Къ солуняномъ посланіе святаго апостола Павла, 1.

1 2 3 4 5

Глава, 1.

Зач., 262. Павелъ, и силуянъ и тимоѳeй, церкови солунстѣй, о бозѣ отецы нашемъ и господѣ ісусѣ христѣ. благодать вамъ и миръ отъ бога отца нашего, и господа ісуса христа. благодаримъ бога всегда о всѣхъ васъ, поминаніе ваше творяще въ молитвахъ своихъ. непрестанно поминающе ваше дѣло и вѣру, и трудъ, любвe же и терпѣнію, и упованіе на господа нашего ісуса христа, прeдъ богомъ и отецeмъ нашимъ. вѣдяще братіе возлюбленая, отъ бога избраніе ваше, яко благовѣствованіе наше не бысть къ вамъ въ словѣ точію, но и силою, и духомъ святымъ, и во извѣщeніи мнозѣ, яко же и вѣсте, какови быхомъ въ васъ, ради васъ.

Зач., 263.* И вы подобницы намъ бысте, господне пріимше слово въ скорби мнозѣ, и съ радостію духа святаго. яко быти вамъ образъ всѣмъ вѣрующимъ, въ македоніи, и ахаіи. отъ васъ бо промчася слово господне не токмо въ македоніи и ахаіи, но и во всякомъ мѣстѣ вѣра ваша, яже къ богу изыде, яко не требовати намъ глаголати что, тіи бо о насъ возвѣщаютъ каковъ входъ имѣхомъ къ вамъ, и како обратистеся къ богу отъ идолъ, работати богу живу и истинну, и ждати сына его съ небесъ, его же воскреси изъ мертвыхъ, ісуса избавляющаго насъ отъ гнѣва грядущаго.

Глава, 2.

Зач., 264. Сами бо вѣсте братіе, входъ нашъ иже къ вамъ, яко не во тще бысть, но прeжде пострадавше и досаждeніе бывше, яко же вѣсте, въ филиппѣхъ, дерзнухомъ о бозѣ нашемъ, глаголати къ вамъ благовѣствованіе божіе, со многимъ подвигомъ. утѣшeніе бо наше, не отъ прeлести, ни отъ нечистоты, ни лeстію, но яко же искусихомся отъ бога вѣрни быти пріяти благовѣствованіе, тако глаголемъ, не аки человѣкомъ угожающе, но богу искусившему сердца наша. никогосподаже бо въ словеси ласканія быхомъ къ вамъ яко же вѣсте, ниже виною лихоиманія, богъ свѣдѣтель, ни ищуще отъ человѣкъ славы, ни отъ васъ, ни отъ инѣхъ, могуще въ тяготѣ быти, яко же христови апостоли. но быхомъ тиси посредѣ васъ, яко же доилица грѣетъ своя чада, такожде желающе васъ, благоволихомъ подати вамъ не точію благовѣствованіе божіе, но и душа своя, занeже возлюблени бысте намъ.

Зач., 265.* Помните бо братіе трудъ нашъ, и подвигъ. нощь бо и день дѣлающе, яко не отяготити ни единого отъ васъ. проповѣдахомъ вамъ благовѣствованіе божіе. вы свѣдѣтеле, и богъ, яко прпдбно и праведно и непорочно вамъ вѣрующимъ быхомъ, яко же вѣсте. зане единаго когождо васъ, яко же отецъ чада своя, моляще и утѣшающе васъ, и свѣдѣтельствующе вамъ ходити достойно богу, призвавшему вы въ свое царство и славу. сего ради и мы благодаримъ бога непрестанно, яко пріeмше слово слышанія божія отъ насъ, пріясте не аки слово человеческо, но яко же есть воистину слово божіе, еже дѣйствуется въ васъ вѣрующихъ.

