От Матфеа святое Благовѣствованіе

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

Глава, 1.

Зач., 1. Книга родства ісусъ христова, сына давыдова, сына авраамля. Авраамъ роди ісаака. Ісаакъ же роди іакова. іаковъ же роди іуду и братію его. Іуда же роди фарeса и зара, отъ ѳамары. фарeсъ же роди есрома. есромъ же роди арама. арамъ же роди аминадава. аминадавъ же роди наассона. наассонъ же роди салмона. салмонъ же роди вооза, отъ рахавы. воозъ же роди овида отъ руѳы. овидъ же роди іессeя. іессeй же роди давида царя. давидъ же царь роди соломона, отъ уріины. Соломонъ же роди ровоама. ровоамъ же роди авія. авія же роди асса. асса же роди іoсафата. іoсафатъ же роди іoрама. Іoрамъ же роди озію. озія же роди іoаѳама. іoаѳамъ же роди ахаза. ахазъ же роди езекію. езекія же роди манасію. Манасія же роди амона. амонъ же роди іoсію. іoсія же роди іехонію, и братію его, въ преселeніе вавилонское. По преселeніи же вавилонстѣмъ, іехонія роди, салаѳіиля. салаѳіиль же роди зоровавeля. зоровавeль же роди, авіуда. авіудъ же роди еліакима. еліакимъ же роди азора. азоръ же роди садока. садокъ же роди ахима. ахимъ же роди еліуду. еліудъ же роди елеазара. елеазаръ же роди матѳана. матѳанъ же роди іакова. іаковъ же роди іосифа, мужа маріина, изъ нея же родися ісусъ глаголемыи христосъ. Всѣхъ же родовъ отъ авраама до давида, родове четыри надесяте. И отъ давида до преселeнія вавилоньскаго, родове четыри надесяте. И отъ преселeнія вавилоньскаго до христа, родове четыри надесяте.

Зач., 2.* Ісусъ христово рождество, сице бѣ. обручeнѣ убо бывши матери его маріи, іосифови, прeже даже не снитися има, обрѣтеся имущи во чревѣ отъ духа свята. іосифъ же мужъ ея праведенъ сыи, и не хотя ея обличити, восхотѣ тай пустити ю. Сія же ему помыслившу, се ангелъ господень во снѣ явися ему, глаголя, іосифе сыну давыдовъ, не убойся пріяти маріамъ жены твоея. Рождьшеебося въ нeй, отъ духа есть свята. родитъ же сына, и наречeши имя ему ісусъ. той бо спасeтъ люди своя отъ грѣхъ ихъ. се же все бысть, да сбудется речeное отъ господа пророкомъ, глаголющимъ. се дѣвая во чревѣ пріиметъ, и родитъ сына, и нарекутъ имя ему еммануилъ, еже есть сказаемо съ нами богъ. воставъ же іосифъ отъ сна, сотвори яко же повелѣ ему ангелъ господень. и пріятъ жену свою и не знаяше ея, дондеже роди сына своего пeрвенца, и нарече имя ему ісусъ.

Глава, 2.

Зач., 3. Ісусу же рождьшуся въ виѳлеeмѣ іудeйстѣмъ, во дни ирода царя. Се волсви отъ востокъ пріидоша во іерусалимъ глаголюще, гдѣ есть рождeися царь іудeйскыи; Видѣхомъ бо звѣзду его на востоцѣ, и пріидохомъ поклонитися ему. слышавъ же иродъ царь, смутися, и вся іерусалима съ нимъ. и собравъ вся первосвященникы, и книжникы людскыя, вопрашаше отъ нихъ, гдѣ христосъ раждается; они же рекоша ему, въ виѳлеeмѣ іудeйстѣмъ. Тако бо писано есть пророкомъ. и ты виѳлеeмъ земле іудова, ничимъ же мeнши еси во владыкахъ іудовахъ. истебe бо изыдетъ вождь, иже упасeтъ люди моя ізраиля. Тогда иродъ тай призва волхвы, и испытоваше отъ нихъ врeмя явльшаяся звѣзды. и пославъ ихъ въ виѳлеeмъ, рече. шeдше, испытайте извѣстно о отрочати. егда же обрящете, возвѣстите ми. яко да и азъ шeдъ поклонюся ему. они же послушавше царя, идоша. и се звѣзда ю же видѣша на востоцѣ, идяше предъ ними. дондеже пришeдши ста верху идѣже бѣ отроча. видѣвше же звѣзду, возрадовашася радостію вeліею зѣло. И при шeдше въ храмину видѣша отроча съ маріею матерію его. и падше поклонишася ему. и отвeрзше сокровища своя, принесоша ему дары. злато, и ливанъ, и смирну, и вѣсть пріeмше во снѣ не возвратитися ко ироду. инѣмъ путeмъ отидоша въ страну свою.

Зач., 4.* Отшeдшимъ же имъ, се ангелъ господень во снѣ явися іосифу глаголя, воставъ поими отроча и матере его, и бѣжи въ египетъ. и буди тамо, дондеже реку ти. хощетъ бо иродъ искати отрочате да погубитъ е. онъ же воставъ, поятъ отроча и матере его нощію, и отиде въ египетъ. и бѣ тамо до умeртія иродова. да сбудется речeное отъ господа пророкомъ глаголющемъ, отъ египта возвахъ сына моего. Тогда иродъ видѣвъ яко поруганъ бысть отъ волхвъ, разгнѣвася зѣло. и пославъ, изби вся дѣти, сущая въ виѳлеeмѣ, и во всѣхъ предѣлехъ его, отъ двою лѣту и нижайша, по времени еже извѣстно испыта отъ волхвъ. Тогда сбысться речeное іереміемъ пророкомъ глаголющемъ, гласъ въ рамѣ слышанъ бысть, плачь и рыданіе и вопль многъ. рахиль плачущися чадъ своихъ, и не хотяше утѣшитися, яко нѣсуть. умeршу же ироду. се ангелъ господень во снѣ явися іосифу въ египтѣ, глаголя. воставъ поими отроча и матере его, и иди въ зeмлю ізраилеву. изомроша бо ищущеи душу отрочате. онъ же воставъ, поятъ отроча и матере его, и пріиде въ зeмлю ізраилеву. Слышавъ же яко архелай царствуетъ во іудeи вмѣсто ирода отца своего, убояся тамо ити. вѣсть же пріeмъ во снѣ, отиде въ предѣлы галилeйскія. и пришeдъ вселися во градѣ нарицаемѣмъ назарeтъ, яко да сбудется речeное пророкы, яко назорeй наречeтся.

Глава, 3.

Зач., 5. Во дни же оны, пріиде іoаннъ креститель проповѣдая въ пустыни іудeйстѣй, и глаголя. покайтеся, приближи бося царствіе небесное. Сeй бо есть речeныи ісаіемъ пророкомъ, глаголющемъ, гласъ вопіющаго въ пустыни. уготовайте путь господень правы творите стезя его. самъ же іoаннъ имяше ризу свою отъ власъ вельбуждь, и поясъ усмѣнъ о чреслѣхъ своихъ. снѣдь же его бѣ, пружіе и мeдъ дивіи. Тогда исхождаше къ нему іерусалима, и вся іудeя, и вся страна іoрданская. и крещахуся во іoрдани отъ него, исповѣдающе грѣхы своя. Видѣвъ же многы фарисeя и саддукeя грядуща на крещeніе его, рече имъ. рождeнія ехиднова, кто сказа вамъ бѣжати отъ будущаго гнѣва; сотворите убо плодъ достоинъ покаянія. и не начинайте глаголати въ себѣ, отца имамы авраама. глаголю бо вамъ, яко можетъ богъ отъ каменія сего воздвигнути чада аврааму. Уже бо и сѣкира при корени дрeва лежитъ. всяко убо дрeво иже не творитъ плода добра, посѣкаемо бываетъ, и въ огнь вмѣтаемо. Азъ убо крещаю вы водою, въ покаяніе. грядыи же по мнѣ, крѣпліи мене есть, ему же нѣсмь достоинъ сапоги понести, той вы креститъ духомъ святымъ и огнeмъ. Ему же лопата въ руцѣ его, и потребитъ гумно свое, и соберeтъ пшеницу свою въ житницу, плѣвы же сожжeтъ огнeмъ негасающимъ.

Зач., 6.* Тогда приходитъ ісусъ отъ галилeя на іoрданъ ко іoанну, креститися отъ него. Іoаннъ же возбраняше ему глаголя. азъ трeбую тобою креститися, и ты ли грядeши ко мнѣ; отвѣщавъ же ісусъ, рече къ нему. остави нынѣ, тако бо подобно есть намъ исполнити всяку правду. тогда остави его. И крестився ісусъ, взыде абіе отъ воды. и се отверзошася ему небеса, и видѣ духъ божіи исходящь яко голубь, грядущь нань. и се гласъ съ небесе глаголя. сeй есть сынъ мой возлюбленыи, о нeмъ же благоволихъ.

Глава, 4.

Зач., 7. Тогда ісусъ возведeнъ бысть духомъ въ пустыню искуситися отъ діавола. и постився дніи четыридесяте и нощіи четыридесяте, послѣди взалка. и приступль къ нему искуситель, рече. аще сынъ еси божіи, рцы яко да каменіе се хлѣби будутъ. онъ же отвѣщавъ, рече. писано есть. не о хлѣбѣ единомъ живъ будетъ человѣкъ, но о всякомъ глаголѣ исходящимъ изъ устъ божіихъ. Тогда поятъ его діаволъ, во святыи градъ, и постави его на крилѣ церковнѣмъ. и глагола ему. аще сынъ еси божіи, вeрзися низу. писано бо есть, яко ангеломъ своимъ заповѣсть о тебѣ сохранити тя, и на рукахъ возмутъ тя, да некогоспода прeткнеши о камень ногу твою. Речe же ему ісусъ, пакы писано есть. не искусиши господа бога своего. пакы поятъ его діаволъ на гору высоку зѣло, и показа ему всѣ царствія мира, и славу ихъ, и глагола ему. сія вся тебѣ дамъ, аще падъ поклонишимися. Тогда глагола ему ісусъ, иди за мною сатана. писано бо есть. господу богу твоему поклонишися, и тому единому послужиши. тогда остави его діаволъ. и се ангели приступиша и служаху ему.

Зач., 8.* Слышавъ же ісусъ, яко іoаннъ прeданъ бысть, отиде въ галилeю, и оставль назарeтъ, пришeдъ вселися въ капернаумъ, въ поморіе, въ предѣлехъ заулонихъ и нефѳалимлихъ, да сбудется речeное ісаіемъ пророкомъ глаголющемъ. земля завулоня, и земля нефѳалимля, путь моря обонъ полъ іoрданѣ, галилeя языкъ. людіе сѣдящеи во тмѣ, видѣша свѣтъ вeліи. и сѣдящимъ въ странѣ и сѣни смертнѣй свѣтъ восія имъ. оттолѣ начатъ ісусъ проповѣдати, и глаголати. Покайтеся, приближибося царство небесное.

Зач., 9.* Ходя же при мори галилeйстѣмъ, видѣ два брата, симона глаголемаго петра, и андрѣя брата его, вмѣтающа мрeжу въ море. бѣста бо рыбаря. И глагола има. грядѣта по мнѣ, и сотворю вы ловца человѣкомъ. она же абіе оставльша мрeжа, по нeмъ идоста. И прешeдъ оттуду, видѣ ина два брата, іакова зеведeoва, и іoанна брата его, въ корабли съ зеведeoмъ отецeмъ ею, завязающа мрeжу свою, и возва я. она же абіе оставльша корабль, и отца своего, по нeмъ идоста. и прохождаше всю галилeю ісусъ. уча на сонмищихъ ихъ, и проповѣдая евангеліе царьствія, и исцѣляя всякъ недугъ, и всяку язю въ людехъ. И изыде слухъ его по всeй сиріи. и приведоша ему вся болящая различными недугы, и страстьми одержимы, и бѣсны, и мѣсячныя, и раслаблены жилами. и исцѣли ихъ.

Зач., 10.* И по нeмъ идоша народи мнози отъ галилeя, и десяти градъ, и отъ іерусалима, іудeя, и со оного полу іoрдана.

Глава, 5.

Узрѣвъ же народы, взыде на гору. и сѣдшу ему, при ступиша къ нему ученицы его. и отвeрзъ уста своя, учаше ихъ глаголя. Блажeни нищіи духомъ, яко тѣхъ есть царствіе небесное. блажeни плачущеи, яко тіи утѣшатся. блажeни кротеціи, яко тіи наслѣдятъ зeмлю. блажeни алчущеи и жаждущеи правды, яко тіи насытятся. Блажeни милостивіи, яко тіи помиловани будутъ. Блажeни чистіи сердцемъ, яко тіи бога узрятъ. блажeни миротворцы, яко тіи сынове божіи нарекутся. Блажeни изгнани правды ради, яко тѣхъ есть царство небесное. Блажeни есте егда поносятъ вамъ, и ижденутъ, и рекутъ всякъ золъ глаголъ на вы лжуще мене ради. радуйтеся и веселитеся, яко мзда ваша многа на небесѣхъ. Тако бо изгнаша пророки иже бѣша прeже васъ. Вы есте соль земли. аще же соль обуяетъ, чимъ осолится; ни во что же будетъ ктому, точію да иссыпана будетъ вонъ, и попираема человѣкы.

Зач., 11.* Вы есте свѣтъ миру. не можетъ градъ укрытися верху горы стоя, ни вжигаютъ свѣтилника, и постав ляютъ его подъ спудомъ, но на свѣщницѣ, и свѣтитъ всѣмъ иже въ храминѣ суть. Тако да просвѣтится свѣтъ вашъ предъ человѣкы, яко да видятъ ваша добрая дѣла, и прославятъ отца вашего иже на небесѣхъ. не мните яко пріидохъ разорити закона или пророкы. не пріидохъ разорити, но исполнити. Аминь бо глаголю вамъ, дондеже прeйдетъ небо и земля, іота едина или едина черта не прeйдетъ отъ закона, дондеже вся будутъ. иже аще разоритъ едину заповѣдіи сихъ малыхъ, и научитъ тако человѣкы, мніи наречeтся во царствіи небеснѣмъ. а иже сотворитъ и научитъ, сeй вeліи наречeтся во царствіи небеснѣмъ.

Зач., 12.* Глаголю бо вамъ. яко аще не избудетъ правда ваша паче книжникъ и фарисей, не внидете во царствіе небесное. Слышасте яко речeно бысть дрeвнимъ, не убіeши. иже бо аще убіeтъ, повиненъ есть суду. Азъ же глаголю вамъ, яко всякъ гнѣваяися на брата своего всуе, повиненъ есть суду, иже бо аще речeтъ брату своему, рака, повиненъ есть сонмищу. а иже речeтъ юроде, повиненъ есть геeннѣ огненѣй. аще убо принесeши даръ твой къ олтарю, и ту помянeши, яко братъ твой имать нѣчто на тя, остави ту даръ твой предъ олтарeмъ, и шeдъ прeже смирися съ братомъ своимъ, и тогда пришeдъ принеси даръ свой. Буди увѣщаваяся съ сопeрникомъ своимъ скоро, дондеже еси на пути съ нимъ, да не предастъ тебе сопeрникъ судіи, и судія тя предастъ слузѣ, и въ темницу ввeрженъ будеши. аминь глаголю тебѣ, не изыдеши оттуду дондеже воздаси послѣдніи кодрантъ.

Зач., 13.* Слышасте, яко речeно бысть пeрвымъ. не прелюбы сотвориши. Азъ же глаголю вамъ, яко всякъ иже возритъ на жену ко еже вожделѣти ей, уже любодѣйствова съ нeю въ сердци своeмъ. аще же око твое десное соблажняетъ тя, изми е, и вeрзи отъ себе. уне бо ти есть, да погибнетъ единъ отъ удъ твоихъ, а не все тѣло твое ввeржено будетъ въ геeнну огненую. и аще же десная твоя рука соблажняетъ тя, усѣци ю, и вeрзи отъ себе. уне бо ти есть, да погибнетъ единъ отъ удъ твоихъ, а не все тѣло твое идетъ въ геeнну. Речeно же бысть, яко иже аще пуститъ жену свою, да дастъ ей книгу распустную. азъ же глаголю вамъ. яко всякъ отпущаяи жену свою развѣ словесе любодѣйнаго, творитъ ю прелюбодѣйствовати. и иже пущеницу пойметъ прелюбы дѣйствуетъ.

Зач., 14.* Пакы слышасте, яко речeно бысть дрeвнимъ, не во лжу кленeшися, воздаси же господви клятвы твоя. Азъ же глаголю вамъ, не клятися всяко, ни небомъ, яко престолъ есть божіи. ни землeю, яко подножіе есть ногама его. ни іерусалимомъ, яко градъ есть великаго царя. ниже главою своeю кленися, яко не можеши власа единого бѣла или чeрна сотворити. Буди же слово ваше. ей, ей. ни, ни, лихо еже сею, отъ непріязни есть. слышасте яко речeно бысть. око, за око. и зубъ, за зубъ. Азъ же глаголю вамъ. не противитися злу. но аще тя кто ударитъ въ десную твою ланиту, обрати ему и другую. и хотящему судитися съ тобою, и ризу твою взяти, отпусти ему и срачицу. и аще кто тя пойметъ по силѣ поприще едино, иди съ нимъ двѣ.

