MARTYROLOGIUM ROMANUM

16 Augusti     

Decimo septimo Kalendas Septembris. Luna ...     ix. D

Sancti Joachim, patris immaculatae Virginis Genitricis Dei Mariae, Confessoris, cujus dies natalis refertur tertiodecimo Kalendas Aprilis.

Romae sancti Titi Diaconi, qui, Urbe a Gothis occupata, pecunias pauperibus distribuens, a Tribuno barbaro jussus est occidi.

Nicaeae, in Bithynia, sancti Diomedis medici, qui in persecutione Diocletiani Imperatoris, pro Christi fide caesus gladio, martyrium complevit.

In Palaestina sanctorum triginta trium Martyrum.

Ferentini, in Hernicis, sancti Ambrosii Centurionis, qui, in persecutione Diocletiani, variis modis cruciatus, et novissime, cum per ignem illaesus transisset, demersus in aquam, eductus est in refrigerium.

Mediolani depositio sancti Simpliciani Episcopi, sanctorum Ambrosii et Augustini testimonio celebris.

Antisiodori sancti Eleutherii Episcopi.

Nicomediae sancti Arsacii Confessoris, qui, sub Licinio persecutore, militia relicta, solitariam vitam ducens, tantis virtutibus claruit, ut et daemones expulisse et orando interemisse ingentem draconem legatur; denique, futuram civitatis cladem praenuntians, in oratione spiritum Deo reddidit.

Apud Montem Pessulanum, in Gallia Narbonensi, depositio beati Rochi Confessoris, qui multas Italiae urbes signo Crucis a morbo epidemiae liberavit. Ipsius corpus Venetias postea translatum, et in Ecclesia, ejus nomine consecrata, honorificentissime conditum fuit.

Romae sanctae Serenae, uxoris quondam Diocletiani Augusti.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.