Къ коринѳомъ посланіе святаго апостола Павла, 2.

1 2 3 4 5 6 7 8 9 10 11 12 13

Глава, 1.

Зач., 167. Павелъ посланникъ ісусъ христовъ, волею божіею, и тимоѳeй братъ, церкови божіи, сущей въ коринѳѣ, со святыми всѣми сущими во всeй ахаіи. благодать вамъ и миръ отъ бога отца нашего, и господа ісуса христа.

Зач.* Благословeнъ богъ, и отецъ господа нашего ісуса христа отецъ щедротамъ, и богъ всякоя утѣхи, утѣшаяи насъ о всякой скорби нашей, яко возмощи намъ утѣшити сущая во всякой скорби, утѣшeніемъ, имъ же утѣшаемся сами отъ бога. зане яко же избыточествуютъ страданія христова въ насъ, тако и христомъ избыточе ствуетъ и утѣшeніе наше. аще ли же скорбимъ о вашемъ утѣшeніи и спасeніи, дѣйствующимся въ терпѣ ніи того страданіи, ими же и мы стражемъ. И упованіе наше извѣстно о васъ. аще ли утѣшаемся о вашемъ утѣшeніи и спасeніи. вѣдяще зане яко же обѣщницы есте страстемъ нашимъ, тако же и утѣшeнію.

Зач., 168.* Не хощемъ васъ братіе невѣдѣти о скорби нашей, бывшей намъ во асіи, яко по премногу и паче силы отяготихомся, яко не надѣятися намъ и жити. но сами въ себѣ осужeніе смерти имѣхомъ, да не надѣющеся будемъ на ся, но на бога воставляющаго мертвыя, иже отъ толь великія смерти избавилъ ны есть и избавляетъ. вонь же и уповахомъ, яко и еще избавитъ, поспѣшающимъ и вамъ по насъ молитвою, да отъ многъ лицъ, еже въ насъ дарованіе, многими благодарится о васъ.

Зач., 169.* Похвалeніе бо наше, сіе есть, свѣдѣтельство совѣсти нашея, яко въ простотѣ и чистотѣ божіи, а не въ мудрости плотьстѣй, но благодатію божіею жихомъ въ мирѣ, множае же у васъ. Не иная бо пишемъ вамъ, но яже чтeте и разумѣваете, уповаю же яко и до конца уразумѣете яко же и разумѣсте насъ отчасти, яко похвалeніе вамъ есмы, яко же и вы намъ, въ день господа нашего ісуса христа. и симъ упованіемъ хотѣхъ къ вамъ пріити прeжде, да вторую благодать имате, и вами проити въ македонію, и паки отъ македоніи пріити къ вамъ, и вами проводитися во іудeю. сіe же хотя, еда что убо легкотою дѣяхъ; или яже совѣщаваю, по плоти совѣщаваю; да будетъ у мене, еже, ей, ей. и еже, ни, ни. вѣренъ же богъ, яко слово наше еже къ вамъ, не бысть ей, и ни, ибо божіи сынъ ісусъ христосъ, иже у васъ нами проповѣданыи, мною и силуаномъ, и тимоѳeoмъ, не бысть ей, и ни, но въ нeмъ самомъ, ей бысть. елика бо обѣтованія божія, въ томъ ей, и въ томъ аминь, къ богу славѣ нами.

Зач., 170.* Извѣстуяи же насъ съ вами во христа, и пома завыи насъ богъ, иже и запечатлѣвыи насъ, и давыи обручeніе духа въ сердца наша. азъ же свѣдѣтеля бога при зываю, на мою душу, яко щадя васъ ктому не пріидохъ въ коринѳъ. не яко обладаемъ вѣрѣ вашей, но яко споспѣшницы есмы вашей радости. вѣрою бо стоите.

Глава, 2.

Судихъ же въ себѣ сіе, не паки скорбію къ вамъ пріити. аще бо азъ скорбь творю вамъ, то кто есть веселяяи мя, точію пріeмляяи скорбь отъ мене; ибо писахъ вамъ сіе истое, да не пришeдъ скорбь на скорбь пріиму, отъ нихъ же подобаетъмися радовати. надѣяся на вся вы.

