St. Škutāns, M.I.C.
Katōļticeibas vēsture un katekisms
D) PAR TYKUMU UN KRISTEIGŪ PIĻNEIBU
1. Voi myusim ir jōapsamīrynōj ar tū, ka sorgōjamēs nu grākim un nūzygumim?
Nā. Mums cīteigi ir jōsaceņš kļyut arvīn vairōk tykumeigim un sasnēgt myusu stōvūkļam pīdīneigu piļneibu.
„Taisneigais lai kļyust vēļ taisneigōks un svatais lai kļyust svātōks“-(Atkl. 22:11).
Pīmārs: sv. Pōvuls par sevi soka: „Na tōpēc, ka jau tū es byutu sajēmis voi byutu piļneigs ... aizmērsdams tū, kas aiz manis, es tīcūs pēc tō, kas prīškā“ (Filip. 3: 12—13).
§ 1. Par tykumu
2. Kōpēc mums ir jōsaceņš kļyut arvīn vairōk tykumeigōkim?
Tōpēc, ka cylvāks vīneigi tod ir lobs un pateikams Dīvam, kod ir tykumeigs.
3. Kamā pastōv kristeigais tykums?
Kristeigais tykums vyspōri pastōv iztureigā grybā un pastōveigā pīpyulē dareit tū, kas ir pateikams Dīvam.
4. Kai kristeigais tykums dolōs sovas izceļsmes ziņā?
Tys dolos īdvastajā un īgyutajā tykumā.
5. Kas ir īdvastais tykums?
Tykumu sauc par īdvastu sakarā ar tū, ka tys, kūpā ar svātdorūšu žēlesteibu teik dūts dvēselei, lai tū dareitu spējeigu un nūskaņōtu (disponētu) pōrdabiskūs tykumu praksei, tys ir, lai dareitu spējeigu dareit taidus dīvbejeibas aktus, kurim ir myužeigōs svātlaimes vērteiba (Rom. 5:5).
6. Kaidi tykumi teik golvonūkōrt īdvasti dvēselē?
Tī ir trejs diviškeigi (teologiski) tykumi: 1. ticeiba, 2. cereiba un 3. mīlesteiba.
7. Kōpēc tūs sauc par teologiskim tykumim?
Tōpēc, ka tī nōk teiši nu Dīva un saistōs ar Dīvu.
8. Kod mums ir jōdora ticeibas, cereibas un mīlesteibas akti?
Tī mums ir jōdora bīži, bet seviški: 1. lelu kārdynōjumu laikā pret šim tykumim, 2. kod mes pījamam svātus sakramentus un 3. kod mums draud brīsmes pazaudeit dzeiveibu, voi kod asam uz nōves gultas.
Šūs aktu paraugus var atrast ik kotrā lyugšonu grōmotā. Vyslobōk tūs dareit sovim vōrdim, kas nōk nu ticeigas sirds dziļumim.
9. Kas ir īgyutais tykums?
Tykumu sauc par īgyutu, sakarā ar tū, ka šys tykums ir ar Dīva želesteibas atbaļsteitu pastōveigu praksi īgyuta spēja.
10. Kai vyspōri sauc tūs ar personeigū praksi īgyutūs tyknmus?
Tūs sauc par moraliskim tykumim, tōpēc, ka tī regulei myusu, ar Dīva grybu saskaņōtu, moraliskū uzvedeibu.
11. Kaidus nu tim sauc par golvonim voi kardinalim tykumim, kurūs pōrejī ītylpst?
Ti ir: 1. saprateiba, 2. taisneigums, 3. gora spāks un 4. māroneiba (attureiba) (Sap. 7:7).
12. Kas ir saprateiba?
Saprateiba ir tykums, kas paleidz mums saredzēt tū, kas teišam ir lobs un Dīvam pateikams, atškireibā nu tō, kas tikai izalīk par lobu. Taidā kōrtā šys tykums pasorgōj myusus nu pasadūšonas kārdynōjumam uz ļaunu.
„Napīsamārojit šam pasauļam, bet pōrsaveidojit, atsajaunōdami sovā gorā, lai jyus saprostu, kaids ir Dīva prōts, kas lobs, pateikams un piļneigs“ (Rom. 12:2). „Sorgōjīs nu viļteigim pravīšim“ (Mt. 7:15).
Pīmārs. Gudrōs jaunovas (Mt. 25).
13. Kas ir taisneigums?
Taisneigums ir tykums, kas paleidz mums byut apjēmeigim dareit tū, kas ir pareizs, tōpēc vīnmār asam nūskaņōti dūt ik kotram, kas kuram pīsanōk. „Atdūdit keizaram, kas ir keizara, un Dīvam, kas Dīvam pīdar“ (Mt. 22:21).
