MARTYROLOGIUM ROMANUM

21 Julii   

Duodecimo Kalendas Augusti. Luna ...     iv. B

Sancti Laurentii a Brundusio, Confessoris et Ecclesiae Doctoris, ex Ordine Fratrum Minorum Capuccinorum, qui sequenti die migravit in caelum.

Romae sanctae Praxedis Virginis, quse, in omni castitate et lege divina cum esset erudita, vigiliis et orationibus atque jejuniis assidue vacans, quievit in Christo, sepultaque est, juxta sororem suam Pudentianam, via Salaria.

Babylone sancti Danielis Prophetae.

Comanae, in Armenia, sancti Zotici, Episcopi et Martyris; qui sub Severo coronatus est.

Massiliae, in Gallia, natalis sancti Victoris, qui, cum esset miles, et nec militare neque idolis sacrificare vellet, hinc, primo in carcerem trusus ibique ab Angelo visitatus, deinde variis cruciatibus punitus, novissime, contritus in mola pistoria, martyrium consummavit. Passi sunt cum ipso et tres milites, id est Alexander, Felicianus et Longinus.

Trecis, in Gallia, passio sanctorum Claudii, Justi, Jucundini et Sociorum quinque, sub Aureliano Imperatore.

Ibidem sanctae Juliae, Virginis et Martyris.

Argentorati sancti Arbogasti Episcopi, miraculis clari.

In Syria sancti Joannis Monachi, qui exstitit collega sancti Simeonis.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.