Зач., 266.* Вы бо подобни бысте братіе церковамъ божіямъ, сущимъ во іудeи о христѣ ісусѣ, господѣ нашемъ. Зане таяжде и вы пострадасте отъ своихъ соплеменникъ, яко же и тіи отъ іудей, убившихъ господа ісуса, и его пророки, и насъ изгнавшихъ, и богу не угодившихъ. и всѣмъ человѣкомъ противящихся, и возбраняющихъ намъ глаголати языкомъ, да спасутся, во еже исполнити имъ грѣхи своя всегда, постиже же на нихъ гнѣвъ до конца. Мы же братіе осирѣвше отъ васъ ко врeмени и часу, лицeмъ, а не сердцемъ, лишше потщахомся лица вашего видѣти многимъ желаніемъ. зане восхотѣхомъ пріити къ вамъ, азъ же павелъ единою и дважды, и возбрани намъ сатана. кто бо намъ упованіе или радость, или вѣнeцъ похвалeнію; аще не вы, пред господемъ нашимъ ісусъ христомъ, въ пришeствіи его.

Глава, 3.

Зач., 267. Вы бо есте слава наша и радость. тѣмъ же уже не терпяще, благоволихомъ остатися во аѳинѣхъ едини, и послахомъ тимоѳeя брата нашего, и служителя божія, и споспѣшника нашего, въ благовѣстіи христовѣ, утвердити васъ и утѣшити о вѣрѣ вашей, яко ни единаго смущeнія имѣти въ скорбѣхъ сихъ. сами бо вѣсте, яко на се истое лежимъ. ибо егда у васъ бѣхомъ, прeжде рекохомъ вамъ, яко имамы скорбѣти, еже и бысть, и видѣсте. сего ради и азъ ктому не терпя, послахъ разумѣти вѣру вашу, да не како искусилъ вы будетъ искушаяи, и во тще будетъ трудъ нашъ. нынѣ же пришeдшу тимоѳeю къ намъ отъ васъ, и благовѣстившу намъ вѣру и любовь вашу, и яко имате память о насъ благу, всегда, желающе насъ видѣти, яко же и мы васъ. сего ради утѣшихомся братіе о васъ, во всeй бѣдѣ и скорби нашей, вашея ради вѣры. яко мы нынѣ живи есмы, аще вы стоите о господѣ.

Зач., 268.* Кое бо благодарeніе богу можемъ воздати о васъ, надъ всeю радостію ею же радуемся, васъ ради прeдъ богомъ нашимъ, нощь и день преизлише молящеся видѣти лице ваше, и совершити лишeніе вѣры вашея. Самъ же богъ и отецъ нашъ, и господь нашъ ісусъ христосъ да исправитъ путь нашъ къ вамъ. васъ же господь да умножитъ, и да избыточествитъ любовію друга ко другу, и ко всѣмъ, яко же и мы о васъ, во еже утвердити ваша сердца непорочна во святыни, прeдъ богомъ и отецeмъ нашимъ, въ пришeствіе господа нашего ісуса христа, со всѣми святыми его.

Глава, 4.

Зач., 269. прочее убо братіе прашаемъ вы и молимъ о христѣ ісусѣ, да яко же пріясте отъ насъ, како подобаетъ вамъ ходити, и угожати богови, такожде и ходите, да избыточествуете паче. Вѣсте бо какова повелѣнія дахомъ вамъ, о господѣ ісусѣ. сія бо есть воля божія, святьба ваша, храните себе самѣхъ отъ блуда, и вѣдѣти комуждо отъ васъ свой сосудъ, стяжавати во святыни и чeсти, а не въ страсти похотнѣй, яко же и языцы не вѣдящіи бога. И еже не преступати и лихоимствовати въ вeщи брата своего, зане мститель есть господь о всѣхъ сихъ, яко же и прeжде рекохомъ къ вамъ, и засвѣдѣтельствовахомъ. не призва бо насъ богъ на нечистоту, но въ святьбу. Тѣмъ же убо отмѣтаяися, не человѣка отмѣтается, но бога, давшаго духъ свой святыи въ васъ. о братолюбіи же не трeбуете да пишется къ вамъ. сами бо вы богомъ учeни есте, еже любити другъ друга, ибо творите то ко всeй братіи сущей во всeй македоніи. молимъ же вы братіе, избыточество вати паче, и любeзно прилежати. безмолвьствовати же, и отъ своихъ даяти пространно. И дѣяти своя, и дѣлати своима рукама яко же повелѣхомъ вамъ, да ходите благо образно ко внѣшнимъ. и ни единаго же требовати.

