Божественная Літургія иже во святыхъ отца нашего Іоанна Златоустаго

Ри́мъ. Въ тvпогра́фіи крvптоферра́тскія oби́тели. 1940.

По благословѣ́нію святѣ́шаго ри́мскаго апо́стольскаго престо́ла.

Чинъ священныя и божественныя Літургіи

Подготовительныя молитвы

Хотя́й іере́й боже́ственное соверша́ти тайнодѣ́йствіе, до́лженъ е́сть пе́рвее у́бо примире́нъ бы́ти со всѣ́ми, и не имѣ́ти что́ на кого́, и се́рдце же, ели́ка си́ла, отъ лука́выхъ блюсти́ помысло́въ, воздержа́тися же съ ве́чера и трезви́тися да́же до вре́менѣ священнодѣ́йствія.

Входныя молитвы

Вре́мени же наста́вшу, вхо́дитъ въ хра́мъ: и соедини́вся со діа́кономъ, творя́тъ вку́пѣ къ восто́ку пре́дъ святы́ми две́рьми поклоне́нія три́.

Та́же глаго́етъ діа́конъ: Благослови́ влады́ко.

Іере́й: Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ.

Діа́конъ: Ами́нь.

И начина́етъ глаго́лати діа́конъ:

Сла́ва тебѣ́ Бо́же на́шъ, сла́ва тебѣ́.

Царю́ небе́сный, утѣ́шителю, ду́ше и́стины, и́же вездѣ́ сы́й и вся́ исполня́яй, сокро́вище благи́хъ и жи́зни пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, бла́же, ду́шы на́шя.

Святы́й Бо́же, святы́й крѣ́пкій, святы́й безсме́ртный, поми́луй на́съ. три́жды.

Сла́ва Отцу́, и Cы́ну, и свято́му Ду́ху, и ны́нѣ и при́сно, и во вѣ́ки вѣко́въ, ами́нь.

Пресвята́я Тро́ицѣ, поми́луй на́съ: Го́споди, очи́сти грѣхи́ на́шя: Влады́ко, прости́ беззако́нія на́ша: святы́й, посѣти́ и исцѣли́ не́мощи на́шя и́мене твоего́ ра́ди.

Го́споди поми́луй, три́жды.

Сла́ва Отцу́, и Cы́ну, и свято́му Ду́ху, и ны́нѣ и при́сно, и во вѣ́ки вѣко́въ, ами́нь.

О́тче на́шъ, и́же еси́ на небесѣ́хъ, да святи́тся и́мя Твое́, да пріи́детъ ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь, и оста́ви на́мъ до́лги на́шя, я́коже и мы́ оставля́емъ должнико́мъ на́шымъ: и не введи́ на́съ во искуше́ніе, но изба́ви на́съ отъ лука́ваго.

Іере́й: Я́ко Твое́ е́сть ца́рство, и си́ла, и сла́ва, Отца́, и Cы́на, и свята́го Ду́ха, ны́нѣ и при́сно, и во вѣ́ки вѣко́въ. Ами́нь.

Та́же глаго́лютъ:

Поми́луй на́съ Го́споди, поми́луй на́съ: вся́каго бо отвѣ́та недоумѣ́юще, сію́ Ти моли́тву я́ко Влады́цѣ грѣ́шніи прино́симъ: поми́луй на́съ.

Сла́ва:

Го́споди, поми́луй на́съ, на Тя́ бо упова́хомъ, не прогнѣ́вайся на ны́ зело́, ниже́ помяни́ беззако́ній на́шихъ: но при́зри и ны́нѣ я́ко благоутро́бѣнъ, и изба́ви ны́ отъ враго́въ на́шихъ. Ты́ бо еси́ Бо́гъ на́шъ, и мы́ лю́діе Твои́, вси́ дѣла́ руку́ Твое́ю, и и́мя Твое́ призыва́емъ.

И ны́не:

Милосе́рдія две́ри отве́рзи на́мъ благослове́нная Богоро́дице, надѣ́ющіися на тя́ да не поги́бнѣмъ , но да изба́вимся тобо́ю отъ бѣ́дъ: ты́ бо еси́ спасе́ніе ро́да хрістіа́нскаго.

Та́же отхо́дятъ ко іко́не Христо́вѣ и целу́ютъ ю́, глаго́люще:

Пречи́стому о́бразу Твоему́ покланя́емся, благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на кре́стъ, да изба́виши, я́же созда́лъ еси́, отъ рабо́ты вра́жія. Тѣ́мже благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ.

Та́же целу́ютъ и іко́ну Богоро́дицы, глаго́люще тропа́рь:

Милосе́рдія су́щи исто́чникъ, ми́лости сподо́би на́съ Богоро́дице, при́зри на лю́ди согрѣши́вшыя, яви́ я́ко при́сно си́лу твою́: на тя́ бо упова́юще, ра́дуйся, вопіе́мъ ти́, я́ко иногда́ Гавріи́лъ безпло́тныхъ архістрати́гъ.

Та́же прикло́нь главу́, іере́й глаго́етъ сію́ моли́тву:

Го́споди, низпосли́ ру́ку Твою́ съ высоты́ свята́го жили́ща Твоего́, и укрепи́ мя́ въ предлежа́щую слу́жбу Твою́: да неосужде́нно предста́ну стра́шному престо́лу Твоему́, и безкро́вное священнодѣ́йствіе совершу́. Я́ко Твоя́ е́сть си́ла, во вѣ́ки вѣко́въ, ами́нь.

Та́же творя́тъ и къ лико́мъ покло́ны по еди́ному, и та́ко отхо́дятъ во святи́лище, глаго́люще:

Вни́ду въ до́мъ Тво́й, поклоню́ся ко хра́му свято́му Твоему́ въ стра́сѣ Твое́мъ. Го́споди, наста́ви мя́ пра́вдою Твое́ю, вра́гъ мои́хъ ра́ди испра́ви пре́дъ Тобо́ю пу́ть мо́й. Я́ко нѣ́сть во устѣ́хъ и́хъ и́стины, се́рдце и́хъ су́етно, гро́бъ отве́рстъ горта́нь и́хъ, язы́ки свои́ми льща́ху. Суди́ и́мъ, Бо́же, да отпаду́тъ отъ мы́слей свои́хъ: по мно́жеству нече́стія и́хъ изри́ни я́, я́ко преогорчи́ша Тя́, Го́споди. И да возвеселя́тся вси́ упова́ющіи на Тя́, во вѣ́ки возра́дуются, и всели́шися въ ни́хъ: и похва́лятся о Тебѣ́ лю́бящіи и́мя Твое́. Я́ко Ты́ благослови́ши пра́ведника, Го́споди, я́ко ору́жіемъ благоволе́нія вѣнча́лъ еси́ на́съ.

Вше́дше же во святи́лище, творя́тъ покло́ны три́ пре́дъ свято́ю трапе́зою и целу́ютъ свято́е ева́нгеліе, святу́ю трапе́зу и напресто́льный крѣ́стъ.

Облаченіе

Та́же пріе́млютъ въ ру́цѣ своя́ кíйждо стіха́рь сво́й, и творя́тъ покло́ны три́ къ восто́ку, глаго́люще въ себѣ́ кíйждо:

Бо́же, ми́лостивъ бу́ди мнѣ́ грѣ́шному.

Та́же прихо́дитъ къ іере́ю діа́конъ, держя́ въ десно́й руцѣ́ стіха́рь со ораре́мъ, и подклони́въ ему́ главу́, глаго́летъ:

Благослови́, влады́ко, стіха́рь со ораре́мъ.

Іере́й глаго́летъ:

Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ.

Та́же отхо́дитъ діа́конъ во еди́ну страну́ святи́лища, и облачи́тся въ стіха́рь, моля́ся си́це:

Возра́дуется душа́ моя́ о Го́сподѣ, облече́ бо мя́ въ ри́зу спасе́нія, и оде́ждею весе́лія одѣ́я мя́: я́ко жениху́ возложи́ ми вѣне́цъ, и я́ко невѣ́сту украси́ мя красото́ю.

И ора́рь у́бо целова́въ, налага́етъ на лѣ́вое ра́мо. Нарука́вницы же налага́я на ру́цѣ, на десну́ю у́бо глаго́летъ:

Десни́ца Твоя́, Го́споди, просла́вися въ крѣ́пости: десна́я Твоя́ рука́, Го́споди, сокруши́ враги́, и мно́жествомъ сла́вы Твоея́ сте́рлъ еси́ супоста́ты.

На лѣ́вую же, глаго́летъ:

Ру́цѣ Твои́ сотвори́сте мя́, и созда́стѣ мя́: вразуми́ мя, и научу́ся за́повѣдемъ Твои́мъ.

