Къ галатомъ посланіе святаго апостола Павла

1 2 3 4 5 6

Глава, 1.

Зач., 198.* Павелъ апостолъ, ни отъ человѣкъ, ни человѣкомъ, но ісусомъ христомъ, и богомъ и отецeмъ, воскресившемъ его изъ мертвыхъ, и иже со мною вся братія, церковамъ галатійскамъ.

Зач., 199.* Благодать вамъ и миръ отъ бога отца, и господа нашего ісуса христа, давшаго себе по грѣсѣхъ нашихъ, яко да избавитъ ны отъ настоящаго вѣка лукаваго, по воли бога и отца нашего, ему же слава во вѣкы вѣкомъ, аминь. Чюждуся, яко тако скоро прелагаетеся отъ звавшаго вы благодатію христовою, во ино благовѣствованіе. еже нѣсть ино, точію нѣцыи суть смущающе вы, и хотяще превратити благовѣствованіе христово. но и аще мы, или ангелъ съ небесе благовѣститъ вамъ, паче, еже благовѣстихомъ вамъ, анаѳeма да есть. яко же предрекохомъ, и нынѣ паки глаголю, аще кто вамъ благовѣститъ паче еже пріясте, анаѳeма да есть. нынѣ бо человѣки препираю, или бога; или ищу человѣкомъ угожати; и аще быхъ еще человѣкомъ угожалъ, христу рабъ не быхъ убо былъ.

Зач., 200.* Сказую же вамъ братіе, благовѣствованіе благо вѣщенное отъ мене, яко нѣсть по человѣку. ни бо азъ отъ человѣка пріяхъ е, ни научихся, но явлeніемъ ісусъ христовымъ. слышасте бо мое житіе иногоспода въ жидовствѣ, яко по премногу гонихъ церковь божію, и раздрушахъ ю, и преспѣвахъ въ жидовствѣ паче многихъ свeрстникъ моихъ въ родѣ моeмъ, излиха ревнитель сыи отeческимъ моимъ преданіемъ. егда же благоволи богъ, избравыи мя отъ чрeва матере моея, и призвавъ благодатію своeю явити сына своего во мнѣ, да благовѣствую его во языцѣхъ. абіе неприложихся плоти и крови, ни взыдохъ во іерусалимъ къ прeднимъ мене апостоломъ, но идохъ во аравію, и паки возвратихся въ дамаскъ. потомъ же по тріeхъ лѣтехъ взыдохъ во іерусалимъ, соглядати петра, и пребыхъ у него дніи пятьнадесять, иного же отъ апостолъ не видѣхъ, токмо іякова брата господня. а яже пишу вамъ, се прeдъ богомъ, яко не лжу. потомъ же пріидохъ въ страны сирьскія, и киликійскія, бѣхъ же незнаемъ лицу церковамъ іудeйскимъ, яже о христѣ. точію же слышаще бяху яко гоняи насъ иногоспода, нынѣ благовѣствуетъ вѣру, ея же иногоспода раздрушаше, и славляху о мнѣ бога.

Глава, 2.

Потомъ же по четырихъ надесяте лѣтехъ паки взы дохъ во іерусалимъ съ варнавою, поимъ съ собою и тита. взыдохъ же по откровeнію, и возложихъ имъ благо вѣствованіе еже проповѣдую во языцѣхъ. на единѣ же мнимымъ, да не како во тще теку или текохъ. но ни титъ иже со мною, еллинъ сыи, нуженъ бысть обрѣзатися, и за пришeдшую лжебратію, иже привнидоша соглядати свободы нашея, юже имамы о христѣ ісусѣ, да насъ поработятъ. имъ же ни къ часу повинухомся въ покорeніе, да истина благовѣстія пребудетъ въ насъ.

Зач., 201.* отъ мнимыхъ же быти великыхъ якови убо бѣша, ничтоже ми разньствуетъ. лице богъ человѣку не пріeмлетъ. мнѣ бо мниміи, ничтоже ми привозложиша, но сопротивное, уразумѣвше же яко увѣрено ми бысть благовѣстіе еже во языцѣхъ. яко же и петру во обрѣзаніи. ибо съпоспѣшествовавыи петру въ посланіе обрѣзанія, поспѣшествова и мнѣ во языки. и познавше благодать даную ми, и іяковъ, и кифа, и іoаннъ, мниміи столпи быти, десная даша мнѣ и варнавѣ общeнія. да мы во языки, они же во обрѣзаніе, точію нищихъ да помнивѣ, еже и потщахся сіе истое сотворити.