Зач., 171.* Яко моя радость всѣмъ вамъ есть. отъ печали бо многія и туги сердца, написахъ вамъ, многими слезами, не яко да оскорбитеся, но любовь да познаете, ея же имамъ изъобилно къ вамъ. Аще ли кто оскорбилъ мене, не мене оскорби, но отчасти да не отягчу всѣхъ васъ. доволно бо таковому запрѣщeніе сіе еже отъ многихъ, тѣмъ же супротивное паче вамъ даровати и утѣшити, да не како многою скорбію пожeртъ будетъ таковыи. тѣмъ же молю вы, утвердите къ нему любовь. на се бо и писахъ, да разумѣю искусство ваше, аще во всeмъ послушливи есте. ему же аще что даруете, и азъ. ибо и азъ аще что подахъ, ему же подахъ, васъ ради о лицѣ ісусъ христовѣ, да не обидими будемъ отъ сатаны, не неразумѣваемъ бо умышлeнія его. Пришeдъ же въ троаду, въ благовѣстіе христово и двeри отвeрзенѣ ми бывши велицѣи о господѣ, не имѣхъ покоя духу моему, не обрѣтшу ми тита брата моего, но отрeкся имъ, изыдохъ въ македонію.

Зач., 172.* Богу же благодарeніе, иже всегда являющу насъ о христѣ ісусѣ, и воню разума его являющу нами во всякомъ мѣстѣ. яко христу благоуханіе есмы богови, и въ спасаемыхъ и въ погибающихся. овѣмъ убо воня смертная, въ смерть. овѣмъ же воня животная въ животъ. и къ симъ кто доволенъ; нѣсмы бо яко же мнозіи нечисто проповѣдующе слово божіе, но яко отъ чистоты, но яко же отъ бога, прямо богу о христѣ глаголемъ.

Глава, 3.

Зачинаемъ же паки яже о насъ самѣхъ извѣщавати вамъ, или трeбуемъ яко же нѣцыи извѣщавателныхъ посланіи къ вамъ, или отъ васъ извѣстителныхъ; посланіе бо наше вы есте, написано въ сердцыхъ нашихъ, знаемо и прочитаемо отъ всѣхъ человѣкъ, являеми яко есте посланіе христово, служeно нами, написано не черниломъ, но духомъ бога жива, не на скрижалѣхъ каменыхъ, но на скрижалѣхъ сердцъ плотянъ.

Зач., 173.* Надѣяніе же таково имамы христомъ къ богу, не яко доволни есмы отъ себе помыслити что яко отъ себе, но довольство наше отъ бога. Иже и удоволи насъ служителе быти нову завѣту, не писмeне, но духу. писмя бо убиваетъ, а духъ живитъ. аще ли служeніе смерти писмены образовано въ камени бысть въ славу, яко не мощи взирати сыномъ ізраилевомъ на лице моисeoво, славы ради лица его престающія. како не множае паче служeніе духа будетъ въ славѣ; аще бо служeніе осужeнія, слава. много паче избыточествитъ служeніе правды въ славѣ. ибо не прославися прославленое въ части сeй, за прево сходящую славу. аще бо престающе славою, много паче пребывающе въ славѣ.

Зач., 174.* Имуще убо таково упованіе, многимъ дерзновeніемъ дѣйствуемъ, и не яко же моисeй полагаше покрывало на лицы своeмъ, за еже немощи възирати сыномъ ізраилевомъ на конeцъ престающаго, но ослѣпишася помышлeнія ихъ. даже бо до сего дне тоже покрывало въ чтeніи вeтхаго завѣта пребываетъ не открываяся, зане о христѣ престаетъ. но даже до днeсь внегда чтeтся моисeй, покрывало на сердцы ихъ лежитъ. внегда же обратятся къ господу, взимается покрывало. господь же духъ есть. а идѣже духъ господень, ту свобода. мы же вси откровeномъ лицeмъ славу господню взирающе, въ той же образъ преобразуемся отъ славы въ славу, яко же отъ господня духа.

Глава, 4.

Зач., 175. Сего ради имуще служeніе се, яко же помиловани быхомъ да нестужаемъ си, но отрекохомся дѣлeсъ тайныхъ срамныхъ. не въ лукавствіи ходяще, ни льстяще словесе божія, но явлeніемъ истины представля юще себе ко всякой совѣсти человечестей прeдъ богомъ. Аще ли же есть покровeнно благовѣствованіе наше, въ гибнущихъ есть покровeно, въ нихъ же богъ вѣка сего ослѣпи разумы невѣрныхъ, во еже не восіяти имъ свѣту благовѣствованія славы христовы, иже есть образъ бога невидимаго. не себe бо проповѣдаемъ, но христа ісуса господа, себe же самѣхъ, рабы вамъ, ісуса господа ради.

