St. Škutāns, M.I.C.

Katōļticeibas vēsture un katekisms

Īvodam

Par mysu vērszemes dzeives cyldonumu

 1. Kaids mērkis ir myusu vērszemes dzeivei?

Mes asam šymā pasaulī, lai Dīvu pazeitu, Jū mīļōtu, Jam kolpōtu, lai taidā veidā sev īgyutu dabasūs.

2. Kas ir dabasi?

Dabasi ir piļneigas un myužeigas laimes vīta.

3. Voi vērszemes lītas nav dūmōtas myusu laimei?

Nā. Šō pasauļa lītas nav spējeigas sagodot myusim patīsu laimi.

4. Kōpēc šō pasauļa lītas naspēj dareit myus laimeigus?

Tōpēc, ka šō pasauļa lītas ir izniceigas, bet Dīvs myusus ir radēj is myužeigai, naizneikstūšai svātlaimei dabasūs.

„Es sev sakrāju kaudzēm sudobru un zaltu, dārgumus nu kēnenim un zemem, sagōdōju sev dzīdōtojus un dzīdōtōjas; ar bogōteibu es pōrspēju vysus, kas pyrms manis beja Jeruzalimā; es sev naatrōvu nikō nu tō, kū īkōrōja munas acis; es nalīdžu sovai sirdei nikaidu tōs vēlēšonūs, jo munai sirdei vajadzēja prīcātīs... Bet kod tagad pōrbaudu vysus sovus dorbus... tod, ak voi! Vyss beja tukšums, izniceiba un vēja keršona un nav nikō palīkūša zam saules“ (Edes. 2: 8—11). — Tai runoj škītami laimeigokais un gudrōkais nu kēnenim — Salomons.
„Jo kas ir jyusu dzeive? Garaini, kas eisu breidi ir radzami un tod izzyud“ (Jāk. 4:15).
„Ak, Dīvs, Tu sevis dēļ myusus esi radejis, tōdēļ namīreiga ir muna sirds, koleidz naatrass mīru Tevī“ (Sv. Augustīns).
5. Kōdā nūlyukā tod laiceigds lītas myusim ir dūtas?

Tōs myusim ir dūtas, lai mums paleidzātu Dīvu pazeit un Jam kolpōt.

„Tukšs ir ik kotrys cylvāks, kuram nav zynōšonas par Dīvu; kod nu tom lītōm, kaidas redz, naspēj pazeit Tū, Kas ir; kod nu dorbim naspēj pazeit Dareitoju“. (Gudr. 13:1.)
6. Kodēļ Dīvs pīprosa, lai mes jū pazeitu, jū mīļōtu un jam kolpōtu?

Dīvs pīprosa: a) lai Jū pazeitu tōdēļ, ka Jys ir myužeigō Patīseiba; b) Jū mīļōt tōdēļ, ka Jys ir bezgaleigais Lobums un c) Jam kolpōt tōdēļ, ka Jys ir Vysaugstōkais Kungs, nu kura asam piļneigi atkareigi.

7. Kas nūtiks ar tim, kuri nagryb Dīvu pazeit, mīļōt un Jam kolpōt?

Tūs Dīvs atmess nu Sevis uz myužim.

„Bet nalīteigū kolpu izmetīt ōrējos tymseibōs; tur byus raudōšona un zūbu grīzšona“ (Mt. 25:30).
8. Taitod kas ir vysnapīcīšamōkais myusu vērszemes dzeivē?

Vysnapīcīšamōkais šamā dzeivē ir, lai mes Dīvu pazeitu, mīļōtu un Jam kolpōtu, lai taidā veidā sasnāgtu myužeigū svātlaimi.

„Meklejit tōpēc vyspyrms Dīva vaļsteibu un Jō taisneibu“ (Mt. 6:33).
„Jo kū tys leidz cylvākam, ka jys īmontōs vysu pasauli, bet sovā dvēselē cīss zaudejumu?“ (Mt. 16:26).
9. Kas mums jōdora, lai Dīvu pazeitu, Jū mīļōtu, Jam kolpōtu un aizkopa dzeivē baudeitu myužeigū svātlaimi?

a) Mums ir jōtic vysam, kū Dīvs ir atklōjis; b) jōpylda bausleibas, kuras Jys ir pavēlējis piļdeit un c) mums ir jōpīlītōj žēlesteibas leidzekli, kaidus Dīvs ir paredzējis myusu pesteišonai.

10. Kōpēc, lai byutu atpesteiti, mums ir jōtic, jōpylda bausleibas un jōpīlītōj žēlesteibas leidzekli?

Lai byutu atpesteiti, mums ir jōtic tōpēc, ka tikai ticeiba mums dūd pareizu zynōsonu par Dīvu; mums jōpylda bausleibas,tōpēc, ka pyldūt bausleibas, mes kolpōjam Dīvam un mums ir jōpīlītōj žēlesteibas leidzekli, tōpēc, ka tī mums dūd napīcīšamū spāku myusu pesteišonas ceļā.

11. Kur mes īgyunam pareizas zvnošonas par dīviškom ticeibas patīseibom, par bausleibom un žēlesteibas leidzeklim?

Tū mes īgyunam myusu katōļticeibas mōceibā.

12. Kai sauc tu grōmotu, kas satur eisu, vaicōjumus un atbiļdēs īturātu katōļticeibas mōceibu?

Tū sauc par katekismu.

13. Par kū katekismā ir runa?

Katekismā ir runa:
1. par ticeibu,
2. par bausleibom,
3. par žēlesteibas leidzeklim, prūti, par sakramentim un lyugšonu.

Katekismā ir sakūpōtas patīseibas, kas myus vad uz myužeigū dzeivi. Pats Kristus tōs ir mōcējis, Bazneica mums tōs pasnādz. Katekismā sakūpōtōs patīseibas ir jōzyna jau bārnim, vēļ lobōk tōs ir jōzyna pīaugušim. Tōs vīnkōrši un skaidri rāda ceļu cauri dzeives sarežgējumim un naskaidreibom, kū izplota vyltus pravīši, kai ari tymsai, kaidu roda myusu pošu lepneibas apmōktais prōts.
„Svēteigs ir veirs, kas atrūn gudreibu (tys ir, Dīva pazeišonu un Jō mīlesteibu). Taids īgyvums ir vērteigōks par vysom bogōteibom. Ar tū navar leidzynōtīs nikaidas īkōrōjamōs lītas. Tei (gudreiba) ir dzeiveibas kūks tim, kuri pi tō turīs. Un svēteigi ir tī, kas nūsaturēs pi tō“ (Gudr. 3:13—18).