Та́же отше́дъ въ предложе́ніе, (раскла́дываетъ ілито́нъ) уготовля́етъ свяще́нная. Святы́й у́бо дíскосъ поставля́етъ ошу́юю страну́: поти́ръ же, е́же е́сть святу́ю ча́шу, одесну́ю, и про́чая съ ни́ми.

Іере́й же си́це облачи́тся: пріе́мъ стіха́рь въ лѣ́вую ру́ку, и поклони́вся три́жды къ восто́ку, я́коже рече́ся, назна́менуетъ, глаго́ля:

Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ, ами́нь.

Та́же облачи́тся, глаго́ля:

Возра́дуется душа́ моя́ о Го́сподѣ, облече́ бо мя́ въ ри́зу спасе́нія, и оде́ждею весе́лія одѣ́я мя́, я́ко жениху́ возложи́ ми вѣне́цъ, и я́ко невѣ́сту украси́ мя красото́ю.

Та́же пріе́мъ епітрахи́ль, и назна́менавъ, облача́ется е́ю, глаго́ля:

Благослове́нъ Бо́гъ излива́яй благода́ть свою́ на свяще́нники своя́, я́ко мѵ́ро на главѣ́, сходя́щее на браду́, браду́ ааро́ню, сходя́щее на оме́ты оде́жды его́.

Та́же пріе́мъ по́ясъ и опоясу́яся, глаго́летъ:

Благослове́нъ Бо́гъ, препоясу́яй мя́ си́лою, и положи́ непоро́ченъ пу́ть мо́й, соверша́яй но́зѣ мои́ я́ко еле́ни, и на высо́кихъ поставля́яй мя́.

Нарука́вницы же, налага́я на ру́ки, на десну́ю у́бо, глаго́летъ:

На лѣ́вую же, глаго́летъ:

Ру́цѣ Твои́ сотвори́сте мя́, и созда́стѣ мя́: вразуми́ мя, и научу́ся за́повѣдемъ Твои́мъ.

Та́же пріе́мъ набе́дренникъ, а́ще и́мать, и благослови́въ и́, и целова́въ, глаго́летъ:

Препоя́ши ме́чь тво́й по бедрѣ́ твое́й, си́льне, красото́ю твое́ю, и добро́тою твое́ю: и наляцы́, и успѣва́й, и ца́рствуй, и́стины ра́ди и кро́тости и пра́вды, и наста́витъ тя́ ди́вно десни́ца твоя́, всегда́, ны́нѣ и при́сно, и во вѣ́ки вѣко́въ, ами́нь.

Та́же пріе́мъ фело́нь и благослови́въ, целу́етъ глаго́ля си́це:

Свяще́нницы Твои́, Го́споди, облеку́тся въ пра́вду, и преподо́бніи Твои́ ра́достію возра́дуются всегда́, ны́нѣ и при́сно, и во вѣ́ки вѣко́въ, ами́нь.

Умовеніе

Та́же отше́дше въ предложе́ніе, умыва́ютъ ру́цѣ, глаго́люще:

Умы́ю въ непови́нныхъ ру́цѣ мои́, и обы́ду же́ртвѣнникъ Тво́й, Го́споди, е́же услы́шати ми́ гла́съ хвалы́ Твоея́, и повѣ́дати вся́ чудеса́ Твоя́. Го́споди, возлюби́хъ благолѣ́піе до́му Твоего́ и мѣ́сто селе́нія сла́вы Твоея́. Да не погуби́ши съ нечести́выми ду́шу мою́, и съ му́жи крове́й живота́ моего́, и́хже въ рука́хъ беззако́нія, десни́ца и́хъ испо́лнися мзды́. А́зъ же незло́біемъ мои́мъ ходи́хъ, изба́ви мя́, Го́споди, и поми́луй мя́. Нога́ моя́ ста́ на правотѣ́, въ це́рквахъ благословлю́ Тя, Го́споди.

I. Проскомидія

Та́же поклоне́нія три́ пре́дъ предложе́ніемъ сотво́рше, глаго́лютъ кíйждо:

Бо́же, ми́лостивъ бу́ди мнѣ́ грѣ́шному.

Искупи́лъ ны́ еси́ отъ кля́твы зако́нныя честно́ю Твое́ю кро́вію: на крестѣ́ пригвозди́вся, и копіе́мъ пробо́дся, безсме́ртіе источи́лъ еси́ человѣ́комъ: Спа́се на́шъ, сла́ва Тебѣ́.

Та́же глаго́летъ діа́конъ: Благослови́ влады́ко.

И начина́етъ іере́й: Благослове́нъ Бо́гъ на́шъ, всегда́, ны́нѣ и при́сно, и во вѣ́ки вѣко́въ.

Діа́конъ: Ами́нь.

1.

Та́же пріе́млетъ свяще́нникъ лѣ́вою у́бо руко́ю просфору́, десно́ю же свято́е копіе́, и зна́менуя и́мъ три́жды верху́ печа́ти просфоры́, глаго́летъ:

Въ воспомина́ніе Го́спода и Бо́га и Спа́са на́шего Ісу́са Христа́. три́жды.

И а́біе водружа́етъ копіе́ въ десну́ю страну́ печа́ти, и глаго́летъ рѣ́жя:

Я́ко овча́ на заколе́ніе веде́ся.

Въ лѣ́вую же:

И я́ко а́гнецъ непоро́ченъ пря́мо стригу́щаго его́ безгла́сенъ, та́ко не отверза́етъ у́стъ свои́хъ.

Въ го́рнюю же страну́ печа́ти:

Во смире́ніи его́ су́дъ его́ взя́тся.

Въ до́льнюю же страну́:

Ро́дъ же его́ кто́ исповѣ́сть.

Діа́конъ же, взира́я благоговѣ́йно на сицево́е та́инство, глаго́летъ на еди́нѣмъ ко́емждо рѣ́заніи: Го́споду помо́лимся, держя́ и ора́рь въ руцѣ́.

По си́хъ глаго́летъ: Возми́, влады́ко.

Іере́й же, вложи́въ свято́е копіе́ отъ ко́свенныя десны́я страны́ просфоры́, взима́етъ святы́й хлѣ́бъ, глаго́ля си́це:

Я́ко взе́млется отъ земли́ живо́тъ его́.

И положи́въ и́ взна́къ на святѣ́мъ дíскосѣ, ре́кшу діа́кону:

Пожри́, влады́ко.

Жре́тъ его́ крестови́дно, си́це глаго́ля:

Жре́тся а́гнецъ бо́жій, взе́мляй грѣ́хъ мíра, за мірскíй живо́тъ и спасе́ніе.

И обраща́етъ горѣ́ другу́ю страну́, иму́щую кре́стъ.

Діа́конъ глаго́летъ: Прободи́, влады́ко.

Іере́й же пробода́я и́ въ десну́ю страну́ святы́мъ копіе́мъ, глаго́летъ:

Еди́нъ отъ во́инъ копіе́мъ ре́бра его́ прободе́, и а́біе изы́де кро́вь и вода́: и ви́дѣвый свидѣ́тельствова, и и́стинно е́сть свидѣ́тельство его́.

Діа́конъ же, пріе́мъ віно́ и во́ду, глаго́летъ ко іере́ю:

Благослови́, влады́ко, свято́е соедине́ніе.

И взе́мъ надъ ни́ми благослове́ніе, влива́етъ во святы́й поти́ръ отъ віна́ вку́пѣ и ма́ло воды́.

2.

Іере́й же пріе́мъ въ ру́цѣ втору́ю просфору́, глаго́летъ:

Въ че́сть и па́мять преблагослове́нныя Влады́чицы на́шея Богоро́дицы, и приснодѣ́вы Марíи, ея́же моли́твами пріими́, Го́споди, же́ртву сію́ въ пренебе́сный Тво́й же́ртвѣнникъ.

И взе́мъ ча́стицу, полага́етъ ю́ одесну́ю свята́го хлѣ́ба, бли́зъ среды́ его́, глаго́ля:

Предста́ цари́ца одесну́ю тебе́, въ ри́зы позлаще́нны одѣ́яна, преукраше́нна.

3.

Та́же пріе́мъ тре́тію просфору́, глаго́летъ:

Честны́хъ небѣ́сныхъ си́лъ безпло́тныхъ.

И взе́мъ пе́рвую ча́стицу, полага́етъ ю́ ошу́юю страну́ свята́го хлѣ́ба, творя́ нача́ло пе́рваго чи́на.

Та́же глаго́летъ: Честна́го сла́внаго проро́ка, предте́чи и крести́теля Іоа́нна, и всѣ́хъ святы́хъ проро́къ.

И взе́мъ ча́стицу, полага́етъ ю́ до́лѣ пе́рвыя благочи́нно.

Та́же па́ки глаго́летъ: Святы́хъ сла́вныхъ и всехва́льныхъ апо́столъ, Петра́ и Па́вла, и про́чихъ всѣ́хъ святы́хъ апо́столъ.

