Апокалипсисъ святаго Іoанна Ѳеолога

1 2 3 4 5 6 7 8 9 10 11 12 13 14 15 16 17 18 19 20 21 22

Глава, 1.

Апокалипсисъ ісуса христа, иже дастъ ему богъ показати рабомъ своимъ, имъ же подобаше быти вскорѣ, и сказа пославъ ангеломъ своимъ, рабу своему іoанну, иже свѣдѣтельствова слово божіе, и свѣдѣтельство ісусъ христово, елико видѣ. Блажeнъ чтыи и слышащіи словеса пророчествія его, и соблюдающіи писаная въ нeмъ, врeмя бо близъ. іoаннъ седмимъ церковамъ иже суть во асіи. благодать вамъ и миръ, отъ сущаго, и иже бѣ, и грядущаго, и отъ седми духовъ, иже предъ престоломъ его суть. и отъ ісуса христа иже есть свѣдѣтель вѣрныи, пeрвенецъ изъ мертвыхъ, и князь царeй зeмскыхъ, любящу ны и омы насъ отъ грѣхъ нашихъ кровію своeю, и сотворилъ есть насъ царя и іерeя богу и отцу своему. Тому слава и держава во вѣкы вѣкомъ аминь. Се грядeтъ съ облакы, и узритъ и всяко око, и иже его прободоша, и плачь сотворятъ на ся о нeмъ вся колѣна земская. ей аминь. азъ есмь алфа и О, начатокъ и конeцъ, глаголетъ господь, сыи, и бѣ, и грядыи, вседержитель. азъ іoаннъ иже и братъ вашъ, и обѣщникъ въ печали и въ царствіи, и въ терпѣніи ісусъ христовѣ. быхъ въ островѣ, нарицаемомъ патмосъ, за слово божіе и за свѣдѣтельство ісусъ христово. быхъ въ дусѣ въ день недѣльныи. и слышахъ за собою гласъ вeліи яко трубу, глаголющъ. азъ есмь алфа и О, пeрвыи и послѣдніи. и яже видиши, напиши въ книги, и посли церковамъ, яже суть во асіи, во ефeсъ, и въ змирну, въ пергамъ, и въ ѳіятиръ, и въ сардію, и въ филадeльфію, и въ лаoдикію. и обратихся видѣти гласъ иже глаголаше со мною. И обращся видѣхъ сeдмь свѣтилникъ златыхъ, и посредѣ седми свѣтилникъ подобенъ сыну человѣчу облечeнъ въ подиръ, и препоясанъ при сосцу поясомъ златымъ. глава же его и власи бѣлы яко ярина бѣлая, яко снѣгъ, и очи его яко пламень огненъ. и нозѣ его подобни мѣди халколивановѣ, яко въ пещи раждежeнѣ. И гласъ его, яко гласъ водъ многъ, и держа въ руцѣ своeй деснѣй сeдмь звѣздъ и изъ устъ его мeчъ обоюду остръ изъострeнъ исходяи. И лице его яко солнце сіяетъ въ силѣ своeй. и егда видѣхъ его, падохъ къ ногама его яко мертвъ, и положи десницу свою на мнѣ глаголя ми, не бойся. Азъ есмь пeрвыи и послѣдніи и живыи, и быхъ мертвъ, и се живъ есмь во вѣкы вѣкомъ. имамъ ключа смерти и аду. напиши убо яже видѣ, и яже суть и имъ же подобаетъ быти посeмъ. Таинство седми звѣздъ яже видѣлъ еси на десници моeй, и сeдмь свѣтилникъ златыхъ, сeдмь звѣздъ суть, ангели седми церковeй суть. сeдмь же свѣтилникъ, яже видѣ, сeдмь церковeй суть.

Глава, 2.

Ангелу ефeсскія церкове напиши. тако глаголетъ держаи сeдмь звѣздъ въ десници своeй, и ходяи посредѣ седми свѣтилникъ златыхъ. вѣмъ твоя дѣла и трудъ твой и терпѣніе твое, и яко не можеши носити злыхъ. и искусилъ еси глаголющаяся быти апостолы, и нѣсуть, и обрѣте я лжа, и понeслъ еси и терпѣніе имаши. и за имя мое трудися, и не изнеможе. но имамъ на тя, яко любовь твою пeрвую остави. помяни убо откуду спаде, и покайся. и пeрвая дѣла сотвори. Аще ли ни, гряду ти скоро, и двигну свѣтилникъ твой отъ мѣста своего, аще не покаешися. но се имаши, яко ненавидиши дѣлъ николаитескъ, ихъ же и азъ ненавижу. Имѣяи ухо да слышитъ, что духъ глаголетъ церковамъ, побѣждающему дамъ ясти отъ дрeва животнаго, еже есть посредѣ рая божія. И ангелу церкови змирнскія напиши. тако глаголетъ пeрвыи и послѣдніи, иже бысть мертвъ, и се живъ есть. вѣмъ твоя дѣла, и скорбь, и нищету, но богатъ еси, и хулы, глаголющихся быти іудeя, и нѣсуть, но сонмище сатанино. не бойся ничесоже яже хощеши пострадати. се бо имать діаволъ всажати отъ васъ въ темница да искуситеся. и имате скорбь до десяти дній. буди вѣренъ до смерти, и дамъ ти вѣнeцъ живота. Имѣяи ухо слышати да слышитъ, что духъ глаголетъ церковамъ. побѣждаяи, не имать вредитися отъ смерти вторыя. и ангелу пергамскія церкови напиши. тако глаголетъ имѣяи мeчъ обоюду изощрeнъ. вѣмъ дѣла твоя, и гдѣ живeши идѣже престолъ сатанинъ. и держиши имя мое, и не отвeржеся вѣры моея. и въ моя дни. антипасъ свѣдѣтель мой вѣрныи иже убіeнъ бысть въ васъ, идѣже живeтъ сатана. но имамъ на тя мало, яко имаши ту держащая учeніе валаамово, иже учаше валака, положити соблазнъ предъ сынми ізраилевыми, ясти жeртвы идолскія, и любы творити. тако имаши и ты держащая учeніе николаитско, его же ненавижу. покайся, аще ли ни, пріиду ти скоро, и брань сотворю съ ними мечeмъ устъ моихъ. имѣяи ухо слышати да слышитъ, что духъ глаголетъ церковамъ. побѣждающему дамъ ясти отъ манны сокровeнныя. и дамъ ему камень бѣлъ, и на камени имя ново написано, его же никтоже вѣсть, токмо пріeмляи. И ангелу ѳиатирскія церкови напиши. тако глаголетъ сынъ божіи, имѣяи очи свои яко пламень огненъ. и нозѣ его подобни мѣди халколивановѣ. вѣмъ твоя дѣла и любовь и вѣру и службу и терпѣніе твое, и дѣла твоя, и послѣдняя болша пeрвыхъ, но имамъ на тя мало, яко оставляеши женѣ іезавeль глаголющеися быти пррѣчца, учитъ и льститъ моя рабы любодѣйство вати, и снѣсти жeртву идолскую. и дахъ ей врeмя да покается отъ любодѣйства своего, и не покаяся. се азъ полагаю ю на одрѣ, и любодѣющая съ нeю въ скорбь вeлію, ащеся не покаютъ отъ дѣлъ своихъ, и чада ихъ умрутъ смертію. и разумѣютъ вся церкови, яко азъ есмь испытаяи сердца и утробы, и дамъ вамъ комуждо по дѣломъ вашимъ. вамъ же глаголю, и прочимъ сущимъ въ ѳіатирѣ, иже не имутъ учeнія сего и иже не разумѣютъ глубины сатанины, яко глаголютъ, не возложу на вы тяго ты иноя, токмо еже имате держите, дондеже пріиду. И побѣждающему и соблюдающему дѣла моя до конца, дамъ ему власть на языцѣхъ и упасeтъ я жезломъ желѣзнымъ, и яко сосуды и скудeлнича сокрушатся. яко же и азъ пріяхъ отъ отца моего. И дамъ ему звѣзду утренюю. имѣяи ухо слышати да слышитъ, что духъ глаголетъ церковамъ.