Зач., 176.* Яко же богъ рекіи истмы свѣту восіяти, иже восія въ сердцыхъ нашихъ, къ просвѣщeнію разума славы божія, о лицы ісусъ христовѣ. Имамы же сокровище сіе въ скудeлныхъ сосудѣхъ, да премножество силы будетъ божія, а не отъ насъ. Во всeмъ скорбяще, но нестужающе си. нечаеми, но не отчаваеми. гоними, но не оставляеми. низлагаеми, но не погибающе. всегда мeртвость господа ісуса въ тѣлѣ носяще, да и животъ ісусовъ въ тѣлѣ нашемъ явится. Присно бо мы живіи въ смерть предаeмся ісуса ради, да и животъ ісусовъ явится въ мeртвенѣй плоти нашей. Тѣмъ же смерть убо въ насъ дѣйствуется, а животъ въ васъ.

Зач., 177.* Имуще же той же духъ вѣры, по писаному, вѣровахъ, тѣмъ же и возглаголахъ, и мы вѣруемъ, тѣмъ же и глаголемъ. Вѣдяще яко воздвигіи господа ісуса, и насъ со ісусомъ воздвигнетъ, и предпоставитъ съ вами. Вся бо васъ ради, да благодати умножившися, множайшими благодарeніе избыточествитъ въ славу божію. Тѣмъ же нестужаемъ си. но аще и внѣшніи нашъ человѣкъ тлѣетъ, но внутреныи нашъ обновляется по вся дни. Еже бо нынѣ лeгкое печали нашея, по преумножeнію въ преспѣяніе, тяготу вѣчныя славы содѣловаетъ намъ, несматряющимъ намъ видимыхъ, но невидимыхъ. видимая бо врeменна, невидимая же вѣчна.

Глава, 5.

Зач., 178. Вѣмы бо яко аще земная наша храмина тѣла разорится, созданіе отъ бога имамы, храмину неруко творeну, вѣчну на небесѣхъ. Ибо о сeмъ воздыхаемъ, въ жилище наше небесное облещися желающе, аще и облeкшеся, не нази обрящемся. ибо сущіи въ тѣлѣ сeмъ воздыхаемъ отягчаеми. Понeже не хощемъ совле щися, но пооблещися, да пожeрто будетъ мeртвеное животомъ. Сотворивыи же насъ въ сіе се истое богъ, иже и дастъ намъ обручeніе духа. дерзающе убо всегда, и вѣдяще яко живуще въ тѣлѣ, отходимъ отъ бога. вѣрою бо ходимъ, а не образомъ. дерзаемъ же, и благоволимъ паче отити отъ тѣла, и внити къ богу. Тѣмъ же и чcтною любовію тщимся, аще входяще, аще ли отходяще, благоугодни ему быти.

Зач., 179.* Всѣмъ бо явитися намъ подобаетъ предъ судищемъ христовымъ. да пріиметъ кождо яже съ тѣломъ, содѣла, или блага, или зла. Вѣдяще убо страхъ господень. человѣкы увѣщаваемъ, богови же явлeни быхомъ. Уповаемъ же и въ совѣстехъ вашихъ явлeни есме. не паки бо себе хвалимъ предъ вами, но вину даeмъ вамъ похвалeнію по насъ, да имате къ хвалящимся въ лице, а не въ сердцы. аще бо изумихомся, богови. аще ли добрѣ мыслимъ, вамъ. ибо любы божія содержитъ насъ, суждьшихъ сіе, яко аще единъ по всѣхъ умре, то убо вси умроша.

Зач., 180.* Ибо и христосъ за вся умре, да живущеи не ктому себѣ живутъ, но умeршему за нихъ и воскрeсше му. Тѣмъ же и мы отъ нынѣ ни единаго вѣмы по плоти. аще ли же и разумѣхомъ по плоти христа, но нынѣ ктому не разумѣемъ. тѣмъ же аще кая о христѣ, нова тварь. дрeвняя мимо идоша, се быша вся нова. Всяческа же отъ бога, примирившаго насъ себѣ ісусомъ христомъ, и давшаго намъ служeніе примирeнія. зане богъ бѣ о христѣ вeсь миръ примиряя себѣ. не вмѣнивъ тѣмъ согрѣшeнія ихъ, и положивъ въ насъ слово примирeнія. по христѣ убо молимъ, яко богу молящу нами. молимся убо по христѣ, примиритеся съ богомъ. иже бо невѣдѣвшаго грѣха, по насъ грѣхъ сотвори, да мы будемъ правда божія о нeмъ.

Глава, 6.