Зач., 15.* Просящему у тебе, дай. и хотящаго отъ тебе заяти, не отврати. слышасте, яко речeно есть. возлю биши искреняго твоего, и возненавидиши врага своего. азъ же глаголю вамъ. любите врагы ваша, благословите кленущая вы, добро творите ненавидящимъ васъ. и молитеся за творящихъ вамъ напасть, и изгонящая вы, яко да будете сынове отца вашего иже есть на небесѣхъ. яко солнце свое сіяетъ на злыя и благыя, и дождитъ на праведны и на неправедны. Аще бо любите любящихъ васъ, кую мзду имате; не и мытаре ли тожде творятъ; и аще цѣлуете другы ваша токмо, что лише творите; не и язычницы ли такожде творятъ; будѣте убо вы совершeни, яко же отецъ вашъ небесныи совершeнъ есть.

Глава, 6.

Зач., 16. Внемлѣте милостыня ваша не творите предъ человѣки, да видими будете ими. аще ли же, ни. мзды не имате отъ отца вашего, иже есть на небесѣхъ. Егда убо твориши милостыню, не воструби предъ собою яко же лицемѣри творятъ въ сонмищихъ, и въ стогнахъ, яко да прославятся отъ человѣкъ. Аминь глаголю вамъ, воспріeмлютъ мзду свою. Тебѣ же творящу милостыня, да не увѣсть шуйца твоя что творитъ десница твоя, яко да будетъ милостыня твоя втайнѣ. И отецъ твой видяи втайнѣ, той воздастъ тебѣ явѣ. И егда молишися, не буди яко же лицемѣри, яко любятъ въ сонмищихъ, и въ стогнахъ путій стояще молитися, яко да явятся человѣкомъ. Аминь глаголю вамъ, яко воспріимутъ мзду свою. Ты же егда молишися, вниди въ клѣть свою, и затворивъ двeри твоя, помолися отцу твоему втайнѣ. и отецъ твой видяи втайнѣ, воздастъ тебѣ явѣ. молящежеся, не лишше глаголите яко же язычницы. мнятъ бо яко въ многоглаголаніи своeмъ услышани будутъ. не подобитеся убо имъ, вѣсть бо отецъ вашъ ихъ же трeбуете, прeжде прошeнія вашего. сице убо молитеся вы. Отче нашъ, иже еси на небесѣхъ, да святится имя твое, да пріидетъ царствіе твое. да будетъ воля твоя, яко на небеси и на земли. хлѣбъ нашъ насущныи даждь намъ днeсь. и остави намъ долгы наша, яко и мы оставляемъ должникомъ нашимъ. и не введи насъ въ напасть. но избави насъ отъ лукаваго. Яко твое есть царствіе и сила и слава, во вѣки, аминь.

Зач., 17.* Аще бо отпущаете человѣкомъ согрѣшeнія ихъ, отпуститъ и вамъ отецъ вашъ небесныи. Аще ли не отпущаете человѣкомъ согрѣшeнія ихъ, ни отецъ вашъ отпуститъ вамъ согрѣшeніи вашихъ. Егда же поститеся, не будѣте яко же лицемѣри, сѣтующе, помрачаютъ бо лица своя. яко да явятся человѣкомъ постящеся. аминь глаголю вамъ яко воспріимутъ мзду свою. Ты же постяся, помажи главу свою, и лице твое умый, яко да не явишися человѣкомъ постяся, но отцу твоему иже втайнѣ. и отецъ твой видяи втайнѣ, воздастъ тебѣ явѣ. Не скрывайте себѣ сокровищъ на земли, идѣже чeрвь и тля тлитъ, и идѣже татіе подкоповаютъ и крадутъ. Скрывайте же себѣ сокровища на небеси, идѣже ни чeрвь ни тля тлитъ, и идѣже татіе не подкоповаютъ, ни крадутъ. идѣже бо есть сокровище ваше, ту будетъ и сердце ваше.

Зач., 18.* Свѣтилникъ тѣлу есть око. аще убо будетъ око твое просто, все тѣло твое свѣтло будетъ. аще ли око твое лукаво будетъ, все тѣло твое тeмно будетъ. аще убо свѣтъ иже въ тебѣ, тма есть, то тма колми; никтоже можетъ двѣма господинома работати. либо единаго возлюбитъ, а другаго возненавидитъ. или единого держится, о друзѣмъ же нерадити начнетъ. не можете богу работати и мамонѣ. сего ради глаголю вамъ, не пецѣтеся душeю вашею что ясте, или что піeте. ни тѣломъ вашимъ, во что облечeтеся. не душа ли болши есть пища, и тѣло одeжда; возрите на птица небесныя, яко не сѣютъ ни жнутъ, ни собираютъ въ житница, и отецъ вашъ небесныи питаетъ ихъ. не вы ли паче лучши ихъ есте; кто же отъ васъ пекіися можетъ приложити возрасту своему лакоть единъ; и о одeжди что печeтеся; смотрите крины сeльныхъ, како растутъ, не тружаются ни прядутъ. глаголю же вамъ, яко ни соломонъ во всeй славѣ своeй облечeся яко единъ отъ сихъ. Аще же сѣно сeльное, днeсь суще, и утрѣ въ пeщь вмѣтаемо, богъ тако одѣетъ. не много ли паче васъ маловѣри;

Зач., 19.* Не пецѣтеся убо глаголюще, что ямы, или что піeмъ, или чимъ одeждимся; всѣхъ бо сихъ языцы ищутъ. вѣсть бо отецъ вашъ небесныи, яко трeбуете сихъ всѣхъ. ищите же прeже царствія божія, и правды его, и сія вся приложатся вамъ. Не пецѣтеся убо на утрѣи, утреніи бо собою печeтся. довлеть днeви злоба его.

Глава, 7.

Зач., 20. Не судите, да не судими будете. Имъ же бо судомъ судите, судятъ вамъ. и въ нюже мѣру мѣрите, возмѣрится вамъ. Что же видиши сучeцъ, иже во оцѣ брата твоего, бервно же еже есть во оцѣ твоeмъ не чуеши; или како речeши брату твоему, остави да изму сучeцъ изъ очесе твоего, и се бервно во оцѣ твоeмъ; лицемѣре, изми пeрвѣе бервно изъ очесе твоего, и тогда узриши изяти сучeцъ изъ очесе брата твоего. не дадите святая псомъ, ниже помѣтайте бисеръ вашихъ предъ свиніями, да не поперутъ ихъ ногами своими, и вращшеся расторгнутъ вы.

Зач.* Просите, и дастся вамъ. ищѣте, и обрящете. толцѣте, и отвeрзется вамъ. всякъ бо просяи, пріeмлетъ. и ищаи, обрѣтаетъ. и толкущему отвeрзется. Или кто есть отъ васъ человѣкъ, его же аще воспроситъ сынъ его хлѣба, еда камень подастъ ему; или аще рыбы проситъ, еда змію подастъ ему; аще бо вы лукави суще, умѣете даянія блага даяти чадомъ вашимъ. колми паче отецъ вашъ небесныи, дастъ блага просящимъ у него;

Зач., 21.* Вся убо елика аще хощете да творятъ вамъ человецы, тако и вы творите имъ. се бо есть законъ и пророцы. внидѣте узкыми враты, яко пространна врата и широкъ путь, вводяи въ пагубу, и мнози суть входящеи имъ. что узкая врата и тѣсенъ путь, вводяи въ животъ, и мало ихъ есть иже обрѣтаютъ его.

Зач., 22.* Внемлѣте же отъ лжихъ пророкъ, иже приходятъ къ вамъ въ одeжахъ овчахъ, внутрь же суть волцы хыщницы, отъ плод ихъ познаете ихъ. еда объeмлютъ отъ тeрнія грозды, или отъ рѣпія смоквы; тако всяко дрѣво добро, плоды добры творитъ. а зло дрѣво, плоды злы творитъ. не можетъ дрѣво добро, плодъ золъ творити. ни дрѣво зло, плодъ добръ творити. всяко убо дрѣво иже не творитъ плода добра, посѣкаютъ е, и въ огнь вмѣтаютъ. тѣмъ же убо отъ плод ихъ познаете ихъ.

Зач., 23.* Не всякъ глаголяи ми, господи господи, внидетъ въ царство небесное, но творяи волю отца моего, иже есть на небесѣхъ. Мнози рекутъ мнѣ въ онъ день, господи господи, не въ твое ли имя пророчествовахомъ, и твоимъ именемъ бѣсы изгонихомъ, и твоимъ именемъ силы многы сотворихомъ; и тогда исповѣмъ имъ, яко николиже знахъ васъ. отидѣте отъ мене дѣлающеи беззаконіе.

Зач., 24.* Всякъ убо иже слышитъ словеса моя сія, и творитъ я, уподоблю его мужу мудру, иже созда храмину свою на камени. и сниде дождь, и пріидоша рѣкы, и возвѣяша вѣтри, и нападоша на храмину ту, и не падeся, основана бо бѣ на камени. и всякъ слышаи словеса моя си, и не творя ихъ, уподобится мужу уродиву, иже созда храмину свою на пѣсцѣ. и сниде дождь, и пріидоша рѣкы, и возвѣяша вѣтри, и опрѣшася храминѣ той, и падeся, и бѣ разрушeніе ея вeліе. и бысть егда сконча ісусъ словеса сія, дивляхуся народи о учeніи его. бѣ бо уча ихъ яко власть имѣя, и не яко книжницы и фарисeе.

Глава, 8.

Сшeдшу же ему съ горы, въ слѣдъ его идяху народи мнози. и се прокажeнъ пришeдъ, кланяшеся ему глаголя, господи. аще хощеши, можеши мя очистити. И простeръ руку ісусъ, коснуся емъ, глаголя. хощу, очистися. и абіе очистися ему проказа. и глагола ему ісусъ. виждь, никомуже повѣждь. но шeдъ покажися іерeoви, и принеси даръ, иже повелѣ въ законѣ моисeй, во свѣдѣтельство имъ.

Зач., 25.* Вшeдшу же ему въ капернаумъ, приступи къ нему сотникъ, моля его и глаголя. господи, отрокъ мой лежитъ въ дому ослабленъ, лютѣ стражда. и глагола ему ісусъ, азъ пришeдъ исцѣлю его. И отвѣщавъ сотникъ, рече ему. господи, нѣсмь достоинъ да подъ кровъ мой внидеши. но токмо рцы слово, и исцѣлѣетъ отрокъ мой. ибо азъ человѣкъ есмь подъ властію, имыи подъ собою воины, и глаголю сему, иди, и идетъ. и другому пріиди, и пріидетъ. и рабу моему сотвори се, и сотворитъ. Слышавъ же ісусъ, удивися, и рече грядущимъ по нeмъ. аминь глаголю вамъ, ни во ізраили толико вѣры обрѣтохъ. глаголю же вамъ, яко мнози отъ востокъ и западъ пріидутъ и возлягутъ со авраамомъ, и ісаакомъ, и іяковомъ, въ царствіи небеснѣмъ. сынове же царствія изгнани будутъ во тму кромѣшнюю, ту будетъ плачь и скрeжетъ зубомъ. и рече ісусъ сотнику. иди, и яко же вѣрова буди тебѣ. и исцѣлѣ отрокъ его въ той часъ.

Зач., 26.* И пришeдъ ісусъ въ домъ петровъ, видѣ тeщу его лежащу и огнeмъ жегому. и прикоснуся руцѣ ея, и остави ю огнь и воста, и служаше ему. Поздѣ же бывшу, приведоша къ нему бѣсны многи, и изгна духи словомъ. и вся болящая исцѣли, да сбудется речeное ісаіемъ пророкомъ, глаголющемъ. той недугы наша пріятъ, и болѣзни понесе. Видѣвъ же ісусъ многы народы окрестъ себе, повелѣ ученикомъ ити на онъ полъ. и приступль единъ книжникъ, рече ему. учителю, иду по тебѣ, ямо же аще идеши. И глагола ему ісусъ. лиси язвины имутъ, и птица небесныя гнѣзда. сынъ же человеческіи не имать гдѣ главы подклонити. другіи же отъ ученикъ его рече ему. господи, повели ми прeжде ити, и погребсти отца моего. ісусъ же рече ему. гряди по мнѣ, и остави мертвыхъ погребсти своя мертвеца.

Зач., 27.* Влѣзшу же ему въ корабль, по нeмъ идоша ученицы его. и се трусъ великъ бысть въ мори, яко же кораблю покрыватися волнами, той же спаше. и пришeдше ученицы его возбудиша его глаголюще. господи, спаси ны, погибаемъ. и глагола имъ, что страшливи есте маловѣри; тогда воставъ, запрѣти вѣтромъ и морю. и бысть тишина вeлія. человецы же чюдишася глаголюще. кто есть сeй, яко и вѣтри и море послушаютъ его;

Зач., 28.* И пришeдшу ему на онъ полъ, въ страну гергесинскую, срѣтоста его два бѣсна, отъ гробъ исходяща, люта зѣло, яко не можти никому минути путeмъ тѣмъ. и се возописта глаголюще. что намъ и тебѣ ісусе сыне божіи; пришeлъ еси сѣмо прeже врeмене мучити насъ. бяше же далeче отъ нею стадо свиніи много пасомо. Бѣси же моляху его, глаголюще. аще изгониши ны, повели намъ ити въ стадо свиное. и рече имъ, идѣте. они же изшeдше идоша въ стадо свиное. и се абіе устремися стадо все по брегу въ море, и утопоша въ водахъ. пасущіи же бѣжаша, и шeдше во градъ, возвѣстиша вся, и о бѣсною. и се вeсь градъ изыде въ срѣтеніе ісусови. и видѣвше его молиша, яко да бы прешeлъ отъ предѣлъ ихъ.

Глава, 9.

Зач., 29. И влѣзъ въ корабль, прeйде и пріиде въ свой градъ. И се принесоша ему ослаблена жилами на одрѣ лежащъ. и видѣвъ ісусъ вѣру ихъ, рече ослабленому, дерзай чадо, отпущаюттися грѣси твои. И се нѣцыи отъ книжникъ, рѣша въ себѣ, сeй хулитъ. и видѣвъ ісусъ помышлeнія ихъ, рече. вскую вы мыслите лукавая въ сердцыхъ своихъ; что бо есть удобѣе рещи, отпущаюттися грѣси, или рещи востани и ходи; но да увѣсте, яко власть имать сынъ человеческіи на земли отпущати грѣхи, тогда глагола раслабленому, востани, возми свой одръ, и иди въ домъ твой. И воставъ взeмъ одръ свой, и иде въ домъ свой. видѣвше же народи чюдишася. и прославиша бога, давшаго власть таковую человѣкомъ.

Зач., 30.* И преходя ісусъ оттуду, видѣ человѣка сѣдяща на мытници, матѳeя глаголема, и глагола ему, по мнѣ гряди, и воставъ по нeмъ иде. и бысть ему возлежащу въ дому, и се мнози мытаре и грѣшницы пришeдше, возлежаху со ісусомъ, и со ученикы его. и видѣвше фарисeе, глаголаху ученикомъ его. почто съ мытари и грѣшникы учитель вашъ ястъ и піeтъ; ісусъ же слышавъ, рече имъ. не требуютъ здравіи врача, но болящіи. шeдше научитеся, что есть, милости хощу, а не жeртвѣ. не пріидохъ бо призвати праведники, но грѣшникы на покаяніе.

Зач., 31.* Тогда приступиша къ нему ученицы іoаннови глаголюще. почто мы, и фарисeе постимся много, ученицы же твои не постятся; и рече имъ ісусъ. еда могутъ сынове брачніи плакати, до нелико врeмя съ ними есть женихъ; пріидутъ же дніе, егда отимется отъ нихъ женихъ, и тогда постятся. Никтоже бо приставляетъ приставлeнія плата небѣлена, ризѣ вeтсѣ. возметъ бо кончину свою отъ ризы, и горши дира будетъ. ниже вливаютъ вина нова въ мѣхы вeтхы. аще ли же ни, то просадятся мѣси, и вино проліeтся, и мѣси погыбнутъ. но вливаютъ вино ново въ мѣхы новы, и обое соблюдeтся.

Зач., 32.* Сія ему глаголющу къ нимъ, се князь нѣкіи пришeдъ кланяшеся ему глаголя, яко дщи моя нынѣ умретъ. но пришeдъ возложи на ню руку свою, и оживeтъ. и воставъ ісусъ, по нeмъ иде, и ученицы его. и се жена кровоточива дванадесяте лѣтъ, приступльши созади, прикоснуся воскриліи ризы его. глаголаше бо въ себѣ, аще токмо прикоснуся ризѣ его, спасeна буду. ісусъ же обращся, и видѣвъ ю, рече. дерзай дщи, вѣра твоя спасе тя. и спасeна бысть жена отъ часа того. и пришeдъ ісусъ въ домъ княжь, и видѣ сопца, и народъ молвящъ, глагола имъ, отидѣте, не умретъ бо дѣвца, но спитъ. и ругахуся ему. егда же изгнанъ бысть народъ, вшeдъ, ятъ ю за руку, и воста дѣвца. и изыде вѣсть си по всeй земли той.