И та́ко полага́етъ тре́тію ча́стицу до́лѣ вторы́я, скончава́я пе́рвый чи́нъ.

Та́же глаго́летъ: Иже во святы́хъ оте́цъ на́шихъ святи́телей: Васíліа Вели́каго, Григо́ріа Бо́госло́ва, и Іоа́нна Златоу́стаго: Аѳана́сія и Кирíлла, Нікола́а и́же въ Мv́рехъ: Кирíлла и Меѳо́дія учи́телей слове́нскихъ, свята́го священному́ченика Іосафа́та, и всѣ́хъ святы́хъ святи́телей.

И взе́мъ четве́ртую ча́стицу, полага́етъ ю́ бли́зъ пе́рвыя ча́стицы, творя́ второ́е нача́ло.

Та́же па́ки глаго́летъ: Свята́го апо́стола, первому́ченика и архідіа́кона Стефа́на, святы́хъ вели́кихъ му́ченкъ: Дими́тріа, Гео́ргіа, фео́дора тѵ́рона, и всѣ́хъ святы́хъ му́ченикъ и му́ченицъ.

И взе́мъ пя́тую ча́стицу, полага́етъ ю́ до́лѣ пе́рвыя, су́щія нача́ломъ втора́го чи́на.

Та́же глаго́летъ: Преподо́бныхъ и богоно́сныхъ оте́цъ на́шихъ: Анто́ніа, Еvѳѵ́міа, Са́ввы, Ону́фріа, и всѣ́хъ преподо́бныхъ оте́цъ и ма́терей.

И та́ко взе́мъ шесту́ю ча́стицу, полага́етъ ю́ до́лѣ вторы́я ча́стицы, во исполне́ніе втора́го чи́на.

По си́хъ же глаго́летъ: Святы́хъ и чудотво́рцевъ безсре́бреникъ: Космы́ и Даміа́на, Кѵ́ра и Іоа́нна, Пантелеи́мона и Ермола́а, и всѣ́хъ святы́хъ безсре́бреникъ.

И взе́мъ седму́ю ча́стицу, полага́етъ ю́ верху́, творя́ тре́тіе нача́ло, по чи́ну.

Та́же па́ки глаго́летъ: Святы́хъ и пра́ведныхъ богооте́цъ, Іоакíма и А́нны.

И полага́етъ осму́ю ча́стицу до́лѣ пе́рвыя благочи́нно.

Еще́ же къ си́мъ глаго́летъ: Свята́го, и́мя рекъ, (его́же е́сть хра́мъ и его́же е́сть де́нь), и всѣ́хъ святы́хъ, и́хже моли́твами посѣти́ ны, Бо́же.

И та́ко взе́мъ девя́тую ча́стицу, полага́етъ ю́ въ коне́цъ тре́тіяго чи́на во исполне́ніе.

4.

Та́же пріе́мъ четве́ртую просфору́, глаго́летъ:

Помяни́, Влады́ко человѣколю́бче, святѣ́йшаго вселе́нскаго Архіере́я на́шего и́мя рекъ Па́пу Ри́мскаго, и преосвяще́ннѣйшаго Архіепíскопа и Митрополíта на́шего Кv́ръ и́мя рекъ, и боголюби́ваго Епíскопа на́шего Кv́ръ и́мя рекъ, и вся́кое епíскопство правосла́вныхъ, честно́е пресвѵ́терство, во Христѣ́ діа́конство, и ве́сь свяще́нническій чи́нъ: и всечестнѣ́йшаго oтца́ на́шего Верхо́внаго Настоя́теля и́мя рекъ, (а́ще во оби́тели: всечестнѣ́йшаго oтца́ на́шего Протоархімандрíта и́мя рекъ, Архімандрíта и́мя рекъ, Протоигу́мена и́мя рекъ, и Игу́мена и́мя рекъ), и oтца́ на́шего Настоя́теля и́мя рекъ, бра́тію и сослуже́бники на́шя свяще́нники и діа́коны и всю́ бра́тію на́шу, я́же призва́лъ еси́ во Твое́ приобще́ніе, за Твоѣ́ благоутро́біе, всеблагíй Влады́ко.

И взе́мъ ча́стицу, полага́етъ ю́ до́лѣ свята́го хлѣ́ба.

Та́же помина́етъ, и и́хже и́мать живы́хъ, по и́мени, и на ко́еждо и́мя взима́етъ ча́стицу, приглаго́ля:

Помяни́, Го́споди, и́мя рекъ.

И та́ко взе́мъ ча́стицы, полага́етъ я́ до́лѣ свята́го хлѣ́ба.

5.

Та́же взе́мъ пя́тую просфору́, глаго́летъ:

О блажѣ́ннѣй па́мяти и оставле́ніи грѣхо́въ блаже́ннымъ кти́торомъ свята́го хра́ма сего́ (а́ще во оби́тели: святы́я оби́тели сея́).

Та́же помина́етъ рукоположи́вшаго его́ Архіере́а, и други́хъ, и́хже хо́щетъ, усо́пшихъ по и́мени. На ко́еждо и́мя взима́етъ ча́стицу, приглаго́ля:

Помяни́, Го́споди, ду́шу усо́пшаго раба́ Твоего́ и́мя рекъ.

И коне́чне глаго́летъ си́це:

И всѣ́хъ въ наде́ждѣ воскресе́нія, жи́зни вѣ́чныя и Твоего́ обще́нія усо́пшихъ правосла́вныхъ оте́цъ и бра́тій на́шихъ, человѣколю́бче Го́споди.

И взима́етъ ча́стицу.

По се́мъ глаго́летъ:

Помяни́, Го́споди, по мно́гимъ щедро́тамъ Твои́мъ, и мое́ недосто́инство, и прости́ ми вся́кое согрѣше́ніе, во́льное же и нево́льное.

И взима́етъ ча́стицу.

И пріе́мъ гу́бу, собира́етъ на дíскосъ ча́стицы до́лѣ свята́го хлѣ́ба, я́коже бы́ти во утверже́ніи, и не испа́днути чесому́.

Та́же діа́конъ, пріе́мъ кади́льницу и ѳvміа́мъ вложи́въ въ ню́, глаго́летъ ко іере́ю:

Благослови́, влады́ко, кади́ло.

И а́біе са́мъ глаго́летъ: Го́споду помо́лимся.

И іере́й моли́тву кади́ла:

Кади́ло Тебѣ́ прино́симъ, Христе́ Бо́же на́шъ, въ воню́ благоуха́нія духо́внаго, е́же пріе́мъ въ пренебе́сный Тво́й же́ртвѣнникъ, возниспосли́ на́мъ благода́ть пресвята́го Твоего́ Ду́ха.

Діа́конъ: Го́споду помо́лимся.

Іере́й покади́въ звѣзди́цу, полага́етъ верху́ свята́го хлѣ́ба, глаго́ля:

И прише́дши звѣзда́ ста́ верху́, идѣ́же бѣ́ отроча́.

Діа́конъ: Го́споду помо́лимся.

Іере́й, покади́въ пе́рвый покрове́цъ, покрыва́етъ святы́й хлѣ́бъ съ дíскосомъ, глаго́ля:

Госпо́дь воцари́ся, въ лѣ́поту облече́ся: облече́ся Госпо́дь въ си́лу и препоя́сася. И́бо утверди́ вселе́нную, я́же не подви́жится. Гото́въ престо́лъ Тво́й отто́лѣ, отъ вѣ́ка Ты́ еси́. Воздвиго́ша рѣ́ки, Го́споди, воздвиго́ша рѣ́ки гла́сы своя́: во́змутъ рѣ́ки сотре́нія своя́, отъ гласо́въ во́дъ мно́гихъ. Ди́вны высоты́ морскíя, ди́венъ въ высо́кихъ Госпо́дь. Свидѣ́нія Твоя́ увѣ́ришася зело́. До́му Твоему́ подоба́етъ святы́ня, Го́споди, въ долготу́ днíй.

Діа́конъ: Го́споду помо́лимся. Покры́й, влады́ко.

Іере́й же, покади́въ вторы́й покрове́цъ, покрыва́етъ святы́й поти́ръ, глаго́ля:

Покры́ небеса́ добродѣ́тель Твоя́, Христе́, и хвалы́ Твоея́ испо́лнь земля́.

Діа́конъ: Го́споду помо́лимся. Покры́й, влады́ко.

Іере́й же, покади́въ покро́въ, си́речь, возду́хъ, и покрыва́я обоя́, глаго́летъ:

Покры́й на́съ кро́вомъ крилу́ Твое́ю, отжени́ отъ на́съ вся́каго врага́ и супоста́та. Умири́ на́шу жи́знь, Го́споди, поми́луй на́съ и мíръ Тво́й, и спаси́ ду́шы на́шя, я́ко бла́гъ и человѣколю́бецъ.