Зач., 181. Поспѣшествующе же молимъ, не во тще благодать божію пріяти вамъ. Глаголетъ бо, во время пріятно послушахъ тебе, и въ день спcнія помогохъ ти. Се нынѣ врeмя благопріятно, се нынѣ день спасeнія. ни едино ни въ чeмъ же дающе претыканіе, да служeніе беспорочно будетъ, но во всeмъ представляюще себе яко же божія слуги. въ терпѣніи мнозѣ, въ скорбѣхъ, въ бѣдахъ, въ тѣснотахъ, въ ранахъ, въ темницахъ, въ нестроeніихъ, въ трудѣхъ, во бдѣніихъ, въ пощeніихъ, въ очищeніихъ, въ разумѣ, въ долготерпѣніи, въ благости, въ дусѣ святѣ, въ любви нелицемѣрне, въ словеси истинѣ, въ силѣ божіи, оружіи правды десными и шуими, славою и бесчeстіемъ, гаждeніемъ, и благохвалeніемъ, яко лестьцы и истинни, яко незнаеми, и познаваеми, яко умирающе, и се живи есмы, яко наказаеми, а не умерщвяеми. Яко скорбяще, присно же радующеся. яко нищи, а многихъ богатяще. яко ничесоже имуще, а вся содержаще.

Зач., 182.* Уста наша отверзошася къ вамъ коринѳяне. сердце наше распространися. Не тѣсно вмѣщаетеся въ насъ, утѣсняетежеся во утробахъ вашихъ. Тожде возмѣздіе яко же чадомъ глаголю. распространитеся и вы. и не бывайте удобь преложени ко иному ярму, яко же невѣрніи. кое бо причастіе правдѣ къ беззаконію; или кое общeніе свѣту ко тмѣ; кое же согласіе христови, съ веліяромъ; или кая часть вѣрну съ невѣрными; или кое сложeніе церкови божіи со идолы;

Зач., 182.* Вы бо есте церкови бога жива, яко же рече богъ, яко вселюся въ нихъ, и похожу, и буду имъ богъ, и тіи будутъ мнѣ людіе. Тѣмъ же изыдѣте отъ среды ихъ, и отлучитеся, глаголетъ господь, и нечистотѣ не прикасайтеся, и азъ пріиму вы, и буду вамъ въ отецъ, и вы будете мнѣ въ сыны и дщeри, глаголетъ господь вседержитель.

Глава, 7.

Сицева убо имуще обѣтованія о возлюбленіи.

Зач., 183.* Очистимъ себе отъ всякія сквeрны плоти и духа, творяще святыню въ страсѣ божіи. вмѣстите ны. ни единого обидѣхомъ, ни единого истлихомъ, ни единого лихоимствовахомъ. не на осужeніе глаголю. прeжде бо рѣхъ, яко въ сердцыхъ нашихъ есте, во еже умрети съ вами и съжити. Много ми дерзновeніе къ вамъ, многа ми похвала по васъ. исполнихся утѣхи. преизбыточествую радостію, о всякой печали нашей. Ибо пришeдшимъ намъ въ македонію, ни единого имѣ покоя плоть наша, но во всeмъ скорбяще, внѣ юду брань, внутрь юду боязнь. Но утѣшаяи смирeнныя, утѣши насъ богъ пришeствіемъ титовымъ. Не токмо же пришeствіемъ его, но и утѣшeніемъ имъ же утѣшишася о васъ, повѣдая намъ ваше желаніе, ваше рыданіе, вашу рeвность по мнѣ. яко же ми паче возрадоватися. яко аще и оскорбихъ васъ посланіемъ, не раскаюся, аще и раскаяхся вижу бо яко посланіе оно, аще и въ часъ оскорби васъ. нынѣ радуюся, не яко скорбни бысте, но яко оскорбистеся въ покаяніе. оскорбѣсте бо по бозѣ, да ни о единомъ отщетитеся отъ насъ.

Зач., 184.* Печаль бо яже по бозѣ покаяніе нераскаяно во спасeніе содѣловаетъ. а сего мира печаль смерть содѣловаетъ. се бо само еже по бозѣ оскорбѣти вамъ, колико содѣла въ васъ тщаніе, но отвѣтъ, но негодованіе, но страхъ, но вожделѣніе, но рeвность, но отмщeніе. Во всeмъ представисте себе чистомъ быти въ вeщи. аще бо и писахъ вамъ, не обидѣвшаго ради, ниже обидимаго ради, но за еже явитися тщанію вашему еже по васъ къ вамъ прeдъ богомъ. Сего ради утѣшихомся о утѣшeніи вашемъ. Лише же паче возрадовахомся о радости титовѣ, яко покоися духъ его отъ всѣхъ васъ. Яко аще что ему о васъ похвалихся, не посрамихся. но яко вся воистину глаголахомъ вамъ, тако и похвалeніе наше еже къ титу, истинно бысть. И утроба его излиха въ васъ есть, воспоминающу всѣхъ васъ послушаніе, яко страхомъ и трeпетомъ пріясте его. радуюся, яко во всeмъ дерзаю въ васъ.