Зач., 202.* Егда же пріиде пeтръ во антіoхію, въ лице ему противу стахъ, яко зазоренъ ми бѣ. прeже бо даже не пріити нѣкимъ отъ іякова, со языки ядяше. егда же пріидоша, опряташеся и отлучашеся, бояся сущихъ отъ обрѣзанія. и лицемѣришася съ нимъ и прочіи іудeе, яко и варнавѣ пристати лицемѣрьству ихъ. Но егда видѣхъ яко не право ходятъ ко истинѣ благовѣствованія, рекохъ петру предъ всѣми, аще ты іудeй сыи, язычески, а не іудeйски живeши, почто языки нудиши іудeйски жительствовати; мы естествомъ іудeе, а не отъ языкъ грѣшницы.

Зач., 203.* Увѣдѣвше же, яко не оправдится человѣкъ отъ дѣлъ закона, но токмо вѣрою ісусъ христовою, и мы во христа ісуса вѣровахомъ, да оправдимся отъ вѣры христовы, а не отъ дѣлъ закона. зане не оправдится отъ дѣлъ закона всяка плоть. Аще ли ищуще оправдитися о христѣ, обрѣтохомся и сами грѣшницы, христосъ убо грѣху ли служитель; да не будетъ. аще бо яже разорихъ, сія паки созидаю, преступника себе представляю. азъ бо закономъ закону умрохъ, да богови живъ буду, христови сраспяхся. живу же не ктому азъ, но живeтъ во мнѣ христосъ. а еже нынѣ живу во плоти, вѣрою живу сына божія, возлюбившаго мене и предавшаго себе по мнѣ.

Зач., 204.* Не отмѣтаюся благодати божія. аще бо закономъ правда, убо христосъ туне умре.

Глава, 3.

О несмысленіи галате, кто вы прельстилъ есть не покоритися истиннѣ; имъ же предъ очима ісусъ христосъ прeжде написанъ бысть въ васъ распятъ. сіе точію хощу увѣдѣти отъ васъ, отъ дѣлъ ли закона духъ пріясте, или отъ слуха вѣры; тако несмыслени есте начeнше духомъ, нынѣ плотію скончаваете; толика пострадасте безума, аще же и безума. подаяи убо вамъ духъ, и дѣйствуяи силы въ васъ отъ дѣлъ ли закона, или отъ слуха вѣры; яко же авраамъ вѣрова богу, и вмѣнися ему въ правду. разумѣйте убо яко сущіи отъ вѣры, сіи суть сынове авраамли.

Зач., 205.* Прeжде видѣвше бо писаніе, яко отъ вѣры оправдаетъ языки богъ, прeжде благовѣствова аврааму, яко благословятся о тебѣ вси языцы. Тѣмъ же сущіи отъ вѣры благословятся съ вѣрнымъ авраамомъ. елицы бо отъ дѣлъ закона суть, подъ клятвою суть. писано бо есть, проклятъ всякъ, иже не пребудетъ во всѣхъ писаныхъ въ книзѣ законнѣй, яко творити я. а яко въ законѣ никтоже оправдается отъ бога, явѣ же, яко праведныи отъ вѣры живъ будетъ. законъ же нѣсть отъ вѣры, но сотворивыи та человѣкъ, живъ будетъ въ нихъ.

Зач., 206.* Христосъ ны искупилъ есть отъ клятвы законныя, бывъ по насъ клятва. писано бо есть, проклятъ всякъ висяи на древѣ, да во языцѣхъ благословeніе авраамле будетъ о христѣ ісусѣ, да обѣтованіе духа пріимемъ вѣрою.

Зач., 207.* Братіе по человѣку глаголю, обаче человѣку утвержeна завѣта никтоже отмѣтаетъ, или приповелѣваетъ. аврааму же речeни быша обѣты, и сѣмени его. не глаголетъ же и сѣменемъ, яко о мнозѣхъ, но яко о единомъ, и сѣмени твоему. Иже есть христосъ. сіe же глаголю, завѣтъ прeжде утвержeныи отъ бога, во христа, иже по лѣтехъ четыриста и тридесяте бывыи законъ, не отмѣтаетъ, во еже разорити обѣтованіе. Аще бо отъ закона наслѣдіе, не ктому уже отъ обѣтованія. аврааму же обѣтованіемъ дарова богъ. что убо законъ; престу плeнія ради приложися, дондеже пріидетъ сѣмя, ему же обѣтовася, повелѣнъ ангелы рукою ходатая. ходатай же единому нѣсть, богъ же единъ есть. законъ ли убо на обѣтованіихъ божіихъ; да не будетъ. аще бо законъ данъ бысть могіи оживити, воистину убо отъ закона бы была правда, но затвори писаніе вся подъ грѣхомъ, да обѣтованіе отъ вѣры ісусъ христовы дастся вѣрующимъ.

