Сѵмволъ, рекше Исповѣданіе, иже во святыхъ Отца нашего Аѳанасія, Патріарха Александрійскаго
Иже хощетъ спастися, прежде всѣхъ подобаетъ ему держати каѳолическую вѣру, еяже аще кто цѣлы и непорочны не соблюдáетъ, кромѣ всякаго недоумѣнія, во вѣки погибнетъ.
Вѣра же каѳолическая сія есть: да единаго Бога въ Троицѣ, и Троицу во единицѣ почитаемъ, нижé сливающе ѵпостаси, ниже существо раздѣляюще.
Ина бо есть ѵпостась Отча, ина Сыновня, ина Святаго Духа: но Отчее, и Сыновнее, и Святаго Духа, едино есть Божество, рáвна слава, соприсносущно величество. Якóвъ Отецъ, такóвъ Сынъ, такóвъ и Святый Духъ.
Несоздáнъ Отецъ, несоздáнъ Сынъ, несоздáнъ и Святый Духъ. Непостижимъ Отецъ, непостижимъ Сынъ, непостижимъ и Духъ Святый. Вѣченъ Отецъ, вѣченъ Сынъ, вѣченъ и Святый Духъ: обаче не три вѣчни, но единъ вѣчный; якоже нижé три несоздáнніи, нижé три непостижиміи, но единъ несоздáнный, и единъ непостижимый.
Подобнѣ: Вседержитель Отецъ, Вседержитель Сынъ, Вседержитель и Духъ Святый: обаче не три вседержители, но единъ Вседержитель. Тако: Богъ Отецъ, Богъ Сынъ, Богъ и Духъ Святый: обаче не три Бози, но единъ Богъ. Равнѣ: Господь Отецъ, Господь Сынъ, Господь и Духъ Святый: обаче не три Господіе, но единъ есть Господь. Зане, якоже особно куюждо ѵпостась, Бога и Господа исповѣдати, христіанскою истиною понуждаемся: тако три Боги, или три Господы глаголати, каѳолическимъ благочестіемъ возбраняемся.
Отецъ ни отъ кого есть сотворенъ, ни созданъ, нижé рожденъ. Сынъ отъ Отца Самагó есть, не сотворенъ, ни создáнъ, но рожденъ. Духъ Святый отъ Отца не сотворенъ, ни создáнъ, нижé рожденъ, но исходящъ.
Единъ убо (есть) Отецъ, не три отцы, единъ Сынъ, не три сыны, единъ Духъ Святый, не три дуси святіи. И въ сей (Святѣй) Троицѣ ничтоже первое или послѣднее, ничтоже болѣе или мнѣе: но цѣлы три ѵпостаси, соприсносущны суть себѣ и рáвны. Сице яко да по всему, якоже предречеся, Троица во Единицѣ, и Единица въ Троицѣ почитается. Хотяй убо спастися, тако о Святѣй Троицѣ да мудрствуетъ.
Но нужно есть къ вѣчному спасенію, да и о воплощеніи Господа нашего Іисуса Христа извѣстно вѣруетъ.
Есть же правая вѣра, да вѣруемъ и исповѣдуемъ, яко Господь нашъ Іисусъ Христосъ, Сынъ Божій, Богъ и человѣкъ есть: Богъ отъ существа Отча прежде вѣкъ рожденный, и человѣкъ есть отъ существа матерня, во врéмени рожденный. Совершенный Богъ и совершенный человѣкъ, отъ души словесныя, и человѣческія плоти состояй. Равенъ Отцу по Божеству, мній Отца по человѣчеству. Иже аще и Богъ есть, и человѣкъ, обаче не два, но единъ есть Христосъ: единъ же не премѣненіемъ Божества въ плоть, но воспріятіемъ человѣчества въ Божество, единъ всяко, не сліяніемъ естествъ, но единствомъ Ѵпостаси.
Якоже бо душа словесная и плоть, единъ есть человѣкъ: тако Богъ и человѣкъ, единъ есть Христосъ, пострадавый спасенія нашего рáди, и сошéдый во адъ, и въ третій день воскресый изъ мертвыхъ, и возшéдый на небеса, и сѣдый одесную Бога и Отца Вседержителя, отонудуже пріидетъ судити живымъ и мертвымъ, Егоже пришествіемъ вси человѣцы воскрéснутъ съ тѣлесы своими и воздадутъ о своихъ дѣлѣхъ отвѣтъ: и убо благая содѣявшіи пóйдутъ въ жизнь вѣчную, злая же — во огонь вѣчный.
Сія есть каѳолическая вѣра, еяже аще кто вѣрно и извѣстно вѣрити не будетъ, спастися не возможетъ. Аминь.