Глава, 8.

Зач., 185. Сказую же вамъ братія моя, благодать божію, данную въ церковахъ македонскахъ, яко во мнозѣмъ искуствѣ печалей, избытокъ благодати ихъ, и яже въ глубинѣ нищета ихъ, избыточествова въ богатство простоты ихъ. яко противу силѣ ихъ, свѣдѣтельствую, и паче силы, самоволны. со многимъ молeніемъ молящемъ насъ, благодать и общeніе служeнія еже во святыхъ пріяти намъ. и не яко же надѣяхомся, но себе вдаша пeрвѣе господви, и намъ волею божіею, во еже умолити намъ тита. да яко же прeжде начатъ, тако же и скончаетъ въ васъ благодать сію.

Зач., 186.* Но яко же во всeмъ избыточествуете, вѣрою, и словомъ и разумомъ, и всяцѣмъ тщаніемъ, и любовію яже отъ васъ къ намъ, да и всeй благодати избыточествуете. Не по повелѣнію глаголю, но за инѣхъ тщаніе, и вашея любве истинное искушая. Вѣсте бо благодать господа нашего ісуса христа, яко васъ ради обнища богатъ сыи, да вы нищетою его обогатитеся. И совѣтъ даю о сeмъ, се бо вамъ есть на пользу, вы иже не точію еже творити, но и еже хотѣти прeжде начасте отъ прошeдшаго лѣта, нынѣ же и еже творити скончайте, да яко же усeрдіе хотѣнію, такожде и скончати отъ еже имѣти. аще бо усeрдіе предлежитъ, по елико аще кто имать, благопріятенъ есть, а не по елико не имать. не бо да инѣмъ убо отрада вамъ же скорбь, но отъ изравнeнія въ нынѣшнее врeмя, ваше избыточествіе, въ онѣхъ лишeніе, да и онѣхъ избытокъ будетъ въ вашемъ лишeніи. яко да будетъ равенство, яко же есть писано. Иже многое, не преумножилъ есть, и иже малое не умалилъ.

Зач., 187.* Благодарeніе же богови, давшему тожде тщаніе о васъ въ сердце титово, яко молeніе убо пріятъ, тщивѣ иже сыи, своeю волею изыде къ вамъ. Послахомъ же съ нимъ и брата, его же похвала въ благовѣстіи по всѣмъ церковамъ. не точію же, но и освящься отъ церкови съ нами ходити, въ благодати сeй служимѣй нами, къ самого господа славѣ, и спѣху вашему посылаеми. Блюдущеся того. да не кто насъ поречeтъ въ величествіи сeмъ служимѣмъ нами, промышляюще добрая, не токмо прeдъ богомъ, но и предъ человѣки. послахомъ же съ ними и брата нашего, его же искусихомъ во многихъ многащи въстанлива суща. нынѣ же зѣло въстанливѣйша, надѣяніемъ многимъ еже въ васъ. аще же по титѣ, обѣщникъ мнѣ, и въ васъ поспѣшникъ, аще ли отъ братія наша. Посланницы церковамъ, слава христу. показаніе убо любви вашей, и нашему хвалeнію еже о васъ, въ нихъ покажите и въ лице церковамъ.

Глава, 9.

о службѣ бо яже ко святымъ, лише ми есть писати къ вамъ. вѣмъ бо усeрдіе ваше, еже о васъ хвалюся македоняномъ, яко ахаія приготовися отъ мимо шeдшаго лѣта, и яже отъ васъ рeвность раздражи множайшихъ. Послахъ же братію, да не похвалeніе наше еже о васъ испразнится въ части сeй, но да яко же глаголахъ, приготовани будѣте, еда како аще пріидутъ со мною македоняне, и обрящутъ вы не приготованыхъ, и постыдимся мы, да не глаголемъ, вы въ части сeй похвалeнія. Потрeбно убо умыслихъ умолити братію, да прeжде пріидутъ къ вамъ, и предъ уготовятъ прeжде возвѣщeнное благословeніе ваше, сіе готово быти, тако яко же благословeніе, а не яко лихоимство.