Зач., 208.* Прeжде же пришeствія вѣры, подъ закономъ стрегоми бѣхомъ, затворeни въ хотящую вѣру откры тися. Тѣмъ же законъ пѣстунъ намъ бысть во христа, да отъ вѣры оправдимся. пришeдши же вѣрѣ, уже не подъ пѣстуномъ есмы. вси бо вы сынове божіи есте, вѣрою о христѣ ісусѣ. Елицы бо во христа крестистеся, во христа облекостеся. нѣсть іудeй, ни еллинъ. нѣсть рабъ, ни свободь. нѣсть мужескіи полъ, ни жeнскіи. вси бо вы едино есте о христѣ ісусѣ. Аще ли же вы христови, то убо авраамле сѣмя есте, и по обѣтованію наслѣдницы.

Глава, 4.

Глаголю же, внелико врeмя наслѣдникъ младъ есть, ни чимъ же лучши есть раба, господь сыи всѣмъ, но подъ повелители и приставники есть, до нарока отча. Тако же и мы, егда бѣхомъ млади, подъ стихіями бѣхомъ мира порабощeни.

Зач., 209.* Егда же пріиде кончина лѣту, посла богъ сына своего, единороднаго, раждаемаго отъ жены, бываема подъ закономъ, да подзаконныя искупитъ, да въ усынeніе воспріимемъ. да яко же есте сынове, посла богъ духа сына своего, въ сердца наша, вопіюща, авва отецъ. тѣмъ же уже нѣси рабъ, но сынъ. аще ли же сынъ, и наслѣдникъ божіи ісусъ христомъ.

Зач., 210.* Но тогда убо невѣдуще бога, служисте не по естеству сущимъ богомъ. нынѣ же познавше бога, паче же познани бывше отъ бога, како возвращаетеся паки, на нeмощныя и худыя стихія, имъ же свыше паки служити хощете; дніи сматряюще, и месеца и времена и лѣта. Боюся о васъ, еда како всуе трудихся у васъ. будите яко же азъ, зане и азъ яко же и вы. Братіе, молю вы, ничимъ же мене обидѣсте. вѣсте же, яко за нeмощь плоти благовѣстихъ вамъ пeрвѣе. И искушeніе мое еже въ плоти моeй не уничижисте, ни оплевасте, но яко же ангела божія пріясте мя, яко же и христа ісуса. Кое убо бяше блажeнство ваше; свѣдѣтельствую бо вамъ, яко аще бы было мощно, очеса ваша извертѣвше, убо дали ми бысте. Тѣмъ же врагъ вамъ быхъ истину вамъ глаголя; ревнуютъ по васъ недобрѣ, но отлучити васъ хотятъ, да имъ ревнуете. добро еже ревновати всегда доброе, и не точію внегда приходити ми къ вамъ. Чадца моя о нихъ же паки болѣзную, дондеже вообразится христосъ въ васъ. Хотѣхъ же пріити къ вамъ нынѣ, и измѣнити гласъ мой, яко не домышляюся о васъ. глаголите ми иже подъ закономъ хотящеи быти, закона ли не слышасте; писано бо есть. яко,

Зач., 211.* Авраамъ два сына имѣ, единаго отъ рабы, а другаго отъ свободныя. но иже отъ рабы, по плоти родися, а иже отъ свободныя по обѣтованію, яже еста ино сказаема, сія бо еста два завѣта, единъ убо отъ горы синайскія, въ работу ражая, еже есть агарь, агарь бо, сина гора есть во аравіи, прилагаетъжеся нынѣшнему іерусалиму. работаетъ же съ чады своими. а вышніи іерусалимъ, свободь есть, иже есть мати всѣмъ намъ. Писано бо есть, возвеселися неплоды неражающія, расторгни и возопи неболѣвшія, яко многа чада пустыя паче, нeжели имущія мужа.

Зач., 212.* Мы же братіе, по ісааку, обѣтованія чада есмы. но яко же тогда иже по плоти родивыися, гоняше духовнаго, тако и нынѣ. но что глаголетъ писаніе; изжени рабу, и сына ея. Не имать бо наслѣдовати сынъ рабынинъ, съ сыномъ свободныя. Тѣмъ же братіе, нѣсмы рабынина чада, но свободныя.

Глава, 5.