Зач., 33.* И преходящу оттуду ісусови, по нeмъ идоста два слѣпца, зовуща и глаголюща, помилуй ны ісусе сыне давыдовъ. Пришeдшу же ему въ домъ, приступиста къ нему слѣпца. и глагола има ісусъ. вѣруета ли яко могу се сотворити; глаголаста ему, ей господи. Тогда прикоснуся очію ихъ, глаголя. по вѣрѣ ваю буди вама. и отверзостася очи има. и запрѣти има ісусъ, глаголя. блюдѣта, да никтоже увѣсть. она же изшeдша прослависта его по всeй земли той. тѣма же исходящема, се приведоша къ нему человѣка нѣма, бѣснуема. и изгнану бѣсу, проглагола нѣмыи. и дивишася народи, глаголюще, яко николиже явися тако во ізраили. фарисeе же глаголаху, о князи бѣсовстѣмъ изгонитъ бѣсы. и прохождаше ісусъ грады вся и вeси уча на сонмищихъ ихъ, и проповѣдая евангеліе царствія, и цѣля всякъ недугъ и всяку язю въ людехъ.

Зач., 34.* Видѣвъ же народы, милосердова о нихъ, яко бѣху смятeни и отвeржени, яко овца не имуща пастыря. Тогда глагола ученикомъ своимъ. жатва убо многа, дѣлателіи же мало. молитеся убо господину жатвѣ, яко да изведeтъ дѣлателя на жатву свою.

Глава, 10.

Зач. * И призвавъ оба надесяте ученика своя, дастъ имъ власть на дусѣхъ нечистыхъ, яко да изгонятъ ихъ, исцѣлити всякъ недугъ и всяку болѣзнь. дванадесятимъ же апостоломъ имена суть сія. пeрвыи симонъ иже нарицается пeтръ, и андрeя братъ его. іаковъ зеведeoвъ, и іoаннъ братъ его. филиппъ, и варѳоломeй. ѳома, и матѳeй мытарь. іаковъ алѳeoвъ, и келевeй наречeныи фаддeй. симонъ кананитъ, и іуда искаріотскіи иже и предастъ его. Сія оба надесяте посла ісусъ заповѣдавъ имъ глаголя. на путь языкъ не идѣте, и во градъ самарянскыи не внидѣте. идѣте же паче ко овцамъ погибшимъ дому ізраилева. ходяще же проповѣдуйте, глаголюще, яко приближися царствіе небесное. болящая исцѣлите, прокажeныя очищайте, мертвыя воскрешайте, бѣсы изгоните. туне пріясте, туне дадите.

Зач., 35.* Не стяжите злата, ни сребра, ни мѣди при поясѣхъ вашихъ. ни пиры на пути, ни двою ризу, ни сапогъ, ни жeзлъ. достоинъ бо есть дѣлатель мзды своея. Вонь же аще колиждо градъ или вeсь внидете, испытайте кто въ нeмъ достоинъ есть, и ту пребудѣте дондеже изыдете. входяще же въ домъ, цѣлуйте его. глаголюще миръ дому сему. и аще убо будетъ домъ достоинъ, пріидетъ миръ вашъ нань. аще ли же не будетъ достоинъ, миръ вашъ къ вамъ возвратится. и иже аще не пріиметъ васъ, ниже послушаетъ словeсъ вашихъ, исходяще изъ дому, или изъ града того, оттрясѣте прахъ ногъ вашихъ. аминь глаголю вамъ, отраднѣе будетъ земли содомстѣи и гоморстѣи въ день судныи, нeже граду тому.

Зач., 36.* Се азъ посылаю васъ яко овца посредѣ волковъ. будѣте убо мудри яко змія, и цѣли яко голубіе. Внемлѣте же отъ человѣкъ. предадятъ бо вы на сонмы, и на соборищихъ ихъ біютъ васъ. предъ владыкы же и царя ведeни будете, мене ради. во свѣдѣтельство имъ, и языкомъ. егда же предаютъ вы, не пецѣтеся, како или что возглаголете. дастъбося вамъ въ той часъ, что возглаголете. не вы бо будете глаголющеи, но духъ отца вашего глаголяи въ васъ. предастъ же братъ брата на смерть, и отецъ чадо. и востанутъ чада на родителя, и убіютъ ихъ. и будете ненавидими всѣми, имени моего ради. претерпѣвыи же до конца той спасeнъ будетъ.

Зач., 37.* Егда же гонятъ вы во градѣ сeмъ, бѣгайте въ другіи. аминь бо глаголю вамъ, не имате скончати грады ізраилевы, дондеже пріидетъ сынъ человеческіи. Нѣсть ученикъ надъ учителемъ своимъ, ниже рабъ, надъ господиномъ своимъ. довлетъ ученику, да будетъ яко учитель его, и рабъ, яко господь его. Аще господина дому веелзевула нарекоша, колми паче домашняя его; не убойтеся убо ихъ. ничтоже бо есть покровeно, еже не открыется. и тайно, еже не увѣдѣно будетъ. Еже глаголю вамъ во тмѣ, рцѣте во свѣтѣ. и еже во уши слышите, проповѣдите въ кровѣхъ. и не убойтеся отъ убивающихъ тѣло, душу же не могущихъ убити. убойтежеся паче могущаго и душу и тѣло погубити въ геeннѣ. не двѣ ли птицы цѣнитася единому ассарію; и ни едина отъ нею падeтъ на земли безъ отца вашего. вамъ же и власи главніи вси изочтeни суть. не убойтеся убо, мнозѣхъ птицъ лучши есте вы.

Зач., 38.* Всякъ убо иже исповѣсть мя предъ человѣкы, исповѣмъ его и азъ предъ отецeмъ моимъ, иже на небесѣхъ. а иже отвeржется мене предъ человѣкы, отвeргуся его и азъ предъ отецeмъ моимъ, иже на небесѣхъ. Не мните яко пріидохъ воврещи миръ на землю. не пріидохъ бо воврещи миръ, но мeчь. пріидохъ бо разлучити человѣка на отца своего, и дщeре на матере свою. и невѣсту на свекровь свою. и врази человѣку домашніи его.

Зач., 39.* Иже любитъ отца или матере паче мене, нѣсть мене достоинъ. и иже любитъ сына или дщeре паче мене, нѣсть мене достоинъ. и иже не пріиметъ креста своего, и въ слѣдъ мене грядетъ, нѣсть мене достоинъ. обрѣтыи душу свою, погубитъ ю. а иже погубитъ душу свою мене ради, обрящетъ ю. Иже васъ пріeмлетъ, мене пріeмлетъ. и иже пріeмлетъ мене, пріeмлетъ пославшаго мя. пріeмляи пророка во имя пророче, мзду пророчу пріиметъ. и пріeмляи праведника во имя праведниче, мзду праведничу пріиметъ. И иже аще напоитъ единого отъ малыхъ сихъ чашу студену воду, токмо во имя ученика, аминь глаголю вамъ, не погубитъ мзду свою.

Глава, 11.

И бысть егда соверши ісусъ, заповѣдая обѣма надесяте ученикома своима, прeйде оттуду учити и проповѣ дати во градѣхъ ихъ.

Зач., 40.* Іoаннъ же слышавъ во узылищи дѣла христова, пославъ два отъ ученикъ своихъ, рече ему. ты ли еси грядыи, или иного чаемъ; и отвѣщавъ ісусъ рече имъ. шeдша возвѣстита іoаннови, яже слышита и видита. слѣпіи прозираютъ и хроміи ходятъ, прокажeніи очищаются, и глусіи слышатъ, мертвіи востаютъ, и нищіи благовѣствуютъ. и блажeнъ есть иже аще не соблазнится о мнѣ. тѣма же исходящема, начатъ ісусъ народомъ глаголати о іoаннѣ. чесо изыдосте въ пустыню видѣти; трость ли вѣтромъ колѣблемъ; но чесо изыдосте видѣти; человѣка ли въ мягкы ризы оболчeна; се иже мягкая носящеи, въ домохъ царскыхъ суть. но чесо изыдосте видѣти; пророка ли; ей глаголю вамъ, и лише пророка. сeй бо есть, о нeмъ же есть писано. Се азъ посылаю ангела моего предъ лицeмъ твоимъ, иже уготовитъ путь твой предъ тобою. аминь глаголю вамъ. не воста въ рожeныхъ женами боліи іoанна крестителя. мніи же, въ царствіи небеснѣмъ, боліи его есть. отъ дни же іoанна крестителя досeлѣ, царствіе небесное нудится. и нужници восхищаютъ е. Вси бо пророцы и законъ до іoанна прорекоша. и аще хощете пріяти, той есть илія хотяи пріити. имѣяи уши слышати, да слышитъ.

Зач., 41.* Кому же уподоблю родъ сeй; подобенъ есть дѣтемъ, сѣдящимъ на торжищихъ, и возглашающимъ другомъ своимъ, и глаголющимъ. пискахомъ вамъ, и не плясасте. плакахомъ вамъ, и не рыдасте. Пріиде бо іoаннъ ни яды ни пія, и глаголете бѣсъ имать. пріиде сынъ человеческіи ядый и пія, и глаголете, се человѣкъ ядца и вино піица, мытарeмъ другъ и грѣшникомъ. и оправдися премудрость отъ чадъ своихъ.

Зач., 42.* Тогда начатъ ісусъ поношати градовомъ, въ нихъ же быша множайшая силы его, зане не покаяшася. Горе тебѣ хоразинъ, горе тебѣ виѳсаида. яко аще въ тирѣ и сидонѣ быша силы были бывшая въ васъ, дрeвле убо во врeтищи и пeпелѣ покаялися быша. обаче глаголю вамъ, тиру и сидону отраднѣе будетъ въ день судныи, нeже вамъ. И ты капернаумъ, иже до небесъ вознесыися, до ада снидеши. зане аще въ содомѣхъ быша силы были, бывшая въ тебѣ, пребыли убо быша до днeшняго дне. обаче глаголю вамъ, яко земли содомстѣй отраднѣе будетъ въ день судныи, нeже тебѣ. въ то врeмя отвѣща ісусъ, рече. исповѣдаютися отче господи небеси и земли, яко утаилъ еси сія отъ премудрыхъ и разумныхъ, и открылъ еси та младeнцемъ. ей отче, яко тако бысть благоволeніе предъ тобою.

Зач., 43.* Вся мнѣ предана суть отецeмъ моимъ. и ни ктоже знаетъ сына, токмо отецъ, ни отца кто знаетъ, токмо сынъ, и ему же аще волитъ сынъ открыти. пріидѣте ко мнѣ вси труждающеися и обременeніи, и азъ покою вы. Возмѣте иго мое на себе, и научитеся отъ мене, яко кротокъ есмь, и смирeнъ сердцемъ, и обрящете покой душамъ вашимъ. иго бо мое благо, и брeмя мое лeгко есть.

Глава, 12.

Зач., 44. Въ то врeмя иде ісусъ въ суботы сквозѣ сѣянія. ученицы же его взалкашася, и начаша востерзати класы и ясти. фарисeе же видѣвше, рѣша ему. се ученицы твои творятъ, его же не достоитъ творити въ суботы. онъ же рече имъ. нѣсте ли чли что сотвори давидъ, егда взалка самъ, и сущіи съ нимъ; како вниде въ храмъ божіи, и хлѣбы предложeнія снѣсть, ихъ же недостойно ему бѣ ясти, ни сущимъ съ нимъ, токмо іерeoмъ единѣмъ; или нѣсте чли въ законѣ, яко въ суботы священицы въ церкови суботы сквернятъ, и неповинни суть; Глаголю же вамъ, яко церкове боле есть здѣ. Аще ли бысте вѣдѣли что есть милости хощу, а не жeртвѣ, николиже убо бысте осуждали неповинныхъ. господь бо есть и суботѣ сынъ человеческіи.

Зач., 45.* И прешeдъ оттуду пріиде на сонмище ихъ. И се человѣкъ бѣ ту, руку имы суху. и вопросиша его глаголюще, аще достоитъ въ суботы цѣлити; да нань возглаголютъ. онъ же рече имъ. кто есть отъ васъ человѣкъ, иже имать овча едино, и аще впадeтся въ суботы въ яму, не иметъ ли, и изметъ; кольми убо лучши есть человѣкъ овчате; Тѣмъ же убо достоитъ въ суботы добро творити. Тогда глагола человѣку, простри руку твою. и прострeтъ, и утвердися цѣла яко другая.

Зач., 46.* Фарисeе же шeдше совѣтъ сотвориша нань, како да его погубятъ. ісусъ же разумѣвъ, отиде оттуду.

Зач.* И по нeмъ идоша народи мнози, и исцѣли ихъ всѣхъ. и запрѣти имъ да не явѣ его творятъ. Яко да сбудется речeное ісаіемъ пророкомъ глаголющемъ. Се отрокъ мой его же изволихъ, возлюбленныи мой, нань же благоволи душа моя. положу духъ мой на нeмъ, и судъ языкомъ возвѣститъ. не прерѣчeтъ, ни возопіeтъ. ниже услышитъ кто на распутіихъ гласа его. трости сокрушeны не преломитъ, и лeна внeмшася не угаситъ, дондеже изведeтъ въ побѣду судъ. и на имя его языцы уповаютъ. Тогда приведоша къ нему бѣснующася слѣпа и нѣма, и исцѣли его, яко слѣпому и нѣмому глаголати и глядати. И дивляхуся вси народи глаголюще. еда сeй есть христосъ, сынъ давыдовъ; фарисeе же слышавше, рѣша. сeй не изгонитъ бѣсы, токмо о веельзевулѣ князи бѣсовстѣмъ. Вѣдыи же ісусъ мысли ихъ, рече имъ. всяко царство раздѣльшееся на ся, запустѣетъ. и всякъ градъ, или домъ раздѣливыися на ся, не станетъ. и аще сатана, сатану изгонитъ, на ся раздѣлился есть, како убо станетъ царство его; И аще азъ о веельзевулѣ изгоню бѣсы, сынове ваши о комъ изгонятъ; Сего ради тіи вамъ будутъ судія. аще ли же азъ о дусѣ божіи изгоню бѣсы, убо постиже на васъ царствіе божіе. Или како можетъ кто внити въ домъ крѣпкаго, и сосуды его расхитити, аще не пeрвѣе свяжетъ крѣпкаго, и тогда домъ его расхититъ;

Зач., 47.* Иже нѣсть со мною, на мя есть, и иже не собираетъ со мною, расточаетъ. Сего ради глаголю вамъ, всякъ грѣхъ и хула, отпустится человѣкомъ, а яже на духъ хула, не отпустится человѣкомъ. и иже аще речeтъ слово на сына человеческаго, отпустится ему. а иже речeтъ на духа святаго, не отпустится ему, ни въ сіи вѣкъ, ни въ будущіи. Или сотворите дрeво добро, и плодъ его добръ. или сотворите дрeво зло, и плодъ его золъ. отъ плода бо дрeво познано будетъ. Порождeнія ехиднова, како можете добро глаголати, зли суще; отъ избытка бо сердцу, уста глаголютъ. Благыи человѣкъ, отъ благаго сокровища износитъ благая. и лукавыи человѣкъ, отъ лукаваго сокровища, износитъ лукавая. Глаголю же вамъ, яко всяко слово праздно еже аще рекутъ человецы, воздадятъ о нeмъ слово въ день судныи. отъ словeсъ бо своихъ оправдишися, и отъ словeсъ своихъ осудишися.

Зач., 48.* Тогда отвѣщаша нѣціи отъ книжникъ и фарисей глаголюще. учителю, хощемъ отъ тебе знаменіе видѣти. онъ же отвѣщавъ рече имъ. родъ лукавъ и прелюбодѣй, знаменія ищетъ. и знаменіе не дасться ему, токмо знаменіе іоны пророка. яко же бо бѣ іона во чревѣ китовѣ три дни, и три нощи. тако будетъ и сынъ человеческіи въ сердци земли три дни, и три нощи. Мужіе ниневитстіи востанутъ на судъ съ родомъ симъ, и осудятъ и, яко покаяшася проповѣдію іониною. и се боле іоны здѣ. Царца южская востанетъ на судъ съ родомъ симъ, и осудитъ и, яко пріиде отъ конeцъ земля слышати премудрость соломонову. и се боле соломона здѣ. Егда же нечистыи духъ изыдетъ отъ человѣка, преходитъ сквозѣ безводная мѣста, ища покоя, и не обрѣтаетъ. тогда речeтъ, возвращуся въ домъ мой отнюду же изыдохъ. и пришeдъ обрящетъ празденъ, пометeнъ и украшeнъ. тогда идетъ, и пойметъ съ собою сeдмь инѣхъ духовъ лютѣйшихъ себе, и вшeдше живутъ ту. и будутъ послѣдняя человѣку тому горша пeрвыхъ. тако будетъ и роду сему лукавому.

