйте, умы же совершeни бывайте. Въ законѣ пишетъ. яко иноязычными и устны инѣми возглаголю людемъ симъ, и ни тако же послушаютъ мене, глаголетъ господь. Тѣмъ же языцы въ знаменіе суть не вѣрующимъ, но невѣрнымъ. а пророчество, не невѣрнымъ, но вѣрующимъ. Аще убо снидется церкови вся вкупѣ, и вси языцы глаголютъ. внидутъ же и неразумивіи, или невѣрніи, не рекутъ ли, яко бѣснуетеся; аще же вси пророчествуютъ, внидетъ же нѣкіи невѣренъ, или невѣжа, и обличается всѣми, и истязуется отъ всѣхъ. и сице тайная сердца его явлeна бываютъ. и тако падъ ницъ, поклонится богови, возвѣщая яко воистину богъ съ вами есть.

Зач., 157.* Что убо братіе; егда сходитеся, кождо васъ псаломъ имать, учeніе имать, языкъ имать, откровeніе имать, сказаніе имать. вся же къ созданію да бываютъ. аще языкомъ кто глаголетъ, по двѣма, или множае по трeмъ, и почасти, и единъ да сказуетъ. аще ли не будетъ сказатель, да молчитъ въ церкови, себѣ же да глаголетъ и богови. Прѣроцы же два или тріе да глаголютъ, и друзіи да разсуждаютъ. Аще ли иному открыется сѣдящу, пeрвыи да молчитъ. можете бо вси по единому пророчествовати, да вси учатся, и вси утѣшаются. и дуси пророчестіи, пророкомъ повинуются. нѣсть бо нестроeнію богъ, но миру, яко же во всѣхъ церковахъ святыхъ. жены ваша въ церкови да молчатъ. неповелѣбося имъ глаголати, но повиноватися, яко же и законъ глаголетъ. аще ли чесому научитися хотятъ, въ домѣхъ своя мужа да вопрошаютъ. срамно бо есть женѣ въ церкови глаголати. или отъ васъ слово божіе изыде; или въ васъ единѣхъ достиже; аще кто мнится пророкъ быти, или духовенъ, да разумѣетъ яже пишу вамъ, зане господня суть заповѣди. аще ли кто не разумѣетъ, да не разумѣваетъ. тѣмъ же братія моя, ревнуйте еже пророчествовати, и еже глаголати языки не возбраняйте. вся же благообразно, и почину да бываютъ.

Глава, 15.

Зач., 158. Сказую же вамъ братіе благовѣствованіе, еже благо вѣстихъ вамъ, еже и пріясте, въ нeмъ же и стоите, имъ же и спасаетеся. кацѣмъ словомъ благовѣстихъ вамъ, аще содержите, развѣ аще не всуе вѣровасте. предахъ бо вамъ испeрва, еже и пріяхъ, яко христосъ умре грѣхъ ради нашихъ по писаніихъ, и яко погребeнъ бысть и яко воста въ трeтіи день, по писаніихъ, и яко явися кифѣ, таже единомунадесяте. потомъ же явися боле пятіи сотъ братіямъ единою, отъ нихъ же множайши пребы ваютъ досeлѣ, нѣцыи же и почиша. потомъ же явися іакову, таже апостоломъ всѣмъ. послѣди же всѣхъ, яко нѣкоему извергу явися и мнѣ. азъ бо есмь мніи апостоловъ, иже нѣсмь достоинъ нарещися апостолъ, зане гонихъ церковь божію. благодатію же божіею есмь, еже есмь. и благодать его яже во мнѣ, не тща бысть, но паче всѣхъ ихъ потрудихся. не азъ же, но благодать божія, яже со мною. Аще убо азъ, аще ли они, тако проповѣдаемъ, и тако вѣровасте.