Глава, 3.

И ангелу сардійскія церкови напиши, тако глаголетъ имѣяи сeдмь духъ божіихъ, и сeдмь звѣздъ. вѣмъ твоя дѣла, яко имя имаши яко живъ, а мертвъ еси. Буди бдя, и утвержая прочая, имъ же умрети. не обрѣтохъ бо дѣлъ твоихъ скончаныхъ прeдъ богомъ твоимъ. Поминай убо како пріятъ, и слыша и соблюдай и покайся. аще убо не бдиши, пріиду на тя яко тать, и не имаши почюти, въ кіи годъ пріиду на тя. но имаши мало имeнъ и въ сардіи, иже не оскверниша ризъ своихъ, и ходити имутъ со мною въ бѣлыхъ, яко достойни суть. побѣждаяи той облечeтся въ ризы бѣлыя, и не имамъ отмыти имени его отъ книгъ животныхъ и исповѣмъ имя его предъ отецeмъ моимъ, и предъ ангелы его. имѣяи ухо, да слышитъ, что духъ глаголетъ церковамъ. И ангелу филаделфійскія церкови напиши. тако глаголетъ святыи истинныи, имѣяи ключь давыдовъ. отверзаяи, и никтоже затворитъ. затворяяи, и никтоже отвeрзетъ. Вѣмъ твоя дѣла. се дахъ предъ тобою двeри отвeрсты и никтоже можетъ затворити ихъ, яко малу имаши силу, и соблюде мое слово, и не отвeржеся имени моего. се даю отъ сонмища сатанина, глаголющаяся быти іудeя и нѣсуть, но лжутъ. се сотворю я да пріидутъ и поклонятся предъ ногама твоима, и разумѣютъ яко азъ возлюбихъ тя. Яко соблюде слово терпѣнія моего, и азъ тя соблюду отъ годины искушeнія хотящая пріити на всю вселeнную, искусити живущая на земли, се гряду скоро, держи еже имаши, да никтоже пріиметъ вѣнца твоего. Побѣждающаго сотворю столпа церкови бога моего. и боле не имать изыти ктому. И напишу на нeмъ имя бога моего, и имя града бога моего новаго іерусалима сходящаго съ небесъ отъ бога моего и имя мое новое. имѣяи ухо да слышитъ, что духъ глаголетъ церковамъ. И ангелу лаoдикійскія церкови напиши, тако глаголетъ, аминь свѣдѣтель вѣрныи и истинныи, начатокъ созданія божія. вѣмъ твоя дѣла яко ни студенъ еси ни тeплъ. не да студенъ бы былъ, ни тeплъ, тако яко объуморeнъ еси, и ни тeплъ ни студенъ. изблевати тя отъ устъ моихъ имамъ, зане глаголеши яко богатъ есмь, и обогатихся и ничтоже трeбую. и не вѣси яко ты еси окаяненъ и мніи и нищъ и слѣпъ и нагъ. Совѣщаю тебѣ купити отъ мене злато раждежeно огнeмъ, да обогатишися, и одѣяніемъ бѣлымъ облечeшися, да не явится срамота наготы твоея. и коллуріемъ помажи очи твои да видиши. азъ ихъ же аще люблю, обличаю и кажу. ревнуй убо и покайся, се стою при двeрехъ, и толку, аще кто услышитъ гласъ мой, и отвeрзетъ двeри, вниду къ нему и вечеряю съ нимъ и той со мною. побѣждающему дамъ сѣсти со мною на престолѣ моeмъ. яко же и азъ побѣдихъ и сѣдохъ со отецeмъ моимъ на престолѣ его. имѣяи ухо, да слышитъ что духъ глаголетъ церковамъ.

Глава, 4.