14. Kas ir gora spāks?
Gora spāks ir tykums, kas dūd mums spēju dreižok izturēt gryuteibas un vojōšonas, nakai atstāt sovus pīnōkumus. Pīmārs: septeni makabeju brōli un jūs mōte, kas mūkas cīte un nūmyra, bet napalyka nauzticeigi sovim pīnōkumim.
15. Kas ir māroneiba (attureiba)?
Māroneiba ir tykums, kas savolda myusu jyutekleigōs tīksmes un kōres, lai tōs myus naatrautu nu tykumu prakses.
„Es pamōcu jyus atsaturēt nu mīsas kōreibom, kas karoj pret dvēseli“ (1. Pīt. 2:11).
16. Kaidi tykumi ir seviški preteji septenim golvonim grākim?
Tī ir: 1. pazemeiba, 2. deveigums, 3. navaineiba (ceisteiba), 4. lānprōteiba, 5. māroneiba ēsšonā un dzeršonā, 6. brōleigō mīlesteiba un 7. čaklums.
17. Kas ir pazemeiba?
Pazemeiba ir tykums, kas mōca myus atzeit sovu mozvērteigumu, naspāku un grēceigumu, kai ari saredzēt, ka vyss lobs nōk nu Dīva.
Pīmāri: Abrahams (Gen. 18:27); muitinīks (Lk. 18:13). „Jo jyus naatsagrīzsit un nakļyusit kai bārni, jyus dabasu vaļsteibā naīīsit“ (Mt. 18:3).
18. Kas ir deveigums?
Deveigums ir tykums, kas myus skubynoj lītōt sovu īpašumu tryuceigūs atbaļsteišonai voi kaidim cytim teicamim mērkim.
Pīmāri: Tobijs (Tob. 1:19—20); Salomons (3. kēn. 5—8); pyrmī kristīsi. „Dūdit, tod ari jums tiks dūts“ (Lk. 6:38).
19. Kas ir navaineiba (ceisteiba)?
Navaineiba ir tykums, kas pakļaun un savolda vysas nateirōs tīksmes un kōreibas, kas apgōnej kauneibu.
Pīmāri: Jezups, Zuzana un pōri vysim vyssv. Jaunova Marija. „Kas pīdar Kristum, tī ir sovu mīsu krystā pīkoluši leidz ar vysom kaisleibom un kōreibom“ (Gal. 5:24).
20. Kas ir lānprōteiba?
Lānprōteiba ir tykums, kas apspīž atrībeibas kōri, kai ari ik kotru nataisneigas dusmes un napatykas izpaudumu.
Pīmāri: Dovids (1. kēn. 24. un 26.), sv. Stepōns (Ap. d. 7:58). „Mōcatēs nu Manis, jo Es asmu lānprōteigs un sirdspazemeigs“ (Mt. 11:29).
21. Kas ir māroneiba ēsšonā un dzeršonā?
Māroneiba ēsšonā un dzeršonā ir tykums, kas paleidz kontrolēt pošam sevi, sovu apetiti un dzeršonas kōri.
Pīmāri. Danieļs, Ananijs, Misaels un Azarijs (Dan. 1), Jōņs Kristeitōjs (Mt. 3:4). „Dzeivōsim gūdeigi kai dīnā: na pleitādami un dzīrōdami“ (Rom. 13:13).
22. Kas ir brōleigō mīlesteiba?
Brōleigō mīlesteiba ir tykums, kas skubynoj myusus vēlēt ik kuram kotram lobu, sirsneigi prīcotīs par tyvōkō prīcu un skumt kūpā ar jū par jō bādom.
Pīmāri: Rutas un Tobija vēsture. „Brōļu mīlesteibā mīļojit vīns ūtru ... Prīcojitēs ar prīceigajim, raudit ar tim, kas raud“ (Rom. 12:10., 15.).
23. Kas ir čaklums?
Čaklums ir tykums, kas dora spējeigus labprōt un mūdri kolpōt Dīvam, veicynōt Jō gūdu, cik tōļ tys ir myusu spākā, kai ari uzticeigi piļdeit sovus pīnōkumus.
Pīmāri: Matatijs (1. mak. 2). „Naesit kyutri ceņteibā, esit dedzeigi gorā, kolpojit Kungam“ (Rom. 12:11).
Praktisks padūms. Jo jyus naatlaideigi nakarōsit pret sovom ļaunōm tīksmēm, jyus nikod naigyusit kristeigūs tykumus. „Uzticeigi karoj leidz nōvei un Dīvs tev dūs dzeiveibas krūni“ (Atkl. 2:10).
