MARTYROLOGIUM ROMANUM

11 Aprilis   

Tertio Idus Aprilis. Luna ...     xiv. F

Sancti Leonis Papae Primi, cognomento Magni, Confessoris et Ecclesiae Doctoris, cujus dies natalis recolitur quarto Idus Novembris.

Pergami, in Asia, sancti Antipae, testis fidelis, cujus meminit sanctus Joannes in Apocalypsi. Ipse autem Antipas, sub Domitiano Imperatore, in bovem aeneum candentem conjectus, martyrium consummavit.

Salonae, in Dalmatia, sanctorum Martyrum Domnionis Episcopi, cum militibus octo.

Gortynae, in Creta, sancti Philippi Episcopi, vita et doctrina clarissimi, qui, temporibus Marci Antonini Veri et Lucii Aurelii Commodi, Ecclesiam sibi creditam regens, a furore Gentilium et ab haereticorum insidiis eamdem tutatus est.

Nicomediae sancti Eustorgii Presbyteri.

Spoleti sancti Isaac, Monachi et Confessoris, cujus virtutes sanctus Gregorius Papa commemorat.

Apud Gazam, in Palaestina, sancti Barsanuphii Anachoretae, sub Justiniano Imperatore.

Lucae, in Etruria, sanctae Gemmae Galgani, Virginis, contemplatione Dominicae Passionis et vitae sanctitate mirabilis, quam Pius Papa Duodecimus in Sanctarum numerum retulit.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.