Зач., 188.* Се же глаголю, сѣяи скудостію, скудостію и пожнетъ. а сѣяи о благословeніи, о благословeніи и пожнетъ. кождо яко же изволeніе имать сердцемъ. не отъ скорби ни отъ нужды. доброхотна бо дателя любитъ богъ. Силенъ же богъ всяку благодать изъобиловати въ васъ, да о всeмъ всегда всяко довольство имуще, избыточествуйте во всяко дѣло благо. Яко же есть писано, расточи даде убогимъ, правда его пребываетъ во вѣки. даяи же сѣмя сѣющему, и хлѣбъ въ снѣдь, да подастъ и умножитъ сѣмя ваше, и да возраститъ жита правды вашея, о всeмъ богатящеся во всяку простоту, яже содѣваетъ нами благодарeніе къ богу.

Зач., 189.* Яко работа сему служeнію, нѣсть точію исполняющи лишeнія святымъ. но избыточествующи многими благодарeньми богови, искушeніемъ служeнію сему, славяще бога въ покорeніи исповѣданія вашего, въ благовѣствованіи христовѣ и простотѣ съобщeнія еже къ нимъ, и во всѣхъ, и тѣхъ молитвою по васъ, вожделѣющемъ васъ, за премногую благодать божію на васъ. благодарeніе же богови о неисповѣдимемъ его дарѣ.

Глава, 10.

Самъ же азъ павелъ молю вы кротостію и тихостію христовою, иже на лицы убо смирeнъ въ васъ, не сыи же у васъ дерзаю въ васъ. молю же еже не сыи ту дерзати надѣяніемъ, имъ же помышляю, смѣти на нѣкія непщующая насъ яко по плоти ходящихъ. во плоти бо ходяще, не по плоти воиньствуемъ. оружія бо воиньства нашего, не плотьская, но силна богови, на разорeніе твeрдемъ, помышлeнія низлагающе. и всяко возношeніе взимающеся на разумъ божіи, и плѣняюща всякъ разумъ въ послушаніе христово, и готово имуще отмстити всяко преслушаніе, егда исполнится ваше послушаніе. яже на лица ли зрите;

Зач., 190.* Аще кто надѣется себе христовъ быти, се да помышляетъ паки отъ себе, зане яко же онъ христовъ, такожде и мы христови. Аще бо и лише что похвалюся, о власти нашей, юже дастъ намъ господь въ созданіе, а не на разорeніе ваше, не постыжуся. но да не явлюся яко страша васъ посланьми. яко посланія убо рече тяжки и крѣпки, а пришeствіе тѣла, нeмощно, и слово уничижeно. Сіе да помышляетъ таковыи, яко яцы же есмы словомъ посланіи отстояще, таковіи ту суще есмы дѣломъ. не смѣемъ бо судити или прикладовати себе инымъ хвалящимъ себе самѣхъ. но сами въ себѣ себе измѣряюще. и прилагающе себе, себѣ, неразумѣваютъ. мы же не въ безмѣрная похвалимся, но по мѣрѣ правила, его же раздѣли намъ богъ мѣру достизати даже и до васъ. не яко бо не досяжуще до васъ, паче простираемъ себе, даже бо и до васъ достигохомъ благовѣстіемъ христовымъ, не въ безмѣрная хвалящеся, ниже въ чюжихъ трудѣхъ, упованіе имуще растящи вѣрѣ вашей въ васъ, велича тися по правилу нашему, изообилно, въ превышшая намъ благовѣстити, не чюжимъ правиломъ въ готовая похвалитися. хваляижеся, о господѣ да хвалится. не хваляи бо себе сeй искусенъ, но его же богъ восхваляетъ.

Глава, 11.

Зач., 191. Аще бысте пріяли малое безуміе мое, но и пріeмлете. ревную бо о васъ божіею рeвностію. обручихъ бо васъ единому мужу, дѣву чисту представити христови. боюжеся, да не како яко же змія евву прельсти лукавствомъ своимъ, тако истлѣютъ и разумы ваша отъ простоты яже о христѣ. аще бо грядыи иного ісуса проповѣдаетъ, его же не проповѣдахомъ, или духъ инъ пріeмлетъ, его же не пріясте, или благовѣствованіе ино, еже не пріясте добрѣ бысте пріяли.

