Соборное посланіе Іоанново, 2.

Глава, 1.

Зач., 75. Старецъ избраннѣй господыни и чадомъ ея, ихъ же азъ люблю воистину. И не азъ точію, но и вси разумѣвшеи истину, за истину пребывающую въ насъ, и съ нами будетъ во вѣкы. да будетъ съ вами благодать милость миръ, отъ бога отца, и господа ісуса христа сына отча, во истиннѣ, и любви. Возрадовахся зѣло, яко обрѣтохъ отъ чадъ твоихъ ходяща во истиннѣ, яко же заповѣдь пріяхомъ отъ отца. И нынѣ молю тя госпоже, не яко заповѣдь пишу тебѣ нову, но ея же имамы испeрва да любимъ другъ друга. и сія есть любы, да ходимъ по заповѣдемъ его. Сія есть заповѣдь, яко же слышасте испeрва, да въ нeй ходите. зане мнози лестцы внидоша въ миръ, иже не исповѣдующе ісуса христа пришeдша во плоти. сeй есть льстeцъ и антихристъ. Блюдѣте себе, да не погубимъ яже дѣлахомъ добрая, но да мзду совершeну воспріимете. Всякъ преступаяи и не пребы ваяи во учeніи христовѣ, бога не имать. пребываяи же во учeніи христовѣ, сeй и отца и сына имать. Аще кто приходитъ къ вамъ, и сего учeнія не приноситъ, не пріeмлите его въ домъ, и радоватися ему не глаголите. глаголяи бо ему радоватися, сообщается дѣломъ его злымъ. Многа имѣхъ писати вамъ, но не восхотѣхъ хартіею и черниломъ. но надѣюся пріити къ вамъ и усты ко устомъ глаголати. да радость наша будетъ исполнена. цѣлуютъ тя чада, сестры твоея избранныя, аминь.

Конeцъ, соборному посланію
іoанновому второму.
Имать въ себѣ
главъ . а
зачало
церков
ное,
1.