Посихъ видѣхъ, и се двeри отвeрсты на небеси. и гласъ пeрвыи его же слышахъ яко трубу глаголющъ со мною глаголя. Взыди сѣмо, и покажу ти ему же подобаетъ быти посихъ. Абіе же быхъ въ дс7ѣ, и се престолъ стояше на небеси, и на престолѣ сѣдящъ, и сѣдяи бѣ подобенъ видѣнію камени іаспиди, и сардинови. И бѣ дуга окрестъ престола подобна видѣніемъ змарагдови. и окрестъ престола престоли двадесять четыри. и на престолѣхъ видѣхъ двадесять четыре старцы сѣдяща, облeчены въ бѣлы ризы. и имяху вѣнца златы на главахъ своихъ, и отъ престола исхождаху молнія и громи и гласы. и сeдмь свѣщникъ огнeмъ горящихъ предъ престоломъ, яже суть сeдмь духовъ божіихъ. и предъ престоломъ море сткляно подобно кристаллу. и посредѣ престола, и окрестъ престола четыри животна исполнь очeсъ спреди и сзади. и животно пeрвое подобно льву, и второе животно подобно тельцу, и трeтіе животно имыи лице яко человѣкъ, и четвeртое животно подобно орлу летящу. и животна четыри, единъ кождо ихъ, имыи по шeсть крылъ окрестъ и внутрь юду исполнь суть очeсъ. И покоя не имуще день и нощь глаголюще, святъ святъ святъ, господь богъ вседержитель, иже бѣ и сыи, и грядыи. и егда даша животная славу и чeсть и хвалу сѣдящему на престолѣ, живущему во вѣкы вѣкомъ, падоша двадесять четыри старцы предъ сѣдящимъ на престолѣ, и поклонишася живущему во вѣкы вѣкомъ. и положиша вѣнца своя предъ престоломъ глаголюще, достоинъ еси господи пріяти славу и чeсть и силу, яко ты еси создалъ всяческая, и волею твоeю суть и сотворeни.

Глава, 5.

И видѣхъ въ десници сѣдящаго на престолѣ книгу написану внутрь юду и внѣ юду, запечатлѣну седмію печатію и видѣхъ ангела крѣпка проповѣдающе гласомъ великымъ. кто есть достоинъ разгнути книгу, и разрѣшити печати ея; и никтоже можаше, и ни на небеси ни на земли ниже подъ землeю разгнути книги ни зрѣти ея. И азъ плакахся много, яко не обрѣтеся никтоже достоинъ разгнути и почести книги ниже зрѣти ея. И единъ отъ старецъ глагола ми, не плачися, се побѣдилъ есть лeвъ иже сыи отъ колѣна іудова корень давыдовъ, разгнути книгу, и разрѣшити сeдмь печатіи ея. и видѣхъ, и се посредѣ престола, и четырехъ животныхъ, и посредѣ старецъ, агнецъ стоящъ яко заколeнъ, имущъ роговъ сeдмь и очeсъ сeдмь, еже есть сeдмь духъ божіихъ посланыхъ во всю зeмлю. и пріиде и пріятъ книгу отъ десница сѣдящаго на престолѣ. и егда пріятъ книгу, четыри животна, и двадесять и четыри старцы падоша предъ агньцемъ, имуще кождо гусли и фіалы златы полны ѳиміама, иже суть молитвы святыхъ. И поютъ пѣснь нову глаголюще, достоинъ еси пріяти книгу, и отвeрсти печати ея. яко заколeнъ бысть, и искупи богови насъ кровію своeю отъ всякого колѣна, и языка и людіи и племeнъ, и сотворилъ еси насъ, богови нашему, царя и іерeя и воцаримся на земли. И видѣхъ, и слышахъ гласъ ангелъ многъ окрестъ престола, и животныхъ и старецъ, и бѣ число ихъ тысяща тысящами, глаголюще гласомъ великимъ. достоинъ есть агнецъ заколeныи пріяти силу и богатьство и премудрость и крѣпость и чeсть и славу и благословeніе. и всяко созданіе, еже есть на небеси и на земли и подъ землeю, и на мори, яже суть и сущая въ нихъ вся, слышахъ глаголюща сѣдящему на престолѣ, и агньцу благословeніе и чeсть и славу и державу во вѣкы вѣкомъ. и четыри животна глаголаху. аминь. И двадесять и четыри старцы падоша и поклонишася живущему во вѣки вѣкомъ.

Глава, 6.

И видѣхъ егда отвeрзе агнецъ едину отъ седми печатіи, и слышахъ единого отъ четырехъ животныхъ глаголюща яко гласъ громныи, гряди и виждь. И видѣхъ, и се конь бѣлъ, и сѣдяи на нeмъ имѣяше лукъ, и данъ бысть ему вѣнeцъ, и изыде побѣждаяи да побѣдитъ. и егда отвeрзе печать вторую, слышахъ второе животно глаголюще, гряди и виждь. и изыде другіи конь рыжъ, и сѣдящему на нeмъ дано бысть взяти миръ отъ земля, и да убіeтъ другъ друга, и данъ бысть ему мeчъ великіи. и егда отвeрзе трeтію печать. слышахъ трeтіе животно глаголюще, гряди и виждь. и видѣхъ, и се конь воронъ. и сѣдяи на нeмъ имѣяше мѣрило въ руцѣ своeй. и слышахъ гласъ посредѣ четырехъ животныхъ глаголющъ. мѣра пшеницы за динарь, и три мѣры ячмeню за динарь, и елeй и вино не вреди. И егда отвeрзе четвeртую печать, слышахъ гласъ четвeртаго животна глаголющъ, гряди и виждь. и видѣхъ. и се конь блѣдъ. и сѣдящъ на нeмъ имя ему смерть, и адъ идяше въ слѣдъ его. и дана бысть ему область на четвeртой части земля убити оружіемъ и гладомъ и смeртію, и звѣрми земными. и егда отвeрзе пятую печать. видѣхъ подъ олтарeмъ душа избіeныхъ за слово божіе и за свѣдѣтельство еже имѣяху, и возопиша гласомъ великомъ глаголюще, доколѣ владыко святыи и истинныи, не судиши, и не мстиши крови наша отъ живущихъ на земли; и даны быша комуждо ихъ ризы бѣлы. и речeно бысть имъ да почіютъ еще врeмя мало дондеже скончаются и клеврeти ихъ, и братія ихъ хотящеи избіeни быти яко же и тіи. и видѣхъ, егда отвeрзе шестую печать. и се бысть трусъ вeліи, и солнце мрачно бысть яко врeтище власяно. и луна бысть яко кровь. и звѣзды небесныя падоша на землю, яко смоковница отмѣтающи пупы своя отъ вѣтра велика движима. И небо отлучися яко свитокъ свиваемо. и всяка гора и островъ отъ мѣстъ своихъ двигнушася, и царіе зeмстіи и велможи и богатіи и тысущницы и силніи. и всякъ рабъ и всякъ свободъ, скрышася въ пещeрахъ и каменіи горъстѣмъ. и глаголаша горамъ и каменію, падѣте на ны и покрыйте ны, отъ лица сѣдящаго на престолѣ, и отъ гнѣва агньча. яко пріиде день великіи гнѣва его, и кто можетъ стати;

Глава, 7.