Та́же пріе́мъ іере́й кади́льницу, кади́тъ предложе́ніе, глаго́ля три́жды:

Благослове́нъ Бо́гъ на́шъ, си́це изво́ливый.

Діа́конъ же глаго́летъ: Всегда́, ны́нѣ и при́сно, и во вѣ́ки вѣко́въ, ами́нь.

И покланя́ются благоговѣ́йно о́ба.

Та́же діа́конъ глаго́летъ: О предложе́нныхъ честны́хъ дарѣ́хъ Го́споду помо́лимся.

Іере́й же, пріе́мь кади́льницу, глаго́летъ моли́тву предложе́нія:

Бо́же, Бо́же на́шъ, небе́сный хлѣ́бъ, пи́щу всему́ мíру, Го́спода на́шего и Бо́га Ісу́са Христа́, посла́вый Спа́са и изба́вителя и благодѣ́теля, благословя́ща и освяща́юща на́съ, са́мъ благослови́ предложе́ніе сіе́, и пріими́ е́ въ пренебе́сный Тво́й же́ртвѣнникъ. Помяни́, я́ко бла́гъ и человѣколю́бецъ, прине́сшихъ, и и́хже ра́ди принесо́ша: и на́съ неосужде́ны сохрани́ во священнодѣ́ствіи боже́ственныхъ Твои́хъ та́инъ. Я́ко святи́ся и просла́вися пречестно́е и великолѣ́пое и́мя Твое́, Отца́, и Cы́на, и свята́го Ду́ха, ны́нѣ и при́сно, и во вѣ́ки вѣко́въ, ами́нь.

И посе́мъ твори́тъ отпу́стъ та́мо, глаго́ля си́це:

Сла́ва Тебѣ́, Христе́ Бо́же, упова́ніе на́ше, сла́ва тебѣ́.

Діа́конъ: Сла́ва, и ны́не: Го́споди поми́луй, три́жды. Благослови́.

Іере́й глаго́летъ отпу́стъ.

А́ще у́бо е́сть недѣ́ля: Воскресы́й изъ ме́ртвыхъ Христо́съ и́стинный: А́ще ли же ни́: Христо́съ и́стинный Бо́гъ на́шъ, моли́твами пречи́стыя своея́ Ма́тере, и́же во святы́хъ отца́ на́шего Іоа́нна Златоу́стаго, архіепíскопа Константíна гра́да, и всѣ́хъ святы́хъ, поми́луетъ и спасе́тъ на́съ, я́ко бла́гъ и человѣколю́бецъ.

Діа́конъ: Ами́нь.

По отпу́стѣ же кади́тъ діа́конъ свято́е предложе́ніе. Та́же отхо́дитъ, и кади́тъ святу́ю трапе́зу круго́мъ крестови́дно, глаго́ля въ себѣ́:

Во гро́бѣ пло́тски, во а́дѣ же съ душе́ю я́ко Бо́гъ, въ раи́ же съ разбо́йникомъ, и на престо́лѣ бы́лъ еси́, Христе́, со Отце́мъ и Ду́хомъ, вся́ исполня́яй неопи́санный.

Та́же псало́мъ 50.

Поми́луй мя́ Бо́же, по вели́цѣй ми́лости твое́й и по мно́жеству щедро́тъ твои́хъ очи́сти беззако́ніе мое́. Наипа́че омы́й мя́ отъ беззако́нія моего́, и отъ грѣха́ моего́ очи́сти мя́. Я́ко беззако́ніе мое́ а́зъ зна́ю, и грѣ́хъ мо́й предо мно́ю е́сть вы́ну. Тебѣ́ еди́ному согрѣши́хъ, и лука́вое пре́дъ тобо́ю сотвори́хъ, я́ко да оправди́шися во словесѣ́хъ твои́хъ, и побѣди́ши, внегда́ суди́ти ти́. Се́ бо въ беззако́ніихъ зача́тъ е́смь, и во гресѣ́хъ роди́ мя ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости твоея́ яви́лъ ми́ еси́. Окропи́ши мя́ vссо́помъ, и очи́щуся: омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́ Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ твоего́, и ду́ха твоего́ свята́го не отими́ отъ мене́. Возда́ждь ми́ ра́дость спасе́нія твоего́, и ду́хомъ влады́чнимъ утверди́ мя. Научу́ беззако́нныя путе́мъ твои́мъ, и нечести́віи къ тебѣ́ обратя́тся. Изба́ви мя́ отъ крове́й Бо́же, Бо́же спасе́нія моего́, возра́дуется язы́къ мо́й пра́вдѣ твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ твою́. Я́ко а́ще бы восхотѣ́лъ еси́ же́ртвы, да́лъ бы́хъ у́бо: всесожже́нія не благоволи́ши. Же́ртва Бо́гу ду́хъ сокруше́нъ: се́рдце сокруше́нно и смире́нно Бо́гъ не уничижи́тъ. Ублажи́ Го́споди, благоволе́ніемъ твои́мъ сіо́на, и да сози́ждутся стѣ́ны іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь тво́й тельцы́.

И покади́въ святи́лище, намѣ́стныя іко́ны, ли́къ и лю́ди, вхо́дитъ па́ки во святы́й олта́рь, и покади́въ святу́ю трапе́зу па́ки, и іере́а, кади́льницу у́бо отлага́етъ на мѣ́сто свое́, са́мъ же прихо́дитъ ко іере́ю.

И ста́вше вку́пѣ пре́дъ свято́ю трапе́зою, покланя́ются три́жды, въ себѣ́ моля́щеся, и глаго́люще:

Царю́ небе́сный, утѣ́шителю, ду́ше и́стины, и́же вездѣ́ сы́й, и вся́ исполня́яй, сокро́вище благи́хъ и жи́зни пода́телю: пріиди́ и всели́ся въ ны́, и очи́сти ны́ отъ вся́кія скве́рны, и спаси́, бла́же, ду́шы на́шя.

Сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе. Два́жды.

Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́.

Та́же целу́ютъ, іере́й у́бо свято́е ева́нгеліе, діа́конъ же святу́ю трапе́зу.

И по се́мъ подклони́въ діа́конъ свою́ главу́ іере́ю, держя́ и ора́рь треми́ пе́рсты десны́я руки́, глаго́летъ:

Вре́мя е́же сотвори́ти Го́сподеви, влады́ко благослови́.

Іере́й зна́менуя его́, глаго́летъ:

Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ.

Та́же діа́конъ: Помоли́ся о мнѣ́, влады́ко.

Іере́й: Да испра́витъ Госпо́дь стопы́ твоя́.

И па́ки діа́конъ: Помяни́ мя, влады́ко святы́й.

Іере́й: Да помяне́тъ тя́ Госпо́дь Бо́гъ во ца́рствіи свое́мъ, всегда́, ны́нѣ и при́сно, и во вѣ́ки вѣко́въ.

Діа́конъ же ре́къ: Ами́нь.

И поклони́вся, исхо́дитъ сѣ́верными две́рьми, поне́же ца́рскія две́ри до вхо́да не отверза́ются. И ста́въ на обы́чномъ мѣ́стѣ, пря́мо святы́хъ двѣ́рій, покланя́ется со благоговѣ́ніемъ три́жды, глаго́ля въ себѣ́:

Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́.

И посе́мъ начина́етъ глаго́лати:

Благослови́, влады́ко.

И начина́етъ іере́й: Благослове́но ца́рство:

Вѣ́дати подоба́етъ: а́ще безъ діа́кона слу́житъ іере́й, въ проскомíдіи діа́конскихъ сло́въ, и на літургíи пре́дъ ева́нгеліемъ, и на отвѣ́тъ его́: Благослови́ влады́ко, и Прободи́ влады́ко, и Вре́мя е́же сотвори́ти, да не глаго́летъ: то́чію ектеніи́ и чино́вное предложе́ніе.

А́ще же собо́ромъ слу́жатъ свяще́нніи мно́зи, дѣ́йство проскомíдіи еди́нъ іере́й то́кмо да твори́тъ: про́чіи же служи́тели ничто́же проскомíдіи осо́бно да глаго́лютъ.

А́ще е́сть Архіерейское служѣ́ніе, іере́й начина́етъ проскомíдію по обы́чаю, та́же полога́етъ ча́стицы Богоро́дицы и святы́хъ, а посѣ́мъ покрыва́етъ святы́й дíскосъ и святу́ю ча́шу возду́хомъ, ничто́же глаго́ля. Херувíмстѣй же пѣ́сни пѣва́емѣй, Архіере́й са́мъ, прѣ́жде вли́каго вхо́да, окончева́етъ проскомíдію.

II. Літургія оглашѣнныхъ

Божественная Літургія иже во святыхъ отца нашего Іоанна Златоустаго

Діа́конъ: Благослови́, влады́ко.