Свободою убо ею же христосъ насъ свободи, стойте и не паки подъ игомъ работѣ держитеся, се азъ павелъ глаголю вамъ, яко аще обрѣзаетеся, христосъ васъ ничтоже пользуетъ. Свѣдѣтельствую же паки, всякому человѣку обрѣзающемуся, яко долженъ есть вeсь законъ творити. упразднистеся отъ христа, иже закономъ оправдаетеся, отъ благодати отпадаете. мы бо духомъ отъ вѣры упованія правды ждeмъ. о христѣ бо ісусѣ. ни обрѣзаніе что можетъ, ни необрѣзаніе, но вѣра любовію спо спѣшествуема. течасте добрѣ, кто вамъ возбрани не покорятися истинѣ; препрѣніе не отъ призвавшаго вы. малъ квасъ все смѣшeніе кваситъ. азъ надѣюся о васъ о господѣ, яко иного ничтоже мыслите. смущая иже васъ понесeтъ грѣхъ иже аще есть.

Зач., 212.* Азъ же братіе аще обрѣзаніе еще проповѣдую, почто еще гонимъ есмь; убо упразднися соблазнъ креста. дабы отсѣчeни были развращающеи васъ. Вы бо на свободу звани бысте братіе, точію да не свобода ваша въ вину плоти, но любовію работайте другъ другу. ибо вeсь законъ во единомъ словеси совершается, во еже возлюбиши ближняго своего яко же себе. аще же другъ друга грызаете и снѣдаете, блюдѣтеся, да не другъ отъ друга истреблeни будете. Глаголю же, духомъ ходите, и похоти плотьскія не совершайте. Плоть бо похотствуетъ на духъ, духъ же на плоть. сія же противистася другъ другу. да не яже хощете сія творите. аще ли духомъ водими есте, нѣсте подъ закономъ. явлeна же суть дѣла плотьская, яже суть, прелюбодѣяніе, блудъ, нечистота, студодѣяніе, идолослужeніе, чародѣяніе, вражды. рвeнія, завиды, ярости, разжежeнія, распря, соблазны. ереси, зависти, убійства, піянства, безчинны кличи, и подобная симъ, яже предрицаю вамъ и прeжде рекохъ, яко таковая творящеи, царствія божія не наслѣдятъ.

Зач., 214.* Плодъ же духовныи есть, любы, радость, миръ. долготерпѣніе, благость, милосердіе, вѣра, кротость, воздержаніе. на таковыхъ нѣсть закона. а иже христу ісусу плоть распяша со страстьми и похотьми. аще живeмъ духомъ, духомъ и да ходимъ. не бываимъ тщеславни, другъ друга раздражающе, другъ другу завидяще.

Глава, 6.

Братіе, аще впадeтъ человѣкъ въ нѣкое прегрѣшeніе, вы духовніи исправляйте таковаго духомъ кротости, блюдыи себе, да не и ты искушeнъ будеши.

Зач., 214.* Другъ другу тяготы носите, и тако исполните законъ христовъ. Аще бо кто мнитъ себе быти что, ничтоже сыи, себе льститъ. дѣло же свое да искушаетъ кождо. И тогда въ себѣ точію хвалeніе да имать, а не ко иному. кождо бо свое брeмя понесeтъ. да общаетъ же учаися словеси учащему, о всѣхъ благихъ. не льститеся, богъ поругаемъ не бываетъ. еже бо аще сѣетъ человѣкъ, тожде и пожнетъ. яко сѣяи въ плоть свою, отъ плоти пожнетъ истлѣніе. а сѣяи въ духъ, отъ духа пожнетъ животъ вѣчныи. доброе же творяще да нестужаемъ си, во время бо свое пожнемъ не ослабѣюще. тѣмъ же убо дондеже врeмя имамы, да дѣлаемъ благое ко всѣмъ, паче же приснымъ въ вѣрѣ.

Зач., 215.* Видите колицѣми книгами писахъ вамъ моeю рукою. елицы хотятъ хвалитися по плоти, сіи нудятъ вы обрѣзатися, точію да не крестомъ христовымъ гонятся. ни бо обрѣзающіися сами законъ хранятъ, но хотятъ вы обрѣзовати. да въ вашей плоти похвалятся.

Зач.* Мнѣ же да не будетъ хвалитися, точію о крестѣ господа нашего ісуса христа, имъ же мнѣ вeсь миръ распяся, и азъ всему миру. о христѣ бо ісусѣ, ни обрѣзаніе что можетъ, ни необрѣзаніе, но нова тварь. и елицы правиломъ симъ жительствуютъ, миръ на нихъ и милость, на ізраили божіи. прочее же труды да никтоже даeтъ ми. Азъ бо язвы господа ісуса на тѣлѣ моeмъ ношу. Благодать господа нашего ісуса христа со духомъ вашимъ братіе. аминь.

Конeцъ посланію къ галатомъ.
Имать въ себѣ. главъ,
6, а зачалъ,
церковных,
19.