И посeмъ видѣхъ четыри ангелы стояща на четырехъ углехъ земли, держаща четыри вѣтры зeмскія, да не дышетъ вѣтръ на землю ни на море, ни на всяко дрeво. и видѣхъ инъ ангелъ восходящъ отъ восхода солнцу, имыи печать бога живаго, и возопи гласомъ вeліимъ къ четыремъ ангеломъ. имъ же дано бысть вредити зeмлю и море, глаголя. не вредите ни зeмлю ни море ни древа, дондеже запечатлѣемъ рабы бога нашего на челѣхъ ихъ. И слышахъ число запечатлѣнныхъ, сто четыредесятъ четыре тысящи запечатлѣнныхъ отъ всякого колѣна сыновъ ізраилевъ. отъ колѣна іудова, дванадесять тысящъ запечатлѣнныхъ, отъ колѣна рувимова, дванадесять тысящъ запечатлѣнныхъ, отъ колѣна гадова дванадесять тысящъ запечатлѣнныхъ. отъ колѣна асирова, дванадесять тысящъ запечатлѣнныхъ. отъ колѣна нефѳалимля дванадесять тысящъ запечатлѣнныхъ. отъ колѣна мана сіина, дванадесять тысящъ запечатлѣнныхъ. отъ колѣна симеонова, дванадесять тысящъ запечатлѣнныхъ. отъ колѣна левіина, дванадесять тысящъ запечатлѣнныхъ. отъ колѣна ісахарова, дванадесять тысящъ запечатлѣн ныхъ. отъ колѣна завулоня, дванадесять тысящъ запечатлѣнныхъ. и отъ колѣна іосифова, дванадесять тысящъ запечатлѣнныхъ. отъ колѣна веніаминова, дванадесять тысящъ запечатлѣнныхъ. Посихъ видѣхъ, и се народъ многъ, его же исчести никтоже можетъ, отъ всякого языка и колѣна и людіи и племeнъ. стояще предъ престоломъ, и предъ агньцемъ, облечeны въ ризы бѣлы, и финицы въ рукахъ ихъ. и возопиша гласомъ вeліимъ глаголюще, спcніе сѣдящаго на престолѣ бога нашего и агньца. и вси ангели стояху окрестъ престола, и старецъ и четыре животныхъ. и падоша на лицы предъ престоломъ и поклонишася богу. глаголюще, аминь. благословeніе и слава и премудрость и хвала и чeсть и сила и крѣпость богу нашему во вѣки вѣкомъ аминь. И отвѣща единъ отъ старецъ глагола ми. сіи облечeніи въ ризы бѣлыя, кто суть и откуду пріидоша; и рѣхъ ему, гдcи, ты вѣси. И рече ми, сіи суть иже пріидоша отъ скорби великія, и испраша ризы своя и убѣлиша ризы своя во крови агньчи, сего ради суть предъ престоломъ божіимъ и служатъ ему день и нощь въ церкови его. и сѣдяи на престолѣ вселится въ ня. не взалчутъ ктому ни вжаждутъ. Не имать же пасти на нихъ солнце, и всякъ зной. Яко агнецъ иже посредѣ престола упасeтъ я и наставитъ ихъ на животныя источники водъ, и отиметъ богъ всяку слезу отъ очію ихъ.

Глава, 8.

И егда отвeрзе седмую печать, бысть безмолвіе на небеси яко полчаса. и видѣхъ сeдмь ангелъ, иже прeдъ богомъ стояху, и дано бысть имъ сeдмь трубъ. И другіи ангелъ пріиде, и ста предъ олтарeмъ имѣяи кадилницу злату, и даны быша ему ѳиміями мнози, да дастъ молитвамъ святыхъ всѣхъ на олтарь златыи сущіи предъ престоломъ. и изыде дымъ кадилныи молитвамъ святыхъ отъ рукы ангела прeдъ бога. и взятъ ангелъ кадилницу и наполни ю огня сущаго на олтари и положи на земли. И быша гласы и громи и блистанія и трусъ. и сeдмь ангелъ, иже имѣяху сeдмь трубъ, уготовашася да вострубятъ. И пeрвому ангелу вострубившу, и бысть градъ и огнь смѣшенъ съ кровію. и паде на земли. и трeтія часть дрeва погорѣ, и всяка трава злачная погорѣ. И вторыи ангелъ воструби, и яко гора велика огнeмъ жегома ввeржена бысть въ море. и бысть трeтія часть моря кровь. и умре трeтія часть созданія въ мори имущихъ душа. и трeтія часть кораблeй погибе. И трeтіи ангелъ воструби. и паде съ небеси звѣзда велика горящи яко свѣща, и паде на трeтіей части рѣкъ, и источникъ водныхъ. и имя звѣздѣ глаголется апсиньѳосъ, и бысть трeтія часть водъ яко пелынь, и мнози отъ человѣкъ умроша отъ водъ, яко горки бѣша. и четвeртыи ангелъ воструби, и уязвeна бысть трeтія часть солнцу, и трeтія часть лунѣ, и трeтія часть звѣздъ, да затмится трeтія часть ихъ, и дня трeтія часть да не свѣтитъ. и нощь тако же. и видѣхъ и слышахъ единъ ангелъ парящъ посредѣ небесе, глаголющъ гласомъ великомъ. горе горе горе живущимъ на земли отъ прочихъ гласъ трубныхъ, тріeхъ ангелъ, хотящихъ трубити.

Глава, 9.