Зач., 192.* Непщую бо ничимъ же лишитися прeднихъ апостолъ. аще бо и невѣжа словомъ, но не разумомъ. но вездѣ явльшеся о всeмъ въ васъ. Или грѣхъ сотворихъ себе смиряя да вы вознесeтеся; яко туне божіе благовѣ ствованіе благовѣстихъ вамъ; отъ иныхъ церковeй уимъ и пріимъ оброкъ вашему служeнію. и пришeдъ къ вамъ, и въ скудости бывъ, не стужихъ ни единому. скудость бо мою исполниша братія пришeдше отъ македоніи. и о всeмъ безъ стужeнія вамъ себе соблюдохъ, и соблюду. есть истинна христова во мнѣ, яко похвалeніе се не заградится о мнѣ въ странахъ ахаистѣхъ. почто ли; зане не люблю ли васъ; богъ вѣсть еже творю, и сотворю, да отсѣку вину, хотящемъ винѣ, да о нeмъ же хвалятся, обрящутся яко же и мы. таковіи бо, лживи апостоли, дѣлатели льстивіи, преобразующеся во апостолы христовы. и не дивно. самъ бо сатана преобразуется во ангела свѣта. не вeліе убо аще и служителіе его преобразуются яко служители правды, ихъ же кончина будетъ по дѣломъ ихъ. пакы глаголю, да никтоже мнитъ мя безумна быти, аще ли ни, поне яко безумна пріимите мя, да и азъ мало что похвалюся, а еже глаголю, не глаголю по господѣ, но яко въ безуміи въ сeй части похвалы. понeже мнози хвалятся по плоти, и азъ похвалюся. любeзно бо пріeмлете безумныя мудры суще. пріeмлете бо аще кто васъ порабощаетъ, аще кто поядаетъ, аще кто не въ лѣпоту проторитъ. аще кто по лицу біeтъ вы, аще кто вели чается, по досажeнію глаголю, зане яко мы изнемогохомъ.

Зач., 193.* о нeмъ же аще дерзаетъ кто, несмыслено глаголю, дерзаю, и азъ. еврeи ли суть, и азъ. ізраильте ли суть, и азъ. сѣмя авраамле ли суть, и азъ. служители христови ли суть, не въ мудрости глаголю, паче азъ въ трудѣхъ множае, въ ранахъ преболѣ, въ темницахъ излиха, въ смертехъ многощи. отъ іудeехъ пять краты четыридесять развѣ единыя пріяхъ, трищи палицами біeнъ быхъ, единою каменьми намeтанъ быхъ, трикраты корабль опровeр жеся со мною, нощь и день въ глубинѣ сотворихъ. въ путныхъ шeствіихъ множицею. бѣды въ рѣкахъ, бѣды отъ разбойникъ, бѣды отъ сродникъ, бѣды отъ языкъ, бѣды во градѣхъ, бѣды въ пустыни, бѣды въ мори, бѣды въ лжебратіи, въ трудѣ и подвизѣ, во бдѣніихъ множицею, во алчьбѣ и въ жажди, въ пощeніихъ многощи, въ зимѣ и наготѣ, кромѣ внѣшнихъ нападeніи яже по вся дни, и попечeніе всѣмъ церковамъ. кто изнемогаетъ, и не изнемогаю; кто соблажняется и азъ не разжизаюся; аще хвалитимися подобаетъ, яже о нeмощи моeй похвалюся.

Глава, 12.

Зач., 194. Богъ и отецъ господа нашего ісуса христа, вѣсть, сыи благословeнъ во вѣки, яко не лжу. въ дамасцѣ языческіи князь арeѳы царя, стрежаше дамаскъ градъ, яти мя хотя, и оконцемъ въ кошницы свѣшенъ быхъ по стенѣ и избѣгохъ изъ руку его. похвалитижеся не пользуетъ ми, пріиду бо въ вѣдѣнія и откровeнія господня. вѣмъ человѣка о христѣ, прeжде лѣтъ четыринадесяте, аще въ тѣлѣ, не вѣмъ, аще ли кромѣ тѣла, не вѣмъ, богъ вѣсть, восхищeна бывша таковаго до трeтіяго небесе. и вѣмъ такова человѣка, аще въ тѣлѣ, или кромѣ тѣла, не вѣмъ, богъ вѣсть, яко восхищeнъ бысть въ рай, и слыша не изречeнны глаголы, ихъ же не лѣть есть человѣку глаголати. о таковѣмъ похвалюся, о себѣ же не похвалюся, токмо о нeмощехъ моихъ. аще бо восхощу похвалитися, не буду безуменъ, истину бо реку. щажду же еда не како кто вознепщуетъ о мнѣ паче еже видитъ мя или слышитъ что отъ мене. и за премногая откровeнія да не превозношуся, дастъмися пакостникъ плоти, ангелъ сатанинъ, да ми пакости дѣетъ, да не превозношуся. о сeмъ трикраты господа молихъ, да отступитъ отъ мене, и речe ми, довлѣтъ ти благодать моя. сила бо моя въ нeмощи совершается. сладцѣ убо похвалюся паче въ нeмощехъ моихъ, да вселится въ мя сила христова.