Зач., 49.* Ещe же ему глаголющу къ народомъ. се мати его и братія его стояху внѣ, ищуще глаголати ему. речe же нѣкіи ему. се мати твоя, и братія твоя внѣ стоятъ хотяще глаголати тебѣ. онъ же отвѣщавъ рече ко глаголющему ему. кто есть мати моя, и кто суть братія моя; и простeръ руку свою на ученики своя, рече. се мати моя и братія моя. иже бо аще сотворитъ волю отца моего иже есть на небесѣхъ, той братъ мой, и сестра, и мати ми есть.

Глава, 13.

Въ день же той изшeдъ ісусъ изъ дому сѣдяше при мори. и собрашася къ нему народи мнози, яко же ему въ корабль влѣсти и сѣсти, и вeсь народъ на поморіи стояше. и глагола имъ притчами много, глаголя.

Зач., 50.* Се изыде сѣяи да сѣетъ. и сѣющу ему, ова падоша при пути. и пріидоша птица, и позобаша я. другая же падоша на каменныхъ, идѣже не имѣяше земля многы, и абіе прозябоша, зане не имѣяше глубины земля. солнцу же восіявшу, присвѣнуша, и зане не имѣяху коренія, исхоша. другая же падоша въ тeрніи, и взыде тeрніе и подави ихъ. другая же падоша на земли добрѣй, и даяху плодъ. ово убо сто, ово же шестьдесятъ, ово тридесять. Имѣяи уши слышати, да слышитъ.

Зач., 51.* И приступивше ученицы его, рекоша ему, почто притчами глаголеши имъ; онъ же отвѣщавъ, рече имъ. яко вамъ дано есть разумѣти тайны царствія небеснаго. онѣмъ же не дано есть. Иже бо имать, дастся ему, и преизбудетъ ему. а иже не имать, и еже имать возмется отъ него. Сего ради въ притчахъ глаголю имъ, яко видяще не видятъ, и слышаще не слышатъ, ни разумѣютъ. и сбывается въ нихъ пророчество ісаино, глаголющее. слухомъ услышите, и не имате разумѣти. и зряще узрите, и не имате видѣти. отолстѣ бо сердце людій сихъ, и ушима тяжко слышаша, и очи свои смѣжиша, да некогоспода узрятъ очима, и ушима услы шатъ, и сердцемъ разумѣютъ, и обратятся, и исцѣлю ихъ. Ваша же блажeная очеса, яко видятъ, и уши ваши, яко слышатъ. Аминь бо глаголю вамъ, яко мнози пророцы и праведницы вожделѣша видѣти яже видите, и не видѣша. и слышати яже слышите, и не слышаша. Вы же убо услышите притчу сѣющаго. Всякому слышащему слово царствія, и не разумѣвающу, приходитъ лукавыи, и восхищаетъ всѣянное въ сердци его, се есть иже при пути сѣянное. а на каменныхъ сѣянное, сeй есть слышаи слово, и абіе съ радостію пріeмлетъ е, не имать же корене въ себѣ, но врeмененъ есть. Бывши же печали или гонeнію словесе ради, абіе соблажняется. а сѣянное въ тeрніи, сeй есть слышаи слово, и печаль вѣка сего, и лeсть богатства, подавляетъ слово, и безъ плода бываетъ. а сѣянное на добрѣй земли, сeй есть слышаи слово, и разумѣвая, иже убо плодъ приноситъ, и творитъ, овъ сто, овъ же шестьдесятъ, овъ тридесять.

Зач., 52.* Ину притчу предложи имъ глаголя. уподобися царствіе небесное человѣку сѣявшу доброе сѣмя на селѣ своeмъ. спящемъ же человѣкомъ, пріиде врагъ его, и всѣя плѣвелы посредѣ пшеница, и отиде. егда же прозябе трава, и плодъ сотвори, тогда явишася и плѣвеліе. Пришeдше же раби господина, рѣша ему. господи, не доброе ли сѣмя сѣялъ еси на селѣ своeмъ; откуду убо имать плѣвелы; онъ же рече имъ, врагъ человѣкъ се сотвори. Раби же рѣша ему. хощеши ли убо, да шeдше исплевeмъ я; онъ же рече имъ, ни. да некогоспода восторгающе плѣвелы, восторгнете купно съ ними и пшеницу. оставите расти обое купно до жатвы, и во время жатвы реку жателемъ. соберѣте пeрвѣе плѣвелы, и свяжите ихъ въ снопы яко съжежти я. а пшеницу соберѣте въ житницу мою.

Зач., 53.* Ину притчу предложи имъ, глаголя. подобно есть царствіе небесное, зерну горушичну, еже взeмъ человѣкъ, всѣя на селѣ своeмъ, еже малѣйше убо есть отъ всѣхъ сѣменъ. егда же возрастeтъ, более всѣхъ зeліи есть, и бываетъ дрeво, яко пріити птицамъ небеснымъ, и витати на вѣтвѣхъ его. Ину притчу глагола имъ. подобно есть царствіе небесное, квасу, иже взeмши жена скры въ мучныхъ сатѣхъ три, дондеже вскисоша вся. Сія вся глагола ісусъ въ притчахъ народомъ, и безъ притча ничесоже глаголаше къ нимъ, яко да сбудется речeное пророкомъ глаголющимъ. отвeрзу въ притчахъ уста моя, отрыгну сокровeная отъ сложeнія миру. Тогда оставль народы, пріиде въ домъ ісусъ.

Зач., 54.* И приступиша къ нему ученицы его глаголюще. скажи намъ притчу плѣвелъ сeлныхъ. онъ же отвѣщавъ, рече имъ. Всѣявыи доброе сѣмя, есть сынъ человеческіи. а село, есть миръ. доброе же сѣмя, сіи суть сынове царствія. а плѣвели суть сынове непріязненіи. а врагъ всѣявыи ихъ, есть діаволъ. а жатва, кончина вѣка есть. а жателе, ангели суть. яко же убо собираютъ плѣвелъ, и огнeмъ съжизаютъ, тако будетъ въ скончаніе вѣка сего. Послетъ сынъ человеческіи ангелы своя, и соберутъ отъ царствія его вся соблазны, и творящая беззаконіе, и ввeргутъ ихъ въ пeщь огнену. ту будетъ плачь, и скрeжетъ зубомъ. Тогда праведницы просвѣтятся яко солнце въ царствіи отца ихъ. имѣяи уши слышати, да слышитъ.

Зач., 55.* Пакы подобно есть царствіе небесное сокровищу сокровeну на селѣ, еже обрѣтъ человѣкъ, съкры, и отъ радости его идетъ, и вся елика имать, продаeтъ, и купуетъ село то.

Зач.* Пакы подобно есть царствіе небесное человѣку купцу, ищущу добрыя бисеры. иже обрѣте единъ многоцѣненъ бисеръ, шeдъ продастъ все елико имяше, и купи его. Пакы подобно есть царствіе небесное нeводу ввeржену въ море, и отъ всякого рода собравшу. иже егда исполнися, извлекоша и на краи, и сѣдше избраша добрыя въ сосуды, а злыя извергоша вонъ. Тако будетъ въ скончаніе вѣка. изыдутъ ангели, и отлучатъ злыя отъ среды праведныхъ, и ввeргутъ ихъ въ пeщь огнену. ту будетъ плачь и скрeжетъ зубомъ. Глагола имъ ісусъ, разумѣсте ли сія вся; глаголаша ему, ей господи. онъ же рече имъ. сего ради всякъ книжникъ научився царствію небесному, подобенъ есть человѣку домовиту, иже износитъ отъ сокровища своего новая и вeтхая.

Зач., 56.* И бысть егда сконча ісусъ притчу сію, прeйде оттуду. и пришeдъ въ оч7ествіе свое, учаше ихъ на сонмищыхъ ихъ, яко дивитися имъ, и глаголати. откуду сему премудрость сія и силы; не сeй ли есть тектоновъ сынъ; не мати ли его нарицается маріамъ, и братія его, іаковъ, и іoсій, и симонъ, и іюда; и сeстры его, не вся ли въ насъ суть; откуду убо сему сія вся; и блажняхуся о нeмъ. Ісусъ же рече имъ. нѣсть пророкъ бeсчести, токмо во отчествіи своeмъ, и въ дому своeмъ. и не сотвори ту силы многы, за невѣрство ихъ.

Глава, 14.

Зач., 57. Въ то врeмя услышавъ иродъ четвертовластникъ слухъ ісусовъ, и рече отрокомъ своимъ, сeй есть іoаннъ креститель, той воскресе отъ мeртвыхъ, и сего ради силы дѣются о нeмъ. Иродъ бо емъ іoанна, связа его и всади въ темницу, иродіяды ради жены филиппа брата своего. Глаголаше бо ему іoаннъ, не достоитъ ти имѣти ея. и хотяше его убити, убояся народа. зане яко пророка его имѣяху. дни же бывшу рождества иродова, пляса дщи иродіадина посредѣ, и угоди иродови, тѣмъ же и съ клятвою изрече ей дати его же аще воспроситъ. она же наваждена матерію своeю, даждь ми рече здѣ на блюдѣ главу іoанна крестителя. и печаленъ бысть царь. клятвы же ради и за возлежащихъ съ нимъ, повелѣ дати ей. и пославъ усѣкну іoанна въ темници. и принесоша главу его на блюдѣ, и даша дѣвци, и отнесе матери своeй. И приступльше ученицы его, взяша тѣло его, и погребоша е, и пришeдше возвѣстиша ісусови. И слышавъ ісусъ, отиде оттуду въ корабли въ пусто мѣсто единъ. и слышавше народи, по нeмъ идоша, пѣши отъ градовъ.

Зач., 58.* И изшeдъ ісусъ, видѣ многъ народъ, и милосердова о нихъ, и исцѣли недужныя ихъ. Поздѣ же бывшу, приступиша къ нему ученицы его глаголюще. пусто есть мѣсто, и часъ уже мину. отпусти народы, да шeдше въ вeси купятъ брашна себѣ. Ісусъ же рече имъ, не трeбуютъ отити. дадите имъ вы ясти. они же глаголаша ему. не имамы здѣ, токмо пять хлѣбъ, и двѣ рыбѣ. онъ же рече, принесѣте ми ихъ сѣмо. и повелѣ народомъ возлежти на травѣ, и пріeмъ пять хлѣбы, и обѣ рыбѣ, возрѣвъ на небо, благослови, и преломивъ, дастъ ученикомъ хлѣбы, ученицы же народомъ. и ядоша вси и насытишася. и взяша избытки укрухъ, дванадесяте коша исполнь. ядущихъ же бѣ мужіи яко пять тысущъ, развѣ жeнъ и дѣтeй.

Зач., 59.* И абіе понуди ісусъ ученикы своя влѣсти въ корабль, и варити его на ономъ полу, дондеже отпуститъ народы. И отпустивъ народы, взыде на гору единъ помолитися. Поздѣ же бывшу, единъ бѣ ту. корабль же бѣ посредѣ моря влаяся волнами. бѣ бо противенъ вѣтръ. Въ четвeртую же стражу нощи, иде къ нимъ ісусъ, ходя по морю. и видѣвше его ученицы по морю ходяща, смутишася, глаголюще, яко призракъ есть. и отъ страха возопиша. Абіе же рече имъ ісусъ, глаголя. дерзайте, азъ есмь, не бойтеся. отвѣщавъ же пeтръ, рече. господи, аще ты еси, повели ми пріити къ тебѣ по водамъ. онъ же рече, пріиди. И излѣзъ искорабля пeтръ, хождаше по водамъ, пріити ко ісусови. видя же вѣтръ крѣпокъ, убояся. и начeнъ утопати, възопи глаголя. господи, спаси мя. И абіе ісусъ простеръ руку, ятъ его, и глагола ему. маловѣре, почтося усомнѣ; и влѣзшема има въ корабль, преста вѣтръ. Сущіи же въ корабли пришeдше, поклонишася ему, глаголюще. воистину божіи сынъ еси. и прешeдше, пріидоша въ зeмлю генисарeтску.

Зач., 60.* И познавше его мужіе мѣста того, послаша во всю страну ту. и принесоша къ нему вся болящая, и моляху его, да токмо прикоснутся воскрилію ризъ его. и елицы прикоснушася спасeни быша.

Глава, 15.

Тогда приступиша ко ісусови иже отъ іерусалима книжницы и фарисeе, глаголюще. почто ученицы твои преступаютъ преданія старецъ; не умываютъ бо рукъ своихъ егда хлѣбъ ядятъ. онъ же отвѣщавъ рече имъ. почто и вы преступаете заповѣдь божію за преданіе ваше; богъ бо заповѣда, глаголя. чти отца и матере, и иже злословитъ отца или матере, смeртію да умретъ. вы же глаголете, иже аще речeтъ отцу или матери, даръ. еже аще отъ мене пользовался еси. и да не почтeтъ отца своего или матри. и разористе заповѣдь божію, за преданіе ваше. лицемѣри, добрѣ пророчествова о васъ ісаія глаголя. Приближаются мнѣ людіе сіи усты своими, и устнами чтутъ мя, сердце же ихъ далeче отстоитъ отъ мене. всуе же чтутъ мя, учаще учeнія заповѣди человеческы. И призвавъ народы, рече имъ. слышите, и разумѣйте. Не входящее во уста сквернитъ человѣка, но исходящее изъ устъ, то сквернитъ человѣка.

Зач., 61.* Тогда приступльше ученицы его, рѣша ему. вѣси ли, яко фарисeе слышавше слово, соблазнишася; онъ же отвѣщавъ рече. всякъ садъ его же не насади отецъ мой небесныи, искоренится. оставите ихъ, вожди суть слѣпи слѣпцeмъ. Слѣпeцъ же слѣпца аще водитъ, оба въ яму впадeтася. отвѣщавъ же пeтръ, рече ему. скажи намъ притчу сію. ісусъ же рече имъ. единаче ли и вы безъ разума есте; не у ли разумѣваете, яко всяко еже входитъ во уста, во чрево вмѣщается, и афедрономъ исходитъ; исходящая же изъ устъ, отъ сердца исходятъ, и та сквернятъ человѣка. отъ сердца бо исходятъ помышлeнія зла, убійства, прелюбодѣянія, любодѣянія, татьбы, лжесвѣдѣтельства, хулы, сія суть сквернящая человѣка. а еже не умовeнами руками ясти, не сквернитъ человѣка.

Зач., 62.* И изшeдъ оттуду ісусъ, отиде въ страны тирскія и сидонскія. И се жена хананeйска отъ предѣлъ тѣхъ изшeдши, възопи къ нему, глаголющи. помилуй мя господи, сыне давыдовъ, дщи моя злѣ бѣсуется. онъ же не отвѣща ей словесе. и приступльше ученицы его, моляху его, глаголюще. отпусти ю, яко вопіeтъ въ слѣдъ насъ. онъ же отвѣщавъ, рече. нѣсмь посланъ, токмо ко овцамъ погибшимъ дому ізраилева. она же пришeдши поклонися ему, глаголющи. господи, помози ми. онъ же отвѣщавъ, рече. нѣсть добро отяти хлѣба чадомъ, и поврещи псомъ. она же рече, ей господи, ибо и пси ядятъ отъ крупицъ падающихъ отъ трапeзы господіи своихъ. Тогда отвѣщавъ ісусъ, рече ей. о жeно, вeлія вѣра твоя, буди тебѣ яко же хощеши. и исцѣлѣ дщи ея отъ того часа.

Зач., 63.* И прешeдъ оттуду ісусъ, пріиде на море галилeйское. и возшeдъ на гору, сѣдѣ ту. И приступиша къ нему народи мнози, имуще съ собою хромы, слѣпы, нѣмы, бѣдны, и ины многы. и привергоша ихъ къ ногама ісусовома, и исцѣли ихъ, яко же народомъ дивитися, видяще нѣмыя глаголюща, бѣдныя здравы, хромыя ходяща, и слѣпыя видяща, и славляху бога ізраилева.

Зач., 64.* Ісусъ же призвавъ ученикы своя, рече имъ. милосердую о народѣ сeмъ. яко уже дни три присѣдятъ мнѣ, и не имутъ чесо ясти. и отпустити ихъ не ядша не хощу, да не како ослабѣютъ на пути. И глаголаша ему ученицы его. откуду намъ въ пустыни хлѣби толицы, яко да насытится толикъ народъ; и глагола имъ ісусъ. колико хлѣбъ имате; они же рѣша. сeдмь, и мало рыбицъ. и повелѣ народомъ возлежти на земли. и пріeмъ сeдмь хлѣбы, и рыбы, хвалу воздавъ преломи, и дастъ ученикомъ своимъ, ученицы же народомъ. и ядоша вси, и насытишася. и взяша избыткы укрухъ, сeдмь кошницъ исполнь. ядшихъ же бяше, четыри тысуща мужій, развѣ жeнъ и дѣтeй. И отпустивъ народы, влѣзе въ корабль, и пріиде въ предѣлы магосподалынскы.

Глава, 16.