И пятыи ангелъ воструби. и видѣхъ звѣзду съ небесе спадшу на землю, и данъ бысть ей ключь студенца бeздны, и отвeрзе студенца бeздны, и взыде дымъ отъ студенца яко дымъ пeщи велики, и омeрче солнце и аеръ отъ дыма студеничнаго. и отъ дыма изыдоша прузи на землю, и дана бысть имъ область, яко имутъ область и скорпіи земніи, и речeно бысть имъ, да не вредятъ травы земныя, ни всякого злака, ни всякого дрeва. но человѣкы точію, иже не имутъ печати божія на челѣхъ своихъ. и дано бысть имъ, да не убіютъ ихъ, но да муку пріимутъ пять месяцъ. и мучeніе ихъ яко мучeніе скорпіево, егда сѣкнетъ человѣка. и въ ты дни взыщутъ человецы смeрти, и не обрящутъ ея, и вожделѣютъ умрети, и бѣжитъ отъ нихъ смeрть. и уподоблeнія пругомъ подобно конемъ уготовленымъ на брань, и на главахъ ихъ яко вѣнцы уподоблени злату, и лица ихъ яко лица человеческа. и имѣху власы, яко власы жeнскыя, и зубы ихъ яко львомъ бѣша. и имѣху броня яко броня желѣзны. И гласъ крылъ ихъ яко гласъ колесницъ и коней многотекущихъ на брань. и имяху ошиби подобни скорпіинымъ, и жала ошибей ихъ. и дана бѣ область имъ вредити человѣкы пять месяцъ, и имѣли надъ собою царя, ангела бeздны, ему же имя еврeйскы, аввадонъ. а еллинскы, аполліонъ. горе едино отиде, се грядутъ два горя посихъ. И шестыи ангелъ воструби, и слышахъ гласъ единъ отъ четырь рогъ олтаря златаго сущаго прeдъ богомъ, глаголюща шестому ангелу, имѣющу трубу. разрѣши четыри ангелы связаны на рѣцѣ велицѣй ефратъ. и разрѣшeны быша четыри ангелы уготованы на часъ, и день, и месяцъ, и лѣто, да избіютъ трeтію часть человѣкъ. И число воиникъ конныхъ двоицею тма тмами слышахъ число ихъ. И тако видѣхъ въ видѣніи, кони, и сѣдящія на нихъ имуща броня огнены, и акинѳны и жупелны. и главы конемъ ихъ яко главы львомъ, и изъ устъ ихъ исхождаше огнь и дымъ и жупелъ, и отъ трeхъ язвъ сихъ погибе трeтія часть человѣкъ, отъ огня и отъ дыма и отъ жупела исходящихъ изъ устъ ихъ. область бо конемъ во устѣхъ ихъ бѣ. и ошиби ихъ подобни зміeмъ имуще главы, и тѣми пакости дѣюще. И прочіи отъ человѣкъ иже неврежeни быша язвами сими. ни покаяшася отъ дѣлъ рукъ своихъ да не поклонятся дѣмономъ, ни идоломъ златымъ и срeбренымъ и мѣдянымъ и каменымъ и древянымъ, иже ни видѣти могутъ ни слышати ни ходити. и не покаяшася отъ убійствъ своихъ, ни отъ волхвованія ихъ, ни отъ блуда ихъ, ни отъ татьбы ихъ.

Глава, 10.

И видѣхъ инъ ангелъ крѣпокъ сходящъ съ небесе, оболчeнъ въ облакъ, и дуга на главѣ его, и лице ему яко солнце, и нозѣ его яко столпы огнены. и имѣя въ руцѣ своeй книгу разгибeну. и постави ногу свою десную на мори, а шую на земли. и возопи гласомъ великымъ яко лeвъ рыкая. и егда возгласи, глаголаша сeдмь громовъ, гласы своими. И егда возгласиша сeдмь громовъ гласы своими, хотѣхъ писати. и слышахъ гласъ съ небесе глаголющъ ми, запечатлѣй яже глаголаше сeдмь громовъ, и сего не пиши. И ангелъ его же видѣхъ стояща на мори и на земли, воздвиже руку свою на небо и клятся живущимъ во вѣкы вѣкомъ, иже созда небо, и яже на нeмъ, и зeмлю, и яже на нeй, и море, и яже въ нeмъ, яко лѣта уже не будетъ. Но во дни гласа седмаго ангела, егда имать вострубити, искончати тайну божію, еже благовѣсти своими рабы пророкы. и гласъ его слышахъ съ небесе паки глаголющъ со мною, и глагола. иди и пріими книжица разгнутыя въ руцѣ ангела стоящаго на мори и на земли. и идохъ ко ангелу глаголя ему, даждь ми книжица. и рече ми, пріими и снѣждь я и горка будетъ во чревѣ твоeмъ, но во устѣхъ ти сладка будетъ яко мeдъ. И пріяхъ книгу отъ руки ангела, и снѣдохъ я. и быша во устѣхъ моихъ яко мeдъ сладкіи. и егда снѣдохъ я горка бяше во чревѣ моeмъ. и рече ми, подобаетъ ти паки пророчествовати въ людехъ. и въ плeменѣхъ и во языцѣхъ и въ царeхъ мнозѣхъ.

Глава, 11.

