MARTYROLOGIUM ROMANUM

18 Junii     

Quartodecimo Kalendas Julii. Luna ...   vij. F

Edessae, in Mesopotamia, sancti Ephraem, Diaconi Edesseni et Confessoris, qui, post multos labores pro Christi fide susceptos, doctrina et sanctitate conspicuus, sub Valente Imperatore quievit in Domino, et a Benedicto Papa Decimo quinto Doctor Ecclesiae universalis est declaratus.

Romae, via Ardeatina, natalis sanctorum Martyrum Marci et Marcelliani fratrum, qui, in persecutione Diocletiani, a Judice Fabiano tenti et ad stipitem alligati, in pedibus clavos acutos acceperunt; cumque non cessarent laudare Christum, lanceis per latera transfixi sunt, et cum gloria martyrii ad siderea regna migrarunt.

Malacae, in Hispania, sanctorum Martyrum Cyriaci, et Paulae Virginis, qui, lapidibus obruti, inter saxa caelo animas reddiderunt.

Tripoli, in Phoenicia, sancti Leontii militis, qui, sub Hadriano Praeside, una cum Hypatio Tribuno et Theodulo, quos convertit ad Christum, per acerba tormenta pervenit ad coronam martyrii.

Eodem die sancti Aetherii Martyris, qui, in persecutione Diocletiani, post ignes et alios cruciatus, gladio caesus est.

Alexandriae passio sanctae Marinae Virginis.

Burdigalae sancti Amandi, Episcopi et Confessoris.

Apud Saccam, in Sicilia, sancti Calogeri Eremitae, cujus sanctitas in energumenis liberandis maxime effulget.

Schonaugiae, in Germania, sanctae Elisabeth Virginis, ob monasticae vitae observantiam celebris.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.