Зач., 65. И приступиша къ нему фарисeе и саддукeе, искушающе, вопросиша его, знаменія съ небесе показати имъ. онъ же отвѣщавъ рече имъ. вeчеру бывшу, глаголете, вeдро, чермнуетъбося небо. и утру, днeсь зима, чермну етъбося дряселуя небо. лицемѣри, лице убо небеси умѣете разсужати, знаменія же врeменемъ, не можете искусити; родъ лукавъ и прелюбодѣйныи, знаменія ищетъ. и знаменіе не дастся ему, токмо знаменіе іоны пророка. и оставль ихъ отиде. И прешeдше ученицы его на онъ полъ, забыша хлѣбы взяти.

Зач., 66.* Ісусъ же рече имъ. внемлѣте и блюдѣтеся отъ кваса фарисeйска и саддукeйска. они же помышляху въ себѣ, глаголюще. яко хлѣбы не взяхомъ. Разумѣвъ же ісусъ, рече имъ. что мыслите въ себѣ маловѣри, яко хлѣбы не взясте; не у ли разумѣете, ниже помните, пять хлѣбы пятимъ тысущамъ, и колико, кошъ взясте; ни ли сeдмь хлѣбы четыремъ тысущамъ, и колико кошницъ взясте; како не разумѣете, яко не о хлѣбѣхъ рѣхъ вамъ, внимати. но отъ кваса фарисeйска и саддукeйска; тогда разумѣша, яко не рече хранитися отъ кваса хлѣб наго, но отъ учeнія фарисeйска и саддукeйска.

Зач., 67.* Пришeдъ же ісусъ въ страны кесарія филипповы, вопрашаше ученикы своя, глаголя. кого мя глаголютъ человецы суща сына человеческаго; они же рѣша. ови убо іoанна крестителя, иніи же илію, друзіи же іеремію, или единого отъ пророкъ. Глагола имъ ісусъ. вы же кого мя глаголете быти; отвѣщавъ же симонъ пeтръ, рече. ты еси христосъ, сынъ бога живаго. И отвѣщавъ ісусъ, рече ему. Блажeнъ еси симоне, варъ іона, яко плоть и кровь не яви тебѣ, но отецъ мой иже на небесѣхъ. и азъ же тебѣ глаголю, яко ты еси пeтръ, и на сeмъ камени созижду церковь мою. и врата адова не удолѣютъ ей. И дамъ ти ключа царствія небеснаго. и еже аще свяжеши на земли, будетъ связано на небесѣхъ. и еже аще разрѣшиши на земли, будетъ разрѣшeно на небесѣхъ.

Зач., 68.* Тогда запрѣти ісусъ ученикомъ своимъ, да никомуже рекутъ, яко сeй ісусъ есть христосъ. оттолѣ начатъ ісусъ сказовати ученикомъ своимъ, яко подобаетъ ему ити во іерусалимъ, и много пострадати отъ старецъ, и архіерей и книжникъ, и убіeну быти, и трeтіи день воскреснути. Пeтръ же начатъ прерѣцати ему глаголя. милосердъ ты господи, не имать быти тебѣ се. онъ же обращся рече петрови. иди за мною сатана, соблазнъ ми еси, яко не мыслиши яже суть божія, но человеческая.

Зач., 69.* Тогда ісусъ, рече ученикомъ своимъ. аще кто хощетъ по мнѣ ити, да отвeржется себе, и возметъ крестъ свой, и по мнѣ грядeтъ. Иже бо аще хощетъ душу свою спасти, погубитъ ю. и иже аще погубитъ душу свою мене ради, обрящетъ ю. кая бо польза человѣку, аще миръ вeсь пріобрящетъ, душу же свою отщетитъ; или что дастъ человѣкъ измѣну за душу свою; пріити бо имать сынъ человеческіи въ славѣ отца своего, со ангелы своими, и тогда воздастъ комуждо по дѣяніемъ его. Аминь глаголю вамъ, яко суть нѣціи отъ здѣ стоящихъ, иже не имутъ вкусити смeрти, дондеже видятъ сына человеческаго грядуща въ царствіи своeмъ.

Глава, 17.

Зач., 70. И по днехъ шестихъ, поятъ ісусъ петра и іакова, и іoанна брата его, и возведе ихъ на гору высоку едины. и преобразися предъ ними, и просвѣтися лице его яко солнце, ризы же его быша бѣлы яко свѣтъ. И се явистася имъ моисeй и илія, съ нимъ глаголюща. отвѣщавъ же пeтръ, рече ко ісусови. господи, добро есть намъ здѣ быти. аще хощеши, сотворимъ здѣ три сѣни, тебѣ едину, и моисeoви едину, и едину иліи. ещe же ему глаголющу, се облакъ свѣтелъ осѣни ихъ. и се гласъ изъ облака глаголя. сeй есть сынъ мой возлюбленныи, о нeмъ же благоволихъ, того послушайте. И слышавше ученицы, падоша ницы, и убояшася зѣло. и приступль ісусъ, прикоснуся ихъ, и рече. востанѣте, и не бойтеся. Возвeдше же очи свои, никогоже видѣша, токмо ісуса единого. Исходящемъ имъ съ горы, заповѣда имъ ісусъ, глаголя. никомуже повѣдите видѣнія, дондеже сынъ человеческіи изъ мертвыхъ воскреснетъ.

Зач., 71.* И вопросиша его ученицы его, глаголюще. что убо книжницы глаголютъ, яко иліи подобаетъ пріити прeжде; ісусъ же отвѣщавъ рече имъ. илія убо пріидетъ прeжде, и устроитъ вся. Глаголю же вамъ, яко илія уже пріиде, и не познаша его. но сотвориша о нeмъ, елика восхотѣша. Тако и сынъ человеческіи имать пострадати отъ нихъ. Тогда разумѣша ученицы, яко о іoаннѣ крестители рече имъ.

Зач., 72.* И пришeдшемъ имъ къ народу, приступи къ нему человѣкъ, кланяяся ему и глаголя. господи, помилуй сына моего, яко на новы месяца бѣсуется, и злѣ страждетъ. множицею бо падаетъ въ огнь, и множицею въ воду. и приведохъ его ко ученикомъ твоимъ, и не возмогоша его исцѣлити. отвѣщавъ же ісусъ, рече. о роде невѣренъ, и развращeнъ, доколѣ буду съ вами, доколѣ терплю васъ; приведѣте ми его сѣмо. и запрѣти ему ісусъ, и изыде изъ него бѣсъ, и исцѣлѣ отрокъ отъ часа того. Тогда приступльше ученицы ісусови единому рѣша. почто мы не возмогохомъ изгнати его; ісусъ же рече имъ. за невѣрствіе ваше. Аминь бо глаголю вамъ. аще имате вѣру яко зeрно горушно, речeте горѣ сeй, преиди отсюду тамо, и прeидетъ. и ничтоже не невозможно будетъ вамъ. сeй же родъ не исходитъ, токмо молитвою и постомъ. Живущемъ же имъ въ галилeи, рече имъ ісусъ. прeданъ имать быти сынъ человеческіи, въ руцѣ человѣкомъ, и убіютъ его, и трeтіи день востанетъ. И скорбни быша зѣло.

Зач., 73.* Пришeдшимъ же имъ въ капернаумъ, при ступиша пріeмлющеи дидрахма къ петрови, и рѣша. учитель вашъ не дастъ ли дидрахма; глагола, ей. и егда вниде въ домъ, предвари его ісусъ, глаголя. чтотися мнитъ симоне; царіе зeмстіи отъ кыихъ пріeмлютъ дани, или кинсонъ, отъ своихъ ли сыновъ, или отъ чуждихъ; глагола ему пeтръ, отъ чуждихъ. Рече ему ісусъ. убо свободни суть сынове. но да не соблазнимъ ихъ. шeдъ въ море, ввeрзи удицу, и яже прeжде имеши рыбу возми. и отвeрзъ уста ей обрящеши статиръ. той взeмъ даждь имъ за мя и за ся.

Глава, 18.

Зач., 74. Въ той часъ приступиша ученицы ко ісусу глаголюще. кто убо боліи есть въ царствіи небеснѣмъ; и призвавъ ісусъ отроча, постави е посредѣ ихъ, и рече. Аминь глаголю вамъ, аще не обратитeся, и будете яко дѣти, не внидете въ царство небесное. иже бо ся смѣритъ яко отроча се, той есть боліи въ царствіи небеснѣмъ. И иже аще пріиметъ отроча таково во имя мое, мене пріeмлетъ. а иже аще соблазнитъ единого малыхъ сихъ вѣрующихъ въ мя, уне ему есть, да обѣсится жeрновъ осeльскыи на выи его, и потонетъ въ пучинѣ морстѣй. горе миру отъ соблазнъ. нужда бо есть пріити соблазномъ. обаче горе человѣку тому, имъ же соблазнъ приходитъ. Аще ли рука твоя или нога твоя соблажняетъ тя. отсѣци ю, и вeрзи отъ себе. добрѣйше ти есть внити въ животъ хрому, или бѣдну. нeжели двѣ руцѣ и двѣ нозѣ имущу, ввeржену быти въ огнь вѣчныи. И аще око твое соблажняетъ тя, изми е, и вeрзи отъ себе. добрѣйше ти есть со единѣмъ окомъ въ животъ внити, нeже двѣ оцѣ имущу ввeржену быти въ геeнну огненую.

Зач., 75.* Блюдѣте, да не прeзрите единого отъ малыхъ сихъ. Глаголю бо вамъ яко ангели ихъ на небесѣхъ выну видятъ лице отца моего небеснаго. Пріиде бо сынъ человеческіи взыскати и спасти погыбшаго. Чтося вамъ мнитъ; аще будетъ нѣкоему человѣку, сто овeцъ, и заблудитъ едина отъ нихъ. не оставитъ ли девятьдесятъ и дeвять въ горахъ, и шeдъ ищетъ заблуждьшее; и аще будетъ обрѣсти ю. аминь глаголю вамъ. яко радуется о нeй, паче, нeже о девятьдесятихъ и дeвять не заблуждшихъ. Тако нѣсть воля предъ отецeмъ вашимъ небеснымъ, да погыбнетъ единъ отъ малыхъ сихъ. Аще согрѣшитъ къ тебѣ братъ твой, иди и обличи его между собою и тѣмъ единѣмъ. Аще тебе послушаетъ, пріобрѣлъ еси брата твоего. аще ли тебе не послушаетъ, поими съ собою пакы единого или два, да при устѣхъ двою или тріeхъ свѣдѣтелій станетъ всякъ глаголъ. Аще же не послушаетъ ихъ, повѣждь церкови. аще же и церковь преслушаетъ, буди ти яко язычникъ и мытарь.

Зач., 76.* Аминь бо глаголю вамъ, елика аще свяжете на земли, будутъ связана на небеси. и елика аще разрѣшите на земли, будутъ разрѣшeна на небесѣхъ. Пакы аминь глаголю вамъ. яко аще два отъ васъ совѣщаета на земли, о всякой вeщи еже аще просита, будетъ има отъ отца моего иже на небесѣхъ. Идѣже бо еста два или тріе собрани во имя мое, ту есмь посредѣ ихъ. Тогда приступль къ нему пeтръ, рече. господи, коль краты аще согрѣшитъ въ мя братъ мой, и отпущу ему; до сeдмь кратъ ли; глагола ему ісусъ, не глаголю тебѣ до сeдмь кратъ. но до сeдмьдесятъ кратъ седмицею.

Зач., 77.* Сего ради уподобися царствіе небесное человѣку царю, иже восхотѣ стязатися о словеси съ рабы своими. начeншу же ему стязатися, приведоша ему единого должника тмою талантъ. не имущу же ему воздати, повелѣ и господь его продати, и жену его и чада, и вся елика имяше, и отдати. Падъ убо рабъ той кланяшеся ему глаголя. господи, потерпи на мнѣ, и вся ти воздамъ. Милосердовавъ же господь раба того, прости его, и долгъ отпусти ему. Изшeдъ же рабъ той, обрѣте единого клеврeтъ своихъ, иже бѣ долженъ ему сто пѣнязь. и емъ его давляше глаголя. отдаждь ми имъ же ми еси долженъ. падъ убо клеврeтъ его на нозѣ его, моляше его глаголя. потерпи на мнѣ, и вся воздамъ ти. онъ же не хотяше, но вeдъ всади его въ темницу, дондеже воздастъ должное. Видѣвше же клеврeти его бывшая, сжалиша си зѣло, и пришeдше сказаша господину своему вся бывшая. Тогда призвавъ его господинъ его, глагола ему. Рабе лукавыи, вeсь долгъ онъ отпустихъ тебѣ, понeже умоли мя. не подобаше ли и тебѣ помиловати клеврeта своего, яко же и азъ тя помиловахъ; и прогнѣвався господь его, предастъ его мучителемъ, дондеже воздастъ вeсь долгъ свой. Тако и отецъ мой небесныи сотворитъ вамъ, аще не отпустите кождо брату своему отъ сердцъ вашихъ прегрѣшeнія ихъ.

Глава, 19.

И бысть егда сконча ісусъ словеса сія, прeиде отъ галилeя. и пріиде въ предѣлы іюдeйскія, обонъ полъ іoрдана. и по нeмъ идоша народи мнози, и исцѣли ихъ ту.

Зач., 78.* И приступиша къ нему фарисeе, искушающе его, и глаголаша ему. аще достоитъ человѣку пустити жену свою по всякой винѣ; онъ же отвѣщавъ рече имъ. нѣсте ли чли, яко сотворивыи искони, мужескіи полъ и жeнскіи сотворилъ я есть; и рече, сего ради оставитъ человѣкъ отца своего и матере, и прилѣпится къ женѣ своeй, и будета оба въ плоть едину. яко же ктому нѣста два, но плоть едина. еже убо богъ сочета, человѣкъ да не разлучаетъ. Глаголаша ему. что убо моисeй заповѣда дати книгу распустную, и отпустити ю; глагола имъ, яко моисeй по жестосeрдію вашему повелѣ вамъ пустити жeны ваша. изначала же не бысть тако. Глаголю же вамъ, яко иже аще пуститъ жену свою, развѣ словесе прелюбодѣйна, и ожeнится иною, прелюбы творитъ. и женяися пущеницею, прелюбы дѣетъ. Глаголаша ему ученицы его. аще тако есть вина человѣку съ женою, уне есть не женитися. онъ же рече имъ. не вси вмѣщаютъ словесе сего, но имъ же дано есть. суть бо скопцы, иже изъ чрeва матерня родишася тако. и суть скопцы, иже скопишася отъ человѣкъ. И суть скопцы, иже исказиша сами себе царствія ради небеснаго. могіи вмѣстити, да вмѣститъ. Тогда приведоша къ нему дѣти, да руцѣ возложитъ на нихъ, и помолится, ученицы же запрѣтиша имъ. ісусъ же рече имъ. оставите дѣтeй, и не возбраняйте имъ пріити ко мнѣ. таковыхъ бо есть царство небесное. и возложъ на нихъ руцѣ, отиде оттуду.

Зач., 79.* И се единъ нѣкіи приступль, рече ему. учителю благіи, что благо сотворю, да имамъ животъ вѣчныи; онъ же рече ему. что мя глаголеши блага; никтоже благъ, токмо единъ богъ. аще ли хощеши внити въ животъ, соблюди заповѣди. Глагола ему, кыя; ісусъ же рече. еже не убіeши, не прелюбы сотвориши, не украдеши, не лжесвѣдѣтельствуеши. чти отца и матре. и возлюбиши искреняго своего яко самъ себе. Глагола ему юноша, вся сія сохранихъ отъ юности моея. что есмь и еще не докончалъ; рече ему ісусъ. аще хощеши совершeнъ быти, иди, продаждь имѣніе твое, и даждь нищимъ, и имѣти имаши сокровище на небеси, и гряди въ слѣдъ мене. Слышавъ же юноша слово, отиде скорбя. бѣ бо имѣя стяжанія многа. ісусъ же рече ученикомъ своимъ. аминь глаголю вамъ, яко неудобь богатыи внидетъ въ царство небесное. Пакы же глаголю вамъ. яко удобѣе есть вельбуду сквозѣ иглѣны уши проити, нeже богату въ царствіе божіе внити. Слышавше же ученицы его, дивляхуся зѣло, глаголюще. кто убо можетъ спасeнъ быти; возрѣвъ же ісусъ, рече имъ. отъ человѣкъ се невозможно есть, отъ бога же вся возможна. Тогда отвѣщавъ пeтръ, рече ему. се мы оставихомъ вся, и въ слѣдъ тебе идохомъ. что убо будетъ намъ; ісусъ же рече имъ. аминь глаголю вамъ, яко вы шeдшеи по мнѣ, въ пакы бытіе, егда сядетъ сынъ человеческіи на престолѣ славы своея, сядете и вы на двою надесяте престолу, судяще обѣма надесяте колѣнома ізраилевома. И всякъ иже оставитъ домъ, или братію, или сестры, или отца, или матере, или жену, или чада, или сeла, имени моего ради, сторицею пріиметъ, и животъ вѣчныи наслѣдитъ. Мнози же будутъ пeрви, послѣдніи. и послѣдни, пeрвіи.

Глава, 20.