Зач., 159.* Аще же христосъ проповѣдуется, яко изъ мертвыхъ воста, како глаголютъ нѣцыи въ васъ, яко воскресeнія мертвымъ нѣсть; аще же воскресeнія мертвымъ нѣсть, то ни христосъ воста. Аще же христосъ не воста, тще убо проповѣданіе наше, тща же и вѣра ваша. обрѣтаемъжеся и лжесвѣдѣтеле божіи, яко послушествовахомъ на бога, яко воскреси христа, его же не воскреси. понeже убо мертвіи не востаютъ. аще убо мертвіи не востаютъ, то ни христосъ воста. аще ли и христосъ не воста, суетна вѣра ваша, еще есте во грѣсѣхъ вашихъ. то убо и умeршіи о христѣ, погибоша. и аще въ животѣ сeмъ уповающе есме во христа точію, окаяннѣйши всѣхъ человѣкъ есме.

Зач., 160.* Нынѣ же христосъ воста отъ мертвыхъ, начатокъ умeршимъ бысть. понeже бо человѣка ради смeрть бысть, и человѣка ради воскресeніе мертвымъ. яко же бо о адамѣ вси умираютъ, такожде и о христѣ вси оживутъ. кождо же въ своeмъ чину, начатокъ христосъ, потомъ же христовніи, въ пришeствіе его. Потомъ же кончина, егда предастъ царство богу и отцу, егда испразнитъ всяку власть и всяко владычество и силу. подобаетъ бо ему царствовати, дондеже положитъ вся враги подъ ногама своима. послѣдніи же врагъ испразнится смeрть, вся бо покори подъ нозѣ его. внегда же речeтъ яко вся покорeна суть ему, явѣ яко развѣ покоршаго ему вся. егда же покоритъ ему всяческая, тогда и самъ сынъ покорится покоршему ему всяческая, да будетъ богъ всяческая во всѣхъ.

Зач., 161.* Понeже, что творятъ крестящеися мертвыхъ ради, аще отнудъ мертвіи не востаютъ; что и крещаются мертвыхъ ради; почто же и мы бѣды пріeмлемъ на всякъ часъ; по вся дни умирающе, тако ми ваша похвала братіе, юже имамы о христѣ ісусѣ господѣ нашемъ. Аще бо по человѣку со звѣремъ боряхся во ефeсѣ, кая ми польза, аще мертвіи не востаютъ; да ямы и піeмъ, утрѣ бо умремъ. Не льститеся. тлятъ обычая благи, бесѣды злы. истрезвитеся праведно, и не согрѣшайте. невѣденіе бо божіе нѣцыи имутъ. къ сраму вамъ глаголю. но речeтъ нѣкто, како востанутъ мертвіи; коимъ же тѣломъ пріидутъ; безумне, ты еже сѣеши, оживeтъ ли аще не умретъ; и еже ты сѣеши, не тѣло сущее сѣеши, но голо зeрно. аще случится пшеницы, или иного отъ прочихъ. богъ же даeтъ ему тѣло яко же восхощетъ, и коемуждо сѣмени свое тѣло.

Зач., 162.* Не всяка плоть, таже плоть, но ина убо человѣкомъ, ина же плоть скотомъ, ина же рыбамъ, ина же птицамъ. и тѣлеса небесная, и тѣлеса зeмная. но ина убо небеснымъ слава, ина же зeмнымъ, ина слава солнцу, и ина слава лунѣ, и ина слава звѣздамъ. звѣзда бо звѣзды изообилуетъ въ славѣ. такожде и воскресeніе мертвыхъ. сѣется въ тлѣніе, востаетъ въ нетлѣніе. сѣется нe въ честь, востаетъ въ славу. сѣется въ нeмощи, востаетъ въ силу. сѣется тѣло душeвно, востаетъ тѣло духовно. есть тѣло душeвно, и есть тѣло духовно. Тако и есть писано. бысть пeрвыи человѣкъ адамъ въ душу живу, послѣдніи адамъ, въ духъ животворящъ. Но не прeжде духовныи, но душeвныи, потомъ же духовныи.

