MARTYROLOGIUM ROMANUM

29 Decembris

Quarto Kalendas Januarii. Luna ...     xxvj. C

Cantuariae, in Anglia, natalis sancti Thomae, Episcopi et Martyris, qui, ob defensionem justitiae et ecclesiasticae immunitatis, in Basilica sua, ab impiorum hominum factione percussus gladio, Martyr migravit ad Christum.

Hierosolymis sancti David, Regis et Prophetae.

Arelate, in Gallia, natalis sancti Trophimi, cujus meminit sanctus Paulus ad Timotheum scribens. Ipse autem Trophimus, ab eodem Apostolo Episcopus ordinatus, praefatae urbi primus ad Christi Evangelium praedicandum directus est; ex cujus praedicationis fonte (ut sanctus Zosimus Papa scribit) tota Gallia rivulos fidei recepit.

Romae sanctorum Martyrum Callisti, Felicis et Bonifatii.

In Africa passio sanctorum Martyrum Dominici, Victoris, Primiani, Lybosi, Saturnini, Crescentii, Secundi et Honorati.

Constantinopoli sancti Marcelli Abbatis.

In pago Oxymensi, in Gallia, sancti Ebrulphi, Abbatis et Confessoris, tempore Childeberti Regis.

Viennae, in Gallia, Commemoratio sancti Crescentis, Episcopi et Martyris, qui fuit discipulus beati Pauli Apostoli ac primus ejusdem civitatis Episcopus, et cujus dies natalis quinto Kalendas Julii celebratur.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.