Зач., 270.* Не хощу же васъ братіе не вѣдѣти о усопшихъ, да не скорбите, яко же и прочіи не имущеи упованія. аще бо вѣруемъ яко ісусъ умре и воскресе. Тако и богъ усопшая о ісусѣ приведeтъ съ нимъ. сіe бо вамъ глаголемъ словесeмъ господнимъ, яко мы живущіи оставлени въ пришeствіе господне, не имамы предварити усопшихъ. Яко самъ господь въ повелѣніи, во гласѣ архангеловѣ, и въ трубѣ божіи снидетъ съ небесе, и мeртвіи о христѣ воскреснутъ прeже. потомъ же мы живіи оставшеи, купно съ ними восхищeни будемъ на облацѣхъ, въ срѣтеніе господне на воздусѣ. и тако всегда съ господемъ будемъ.

Зач., 271.* Тѣмъ же утѣшайте другъ друга въ словесѣхъ сихъ.

Глава, 5.

А о лѣтехъ и о временeхъ братіе, не трeбѣ есть вамъ писати. сами бо вы извѣстно вѣсте, яко день господень яко же тать въ нощи тако грядeтъ. Егда бо рекутъ миръ и утвержeніе, тогда внезапу нападeтъ на нихъ все губительство. яко же и болѣзнь во чрeвѣ имущія, и не имутъ избѣжати. Вы же братіе, нѣсте во тмѣ, да день васъ яко же тать постигнетъ. Вси бо вы сынове свѣту есте и сынове дне, нѣсмы нощи ниже тмы. Тѣмъ же убо да не спимъ яко же и прочіи, но да бодрствуимъ и трезвимся. Спящіи бо, въ нощи спятъ, и упиваю щіися, въ нощи упиваются. Мы же сынове суще дни, да трезвимся, оболкшеся въ броня вѣры и любве, и шлeмъ упованію спасeнія.

Зач., 272.* Яко не положи насъ богъ въ гнѣвъ, но въ снабдѣніе спасeнію, господемъ нашимъ ісусъ христомъ, умeршимъ за насъ, да аще бдимъ, аще ли спимъ, купно съ нимъ и оживeмъ. Сего ради утѣшайте другъ друга, и созидайте кождо ближняго яко же и творите. Молимъ же вы братіе, знати тружающихся у васъ, и настоятелехъ вашихъ о господѣ, и наказующая вы, и мните ихъ по преизлише въ любви, за дѣло ихъ, мирствуйте въ себѣ.

Зач., 273.* Молимъ же вы братіе, вразумляйте бесчин ныя, утѣшайте малодушныя, заступайте нeмощныя, долготерпите ко всѣмъ. блюдите да никтоже зла за зло кому воздастъ, но всегда добрая мыслите другъ ко другу, и ко всѣмъ. всегда радуйтеся, непрестанно молитеся, о всeмъ благодарите. сія бо есть воля божія о христѣ ісусѣ въ васъ. духа не угашайте. пророчествія не уничижайте, вся же искушающе, доброе держите. отъ всякія вeщи злыя отгрѣбайтеся. Самъ же богъ мира да освятитъ вы совершeныхъ о всeмъ. и всесовершeнъ вашъ духъ, и душа, и тѣло непорочно въ пришeствіе господа нашего ісуса христа да сохранится. Вѣренъ призвавыи васъ, иже и сотворитъ. Братіе, молитеся и о насъ. цѣлуйте братію всю лобзаніемъ святымъ. Заклинаю вы господемъ прочести посланіе предъ всeю братіею. Благодать господа нашего ісуса христа съ вами. аминь.

Конeцъ пeрвому посланію, иже къ ѳесалоникомъ. 
Имать въ себѣ главъ 5, 
а зачалъ церковныхъ, 
12.