Зач., 80. Подобно есть царствіе небесное, человѣку домовиту, иже изыде купно утро наяти дѣлателя въ виноградъ свой. и совѣщавъ съ дѣлатели по пѣнязю на день, посла ихъ въ виноградъ свой. И изшeдъ въ трeтіи часъ, видѣ ины стояща на торжищи праздны, и тѣмъ рече. идѣте и вы въ виноградъ мой. и еже будетъ правда, дамъ вамъ. они же идоша. Пакы же изшeдъ въ шестыи, и девятыи часъ, сотвори такожде. Во единыи же надесяте часъ изшeдъ, обрѣте другыя стояща праздны. и глагола имъ, что здѣ стоите вeсь день праздны; глаголаша ему, яко никтоже насъ наятъ. И глагола имъ, идѣте и вы въ виноградъ мой. и еже будетъ праведно, пріимете. Вeчеру же бывшу, глагола господинъ винограда къ приставнику своему, призови дѣлателя, и даждь имъ мзду, начeнъ отъ послѣднихъ до пeрвыхъ. и пришeдше иже во единыи надесяте часъ, пріяша по пѣнязю. Пришeдше же пeрвіи, мнѣху вяще пріяти. пріяша и тіи по пѣнязю. пріeмше же роптаху на господина, глаголюще, яко сіи послѣдніи, единъ часъ сотвориша, и равны намъ сотворилъ ихъ еси, понeсшимъ тяготу дне и варъ. онъ же отвѣщавъ, рече единому ихъ. друже, не обижу тебе. не по пѣнязю ли совѣща со мною; возми свое, и иди. хощу же и сему послѣднему дати, яко же и тебѣ. или нѣсть ми лѣть сотворити еже хощу во своихъ ми; Аще око твое лукаво есть, яко азъ благъ есмь; тако будутъ послѣдніи, пeрви. и пeрвіи, послѣдни. Мнози бо суть звани, мало же избранныхъ.

Зач., 81.* И восходя ісусъ во іерусалимъ, поятъ оба надесяте ученика едины на пути, и рече имъ. се восходимъ во іерусалимъ, и сынъ человеческыи прeданъ будетъ архіерeoмъ и книжникомъ, и осудятъ его на смерть, и предадятъ его языкомъ, на поруганіе и біeніе и пропятіе, и въ трeтіи день воскреснетъ. Тогда приступи къ нему мати сыну зеведeoву съ сынома своима, кланяющися, и просящи нѣчто отъ него. онъ же рече ей, чесо хощеши; глагола ему. рцы, да сядета сія оба сына моя, единъ одесную тебе, и единъ ошую тебе, въ царствіи твоeмъ. отвѣщавъ же ісусъ, рече. не вѣстася чесо просита. можета ли пити чашу, юже азъ имамъ пити. или крещeніемъ, имъ же азъ крещаюся, креститися; глаголаста ему, можевѣ. и глагола има, чашу убо мою испіeта, и крещeніемъ, имъ же азъ крещаюся, креститася. а еже сѣсти одесную мене, и ошую мене, нѣсть мое дати, но имъ же уготовася отъ отца моего. И слышавше дeсять, негодоваша о обою брату. Ісусъ же призвавъ ихъ, рече. вѣсте яко князи языкъ, господствуютъ ими, и велиціи, обладаютъ ими. не тако же будетъ въ васъ. но иже аще хощетъ въ васъ вящшіи быти, да будетъ вамъ слуга. и иже аще хощетъ въ васъ быти пeрвыи, буди вамъ рабъ. Яко же сынъ человеческіи не пріиде да послужатъ ему, но послужити, и дати душу свою избавлeніе за многыхъ.

Зач., 82.* И исходящу ему отъ іерихона, по нeмъ иде народъ многъ. И се два слѣпца сѣдяща при пути, слышавша яко ісусъ мимо ходитъ, возописта глаголюща, помилуй ны господи сыне давыдовъ. народъ же запрѣти има да умолчита. она же паче вопіяста глаголюща. помилуй ны господи сыне давыдовъ. И ставъ ісусъ, возгласи я, и рече. что хощета, да сотворю вама; глаголаста ему. господи, да отвeрзетася очи наю. милосердовавъ же ісусъ, прикоснуся очію има. и абіе прозрѣста има очи, и по нeмъ идоста.

Глава, 21.

Зач., 83. И егда приближишася во іерусалимъ, и пріидоша въ виѳсфагію къ горѣ елеонстѣй. Тогда ісусъ посла два ученика, глаголя има. идѣта въ вeсь яже прямо вама. и абіе обрящете осля привязано, и жрѣбя съ нимъ, и отрѣшивше приведѣта ми. и аще вама кто речeтъ что, речeта, яко господь ею трeбуетъ, абіе же послетъ я. Се же все бысть, да сбудется речeное пророкомъ глаголющимъ. рцѣте дщeри сіоновѣ. се царь твой грядeтъ тебѣ кротокъ, всѣдъ на осля и жрѣбя, сына ярeмнича. шeдша же ученика, и сотворша яко же повелѣ има ісусъ. приведоста осля и жрѣбя, и возложиша верху ею ризы своя, и всѣде верху ихъ. Множайшіи же народи постилаху ризы своя по пути. друзіи же рѣзаху вѣтви отъ дрeвъ, и постилаху по пути. Народи же предходящеи ему, и въслѣдствующеи зваху глаголюще, осанна сыну давыдову. благословeнъ грядыи во имя господне, осанна въ вышнихъ. И вшeдшу ему во іерусалимъ, потрясeся вeсь градъ глаголя, кто есть сeй; народи же глаголаху, сeй есть ісусъ пророкъ, иже отъ назарeта галилeйска.

Зач., 83.* И вниде въ церковь божію, и изгна вся продаю щая и купующая въ церкови, и трапeзы торжникомъ испровeрже, и сѣдалища продающихъ голубы. и глагола имъ. писано есть, храмъ мой, храмъ молитвы наречeтся. вы же сотвористе и вертeпъ разбойникомъ. И приступиша къ нему хроми и слѣпи въ церкови, и исцѣли ихъ. Видѣвше же архіерeе и книжницы чюдеса яже сотвори, и отроки зовуща въ церкови, и глаголюща, осанна сыну давыдову. негодоваша, и рѣша ему. слышиши ли, что сіи глаголютъ; ісусъ же рече имъ, ей. нѣсте ли чли николиже; яко изъ устъ младенецъ, и ссущихъ съвершилъ еси хвалу; и оставль ихъ, изыде вонъ изъ града въ виѳанію, и водворися ту.

Зач., 84.* Утру же возвращся во градъ, взалка. и узрѣвъ смоковницу едину при пути, пріиде къ нeй, и ничтоже обрѣте на нeй, токмо листвіе едино. и глагола ей. да николиже отъ тебе плода будетъ во вѣки. и абіе исше смоковница. и видѣвше ученицы дивишася глаголюще, како абіе исше смоковница; отвѣщавъ же ісусъ, рече имъ. аминь глаголю вамъ. аще имате вѣру, и не усумнитeся, не токмо смоковничное сотворите. но аще и горѣ сeй речeте, двигнися, и вeрзися въ море, будетъ. И вся елика аще воспросите въ молитвѣ, вѣрующе, пріимете.

Зач., 85.* И пришeдшу ему въ церковь, приступиша къ нему учащу, архіерeе и старцы людстіи глаголюще. коею властію сія твориши; и кто ти дастъ область сію; отвѣщавъ же ісусъ, рече имъ. вопрошу вы и азъ слово едино, еже аще речeте мнѣ, и азъ вамъ реку, коею властію сія творю. крещeніе іoанново откуду бѣ, съ небесе ли, или отъ человѣкъ; они же помышляху въ себѣ глаголюще. аще речeмъ съ небесе, речeтъ намъ, почто убо не вѣровасте ему; аще ли речeмъ отъ человѣкъ. боимся народа. вси бо имутъ іoанна яко пророка. и отвѣщавше ісусови, рѣша, не вѣмы. рече имъ и той, ни азъ вамъ глаголю, коею властію сія творю.

Зач., 86.* Чтожеся вамъ мнитъ; человѣкъ нѣкіи имяше два сына, и пришeдъ къ пeрвому рече. чадо, иди, днeсь дѣлай въ виноградѣ моeмъ. онъ же отвѣщавъ, рече, не хощу. послѣди же раскаявся, иде. и приступль къ другому, рече такожде. онъ же отвѣщавъ, рече. азъ господи иду, и нeиде. кыи отъ обою сотвори волю отчу; глаголаша ему, пeрвыи. Глагола имъ ісусъ. аминь, глаголю вамъ, яко мытаре и любо дѣица варяютъ вы въ царствіи божіи. пріиде бо къ вамъ іoаннъ креститель путeмъ праведнымъ, и не вѣровасте ему. мытаре же и любодѣица вѣроваша ему. Вы же видѣвше не раскаястеся послѣди вѣровати ему.

Зач., 86.* Ину притчу слышите. человѣкъ нѣкіи бѣ домовитъ, иже насади виноградъ, и оплотомъ огради его, и ископа въ нeмъ точило, и созда столпъ, и вдастъ дѣлателемъ, и отиде. Егда же приближися врeмя плодомъ, посла рабы своя къ дѣлателемъ, пріяти плоды его. И емше дѣлателе рабы его, ового убо биша, ового же убиша, ового же каменіемъ побиша. Пакы посла ины рабы множайша пeрвыхъ. и сотвориша имъ такожде. Послѣди же посла къ нимъ сына своего глаголя, усрамятся сына моего. дѣлателе же видѣвше сына, рѣша въ себѣ, сeй есть наслѣдникъ, пріидѣте убіeмъ его, и удержимъ достояніе его. и емше его, изведоша вонъ изъ винограда, и убиша. Егда убо пріидетъ господинъ винограда, что сотворитъ дѣлателемъ тѣмъ; глаголаша ему, злыхъ злѣ погубитъ ихъ, и виноградъ предастъ инѣмъ дѣлателемъ, иже воздадятъ ему плоды во времена своя. Глагола имъ ісусъ, нѣсте ли чли николиже въ писаніихъ; камень, его же не въ ряду сотвориша зиждущеи, сeй бысть въ главу углу. отъ господа бысть си, и есть дивна во очію вашею.

Зач., 88.* Сего ради глаголю вамъ, яко отимется отъ васъ царствіе божіе, и дастся языку творящему плоды его. и падыи на камени сeмъ, сокрушится. а на нeмъ же падeтъ, сотрыетъ и. И слышавше архіерeе и фарисeе притча его, разумѣша яко о нихъ глаголетъ. и ищуще его яти, убояшася народа. понeже яко пророка его имѣяху.

Глава, 22.

Зач., 89. И отвѣщавъ ісусъ, пакы рече имъ въ притчахъ глаголя. уподобися царствіе небесное человѣку царю, иже сотвори бракы сыну своему. и посла рабы своя призвати званыя на бракы, и не хотяху пріити. Пакы посла ины рабы глаголя. рцѣте званымъ. Се обѣды мои уготовахъ. юнцы мои и упитанная исколeна, и вся готова, пріидѣте на бракы. они же небрeгше отидоша, овъ убо на село свое, овъ же на купля своя. прочіи же емше рабы его, досадиша имъ, и убиша ихъ. и слышавъ царь той, разгнѣвася. и пославъ воя своя, погуби убійца оны, и градъ ихъ зажже. Тогда глагола рабомъ своимъ, бракъ убо готовъ есть. званіи же не быша достойни. Идѣте убо на исходища путій, и елицѣхъ аще обрящете, призовѣте на бракы. И изшeдше раби они на распутія, собраша всѣхъ, елицѣхъ обрѣтоша злыя же и добрыя. и исполнися бракъ возлежащихъ. Вшeдъ же царь видѣти возлежащихъ. видѣ ту человѣка не оболчeна въ одѣяніе брачное. И глагола ему, друже, како вниде сѣмо, не имы одѣянія брачна; онъ же умолче. Тогда рече царь слугамъ. связавше ему руцѣ и нозѣ, возмѣте его, и ввeрзѣте во тму кромѣшную. ту будетъ плачь и скрeжетъ зубомъ. мнози бо суть звани, мало же избранныхъ.

Зач., 90.* Тогда шeдше фарисeе, совѣтъ пріeмше, яко да обольстятъ его словомъ. и посылаютъ къ нему ученикы своя со иродіяны, глаголюще. учителю, вѣмы яко истиненъ еси, и пути божію воистину учиши, и нерадиши ни о комъ же. не бо зриши на лице человѣкомъ. рци убо намъ, чтотися мнитъ; достойно ли есть дати кинсонъ кесарeви, или ни; разумѣвъ же ісусъ лукавство ихъ, рече. что мя искушаете лицемѣри; покажите ми златицу кинсонную. они же принесоша ему пѣнязь. и глагола имъ, чіи образъ сeй и написаніе; глаголаша ему, кесарeвъ. Тогда глагола имъ. воздадите убо кесарeва кесарeви. и божія богови. И слышавше, дивишася. и оставльше его отидоша.

Зач., 91.* Въ той день приступиша къ нему саддукeе, иже глаголютъ не быти воскресeнію. и вопросиша его, глаголюще. учителю, моисeй рече. аще кто умретъ не имы чадъ, да поиметъ братъ его жену его, и воскреситъ сѣмя брата своего. бѣше же въ насъ сeдмь братія, и пeрвыи ожeнься умре, и не имы сѣмене, остави жену свою брату своему. такожде же и вторыи, и трeтіи, даже до седмаго. Послѣди же всѣхъ умре и жена. въ воскрешeніе убо, котораго отъ седмихъ будетъ жена; вси бо имѣша ю. отвѣщавъ же ісусъ, рече имъ. прельщаетеся, не вѣдяще писанія, ни силы божія. въ воскресeніе бо ни жeнятся ни посягаютъ. но яко ангели божіи на небеси суть. о воскресeніи же мертвыхъ, нѣсте ли чли речeнаго вамъ богомъ, глаголющемъ. азъ есмь богъ авраамовъ, и богъ ісааковъ, и богъ іаковль; нѣсть богъ, богъ мертвыхъ, но богъ живыхъ. И слышавше народи, дивляхуся о учeніи его.

Зач., 92.* Фарисeе же слышавше яко посрами саддукeя. собрашася вкупѣ. И вопроси единъ отъ нихъ законо учитель, искушая его, и глаголя. учителю, кая заповѣдь болши есть въ законѣ; ісусъ же рече ему. возлюбиши господа бога твоего всѣмъ сердцемъ твоимъ. и всeю душeю твоeю, и всeю мыслію твоeю. Си есть пeрвая и болшая заповѣдь. Вторая же подобна ей. возлюбиши искреняго твоего яко самъ себе. въ сію обою заповѣдію вeсь законъ и пророцы висятъ. Собраномъ же фарисeoмъ, вопроси ихъ ісусъ, глаголя. чтося вамъ мнитъ о христѣ, чіи есть сынъ; глаголаша ему, давыдовъ. Глагола имъ. како убо давидъ духомъ господа его нарицаетъ глаголя. Рече господь господви моему, сѣди одесную мене, дондеже положу врагы твоя подножіе ногама твоима. аще убо давидъ нарицаетъ его господа, и како сынъ ему есть; и никтоже можаше отвѣщати ему словесе, ниже смѣяше кто отъ того дне вопросити его ктому.

Глава, 23.

Зач., 93. Тогда ісусъ глагола къ народомъ, и ученикомъ своимъ, глаголя. на моисeoвѣ сѣдалищи сѣдоша книжницы и фарисeе. вся убо елика аще рекутъ вамъ блюсти, соблюдайте и творите. по дѣломъ же ихъ не творите. глаголютъ бо, и не творятъ. Связуютъ бо бремена тяжка и бѣднѣ носима, и возлагаютъ на плеща человеческа. пeрстомъ же своимъ не хотятъ двигнути ихъ. вся же дѣла своя творятъ, да видими будутъ человѣкы. расширяютъ же хранилища своя, и величаютъ воскрилія ризъ своихъ. любятъ же прeже возлеганія на вeчерѣхъ, и прeже сѣданія на сонмищихъ, и цѣлованія на торжищихъ, и зватися отъ человѣкъ, учителю учителю. вы же не нарицайтеся учителе. единъ бо есть учитель вашъ христосъ, вси же вы братія есте. и отца не зовѣте себѣ на земли. единъ бо отецъ вашъ иже на небесѣхъ. ниже нарицайтеся наставници. единъ бо есть наставникъ вашъ христосъ. боліи же въ васъ, да будетъ вамъ слуга. Иже бо вознесeтся, смирится. и смѣряяися, вознесeтся.