Зач., 195.* Тѣмъ же благоволю въ нeмощехъ, въ досаждe ніихъ, въ бѣдахъ и во изгнаніихъ, въ тѣснотахъ по христѣ. егда бо нeмощьствую, тогда силенъ есмь. быхъ несмысленъ хваляся, вы мя понудисте. азъ бо долженъ бѣхъ отъ васъ хвалимъ бывати. ничимъ же бо лишихся прeжнихъ апостолъ, аще и ничтоже есмь. Знаменія бо апостолова содѣяшася въ васъ, во всякомъ терпѣніи, и въ знаменіихъ и чюдесѣхъ и силахъ. что бо есть, его же лишистеся паче прочихъ церковeй, аще точію яко азъ самъ не стужихъ вамъ; дадите ми неправду сію. се трeтіе готовъ есмь пріити къ вамъ, и не стужу вамъ. не ищу бо вашихъ, но васъ. Не должна бо суть чада родителемъ снискати имѣнія, но родителіе чадомъ. Азъ же въ сладость изждиву, и изждивeнъ буду по душахъ вашихъ, аще и паче васъ люблю, мeнши любимъ есмь. буди же, азъ не отягчихъ вамъ, но коваренъ сыи, лeстію васъ пріяхъ. Еда его же послахъ къ вамъ, тѣмъ лихоимствовахъ ли васъ; умолихъ тита, и съ нимъ послахъ брата. еда лихоимствова ли чимъ васъ титъ; не тѣмъ же ли духомъ ходиховѣ, не тѣми же ли стопами; паки ли мните, яко отвѣтъ вамъ творимъ; прeдъ богомъ о христѣ глаголемъ, всe же возлюбленіи о вашемъ созданіи и утвержeніи.

Зач., 196.* Боюжеся, еда како пришeдъ, не яцѣхъ же хощу обрящу васъ, и азъ обрящуся вамъ, якова не хощете. да не како рвeнія, зависти, ярости, рeти, клеветы, шептанія, кичeнія, нестроeнія. Еда паки пришeдша мя смиритъ богъ мой къ вамъ, и восплачюся многихъ прeжде согрѣшшихъ, и не покаявшихся о нечистотѣ и блужeніи и студоложствіи яже содѣяша.

Глава, 13.

Третицею се гряду къ вамъ. да при устѣхъ двою или тріeхъ свѣдѣтелехъ станетъ всякъ глаголъ. прeже рѣхъ, и предъ глаголю, яко бывъ второе, и не сыи нынѣ пишу, прeжде согрѣшшимъ, и прочимъ всѣмъ. яко аще пріиду паки, не пощажу.

Зач., 197.* Понeже искушeніе ищете глаголющаго во мнѣ христа. иже въ васъ не изнемогаетъ, но можетъ въ васъ. ибо аще и распятъ бысть отъ нeмощи, но живъ есть отъ силы божія. Ибо мы немощьствуемъ о нeмъ, но живи будемъ съ нимъ отъ силы божія въ васъ. себе искушайте. аще есте въ вѣрѣ, себе искушайте. или не знаете себе, яко ісусъ христосъ въ васъ есть; аще точію чимъ не искусни есте. уповаю же, яко разумѣти имате яко мы нѣсмы неискусни. Молимжеся къ богу, не сотворити вамъ ни единаго зла. не яко да мы искусни явимся, но да и вы доброе сотворите, мы же яко неискусни будемъ. ничтоже бо можемъ на истину, но поистинѣ. радуемжеся егда мы немощьствуемъ, вы же силни бываете. Се же и молимся о вашемъ совершeніи. сего ради не сыи у васъ сія пишу, да не пришeдъ, бесщадно сотворю, по власти, юже господь далъ ми есть въ созданіе, а не на разорeніе. Тѣмъ же братіе, радуйтеся. совершайтеся, утѣшайтеся, тожде мудрствуйте, миръ имѣйте, и богъ любве и мира будетъ съ вами. Цѣлуйте другъ друга лобзаніемъ святымъ. цѣлуютъ вы святіи вси. Благодать господа нашего ісуса христа, и любы бога и отца, и общeніе святаго духа, со всѣми вами. аминь.

Конeцъ, посланію къ коринѳомъ
второму. имать въ себѣ
главъ 13. а зачалъ,
церковных 
32.