MARTYROLOGIUM ROMANUM

5 Augusti   

Nonis Augusti. Luna ...     vij. G

Romae, in Exquiliis, Dedicatio Basilicae sanctae Mariae ad Nives.

Catalauni, in Gallia, sancti Memmii, civis Romani, qui, a sancto Petro Apostolo consecratus illius civitatis Episcopus, populum sibi commissum ad Evangelii veritatem perduxit.

Romae passio sanctorum Martyrum viginti trium, qui, in persecutione Diocletiani, via Salaria veteri, capite obtruncati sunt, et, ad clivum Cucumeris, ibidem sepulti.

Asculi, in Piceno, sancti Emygdii, Episcopi et Martyris; qui, a sancto Marcello Papa Episcopus ordinatus et illuc ad praedicandum Evangelium missus, ibidem, in confessione Christi, sub Diocletiano Imperatore, martyrii coronam accepit.

Antiochiae sancti Eusignii militis, qui annum agens centesimum decimum, cum Constantini Magni fidem, sub quo militaverat, Juliano Apostatae exprobraret, eumque ut patriae pietatis desertorem redargueret, ab eodem jussus est capite caedi.

Item sanctorum Martyrum Aegyptiorum Cantidii, Cantidiani et Sobelis.

Augustae Vindelicorum natalis sanctae Afrae Martyris, quae, cum esset pagana, per doctrinam sancti Narcissi Episcopi ad Christum est conversa, et, cum omnibus domus suae membris, ab eodem Episcopo baptizata; postmodum vero, ob Christi confessionem igni tradita, martyrium suum, septem diebus antequam beata Hilaria mater ac tres ancillae eodem cruciatus genere coronarentur, feliciter explevit.

Augustodiini beati Cassiani Episcopi.

Apud Theanum, in Campania, sancti Paridis Episcopi.

In Anglia sancti Oswaldi Regis, cujus gesta sanctus Beda Venerabilis commemorat.

Eodem die sanctae Nonnae, quae fuit mater beatorum Gregorii Nazianzeni, Caesarii et Gorgoniae.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.