И дана ми бысть трость, подобна жезлу, глаголющи востани, и измѣри церковь божію, и олтарь, и кланяющаяся въ нeй. а дворъ сущіи внутрь церкове изнеси внѣ юду. ниже измѣри его, зане данъ бысть языкомъ и градъ святыи поперутъ четыредесять и два месяца. И дамъ обѣма свѣдѣтелема моима и прорицаютъ днeй тысящу двѣстѣ и шестьдесятъ, оболчeна во врeтища, си еста двѣ маслици и два свѣщника прeдъ богомъ земля стояща. и иже има неправду сотворитъ, огнь исходитъ изъ устъ ею и поястъ враги ихъ, и иже хощетъ обидѣти ихъ сему подобаетъ убіeну быти. и сіи имутъ область затворити небо да не снидетъ дождь на землю во дни прорицанія ею. и область имутъ на водахъ обращати я въ кровь. и поразити зeмлю всякою язвою, елика аще восхощета. и егда искончаета свѣдѣтельство свое. звѣръ иже исходитъ отъ бeздны, сотворитъ съ ними брань, и побѣдитъ ихъ и убіeтъ я. и трупъ ею оставитъ на стогнахъ града великаго, иже нарицается духовнѣ, содомъ, и египетъ, идѣже и господь нашъ распятъ бысть. и узрятъ отъ людіи и языкъ и отъ колѣнъ и племeнъ тѣлеса ею, дни три и полъ, и трупу ею не оставитъ положити во гробѣ. и живущеи на земли возрадуются и возвеселятся о нихъ, и дары послютъ другъ ко другу, яко оба сія пророка мучиста живущая на земли. и по трeхъ днeхъ и полъ, духъ животенъ внидетъ въ ня отъ бога, и станета оба на ногахъ своихъ, и страхъ вeліи нападе на зрящихъ ею. и услышатъ гласъ вeліи съ небесе глаголющъ има, взыдѣта сѣмо, и взыдоша на небо на облацѣхъ. И видѣша я врази ихъ. и въ часъ той трусъ бысть вeліи, и десятая часть града паде и погибе трусомъ имeнъ человеческъ сeдмь тысящъ. И прочіи пристрашни быша, и даша славу богу небесному. горе второе отиде, се горе трeтіе грядeтъ скоро. и седмыи ангелъ воструби. и быша гласи велицы на небесѣхъ, глаголюще, бысть царство мира господа нашего и христа его, и воцарится во вѣкы вѣкомъ. и двадесять и четыри старцы прeдъ богомъ сѣдящая на престолѣхъ своихъ, падоша на лица своя и поклонишася богу глаголюще. хвалимъ тя господи боже вседержителю. сыи, и бѣ, и грядыи, яко пріятъ силу твою великую и воцарися, и языцы прогнѣвашася, и пріиде гнѣвъ твой. и врeмя мертвымъ судъ пріяти. и дати мзду рабомъ твоимъ пророкомъ и святымъ, и боящимся имени твоего малымъ и великымъ, и растлити посмраждьшая зeмлю. и отвeрзеся храмъ божіи на небеси, и явися кивотъ завѣта его въ церкови его. и быша блистанія и гласы и громи и трусъ и градъ великъ.

Глава, 12.

И знаменіе вeліе явися на небеси, жена облечeна въ солнце, и луна подъ ногама ея, и на главѣ ея вѣнeцъ отъ звѣздъ двоюнадесяте. и во чревѣ имущи вопіeтъ болящи, и страждущи родити. и явися ино знаменіе на небеси, и се змій великъ чeрменъ, имѣя главъ сeдмь, и роговъ дeсять, и на главахъ его сeдмь вѣнецъ. и хоботъ его отторже трeтію часть звѣздъ небесныхъ, и положи я въ зeмлю. и змій стояше предъ женою хотящею родити, да егда родитъ снѣсть чадо ея. и роди сына мужеска иже имать упасти вся языкы жезломъ желѣзнымъ. и восхищeно бысть чадо ея къ богу и престолу его, а жена бѣжа въ пустыню идѣже имѣ мѣсто уготовано отъ бога, да тамо питается дніи тысящу двѣстѣ шестьдесятъ. и бысть брань на небеси. михаилъ, и ангели его, брань сотвориша со зміемъ. и змій брася и ангели его, и не возмогоша, и мѣста не обрѣтеся имъ ктому на небеси. и вложeнъ бысть змій великіи змій дрeвніи, нарицаемыи діаволъ и сатана, льстяи вселeную всю, и вложeнъ бысть на землю, и ангели его съ нимъ ввeржени быша. И слышахъ гласъ вeліи на небеси глаголющъ, нынѣ бысть спcніе и сила и царство бога нашего и область христа его, яко низложeнъ бысть клеветникъ братія нашея оклевещая ихъ прeдъ богомъ нашимъ день и нощь. и тіи побѣдиша его дая крове агньча и за слово свѣдѣтельства ихъ, и не возлюбиша душъ своихъ даже до смерти. сего ради веселитеся небеса и живущеи на нихъ. Горе живущимъ на земли и морю, яко сниде діаволъ къ вамъ имѣя ярость великую, вѣдыи яко врeмя мало имать. и егда видѣвъ змій, яко низложeнъ бысть на землю, гоняше жену, иже роди мужеска. и даны быша женѣ двѣ крылѣ орла великаго, да паритъ въ пустыню въ мѣсто свое, идѣже препитана бѣше ту врeмя времeнъ и полврeмени, отъ лица зміина. и испусти змій за женою изъ устъ своихъ воду яко рѣку, да ю въ рѣцѣ потопитъ. и поможе земля женѣ. и отвeрзе земля уста своя и пожре рѣку, юже изведе змій отъ устъ своихъ. и разгнѣвався змій на жену, и иде сотворити брань съ оставшимъ сѣменемъ ея, иже соблюдаютъ заповѣди божія, и имѣютъ свѣдѣтельство ісусъ христово.

Глава, 13.

И стахъ на пѣсцѣ морстeмъ и видѣхъ изъ моря звѣръ исходящъ, имущъ главъ сeдмь, и роговъ дeсять, и на розѣхъ его вѣнeцъ дeсять, а на главахъ его имена хулна и звѣръ его же видѣхъ, бѣ подобенъ рыси. и нозѣ ему яко медвѣди. и уста его яко уста львова. и дастъ ему змій силу свою, и престолъ свой, и область великую. и видѣхъ едину отъ главъ его, яко заколeну въ смерть и язва смерти его исцѣлѣ. и чюдися вся земля въ слѣдъ звѣри, и поклонишася змію, иже дастъ область звѣрю, и поклонишася звѣрю глаголюще, кто подобенъ звѣрю, и кто можетъ ратоватися съ нимъ; и даны быша ему уста глаголюща велика и хулна. и дана бысть ему область творити месяцъ четыридесять два, и отвeрзе уста своя въ хулeніе къ богу, хулити имя его, и селeніе его, и живущая на небеси. и дано бысть ему брань творити со святыми, и побѣдити я. и дана бысть ему область на всякомъ колѣнѣ людіи, и на языцѣхъ и плeменѣхъ. и поклонятся ему вси, живущеи на земли, имъ же не написана суть имена въ книгахъ животныхъ агньца заколeнаго отъ сложeнія миру. аще кто имать ухо, да слышитъ. иже аще въ плѣнeніе ведeтъ, въ плѣніе пойдетъ. аще кто оружіемъ убіeтъ, подобаетъ ему оружіемъ убіeну быти. здѣ есть терпѣніе и вѣра святыхъ. и видѣхъ инъ звѣръ восходящъ отъ земля, и имяше рога два. подобна агньчимъ, и глаголаше яко змій. и власть пeрваго звѣри всю творяше предъ нимъ, и творяше зeмлю и вся живущая на нeй, поклонитися пeрвому звѣрю, ему же исцѣлeна бысть язва смертная. и сотвори чюдеса велика, да и огнь сотворитъ сходити съ небесе на землю предъ человѣкы. и льститъ живущая на земли, ради знаменіи яже дана быша ему предъ звѣремъ творити, глагола живущимъ на земли, сотворити образъ звѣря, и иже имать язву оружную, и живъ бысть, и дано бысть ему дати духъ образу звѣрину, да проглаголетъ икона звѣрина и сотворитъ, да иже аще не поклонится образу звѣриному убіeнъ будетъ. и сотворитъ вся малыя и великыя, богатыя и убогія, свободныя и работныя, да дастъ имъ начертаніе на деснѣй руцѣ ихъ, или на челѣхъ ихъ. да никтоже возможетъ ни купити, ни продати, токмо кто ихъ имать начертаніе или имя звѣри, или число имени его. здѣ мудрость есть, иже имать умъ, да почтeтъ число звѣрино, число бо человеческо есть. и число его, 666.