Іере́й: Благослове́но ца́рство, Отца́, и Cы́на, и свята́го Ду́ха, ны́нѣ и при́сно, и во вѣ́ки вѣко́въ.

Ли́къ: Ами́нь.

Великая ектенія

Діа́конъ: Ми́ромъ Го́споду помо́лимся.

Ли́къ: Го́споди, поми́луй.

О свы́шнѣмъ ми́рѣ, и спасе́ніи ду́шъ на́шихъ, Го́споду помо́лимся.

Ли́къ: Го́споди, поми́луй.

О ми́рѣ всего́ мíра, благостоя́ніи святы́хъ бо́жіихъ церкве́й, и соедине́ніи всѣ́хъ, Го́споду помо́лимся.

Ли́къ: Го́споди, поми́луй.

О святѣ́мъ хра́мѣ се́мъ, и съ вѣ́рою, благоговѣ́ніемъ и стра́хомъ бо́жіимъ входя́щихъ въ о́нь, Го́споду помо́лимся.

Ли́къ: Го́споди, поми́луй.

О святѣ́йшемъ вселе́нстѣмъ Архіере́ѣ на́шемъ и́мя рекъ Па́пѣ Ри́мстѣмъ, Го́споду помо́лимся.

Ли́къ: Го́споди, поми́луй.

О преосвяще́ннѣйшемъ Архіепíскопѣ и Митрополíтѣ на́шемъ Кv́ръ и́мя рекъ, и о боголюби́вѣмъ Епíскопѣ на́шемъ Кv́ръ и́мя рекъ, честнѣ́мъ пресвv́терствѣ, во Христѣ́ діа́конствѣ, о все́мъ при́чтѣ и лю́дехъ. Го́споду помо́лимся.

Ли́къ: Го́споди, поми́луй.

О предержа́щихъ властѣ́хъ на́шихъ и о всѣ́мъ во́инствѣ, Го́споду помо́лимся.

Ли́къ: Го́споди, поми́луй.

О гра́дѣ се́мъ, (или́: О вѣ́си се́й, или́: О святѣ́й оби́тели се́й,) вся́комъ гра́дѣ, странѣ́, и вѣ́рою живу́щихъ въ ни́хъ, Го́споду помо́лимся.

Ли́къ: Го́споди, поми́луй.

О благорастворе́ніи возду́ховъ, о изоби́ліи плодо́въ земны́хъ, и вре́менѣхъ ми́рныхъ, Го́споду помо́лимся.

Ли́къ: Го́споди, поми́луй.

О пла́вающихъ, путеше́ствующихъ, неду́гующихъ, стра́ждущихъ, плѣне́нныхъ, и о спасе́ніи и́хъ Го́споду помо́лимся.

Ли́къ: Го́споди, поми́луй.

***

а́ще твори́тся вселе́нское помина́ніе усо́пшихъ, приложи́ сія́.

О душа́хъ всеѣ́хъ отъ вѣ́ка въ правовѣ́ріи, наде́жди воскресе́нія и жи́зни вѣ́чныя усо́пшихъ oте́цъ и бра́тій на́шихъ, кти́торовъ и благодѣ́телей свята́го хра́ма сего́, роди́телей и сро́дниковъ на́шихъ по пло́ти, здѣ́ лежа́щихъ, здѣ́ впи́санныхъ, и по всю́ду правосла́вныхъ Христіа́нъ, и о блаже́нѣмъ упокое́ніи и́хъ, Го́споду помо́лимся.

Ли́къ: Го́споди, поми́луй.

О е́же неосужде́но предста́ти и́мъ стра́шному суди́щу Христо́ву, и вчини́ти ду́шы и́хъ въ странѣ́ живы́хъ, въ мѣ́стѣ свѣ́тлѣ, идѣ́же вси́ святíи пра́ведніи упокоя́ются, Го́споду помо́лимся.

Ли́къ: Го́споди, поми́луй.

а́ще же осо́бное.

О рабѣ́ бо́жіемъ (или́: рабѣ́ бо́жіи, или́: рабѣ́хъ бо́жіихъ), и́мя рекъ, и блаже́нѣй па́мяти его́ (или́: ея́, или́: и́хъ), и о е́же прости́тися вся́кому прегрѣше́нію его́ (или́: ея́, или́: и́хъ), во́лному и нево́лному, Го́споду помо́лимся.

Ли́къ: Го́споди, поми́луй.

О е́же неосужде́но предста́ти ему́ (или́: е́й или́: и́мъ) стра́шному суди́щу Христо́ву и вчини́ти ду́шу (или́: ду́шы) его́ (или́: ея́, или́: и́хъ) въ странѣ́ живы́хъ, въ мѣ́стѣ свѣ́тлѣ, идѣ́же пра́ведніи упокоя́ются, Го́споду помо́лимся.

Ли́къ: Го́споди, поми́луй.

***

О изба́витися на́мъ отъ вся́кія ско́рби, гнѣ́ва и ну́жды, Го́споду помо́лимся.

Ли́къ: Го́споди, поми́луй.

Заступи́, спаси́, поми́луй, и сохрани́ на́съ, Бо́же, Твое́ю благода́тію.

Ли́къ: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и приснодѣ́ву Марíю со всѣ́ми святы́ми помяну́вше, са́ми себе́, и дру́гъ дру́га, и ве́сь живо́тъ на́шъ Христу́ Бо́гу предади́мъ.

Ли́къ: Тебѣ́, Го́споди.

Іере́й глаго́летъ та́йно моли́тву пѣ́рваго антіфо́на:

Го́споди Бо́же на́шъ, его́же держа́ва несказа́нна, и сла́ва непостижи́ма, его́же ми́лость безмѣ́рна, и человѣколю́біе неизрече́нно: са́мъ, Влады́ко, по благоутро́бію Твоему́, при́зри на ны́, и на святы́й хра́мъ се́й, и сотвори́ съ на́ми, и моля́щимися съ на́ми, бога́тыя ми́лости Твоя́ и щедро́ты Твоя́.

Возглаше́ніе: Я́ко подоба́етъ Тебѣ́ вся́кая сла́ва, че́сть и поклоне́ніе, Отцу́, и Cы́ну, и свято́му Ду́ху, ны́нѣ и при́сно, и во вѣ́ки вѣко́въ.

Ли́къ: Ами́нь.

И пое́тся пе́рвый антіфо́нъ отъ пѣвце́въ.

Діа́конъ же поклони́вся уступа́етъ отъ мѣ́ста своего́, и отше́дъ стои́тъ пре́дъ іко́ною Христо́вою, держя́ и ора́рь треми́ пе́рсты десны́я руки́.

Пѣрвый псаломъ изобразительный

Ли́къ: Благослови́ душе́ моя́ Го́спода, благослове́нъъ еси́ Го́споди. Благослови́ душе́ моя́ Го́спода, и вся́ вну́тренняя моя́, и́мя свято́е его́. * Благослови́ душе́ моя́ Го́спода, и не забыва́й всѣ́хъ воздая́ній его́. * Очища́ющаго вся́ беззако́нія твоя́, исцѣля́ющаго вся́ неду́ги твоя́: * Избавля́ющаго отъ истлѣ́нія живо́тъ тво́й, вѣнча́ющаго тя́ ми́лостію и щедро́тами: * Исполня́ющаго во благи́хъ жела́ніе твое́: обнови́тся я́ко о́рля ю́ность твоя́. * Творя́й ми́лостыни Госпо́дь, и судьбу́ всѣ́мъ оби́димымъ. * Сказа́ пути́ своя́ моvсе́ови, сыново́мъ ісра́илевымъ хотѣ́нія своя́. * Ще́дръ и ми́лостивъ Госпо́дь, долготерпѣли́въ и многоми́лостивъ. * Не до конца́ прогнѣ́вается, ниже́ во вѣ́къ вражду́етъ. Не по беззако́ніемъ на́шымъ сотвори́лъ е́сть на́мъ, ниже́ по грѣхо́мъ на́шымъ возда́лъ е́сть на́мъ. * Я́ко по высотѣ́ небе́снѣй отъ земли́, утверди́лъ е́сть Госпо́дь ми́лость свою́ на боя́щихся его́. * Ели́ко отстоя́тъ восто́цы отъ за́падъ, уда́лилъ е́сть отъ на́съ беззако́нія на́ша. * Я́коже ще́дритъ оте́цъ сы́ны, уще́дри Госпо́дь боя́щихся его́. * Я́ко то́й позна́ созда́ніе на́ше, помяну́, я́ко пе́рсть есмы́: * Человѣ́къ, я́ко трава́ днíе его́, я́ко цвѣ́тъ се́льный та́ко оцвѣте́тъ. * Я́ко ду́хъ про́йде въ не́мъ, и не бу́детъ, и не позна́етъ ктому́ мѣ́ста своего́. * Ми́лость же Госпо́дня отъ вѣ́ка и до вѣ́ка на боя́щихся его́, * И пра́вда его́ на сынѣ́хъ сыно́въ храня́щихъ завѣ́тъ его́, и по́мнящихъ за́повѣди его́ твори́ти я́. * Госпо́дь на небеси́ угото́ва престо́лъ сво́й, и ца́рство его́ всѣ́ми облада́етъ. * Благослови́те Го́спода вси́ а́нгели его́, си́льніи крѣ́постію, творя́щіи сло́во его́, услы́шати гла́съ слове́съ его́. * Благослови́те Го́спода вся́ си́лы его́, слуги́ его́, творя́щіи во́лю его́. * Благослови́те Го́спода вся́ дѣла́ его́, на вся́комъ мѣ́стѣ влады́чества его́.
Сла́ва Отцу́, и Cы́ну, и свято́му Ду́ху, и ны́нѣ и при́сно, и во вѣ́ки вѣко́въ, ами́нь.
Благослови́ душе́ моя́ Го́спода, и вся́ вну́тренняя моя́, и́мя свято́е его́.
Благослове́нъ еси́ Го́споди.