Зач., 94.* Горе же вамъ книжницы и фарисeе лицемѣри, яко затворяете царствіе небесное предъ человѣкы. вы бо не входите, ни входящихъ оставляете внити. горе вамъ книжницы и фарисeе лицемѣри, яко снѣдаете домы вдовицъ и виною далeче молитвы творяще. сего ради лишшее пріимете осужeніе. Горе вамъ книжницы и фарисeе лицемѣри, яко преходите море и сушу, сотворити единого пришeльца, и егда будетъ, творите его сына геeнны сугубѣйша васъ. Горе вамъ вожди слѣпіи, глаголющеи, иже аще кленeтся церковію, ничесоже есть. а иже кленeтся златомъ церковнымъ, долженъ есть. буи слѣпіи, коe бо боле есть, злато ли, или церкови, святящія злато; и иже аще кленeтся олтарeмъ, ничесоже есть. а иже кленeтся даромъ иже верху его, долженъ есть. буи и слѣпіи, что бо боле, даръ ли, или олтарь святяи даръ; иже убо кленeтся олтарeмъ, кленeтся имъ, и сущимъ верху его. и иже кленeтся церковію, кленeтся ею, и живущимъ въ нeй. и кленыися небесeмъ, кленeтся престоломъ божіимъ, и сѣдящимъ на нeмъ.

Зач., 95.* Горе вамъ книжницы и фарисeе лицемѣри, яко одесятствуете мятву, и копръ, и киминъ. и остависте вящьшая закону, судъ и милость и вѣру. сія же подобаше творити, и онѣхъ не оставляти. Вожди слѣпіи, оцѣжающеи комары, велбуда же пожирающе. Горе вамъ книжницы и фарисeе лицемѣри, яко очищаете внѣшнее сткляници и блюду, внутрь юду же суть полни хищeнія и неправды. фарисeю слѣпыи, очисти прeжде внутренее сткляници и блюду, да будетъ и внѣшнее има чисто. горе вамъ книжницы и фарисeе лицемѣри, яко подобитеся гробомъ повапленомъ, иже внѣ юду убо являются красни, внутрь юду же полни суть костіи мертвыхъ, и всякоя нечистоты. Тако и вы, внѣ юду убо являетеся человѣкомъ праведни, внутрь юду же есте полни лицемѣрія и беззаконія.

Зач., 96.* Горе вамъ книжницы и фарисeе лицемѣри, яко зиждете гробы пророческія, и красите ракы праведныхъ, и глаголете, аще быхомъ были во дни отецъ нашихъ, не быхомъ убо обѣщници имъ были въ крови пророкъ. Тѣмъ же сами свѣдѣтельствуете себѣ яко сынове есте избившихъ пророкы. и вы исполните мѣру отецъ вашихъ. змія порождeнія ехиднова, како убѣжите отъ суда огня геeнскаго; сего ради се азъ послю къ вамъ пророкы, и премудры, и книжникы, и отъ нихъ убіeте и распнете, и отъ нихъ біeте на сонмищихъ вашихъ, и ижденeте отъ града во градъ. яко пріидетъ на вы всяка кровь праведна проливаема на земли, отъ крове авеля праведнаго, до крове захарія сына варахіина, его же убисте между церковію и олтарeмъ. Аминь глаголю вамъ, яко пріидутъ вся сія на родъ сeй. Іерусалимъ, іерусалимъ, избивыи пророкы, и каменіемъ побивая посланныя къ тебѣ, коль краты восхотѣхъ собрати чада твоя, яко же собираетъ кокошъ птенца своя подъ крилѣ, и не восхотѣсте; се оставляется вамъ домъ вашъ пустъ. Глаголю бо вамъ, яко не имате мене видѣти отсeлѣ, дондеже речeте, благословeнъ грядыи во имя господне.

Глава, 24.

Зач., 97.* И изшeдъ ісусъ, идяше отъ церкове. и приступиша къ нему ученицы его, показати ему зданія церковная. ісусъ же рече имъ. видите ли вся сія; аминь глаголю вамъ, не имать остати здѣ камень на камени, еже не разорится.

Зач., 98.* Сѣдящу же ему на горѣ елеонстѣй, присту пиша къ нему ученицы на единѣ глаголюще. рци намъ, когоспода сія будутъ; и что есть знаменіе твоего пришeствія и кончина вѣку; и отвѣщавъ ісусъ, рече имъ. блюдѣте, да никтоже васъ прельститъ. мнози бо пріидутъ во имя мое, глаголюще, азъ есмь христосъ, и многы прельстятъ. Услышати же имате брани, и слышанія бранемъ. зрите, не ужасайтеся. подобаетъ бо всѣмъ симъ быти, но не тогда есть кончина. востанетъ бо языкъ на языкъ, и царство на царство. И будутъ глади и пагубы и труси по мѣста. вся же сія начало болѣзнемъ. Тогда предадятъ вы въ скорби, и убіютъ вы, и будете ненавидими всѣми языкы, имени моего ради. И тогда соблазнятся мнози, и другъ друга предадятъ, и возненавидитъ другъ друга. И мнози лжепророцы востанутъ, и прельстятъ многыя, и за умножeніе беззаконія, изсякнетъ любы многыхъ.

Зач., 99.* Претерпѣвыи же до конца, той спасeтся. и проповѣсться сіе евангеліе царствія, по всeй вселeннѣй, во свѣдѣтельство всѣмъ языкомъ, и тогда пріидетъ кончина. Егда убо узрите мeрзость запустѣнія, речeную даніиломъ пророкомъ, стоящу на мѣстѣ святѣ, иже чтeтъ да разумѣетъ. Тогда сущіи во іудeи, да бѣжатъ на горы. и иже на кровѣ, да не сходитъ взяти яже въ дому его. и иже на селѣ, да не возвратится вспять взяти ризъ своихъ. Горе же непразднымъ, и доящимъ въ тыи дни. Молитежеся, да не будетъ бѣжъство ваше зимѣ, ни въ суботу. будетъ бо тогда скорбь вeлія, якова же нѣсть была отъ начала миру, досeлѣ, ниже имать быти. и аще не быша прекратилися дніе тіи, не бы убо спаслася всяка плоть. избранныхъ же ради прекратятся дніе тіи. Тогда аще кто речeтъ вамъ. се здѣ христосъ, или ондѣ, не имѣте вѣры. востанутъ бо лжехристи и лжепророцы, и дадятъ знаменія вeлія и чюдеса, яко же прельстити аще возможно и избранныя. се прeже рѣхъ вамъ. аще убо рекутъ вамъ. се въ пустыни есть, не изыдѣте. се въ сокровищыхъ, не имѣте вѣры.

Зач., 100.* Яко же бо молніи исходитъ отъ востокъ, и является до западъ, тако будетъ и пришeствіе сына человеческаго. идѣже бо аще будетъ трупъ, тамо соберутся орли. Абіе же по скорби дніи тѣхъ, солнце помeркнетъ и луна не дастъ свѣта своего, и звѣзды спаднутъ съ небесе, и силы небесныя подвигнутся. И тогда явится знаменіе сына человеческаго на небеси. И тогда восплачются вся колѣна земная. и узрятъ сына человеческаго грядуща на облацѣхъ небесныхъ, съ силою и славою многою. и послетъ ангелы своя, съ трубнымъ гласомъ вeліемъ, и соберутъ избранныя его отъ четырехъ вѣтръ, отъ конeцъ небесъ, до конeцъ ихъ. отъ смоковница же научитеся притчи. егда уже вѣія ея будутъ млада, и листвіе прозябнетъ, вѣдите яко близъ есть жатва. тако и вы, егда видите сія вся, вѣдите яко близъ есть при двeрехъ.

Зач., 101.* Аминь глаголю вамъ, не мимо идетъ родъ сeй, дондеже вся сія будутъ. небо и земля мимо идетъ, словеса же моя не мимо идутъ.

Зач., 102.* О дни же томъ, и часѣ, никтоже вѣсть. ни ангели небесніи, токмо отецъ мой единъ. Яко же бо бысть во дни ноевы, тако будетъ и пришeствіе сына человеческаго. Яко же бо бѣху во дни прeже потопа, ядуще же и піюще. женящеся и посягающе, до него же дне вниде ное въ ковчeгъ, и не увѣдѣша, дондеже пріиде вода, и взятъ вся, тако будетъ и пришeствіе сына человеческаго. Тогда два будета на селѣ, единъ поeмлется, а другіи оставляется. двѣ мeлющи въ жeрновахъ, едина поeмлется, и едина оставляется.

Зач., 103.* Бдите убо, яко не вѣсте въ кіи часъ господь вашъ пріидетъ. Се же вѣдите, яко аще бы вѣдалъ дому владыка, въ кую стражду тать пріидетъ, бдѣлъ убо бы, и не бы далъ подкопати храма своего, сего ради и вы будѣте готови, яко вонь же часъ не мните, сынъ человеческіи пріидетъ. Кто убо есть вѣрныи рабъ и мудрыи. его же поставитъ господинъ его надъ домомъ своимъ. еже даяти имъ пищу во время ихъ; блажeнъ рабъ той, его же пришeдъ господинъ его, обрящетъ тако творяща. аминь глаголю вамъ, яко надъ всѣмъ имѣніемъ своимъ поставитъ его. Аще ли же речeтъ злыи рабъ той въ сердци своeмъ, коснитъ господинъ мой пріити, и начнетъ бити клеврeты своя, ясти же и пити съ піяницами. пріидетъ господинъ раба того, въ день вонь же не чаетъ, и въ часъ вонь же не вѣсть, и протeшетъ его полма, и часть его съ невѣрными положитъ. ту будетъ плачь и скрeжетъ зубомъ.

Глава, 25.

Зач., 104. Тогда уподобится царствіе небесное десятимъ дѣвамъ яже пріяша свѣтилникы своя, и изыдоша въ срѣтеніе жениху. пять же бѣ отъ нихъ мудры, и пять юродивы. юродивыя же пріeмше свѣтилникы своя, не взяша съ собою елeя. мудрыя же пріяша елeй въ сосудѣхъ со свѣтилникы своими. коснящу же жениху, воздрѣмашася всѣ, и спаху. полунощи же вопль бысть. се женихъ грядeтъ, исходите въ срѣтеніе его. Тогда воставше всѣ дѣвы ты, и украсиша свѣтилникы своя. юродивыя же мудрымъ рѣша, дадите намъ отъ масла вашего, яко свѣтилницы наши угасаютъ. отвѣщаша же мудрыя глаголюще, еда како недостанетъ намъ и вамъ. идѣте же паче къ продающымъ, и купите себѣ. идущимъ же имъ купити пріиде женихъ, и готовыя внидоша съ нимъ на бракы, и затворeни быша двeри. Послѣди же пріидоша и прочая дѣвы, глаголюще, господи господи, отвeрзи намъ. онъ же отвѣ щавъ рече. аминь глаголю вамъ, не вѣмъ васъ. бдите убо, яко не вѣсте дне ни часа, вонь же сынъ человеческіи пріидетъ.

Зач., 105.* Яко же бо человѣкъ нѣкіи отходя, призва своя рабы, и предастъ имъ имѣніе свое, и овому убо дастъ пять талантъ, овому же два, овому же единъ, комуждо противу силѣ его, и отиде абіе. шeдъ же пріeмыи пять талантъ, дѣла въ нихъ, и сотвори другыя пять талантъ. Такожде же и иже два, пріобрѣте и той другая два. Пріeмыи же единъ, шeдъ вкопа его въ зeмлю, и съкры сребро господина своего. по мнозѣ же врeмени, пріиде господинъ рабъ тѣхъ, и стязася съ ними о словеси. И приступль пять талантъ пріeмыи, принесе другыя пять талантъ, глаголя. господи, пять талантъ ми еси прeдалъ, и се другыя пять талантъ пріобрѣтохъ ими. Речe же ему господь его, добрыи рабе благіи и вѣрныи, о малѣ бысть вѣренъ, надъ многыми тя поставлю, вниди въ радость господа своего. Приступль же и иже два таланта пріeмыи, рече. господи, два таланта ми еси прeдалъ, се другая два таланта пріобрѣтохъ има. речe же ему господь его, добрыи рабе, благіи и вѣрныи, о малѣ бысть вѣренъ, надъ многыми тя поставлю. вниди въ радость господа своего. Приступль же и пріeмыи единъ талантъ, рече. господи, вѣдѣхъ тя яко жестокъ еси человѣкъ. жнeши, удуже не сѣялъ еси. и собираеши, удуже не расточилъ еси. и убоявся шeдъ съкрыхъ талантъ твой въ земли, и се имаши твое. отвѣщавъ же господь его рече ему. лукавыи рабе и лѣнивыи, вѣдяше яко жну идѣже не сѣяхъ, и собираю удуже не расточихъ. Подобаше убо тебѣ вдати сребро мое торжникомъ, и пришeдъ азъ, взялъ быхъ свое съ лихвою. возмѣте убо отъ него талантъ, и дадите имущему дeсять талантъ. Имущему бо вездѣ дано будетъ и преизбудетъ. отъ неимущаго же, и еже мнится имѣя взято будетъ отъ него. И неключимаго раба ввeрзѣте во тму кромѣшнюю, ту будетъ плачь и скрeжетъ зубомъ. Сія глаголя возгласи. имѣяи уши слышати, да слышитъ.

Зач., 106.* Егда же пріидетъ сынъ человеческіи въ славѣ своeй, и вси святіи ангели съ нимъ, тогда сядетъ на престолѣ славы своея. и соберутся предъ нимъ вси языцы, и разлучитъ ихъ другъ отъ друга, яко же пастырь разлучаетъ овца отъ козлищъ. и поставитъ овца одесную себе, а козлища ошуюю. Тогда речeтъ царь сущимъ одесную его. пріидѣте благословeніи отца моего, наслѣдуйте уготованное вамъ царствіе, отъ сложeнія миру. възалкахъбося, и дасте ми ясти. возжадахся, и напоисте мя. Страненъ бѣхъ, и введосте мене. нагъ, и одѣясте мя. боленъ, и посѣтисте мене. въ темници бѣхъ, и пріидосте ко мнѣ. тогда отвѣ щаютъ ему праведници глаголюще. господи, когоспода тя видѣхомъ алчуща, и напитахомъ; или жаждуща, и напоихомъ; когоспода же тя видѣхомъ странна, и введохомъ; или нага, и одѣяхомъ; когоспода же тя видѣхомъ боляща, или въ темници, и пріидохомъ къ тебѣ; и отвѣщавъ царь, речeтъ имъ. аминь глаголю вамъ. понeже сотвористе единому сихъ братіи моихъ мeншихъ, мнѣ сотвористе. Тогда речeтъ и сущимъ ошую его. идѣте отъ мене проклятіи въ огнь вѣчныи, уготованныи діаволу и аггеломъ его. възалкахбося, и не дасте ми ясти. возжадахся, и не напоисте мене. Страненъ бѣхъ, и не введосте мене. нагъ, и не одѣясте мене. Боленъ, и въ темници, и не посѣтисте мене. Тогда отвѣщаютъ ему и тіи глаголюще. господи, когоспода тя видѣхомъ алчуща, или жаждуща, или странна, или нага, или больна, или въ темници, и не послужихомъ тебѣ; тогда отвѣщаетъ имъ, глаголя. аминь глаголю вамъ, понeже не сотвористе единому сихъ мeншихъ, ни мнѣ сотвористе. и идутъ сіи въ муку вѣчную. праведници же въ животъ вѣчныи.

Глава, 26.

И бысть егда сконча ісусъ словеса сія вся, рече ученикомъ своимъ.

Зач., 107.* Вѣсте яко по двою дню пасха будетъ, и сынъ человеческіи прeданъ будетъ на пропятіе. Тогда собрашася архіерeе и книжницы и старцы людстіи, во дворъ архіерeoвъ, глаголемаго каіафа, и совѣщаша, да ісуса лeстію имутъ, и убіютъ. глаголаху же, но не въ праздникъ, да не молва будетъ въ людехъ.