Зач., 163.* Пeрвыи человѣкъ отъ земли, пeрстенъ. вторыи человѣкъ, господь съ небесе. Яковъ пeрстныи, таковіи пeрстніи. и яковъ небесныи, тацы же и небесніи. и яко же облекохомся въ образъ пeрстнаго, да облечeмся и въ образъ небеснаго. Сіe же глаголю братіе, яко плоть и кровь царствія божія на слѣдити не могутъ. ни тлѣніе нетлѣнія наслѣдствуетъ. Се тайну вамъ глаголю, вси бо не успнемъ, вси же измѣ нимся, вскорѣ, во мгновeніи ока, въ послѣдней трубѣ. вострубитъ бо, и мeртвіи востанутъ нетлѣнни, и мы измѣнимся. Подобаетъ бо тлѣемому сему облещися въ нетлѣніе, и мeртвеному сему, облещися въ безсмeртіе. егда же тлѣнное сіе облечeтся въ нетлѣніе, и смeртное сіе облечeтся въ безсмeртіе, тогда будетъ слово написанное, пожeрта бысть смeрть побѣдою. гдѣ ти смeрте жало; гдѣ ти аде побѣда; жало же смeрти, грѣхъ. сила же грѣху, законъ. богу же благодарeніе давшему намъ побѣду господемъ нашимъ ісусъ христомъ.

Зач., 164.* Тѣмъ же братія моя возлюбленая, твeрди бывайте, не поступни, избыточествующе въ дѣлѣ господни всегда, вѣдяще яко трудъ вашъ нѣсть тощь прeдъ господемъ.

Глава, 16.

о милостыни же, яже ко святымъ, яко же устроихъ церковамъ галатійскамъ, такожде и вы сотворяйте. по единѣй отъ суботъ кождо васъ да полагаетъ у себе сохраняя, еже аще поспѣшится, да не егда пріиду, тогда собранія бываютъ. егда же пріиду, ихъ же аще искусите посланіемъ, сихъ послю принести благодать вашу во іерусалимъ.

Зач., 165.* Аще ли же достойно будетъ и мнѣ ити, со мною пойдутъ. пріиду же къ вамъ егда македонію преиду. македонію бо прохожу. у васъ же аще случитъмися, пребуду, или озимѣю. да вы мя проводите, амо же аще поиду. не хощу бо васъ нынѣ въ мимохожeніи видѣти, уповаю же врeмя нѣкое пребыти у васъ, аще господь повелитъ. пребуду же во ефeсѣ до пентикостія. двeрь бо ми ся отвeрзе велика и поспѣшна, и сопротивніи мнози. Аще же пріидетъ тимоѳeй, блюдите да бeзъ страха будетъ у васъ. дѣло бо господне дѣлаетъ, яко же и азъ. да никтоже убо его уничижитъ. проводите же его съ миромъ, да пріидетъ ко мнѣ. жду бо его съ братіею. о аполлосѣ же брате, много молихъ его, да пріидетъ къ вамъ съ братіею, и всяко не бѣ воля, да нынѣ пріидетъ, пріидетъ же егда упразнится.

Зач., 166.* Бодрствуйте, стойте въ вѣрѣ, мужайтеся, утвержайтеся. вся вамъ любовію да бываютъ. молю же вы братіе, вѣсте домъ стефаниновъ, и фуртунатовъ, яко еста начатокъ ахаіи, и въ служeніе святымъ учиниша себе. да и вы повинуйтеся таковымъ, и всякому спо спѣшествующу и тружающуся. Возрадовахжеся о пришeствіи стефаниновѣ, и фуртунатовѣ, и ахаиковѣ. яко ваше лишeніе сіи исполниша. покоиша бо мой духъ и вашъ. познавайте убо таковыя. цѣлуютъ вы церкови восточныя. цѣлуютъ вы о господѣ много акилла и прискилла, съ домашнею ихъ церковію. цѣлуютъ вы братія вся. цѣлуйте другъ друга лобзаніемъ святымъ. цѣлованіе моeю рукою павлею. иже не любитъ господа ісуса, да будетъ проклятъ. маранафа. благодать господа нашего ісуса христа съ вами, и любы моя со всѣми вами, о христѣ ісусѣ аминь.

Конeцъ коринѳскому пeрвому
посланію. Имать въ
себѣ главъ, 16,
а зачалъ
церков
ных,
46.