или: Пѣрвый антифонъ повседнѣвный.

Благо е́сть исповѣ́датися Го́сподеви, и пѣ́ти и́мени Твоему́ вы́шній.
Моли́твами Богоро́дицы Спа́се, спаси́ на́съ.
Возвѣща́ти зау́тра ми́лость Твою́, и и́стину Твою́ на вся́ку но́щь.
Моли́твами Богоро́дицы Спа́се, спаси́ на́съ.
Я́ко пра́въ Госпо́дь Бо́гъ на́шъ, и нѣ́сть непра́вды въ не́мъ.
Моли́твами Богоро́дицы Спа́се, спаси́ на́съ.
Сла́ва Отцу́, и Cы́ну, и свято́му Ду́ху.
Моли́твами Богоро́дицы Спа́се, спаси́ на́съ.
И ны́нѣ при́сно, и во вѣ́ки вѣко́въ, ами́нь.
Моли́твами Богоро́дицы Спа́се, спаси́ на́съ.

Малая ектенія

По исполне́ніи же антіфо́на, прише́дъ діа́конъ, и ста́въ на обы́чномъ мѣ́стѣ, и поклони́вся, глаго́летъ:

Па́ки и па́ки ми́ромъ Го́споду помо́лимся.

Ли́къ: Го́споди, поми́луй.

Заступи́, спаси́, поми́луй и сохрани́ на́съ Бо́же, Твое́ю благода́тію.

Ли́къ: Го́споди, поми́луй.

Ли́къ: Тебѣ́, Го́споди.

Моли́тва втора́го антіфо́на:

Го́споди Бо́же на́шъ, спаси́ лю́ди Твоя́, и благослови́ достоя́ніе Твое́, исполне́ніе це́ркве Твоея́ сохрани́, освяти́ лю́бящыя благолѣ́піе до́му Твоего́: Ты́ тѣ́хъ воспросла́ви боже́ственною Твое́ю си́лою, и не оста́ви на́съ упова́ющихъ на Тя́.

Возглаше́ніе: Я́ко Твоя́ держа́ва, и Твое́ е́сть ца́рство, и си́ла и сла́ва, Отца́, и Cы́на, и свята́го Ду́ха, ны́нѣ и при́сно, и во вѣ́ки вѣко́въ.

Ли́къ: Ами́нь.

И пое́тся подо́бнѣ отъ пѣвце́въ вторы́й антіфо́нъ: діа́конъ же подо́бнѣ твори́тъ, я́коже и въ пе́рвой моли́твѣ.

Вторый псало́мъ изобразительный.

Ли́къ: Сла́ва Отцу́, и Cы́ну, и свято́му Ду́ху.
Та́же: Хвали́ душе́ моя́ Го́спода. Восхвалю́ Го́спода въ животѣ́ мое́мъ, пою́ Бо́гу моему́, до́ндеже е́смь. * Не надѣ́йтеся на кня́зи, на сы́ны человѣ́ческія, въ ни́хже нѣ́сть спасе́нія. * Изы́детъ ду́хъ его́, и возврати́тся въ зе́млю свою́: въ то́й де́нь поги́бнутъ вся́ помышле́нія его́. * Блаже́нъ, ему́же Бо́гъ іа́ковль помо́щникъ его́, упова́ніе его́ на Го́спода Бо́га своего́: * Сотво́ршаго не́бо и зе́млю, мо́ре, и вся́ я́же въ ни́хъ: * Храня́щаго и́стину въ вѣ́къ, творя́щаго су́дъ оби́димымъ, даю́щаго пи́щу а́лчущымъ. * Госпо́дь рѣши́тъ окова́нныя, Госпо́дь умудря́етъ слѣпцы́, Госпо́дь возво́дитъ низве́рженныя, Госпо́дь лю́битъ пра́ведники. * Госпо́дь храни́тъ прише́льцы, си́ра и вдову́ пріи́метъ, и пу́ть грѣ́шныхъ погуби́тъ. * Воцари́тся Госпо́дь во вѣ́къ, Бо́гъ тво́й сіо́не, въ ро́дъ и ро́дъ.
И ны́нѣ при́сно, и во вѣ́ки вѣко́въ, ами́нь.
Единоро́дный Cы́не и Сло́ве бо́жій, безсме́ртенъ сы́й, и изво́ливый спасе́нія на́шего ра́ди воплоти́тися отъ святы́я Богоро́дицы и приснодѣ́вы Марíи, непрело́жно вочеловѣ́чивыйся: распны́йся же Христе́ Бо́же, сме́ртію сме́рть попра́вый, еди́нъ сы́й святы́я Тро́ицы, спрославля́емый Отцу́ и свято́му Ду́ху, спаси́ на́съ.

или: Вторый антифонъ повседнѣвный.

Госпо́дь воцари́ся, въ лѣ́поту облече́ся, облече́ся Госпо́дь въ си́лу и препоя́сася.
Моли́твами святы́хъ твои́хъ Спа́се, спаси́ на́съ.
И́бо утверди́ вселе́нную, я́же не подви́жится.
Моли́твами святы́хъ твои́хъ Спа́се, спаси́ на́съ.
Свидѣ́нія Твоя́ увѣ́ришася зело́: до́му твоему́ подоба́етъ святы́ня Го́споди, въ долготу́ днíй.
Моли́твами святы́хъ твои́хъ Спа́се, спаси́ на́съ.
Сла́ва Отцу́, и Cы́ну, и свято́му Ду́ху, и ны́нѣ и при́сно, и во вѣ́ки вѣко́въ, ами́нь.
Единоро́дный Cы́не и Сло́ве бо́жій, безсме́ртенъ сы́й, и изво́ливый спасе́нія на́шего ра́ди воплоти́тися отъ святы́я Богоро́дицы и приснодѣ́вы Марíи, непрело́жно вочеловѣ́чивыйся: распны́йся же Христе́ Бо́же, сме́ртію сме́рть попра́вый, еди́нъ сы́й святы́я Тро́ицы, спрославля́емый Отцу́ и свято́му Ду́ху, спаси́ на́съ.

Малая ектенія

Та́же діа́конъ: Па́ки и па́ки ми́ромъ Го́споду помо́лимся.

Ли́къ: Го́споди, поми́луй.

Заступи́, спаси́, поми́луй и сохрани́ на́съ Бо́же, Твое́ю благода́тію.

Ли́къ: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и приснодѣ́ву Марíю, со всѣ́ми святы́ми помяну́вше, са́ми себе́, и дру́гъ дру́га, и ве́сь живо́тъ на́шъ Христу́ Бо́гу предади́мъ.

Ли́къ: Тебѣ́ Го́споди.

Моли́тва тре́тіяго антіфо́на:

И́же о́бщыя сія́, и согла́сныя дарова́вый на́мъ моли́твы, и́же и двѣма́, или́ тре́мъ, согласу́ющымся о и́мени Твое́мъ, проше́нія пода́ти обеща́вый: са́мъ и ны́нѣ ра́бъ Твои́хъ проше́нія къ поле́зному испо́лни, подая́ на́мъ и въ настоя́щемъ вѣ́цѣ позна́ніе Твоея́ и́стины, и въ бу́дущемъ живо́тъ вѣ́чный да́руя.

Возглаше́ніе: Я́ко бла́гъ и человѣколю́бецъ Бо́гъ еси́, и Тебѣ́ сла́ву возсыла́емъ, Отцу́, и Cы́ну, и свято́му Ду́ху, ны́нѣ и при́сно, и во вѣ́ки вѣко́въ.

Ли́къ: Ами́нь.