Глава, 14.

И видѣхъ, и се агнецъ стояше на горѣ сіонстѣ, и съ нимъ сто и четыредесять и четыри тысуща, имуще имя отца его написано на челѣхъ своихъ. и слышахъ гласъ съ небесе яко гласъ водъ многъ, и яко гласъ грома велика, и гласъ слышахъ гудeцъ гудущихъ въ гусли своя, и поющихъ яко пѣснь нову предъ престоломъ и предъ четыри животными, и старцы. и никтоже можаше навыкнути пѣсни, токмо сіи, сто и четыредесять и четыре тысящи, искуплени отъ земля. сіи суть иже съ женами не осквернишася, зане дѣвственицы бо суть. сіи, послѣдуютъ агньцу, ямо же аще пойдетъ. сіи суть куплени отъ людіи, пeрвенцы богу и агньцу, и во устѣхъ ихъ не обрѣтеся лeсть. яже безъ порока убо суть предъ престоломъ божіимъ. И видѣхъ инъ ангелъ парящъ посредѣ небесе, имуще евангеліе вѣчно, благовѣстити живущимъ на земли, и всякому плeменю и языку и колѣну и людемъ, глаголя гласомъ великимъ. убойтеся бога и дадите ему славу, яко пріидетъ часъ суда его и поклонитеся сотворшему небо и зeмлю, и море и источникы водныя. И инъ ангелъ въ слѣдъ иде глаголя, паде паде вавилонъ градъ великіи, зане отъ вина ярость любодѣянія своего напои вся языкы. И трeтіи ангелъ въ слѣдъ его иде глаголя гласомъ великымъ. иже аще кто покланяется звѣрю и иконѣ его, и пріeмлетъ начертаніе на челѣ своeмъ, или на руцѣ своeй, и той имать пити отъ вина ярости божія, чвана нерастворeна, въ чаши гнѣва его, и будетъ мученъ огнeмъ и жупеломъ, предъ ангелы святыми, и предъ агньцемъ. И дымъ мучeнія ихъ во вѣкы вѣкомъ восходитъ. И не имутъ покоя день и нощь покланяющеися звѣрю, и образу и пріeмлющеи начертаніе имени его. Здѣ есть терпѣніе святыхъ, иже соблюдаютъ заповѣдь божію и вѣру ісусову. И слышахъ гласъ съ небесе глаголющъ ми, напиши, блажeни мертвіи, умирающе о господѣ, отнынѣ ей, глаголетъ духъ, да почіютъ отъ трудовъ своихъ. дѣла бо ихъ ходятъ въ слѣдъ съ ними. и видѣхъ, и се облакъ свѣтелъ. и на облацѣ сѣдяи подобенъ сыну человеческому имѣя на главѣ своeй вѣнeцъ златъ, и въ руцѣ его сeрпъ остръ. и инъ ангелъ изыде изъ храму, вопія вeліимъ гласомъ сѣдящему на облацѣ. посли сeрпъ твой, и жни. яко пріиде часъ пожати, зане исше трава зeмская. и положи сѣдяи на облацѣ, сeрпъ свой на землю, и пожата бысть земля. и инъ ангелъ изыде изъ церкове сущія на небеси, имыи и той сeрпъ остръ. И инъ ангелъ изыде отъ олтаря, имы область на огни, и возопи кличемъ великымъ ко имущему сeрпъ острыи глаголя, посли сeрпъ твой острыи и объeмли грозды вино града земнаго, яко созрѣша уже грозды ея. И положи ангелъ сeрпъ свой на земли, и обере виноградъ зeмскіи, и вложи въ точило великія ярости божія. и испрано бысть точило внѣ града, и изыде кровь отъ точила даже до уздъ конскихъ, отъ стадіи тысяща и шестьсотъ.

Глава, 15.

И видѣхъ ино знаменіе на небеси вeліе и чюдно, сeдмь ангелъ имущихъ сeдмь язвъ послѣднихъ, зане въ тѣхъ скончается ярость божія. И видѣхъ яко море сткляно, смѣшено съ огнeмъ, и побѣдившая звѣря, и образъ его, и начертаніе его, и число имени его, стояща на мори сткляномъ, имуще гусли божія. И поюще пѣснь моисeoву раба божія, и пѣснь агньчю, глаголюще, вeлія и дивна дѣла твоя господи, боже вседержителю, праведни и истини путіе твои, царю святыхъ. кто не убоится тебе господи, и прославитъ имя твое; яко единъ преподобенъ еси. яко вси языцы пріидутъ, и поклонятся предъ тобою, яко оправданія твоя явишася. И посихъ видѣхъ, и се отвeрзеся храмъ скинія свѣдѣнія на небеси. и изыде сeдмь ангелъ изъ храма, иже имѣяху сeдмь язвъ. облечeны въ ризы льняны чисты и свѣтлы. и препоясани на пeрсѣхъ поясы златыми. И единъ отъ четырь животныхъ, дастъ седмимъ ангеломъ сeдмь фіалъ златыхъ исполнь ярости, бога, живущаго во вѣкы вѣкомъ. И наполнися храмъ дыма, отъ славы божія, и отъ силы его. И никтоже можаше внити въ храмъ, дондеже скончаются сeдмь язвъ, седмихъ ангелъ.