Зач., 108.* Ісусу же бывшу въ виѳаніи, въ дому симона прокажeнаго, приступи къ нему жена, сткляницу мира имущи многоцѣннаго, и возливаше на главу его возлежащу. видѣвше же ученицы его, негодоваша глаголюще, чесо ради гибель сія бысть; можаше бо се миро продано быти на мнозѣ, и датися нищимъ. разумѣвъ же ісусъ, рече имъ, что тружаете жену; дѣло бо добро содѣла о мнѣ. всегда бо нищихъ имате съ собою, менe же не всегда имате. возліявши бо сія миро се на тѣло мое, на погребeніе мя сотвори. аминь глаголю вамъ. идѣже аще проповѣдано будетъ евангеліе се во всeмъ мирѣ, речeтся, и еже сотвори сія въ память ея. Тогда шeдъ единъ отъ обоюнадесяте, глаголемыи іюда искаріотскіи ко архіерeoмъ рече. что ми хощете дати, и азъ вамъ предамъ его; они же поставиша ему тридесяте сребреникъ. и оттолѣ искаше подобна врeмене, да его предастъ. Въ пeрвыи же день опрѣсночныи, приступиша ученицы ісусови глаголюще ему. гдѣ хощеши уготоваемъ ти ясти пасху; онъ же рече. идѣте во градъ къ онсици, и рцѣте ему, учитель глаголетъ, врeмя мое близъ есть, у тебе сотворю пасху со ученикы моими. и сотвориша ученицы, яко же повелѣ имъ ісусъ, и уготоваша пасху. Вeчеру же бывшу, возлежаше со обѣма надесяте ученикома. И ядущемъ имъ, рече. аминь глаголю вамъ, яко единъ отъ васъ предастъ мя. И скорбяще зѣло, начаша глаголати ему единъ кождо ихъ. еда азъ есмь господи; онъ же отвѣщавъ рече. омочивыи со мною въ солило руку, той мя предастъ. сынъ же человеческіи идетъ, яко же есть писано о нeмъ. горе же человѣку тому, имъ же сынъ человеческіи предастся, добро бы было ему, ащеся не бы родилъ человѣкъ той. отвѣщавъ же іуда предаяи его, рече. еда азъ есмь, равви; глагола ему, ты рече. Ядущемъ же имъ, пріeмъ ісусъ хлѣбъ, и благословивъ, преломи, даяше ученикомъ, и рече. пріимѣте, и ядите, се есть тѣло мое. и пріeмъ чашу, хвалу воздавъ, дастъ имъ, глаголя. пійте отъ нея вси. се бо есть кровь моя новаго завѣта, яже за многыя изливаема, во оставлeніе грѣховъ. Глаголю же вамъ, яко не имамъ пити отнынѣ отъ сего плода лознаго, до дне того, егда и пію съ вами ново въ царствіи отца моего. И воспѣвше, изыдоша въ гору елеонскую. Тогда глагола имъ ісусъ. вси вы соблазнитеся о мнѣ въ нощь сію. писано бо есть. Поражу пастыря, и разыдутся овца стада. по воскресeніи же моeмъ, варяю вы въ галилeи. отвѣщавъ же пeтръ, рече ему. аще и вси соблазнятся о тебѣ, азъ николиже соблажнюся. Рече ему ісусъ. аминь глаголю тебѣ, яко въ сію нощь прeжде даже алекторъ не возгласитъ, три краты отвeржешися мене. Глагола ему пeтръ. аще ми есть и умрети съ тобою, не отвeргуся тебе. тако же и вси ученицы рѣша. Тогда пріиде съ ними ісусъ въ вeсь, нарицаемую геѳсимани. И глагола ученикомъ. сѣдите ту, дондеже шeдъ помолюся тамо. и поeмъ петра и оба сына зеведeoва, начатъ скорбѣти и тужити. Тогда глагола имъ ісусъ, прискорбна есть душа моя до смерти. пождите здѣ, и бдите со мною. И прешeдъ мало, паде на лици своeмъ моляся и глаголя. отче мой. аще возможно есть, да мимо идетъ отъ мене чаша сія. обаче не яко же азъ хощу, но яко же ты. И пришeдъ ко ученикомъ, и обрѣте ихъ спяща. и глагола петрови. тако ли, не возмогосте единаго часа побдѣти со мною; бдите и молитеся, да не внидете въ напасть. духъ бо бодръ, плоть же немощна. паки вторицею шeдъ, помолися, глаголя. отче мой, аще не можетъ сія чаша мимо ити отъ мене, аще не пію ея, буди воля твоя. и пришeдъ обрѣте ихъ паки спяща, бѣста бо имъ очи отяготѣнѣ. и оставль ихъ, шeдъ паки, помолися третицею, тожде слово рeкъ. Тогда пріиде ко ученикомъ своимъ, и глагола имъ. спите прочее и почивайте. се приближися часъ, и сынъ человеческіи предаeтся въ рукы грѣшникомъ. востанѣте, идемъ. се прибли жися предаяи мя. И еще ему глаголющу, се іуда единъ отъ обоюнадесяте пріиде, и съ нимъ народъ многъ, съ оружіемъ, и дрекольми, отъ архіерей и старецъ людскыхъ. Предаяи же его, дастъ имъ знаменіе, глаголя. его же аще лобжу, той есть, имѣте его. И абіе приступль ко ісусови, рече. радуйся равви, и облобыза его. Ісусъ же рече ему. друже твори, на нeже еси пришeлъ; тогда приступльше, возложиша руцѣ на ісуса, и яша его. И се единъ отъ сущыхъ со ісусомъ, простeръ руку, извлече ножъ свой, и удари раба архіерeoва, и урѣза ему ухо. тогда глагола ему ісусъ, возврати ножъ свой въ мѣсто его. вси бо пріeмшеи ножъ, ножeмъ погибнутъ. Или мниттися яко не могу нынѣ умолити отца моего, и представитъ ми вяще или дванадесяте легеона ангелъ; како же убо сбудутся писанія, яко тако подобаетъ быти; въ той часъ рече ісусъ народомъ. яко на разбойника ли изыдосте съ оружіемъ и дрекольми яти мя. по вся дни при васъ сѣдѣхъ въ церкови уча, и не ясте мене. Се же все бысть, да сбудутся писанія пророческая. Тогда ученицы вси оставльше его бѣжаша.

Зач., 109.* Воини же емше ісуса, ведоша къ каіафѣ архіерe oви, идѣже книжницы и старцы собрашася. пeтръ же идяше по нeмъ издалeче до двора архіерeoва, и вшeдъ внутрь, сѣдяше со слугами, видѣти кончину. архіерeе же и старцы, и сонмъ вeсь, искаху лжесвѣдѣтельства на ісуса, яко да убіютъ его, и не обрѣтаху. и многомъ лжесвѣдѣтелемъ приступльшемъ, не обрѣтоша. Послѣди же приступивша два лжесвѣдѣтеля, рѣста. сeй рече. могу разорити церковь божію, и трeми деньми создати ю. и воставъ архіерeй, рече ему. ничесоже ли отвѣщаваеши, что сіи на тя свѣдѣтельствуютъ; ісусъ же молчаше. и отвѣ щавъ архіерeй, рече ему. заклинаю тя богомъ живымъ, да речeши намъ, аще ты еси христосъ, сынъ божіи. Глагола ему ісусъ. ты рече. обаче глаголю вамъ. отсeлѣ узрите сына человеческаго сѣдяща одесную силы, и грядуща на облацѣхъ небесныхъ. Тогда архіерeй растерза ризы своя глаголя. яко хулу глагола. что и еще трeбуемъ свѣдѣтелій; се нынѣ слышасте хулу его. чтося вамъ мнитъ; они же отвѣщавше рѣша, повиненъ есть смeрти. Тогда заплеваша лице его, и пакости ему дѣяху. ови же за ланиту удариша глаголюще, прорци намъ христе кто есть ударeи тя; пeтръ же внѣ сѣдяше во дворѣ. И приступи къ нему едина рабыни глаголющи. и ты бѣ со ісусомъ галилeйскымъ. онъ же отвeржеся предъ всѣми глаголя. не вѣмъ что глаголеши. изшeдшу же ему ко вратомъ, узрѣ его другая, и глагола сущимъ ту. и сeй бѣ со ісусомъ назорeoмъ. и пакы отвeржеся съ клятвою, яко не знаю человѣка. по малѣ же приступивше стоящеи. рѣша петрови, воистину и ты отъ нихъ еси. ибо бесѣда твоя явѣ тя творитъ. Тогда начатъ ротитися и клятися, яко не знаю человѣка. и абіе пѣтелъ возгласи. И помяну пeтръ глаголъ ісусовъ, речeныи ему. яко прeже даже пѣтелъ не возгласитъ, три краты отвeржешися мене. и изшeдъ вонъ плакася горко.

Глава, 27.

Зач., 110. утру же бывшу, совѣтъ сотвориша вси архіерeе, и старцы людстіи на ісуса, яко убити его. И связавше его ведоша, и предаша его понтійскому пилату игeмону.

Зач., 111.* Тогда видѣвъ іюда предавыи его яко осудиша его, раскаявся, возврати тридесяте срeбреникы архіерeoмъ и старцемъ, глаголя. согрѣшихъ, предавъ кровь неповинну. они же рѣша. что есть намъ; ты узриши. и повeргъ срeбреникы въ церкови, отиде, и шeдъ удавися. Архіерeе же пріeмше срeбреникы, рѣша. недостойно есть вложити ихъ въ корвану, понeже цѣна крове есть. Совѣтъ же сотворше, купиша ими село скудeльниче, въ погрѣбаніе страннымъ. тѣмъ же наречeся село то, село крове, до сего дне. Тогда сбысться речeное іереміемъ пророкомъ глаголющемъ. И пріяша тридесяте сребреникъ цѣну цѣнeнаго, его же цѣниша отъ сыновъ ізраилевъ, и даша я на селѣ скудeльничи, яко же сказа мнѣ господь. Ісусъ же ста предъ игeмономъ. И вопроси его игeмонъ глаголя. ты ли еси царь іюдeйскыи; ісусъ же рече ему, ты глаголеши. И егда нань глаголаху архіерeе и старцы, ничесоже не отвѣщаваше. Тогда глагола ему пилатъ. не слышиши ли, колико на тя свѣдѣтельствуютъ; и не отвѣща ему, ни къ единому глаголу, яко дивитися игeмону зѣло. На всякъ же праздникъ обычай бѣ игeмону отпущати единого народу связана, его же хотяху. имяху же тогда связана нарочита, глаголемаго варавва. Собраномъ же имъ, рече имъ пилатъ. кого хощете отъ обою отпущу вамъ, варавву ли, или ісуса глаголемаго христа; вѣдяше бо яко зависти ради предаша его. Сѣдящу же ему на судищи, посла къ нему жена его, глаголющи. ничтоже тебѣ, и праведнику тому. много бо пострадахъ днeсь во снѣ его ради. Архіерeе же и старцы наустиша народы да испросятъ варавву, ісуса же погубятъ. отвѣщавъ же игeмонъ рече имъ. кого хощете отъ обою отпущу вамъ; они же рѣша, варавву. глагола имъ пилатъ. что убо сотворю ісусу, глаголемому христу; глаголаша ему вси, да распятъ будетъ. Игeмонъ же рече. кое убо зло сотвори; они же излиха вопіяху глаголюще, да пропятъ будетъ. Видѣвъ же пилатъ, яко ничтоже успѣваетъ, но паче молва бываетъ, пріeмъ воду, умы руцѣ предъ народомъ, глаголя. неповиненъ есмь отъ крове праведнаго сего, вы узрите. и отвѣщавше вси людіе, рѣша. кровь его на насъ, и на чадѣхъ нашихъ. Тогда отпусти имъ варавву, ісуса же бивъ предастъ имъ, да его пропнутъ.

Зач., 112.* Тогда воини игeмонови, пріeмше ісуса на судищи, собраша нань все множество воинъ. и совлeкше его, одѣяша его хламидою червлeною, и сплeтше вѣнeцъ отъ тeрнія, возложиша на главу его, и трость въ десницу его. и поклоншеся на колѣну предъ нимъ, ругахуся ему глаголюще. радуйся царю іюдeйскыи. И плюнувше нань, пріяша трость, и біяху по главѣ его. и егда поругашася ему, совлекоша съ него багряницу, и облекоша его въ ризы его, и ведоша его на пропятіе. исходяще же, обрѣтоша человѣка киринeйска, именемъ симона. и сему задѣша понести крестъ его.

Зач., 113.* И пришeдше на мѣсто нарицаемое голгоѳа. еже есть глаголемо, краніево мѣсто. даша ему пити оцeтъ съ жeлчію смѣшенъ. и вкушь, не хотяше пити. Распeнше же его, раздѣлиша ризы его, вeргше жрeбія, и сѣдяще стрежаху его ту. И возложиша верху главы его вину его написану. сeй есть ісусъ, царь іюдeйскыи. Тогда распяша съ нимъ два разбойника, единого одесную, и единого ошуюю. Мимо ходящеи же хуляху его, покивающе главами своими, и глаголюще. разаряяи церковь, и треми деньми созидая, спасися самъ. аще сынъ еси божіи, сниди съ креста. Такожде же и архіерeе ругающеся съ книжникы и старцы, и фарисeи глаголаху. иныя спасе, себе ли не можетъ спасти. аще царь ізраилевъ есть, да снидетъ нынѣ съ креста, и вѣруемъ въ него. упова на бога, да избавитъ нынѣ его, аще хощетъ ему. речe бо яко божіи есмь сынъ. Тожде же и разбойника распятая съ нимъ, поношаста ему. отъ шестаго же часа, тма бысть по всeй земли, до часа девятаго. о девятемъ же часѣ, возопи ісусъ гласомъ вeліемъ, глаголя. или или, лимасавахѳани; еже есть. боже мой боже мой, вскую мя еси оставилъ; нѣціи же отъ ту стоящихъ слышавше, глаголаху, яко илію глашаетъ сeй. И абіе тeкъ единъ отъ нихъ, и пріeмъ губу, исполнивъ же оцта, и вознeзъ на трость напаяше его. прочіи же глаголаху, остави, да видимъ аще пріидетъ илія спасти его. Ісусъ же пакы возопивъ гласомъ вeліемъ, испусти духъ. И се завѣса церковная раздрася на двое, съ вышняго края до нижняго. И земля потрясeся, и каменіе распадeся, и гроби отверзошася, и многа тѣлеса усопшихъ святыхъ восташа. и изшeдше изъ гробъ по воскресeніи его, внидоша во святыи градъ, и явишася мнозѣмъ. Сотникъ же и иже съ нимъ стрегущеи ісуса, видѣвше трусъ, и бывшая, убояшася зѣло, глаголюще, воистину божіи сынъ бѣ, сeй. Бѣху же ту и жены многы издалeче зряще, иже идоша по ісусѣ отъ галилeя, служаще ему. въ нихъ же бѣ марія магосподалыни, и марія іаковля и іoсіи мати. и мати сыну зеведeoву. Поздѣ же бывшу, пріиде человѣкъ богатъ, отъ аримаѳeя, именемъ іосифъ, иже и той учися у ісуса. сeй приступль къ пилату, проси тѣлесе ісусова. Тогда пилатъ повелѣ дати тѣло. и пріeмъ тѣло іосифъ, обвитъ е плащаницею чистою, и положи е въ новѣмъ своeмъ гробѣ, иже иссѣче въ камени. и възвали камень вeліи надъ двeріи гроба, и отиде. Бѣ же ту марія магосподалыни, и другая марія, сѣдящи прямо гробу.

Зач., 114.* Во утрѣи же день, иже есть по пятцѣ, собрашася архіерeе и фарисeе къ пилату глаголюще, господи, помянухомъ, яко льстeцъ онъ рече еще сыи живъ, по тріeхъ днeхъ востану. повели убо утвердити гробъ до трeтіяго дне. да не како пришeдше ученицы его, нощію украдутъ его, и рекутъ людемъ, воста отъ мертвыхъ. и будетъ послѣдняя лeсть горша пeрвыя. речe же имъ пилатъ, имате кустодію, идѣте утвердите яко же вѣсте. они же шeдше, утвердиша гробъ, знаменавше камень съ кустодіею.

Глава, 28.

Зач., 115. Въ вeчеръ же суботныи, свитающи во едину отъ суботъ, пріиде марія магосподалыни, и другая марія, видѣти гробъ. и се трусъ бысть вeліи. ангелъ бо господень съшeдъ съ небесе, приступль отвали камень отъ двeріи гроба, и сѣдяше на нeмъ. бѣ же зракъ его яко молніи, и одѣяніе его бѣло яко снѣгъ. отъ страха же его сотрясошася стрегущеи, и быша яко мeртви. отвѣщавъ же ангелъ, рече женамъ. не бойтеся вы. вѣмъ бо, яко ісуса распятаго ищете. нѣсть здѣ. воста бо, яко же рече. пріидѣте. видите мѣсто, идѣже лежа господь. и скоро шeдше, рцѣте ученикомъ его, яко воста отъ мертвыхъ, и се варяетъ вы въ галилeи, тамо его узрите. се рѣхъ вамъ. И изшeдше скоро отъ гроба со страхомъ, и радостію вeліею, текостѣ возвѣстити ученикомъ его. яко же идясте возвѣстити ученикомъ его, и се ісусъ срѣте я, глаголя, радуйтеся. онѣ же приступльши, ястеся за нозѣ его, и поклонистеся ему. Тогда глагола имъ ісусъ, не бойтеся. идѣте, возвѣстите братіи моeй, да идутъ въ галилeю, и ту мя видятъ. идущема же има, се нѣціи отъ кустодія пришeдше во градъ, возвѣстиша архіерeoмъ вся бывшая. и собравшеся со старцы, совѣтъ сотвориша, срeбреникы доволны даша воиномъ, глаголюще. рцѣте, яко ученицы его нощію пришeдше украдоша его, намъ спящемъ. и аще се услышано будетъ у игeмона, мы утолимъ его, и васъ беспечальны сотворимъ. они же пріeмше срeбреникы, сотвориша яко же научeни быша. и промчeся слово се во іудeехъ, даже до сего дне.

Зач., 116.* Единіи же надесяте ученицы, идоша въ галилeю, въ гору, ямо же повелѣ имъ ісусъ. и видѣвше его, поклонишася ему. ови же усомнѣшася. И приступль ісусъ, рече имъ, глаголя. дастъмися всяка власть, на небеси и на земли. шeдше убо научите вся языкы, крестяще ихъ, во имя отца и сына и святаго духа, учаще ихъ блюсти вся елика заповѣдахъ вамъ. и се азъ съ вами есмь вся дни до скончанія вѣка, аминь.

Конeцъ, еже отъ матѳeя святаго
евангелія. имать въ себѣ,
главъ, 28. а зачалъ
церковных,
116.