Малый входъ

Здѣ́ отверза́ются две́ри на ма́лый вхо́дъ. Пое́тся отъ пѣвце́въ антіфо́нъ тре́тій:

Блажены.

Ли́къ: Во ца́рствіи Твое́мъ помяни́ на́съ Го́споди.
Блаже́ни ни́щіи ду́хомъ, я́ко тѣ́хъ е́сть ца́рство небе́сное.
Блаже́ни пла́чущіи, я́ко тíи утѣ́шатся.
Блаже́ни кро́тцыи, я́ко тíи наслѣ́дятъ зе́млю.
Блаже́ни а́лчущіи и жа́ждущіи пра́вды, я́ко тíи насы́тятся.
Блаже́ни ми́лостивіи, я́ко тíи поми́ловани бу́дутъ.
Блаже́ни чи́стіи се́рдцемъ, я́ко тíи Бо́га у́зрятъ.
Блаже́ни миротво́рцы, я́ко тíи сы́нове бо́жіи нареку́тся.
Блаже́ни изгна́ни пра́вды ра́ди, я́ко тѣ́хъ е́сть ца́рство небе́сное.
Блаже́ни есте́, егда́ поно́сятъ ва́мъ, и изжену́тъ, и реку́тъ вся́къ зо́лъ глаго́лъ, на вы́ лжу́ще Мене́ ра́ди.
Ра́дуйтеся и весели́теся, я́ко мзда́ ва́ша мно́га на небесѣ́хъ.
Сла́ва Отцу́, и Cы́ну, и свято́му Ду́ху.
И ны́нѣ при́сно, и во вѣ́ки вѣко́въ, ами́нь.

или: Третій антіфонъ повседнѣвный.

Пріиди́те возра́дуемся Го́сподеви, воскли́кнѣмъ Бо́гу спаси́телю на́шему.
Спаси́ ны Cы́не Бо́жій, во святы́хъ ди́венъ сы́й, пою́щыя Ти́: Аллилу́іа.
Предвари́мъ лице́ его́ во исповѣ́даніи, и во псалмѣ́хъ воскли́кнѣмъ ему́.
Спаси́ ны Cы́не Бо́жій, во святы́хъ ди́венъ сы́й, пою́щыя Ти́: Аллилу́іа.
Я́ко Бо́гъ ве́лій Госпо́дь и ца́рь ве́лій по все́й земли́.
Спаси́ ны Cы́не Бо́жій, во святы́хъ ди́венъ сы́й, пою́щыя Ти́: Аллилу́іа.
Я́ко въ руцѣ́ его́ вси́ концы́ земли́, и высоты́ го́ръ того́ су́ть.
Спаси́ ны Cы́не Бо́жій, во святы́хъ ди́венъ сы́й, пою́щыя Ти́: Аллилу́іа.
Я́ко того́ е́сть мо́ре, и то́й сотвори́ е́, и су́шу ру́цѣ его́ созда́стѣ.
Спаси́ ны Cы́не Бо́жій, во святы́хъ ди́венъ сы́й, пою́щыя Ти́: Аллилу́іа.

Пѣва́ему же тре́тіему антіфо́ну отъ пѣвце́въ, или́ блаже́ннамъ, а́ще е́сть недѣ́ля. егда́ пріи́дутъ на Сла́ву, іере́й и діа́конъ, ста́вше пре́дъ свято́ю трапе́зою, творя́тъ покло́ны три́. Та́же пріе́мъ іере́й свято́е ева́нгеліе, дае́тъ діа́кону, и и́дутъ отъ десны́я страны́ созади́ престо́ла, и та́ко изше́дше сѣ́верною страно́ю, предъиду́щымъ и́мъ свѣщено́сцемъ, творя́тъ ма́лый вхо́дъ, и ста́вше на обы́чнѣмъ мѣ́стѣ, приклоня́ютъ о́ба главы́, и діа́кону ре́кшу: Го́споду помо́лимся, глаго́летъ іере́й моли́тву вхо́да та́йно.

Моли́тва вхо́да:

Влады́ко Го́споди Бо́же на́шъ, уста́вивый на небесѣ́хъ чи́ны, и во́инства а́нгелъ и арха́нгелъ, въ служе́ніе твоея́ сла́вы: сотвори́ со вхо́домъ на́шимъ, вхо́ду святы́хъ а́нгелъ бы́ти, сослужа́щихъ на́мъ, и сославосло́вящихъ Твою́ бла́гость.
Я́ко подоба́етъ тебѣ́ вся́кая сла́ва, че́сть и поклоне́ніе, Отцу́, и Cы́ну, и свято́му Ду́ху, ны́нѣ и при́сно, и во вѣ́ки вѣко́въ. Ами́нь.

Моли́твѣ же сконча́вшейся, глаго́летъ діа́конъ ко свяще́ннику, показу́яй къ восто́ку десни́цею, держя́ вку́пѣ и ора́рь треми́ пе́рсты:

Благослови́, влады́ко, святы́й вхо́дъ.

И іере́й, блгcвля́я глаго́летъ:

Благослове́нъ вхо́дъ святы́хъ Твои́хъ, всегда́, ны́нѣ и при́сно, и во вѣ́ки вѣко́въ.

Посе́мъ діа́конъ подае́тъ свято́е ева́нгеліе іере́ю и целу́етъ іере́й свято́е ева́нгеліе.

Испо́лньшуся же коне́чному тропарю́, вхо́дитъ діа́конъ посредѣ́, и ста́въ пре́дъ іере́емъ, возвыша́етъ ма́ло ру́цѣ, и показу́я свято́е ева́нгеліе, глаго́летъ велегла́сно:

Прему́дрость, про́сти.

Та́же, сотвори́въ поклонѣ́ние, вхо́дитъ во святы́й олта́рь діа́конъ и созади́ его́ іере́й, и діа́конъ у́бо полага́етъ свято́е ева́нгеліе на святѣ́й трапе́зѣ.

Пѣвцы́ же пою́тъ:

Пріиди́те, поклони́мся и припаде́мъ ко Христу́. Спаси́ ны, Cы́не Бо́жій, во святы́хъ ди́венъ сы́й, пою́щыя ти́: аллилу́іа. А́ще же недѣ́ля: Воскресы́й изъ ме́ртвыхъ, пою́щыя ти́, аллилу́іа.

Та́же обы́чныя тропари́.

Трисвятое

Іере́й же глаго́летъ моли́тву сію́:

Моли́тва трисвята́го пѣ́нія:

Бо́же святы́й, и́же во святы́хъ почива́яй, и́же трисвяты́мъ гла́сомъ отъ серафíмовъ воспѣва́емый и отъ херувíмовъ славосло́вимый, и отъ вся́кія небе́сныя си́лы покланя́емый: и́же отъ небытія́ во е́же бы́ти приведы́й вся́ческая, созда́вый человѣ́ка по о́бразу Твоему́ и по подо́бію, и вся́кимъ Твои́мъ дарова́ніемъ украси́вый: дая́й прося́щему прему́дрость и ра́зумъ, и не презира́яй согрѣша́ющаго, но полага́яй на спасе́ніе покая́ніе: сподо́бивый на́съ, смире́нныхъ и недосто́йныхъ ра́бъ Твои́хъ, и въ ча́съ се́й ста́ти пре́дъ сла́вою свята́го Твоего́ же́ртвѣнника и до́лжное Тебѣ́ поклоне́ніе и славосло́віе приноси́ти: са́мъ, Влады́ко, пріими́ и отъ у́стъ на́съ грѣ́шныхъ трисвяту́ю пѣ́снь и посѣти́ ны бла́гостію Твое́ю. Прости́ на́мъ вся́кое согрѣше́ніе, во́льное же и нево́льное, освяти́ на́шя ду́шы и тѣлеса́, и да́ждь на́мъ въ преподо́біи служи́ти Тебѣ́ вся́ дни́ живота́ на́шего, моли́твами святы́я Богоро́дицы и всѣ́хъ святы́хъ, отъ вѣ́ка Тебѣ́ благоугоди́вшихъ.

Егда́ же пѣвцы́ пріи́дутъ на послѣ́дній тропа́рь, глаго́етъ діа́конъ ко іере́ю, прикло́нь вку́пѣ главу́, и ора́рь въ руцѣ́ держя́ треми́ пе́рсты:

Благослови́, влады́ко, вре́мя трисвята́го.

Іере́й же, зна́менуя его́, возглаша́етъ:

Я́ко свя́тъ еси́, Бо́же на́шъ, и Тебѣ́ сла́ву возсыла́емъ, Отцу́, и Cы́ну, и свято́му Ду́ху, ны́нѣ и при́сно.

Діа́конъ же прихо́дитъ бли́зъ святы́хъ две́рій, и наво́дитъ, глаго́ля ко внѣ́ стоя́щымъ велегла́сно:

И во вѣ́ки вѣко́въ.

Ли́къ: Ами́нь. Святы́и Бо́же, святы́и крѣ́пкіи, святы́и безсме́ртныи, поми́луй на́съ. Три́жды. Сла́ва Отцу́, и Cы́ну, и свято́му Ду́ху, и ны́нѣ и при́сно, и во вѣ́ки вѣко́въ, ами́нь. Святы́и безсме́ртныи, поми́луй на́съ. Святы́и Бо́же, святы́и крѣ́пкіи, святы́и безсме́ртныи, поми́луй на́съ.

Пѣва́ему же трисвято́му, глаго́лютъ и са́ми, іере́й же и діа́конъ, трисвято́е. творя́ще вку́пѣ и покло́ны три́ пре́дъ свято́ю трапе́зою.

Та́же глаго́летъ діа́конъ ко іере́ю:

Повели́, влады́ко.

И отхо́дятъ къ го́рнему мѣ́сту: и іере́й отходя́ глаго́летъ:

Благослове́нъ гряды́й во и́мя Госпо́дне.

Діа́конъ: Благослови́, влады́ко, го́рнее седа́лище.

Іере́й же: Благослове́нъ еси́ на престо́лѣ сла́вы ца́рствія Твоего́, седя́й на херувíмѣхъ, всегда́, ны́нѣ и при́сно, и во вѣ́ки вѣко́въ.

Вѣ́дательно, я́ко іере́ю не подоба́етъ на го́рнее мѣ́сто восходи́ти, ниже́ сѣдѣ́ти на не́мъ: но сѣдѣ́ти во странѣ́ го́рняго престо́ла, изъ ю́жныя страны́.

Апостолъ.

И по исполне́ніи трисвята́го, прише́дъ пре́дъ святы́я две́ри, діа́конъ глаго́летъ:

Во́нмѣмъ.

Іере́й же возглаша́етъ:

Ми́ръ всѣ́мъ.

И па́ки діа́конъ: Прему́дрость, Во́нмѣмъ.

И чте́цъ, прокíменъ, псало́мъ дѣ́вдовъ.

И ска́зываетъ прокíменъ апо́столу. Ли́къ же поѣ́тъ прокíменъ. Чте́цъ ска́зываетъ сти́хъ къ нему́. Ли́къ повторя́етъ прокíменъ. Чте́цъ, прокíменъ до полу́. Ли́къ же поѣ́тъ конѣ́цъ его́.

Посе́мъ діа́конъ: Прему́дрость.

И чте́цъ надписа́ніе апо́стола:

Дѣя́ній святы́хъ апо́столъ чте́ніе. или́: Собо́рнаго посла́нія Іа́ковля чте́ніе. или́: Пѣ́рваго (или́: Втора́го) собо́рнаго посла́нія Петро́ва чте́ніе. или́: Пѣ́рваго (или́: Втора́го, или́: Трѣ́тяго) собо́рнаго посла́нія Іоа́ннова чте́ніе. или́: Собо́рнаго посла́нія Іу́дова чте́ніе. или́: Къ Ри́мляномъ, (или́: Къ Корíнѳяномъ пѣ́рваго, или́: Къ Корíнѳяномъ втра́го, или́: Къ Гала́томъ, или́: Ко Ефесѣ́емъ, или́: Къ філіпписíемъ, или́: Къ Колосса́емъ, или́: Къ Солу́няномъ пѣ́ваго, или́: Къ Солу́няномъ втора́го, или́: Къ Тімоѳѣ́ю пѣ́ваго, или́: Къ Тімоѳѣ́ю втора́го, или́: Къ Тíту, или́: Къ філимо́ну, или́: Ко Еврѣ́емъ) посла́нія свята́го апостола Па́вла чте́ніе.

И па́ки діа́конъ: Во́нмѣмъ.

Апо́столу же испо́лньшуся, глаго́летъ іере́й:

Ми́ръ ти́.

Діа́конъ: Прему́дрость, во́нмѣмъ.

Чте́цъ: Аллилуіа́рій.

(Псало́мъ дѣ́вдовъ, аллилу́іа. или́: Аллилу́іа, гла́съ, и сказу́етъ прилучи́вшійся гла́съ.)

Ли́къ: Аллилу́іа.

Чте́цъ ска́зываетъ стихи́ къ нему. Ли́къ поѣ́тъ Аллилу́іа, по ка́ждомъ сти́сѣ.

Аллилу́іа же пѣва́ему, пріе́мъ діа́конъ кади́льницу и ѳvміа́мъ, прихо́дитъ ко іере́ю и пріе́мъ благослове́ніе отъ него́, кади́тъ святу́ю трапе́зу о́крестъ, и олта́рь ве́сь, и іере́я.

Евангеліе

Іере́й же, сто́я пре́дъ свято́ю трапе́зою, глаго́летъ моли́тву сію́.

Моли́тва пре́жде ева́нгеліа:

Возсія́й въ сердца́хъ на́шихъ, человѣколю́бче Влады́ко, Твоего́ богоразу́мія нетлѣ́нный свѣ́тъ, и мы́сленныя на́ши отве́рзи о́чи во е́же разумѣ́ти ева́нгельская Твоя́ проповѣ́данія. Вложи́ въ на́съ и стра́хъ блаже́нныхъ Твои́хъ за́повѣдей, да плотскíя по́хоти вся́ попра́вше, духо́вное жи́тельство про́йдемъ, вся́, я́же ко благоугожде́нію Твоему́, и му́дрствующе и дѣ́юще. Ты́ бо еси́ просвѣще́ніе ду́шъ и тѣле́съ на́шихъ, Христе́ Бо́же, и Тебѣ́ сла́ву возсыла́емъ, со безнача́льнымъ Твои́мъ Отце́мъ, и пресвяты́мъ и благи́мъ и животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ. Ами́нь.

Діа́конъ же, кади́ло отложи́въ на обы́чное мѣ́сто, прихо́дитъ ко іере́ю, и подклони́въ ему́ главу́ свою́, держя́ ора́рь кра́йними пе́рсты и указу́я на свято́е ева́нгеліе, глаго́летъ:

Благослови́, влады́ко, благовѣсти́теля свята́го апо́стола и евангелíста, и́мя рекъ.

Іере́й, зна́менуя его́, глаго́летъ:

Бо́гъ, моли́твами свята́го, сла́внаго, всехва́льнаго апо́стола и еvангелíста, и́мя рекъ, да да́стъ тебѣ́ глаго́лъ благовѣству́ющему си́лою мно́гою, во исполне́ніе еvа́нгеліа возлю́бленнаго Cы́на своего́, Го́спода на́шего Ісу́са Хрcта́.

И подае́тъ ему́ свято́е еvа́нгеліе.

Діа́конъ же ре́къ: Ами́нь.

И поклони́вся свято́му ева́нгелію, пріѣ́млетъ е́, и изше́дъ святы́ми две́рьми, предходя́щымъ ему́ свѣщено́сцемъ, прихо́дитъ и стои́тъ на амво́нѣ, или́ на учине́ннѣмъ мѣ́стѣ.

Іере́й же, стоя́ пре́дъ свято́ю трапе́зою и зря́ къ за́паду, возглаша́етъ:

Прему́дрость, прости́, услы́шимъ свята́го ева́нгеліа.

Та́же: Ми́ръ всѣ́мъ.

Ли́къ: И ду́хови твоему́.

Діа́конъ: Отъ и́мя рекъ свята́го ева́нгеліа чте́ніе.

Ли́къ: Сла́ва тебѣ́ Го́споди, сла́ва Тебѣ́.

Іере́й: Во́нмѣмъ.

А́ще же су́ть два́ діа́кона, то еди́нъ да глаго́летъ: Прему́дрость, про́сти: Та́же, и: Во́нмѣмъ.

И испо́лнившуся ева́нгелію, глаго́летъ іере́й:

Ми́ръ ти́ благовѣству́ющему.

Ли́къ: Сла́ва тебѣ́ Го́споди, сла́ва Тебѣ́.

И отше́дъ діа́конъ да́же до святы́хъ двѣ́рій, отдае́тъ свято́е ева́нгеліе іере́ю, и затворя́ются па́ки святы́я две́ри.

Сугубая ектенія

Діа́конъ, ста́въ на обы́чномъ мѣ́стѣ, начина́етъ си́це:

Рце́мъ вси́ отъ всея́ души́, и отъ всего́ помышле́нія на́шего рце́мъ.

Ли́къ: Го́споди, поми́луй.

Го́споди вседержи́телю, Бо́же оте́цъ на́шихъ, мо́лимтися, услы́ши и поми́луй.

Ли́къ: Го́споди, поми́луй.

Поми́луй на́съ, Бо́же, по вели́цѣй ми́лости Твое́й, мо́лимтися, услы́ши и поми́луй.