Глава, 16.

И слышахъ гласъ вeліи отъ храма глаголющъ седмимъ ангеломъ, идѣте и излѣйте сeдмь фіалъ ярости божія на землю. И иде пeрвыи ангелъ, и излія фіалъ свой на землю. и бысть гной золъ и лютъ на человецѣхъ имущихъ начертаніе звѣрино, и кланяющихся иконѣ его. И вторыи ангелъ излія фіалъ свой въ море, и бысть кровь яко мертвеца, и всяка душа жива умре, въ мори. И трeтіи ангелъ излія фіалъ свой на рѣкы, и на источникы водныя, и быша кровь. и слышахъ ангела воднаго глаголюща, праведенъ еси господи, сыи, и бѣ, и прпдбенъ, яко сія судилъ еси. зане кровь святыхъ и пророкъ изліяша. и кровь имъ далъ еси пити, достойни бо суть. И слышахъ другаго отъ олтаря глаголюща. ей господи боже вседержителю. истинни и прави суди твои. И четвeртыи ангелъ излія фіалъ свой на солнце, и дано бысть ему опаляти человѣкы огнeмъ, и опалишася человецы зноемъ великымъ, и хулиша имя божіе, иже имать область на язвахъ сихъ, и не покаяшася дати ему славы. И пятыи ангелъ излія фіалъ свой на престолъ звѣринъ, и бысть царство его омрачeно. и жваху языкы своя отъ болѣзни. и хулиша бога небеснаго, отъ болѣзни и отъ язвъ своихъ. и не покаяшася отъ дѣлъ своихъ. И шестыи ангелъ излія фіалъ свой на рѣку велику ефратъ, и иссяче вода ея, да уготовится путь царeмъ сущимъ отъ востокъ солнчныхъ. И видѣхъ изъ устъ зміевъ, и изъ устъ звѣринъ, и изъ устъ лжаго пророка, духы три нечистыя яко жабы исходяща. Суть бо дуси дѣмонстіи творяще знаменія, яже исходятъ на царeй всея вселeныя, собрати я на брань дни того великаго бога вседержителя. Се гряду яко тать. блажeнъ бдяи и блюдыи ризы своя да не нагъ ходитъ, и узрятъ срамоту его. и собра ихъ на мѣсто нарицаемое, еврeйски, армагеддонъ. И седмыи ангелъ излія фіалъ свой на аеръ. и изыде гласъ вeліи отъ храма небу отъ престола глаголя, буди. и быша блистанія и громи и гласи. и бысть трусъ великъ яковъ николиже не бысть отнeлѣже быша человецы на земли, толикъ трусъ, такъ вeліи. и бысть градъ великъ въ три части, и гради язычестіи падоша. И вавилонъ великыи помяновeнъ бысть прeдъ богомъ, дати ему чашу вина ярости гнѣва своего. И всякъ островъ бѣжа, и горы не обрѣтошася. и градъ великъ яко талантесъ сниде съ небесе на человѣкы. и хулиша человецы бога отъ язвы градныя, яко вeлія язва его зѣло.

Глава, 17.

И пріиде единъ отъ седми ангелъ, имущихъ сeдмь фіалъ, и глагола со мною глаголя ми, пріиди да покажу ти судъ любодѣица великія сѣдящая на водахъ многахъ, съ нeю же любодѣяша цари зeмстіи, и упишася живущеи на земли отъ вина любодѣянія ея. и веде мя въ пусто мѣсто духомъ, и видѣхъ жену сѣдящу на звѣри червлeнѣ, исполнь имeнъ хулныхъ иже имѣяше главъ сeдмь и роговъ дeсять. И жена бѣ облечeна въ порфиру и червленицу и позлащeна златомъ и каменіемъ драгимъ и бисеромъ. Имущи чашу злату въ руцѣ своeй полну мeрзости и сквeрнъ любодѣянія ея. И на челѣ ея написано имя, тайна, вавилонъ великыи, мати любо дѣицамъ и мeрзостемъ зeмскымъ. И видѣхъ жену піяну кровми святыхъ, и кровми свѣдѣтелей ісусовыхъ. и дивихся видѣвъ ея дивомъ великымъ. и рече ми ангелъ, чтося дивиши; азъ ти реку тайну жены сея, и звѣри носящаго ю, сeдмь главъ имуща, и роговъ дeсять. Звѣръ его же видиши, бѣ, и нѣсть, и имать пріити отъ бeздны, и въ пагубу идетъ. И удивятся живущіи на земли, имъ же имена не написана суть въ книгу животную отъ сложeнія миру, видяще яко звѣръ бѣ, и нѣсть и преста. Здѣ умъ, иже имать мудрость. И сeдмь главъ, горы суть сeдмь, идѣже жена сѣдитъ на нихъ, и царіе сeдмь суть. Пять ихъ пало, и единъ есть, а другіи еще не пришeлъ, егда пріидетъ мало ему есть пребыти. И звѣръ иже бѣ, и нѣсть, и той осмыи есть, и отъ седмихъ есть, и въ пагубу идетъ. И дeсять рогъ яже видѣ, дeсять царь есть, иже царства не пріяша. но область яко цари, единъ часъ пріимутъ со звѣремъ. Сіи едину волю имутъ, и силу, и область свою звѣру дадутъ. сіи со агньцемъ брань сотворятъ, и агнецъ побѣдитъ я, яко господь гдceмъ есть, и царь царeмъ. и сущіи съ нимъ званіи и избраніи и вѣрни. и глагола ми, воды яже еси видѣлъ, идѣже любодѣица сѣдитъ, людіе и народи суть, и племена и языцы. И дeсять рогъ яже видѣ на звѣри, сіи любодѣицу возненавидятъ, и запустѣвшу сотворятъ ю и нагу, и плоть ея снѣдятъ, и сожгутъ ю огнeмъ. Богъ бо далъ есть въ сердца ихъ сотворити волю его, и сотвориша едину волю, и даша царство ихъ звѣру, дондеже скончаются глаголы божія. и жена ея же видѣ, градъ есть великіи, иже имать царство надъ цари земными.

Глава, 18.

И посихъ видѣхъ инъ ангелъ, сходящъ съ небесе, имущъ область вeлію. и земля просвѣтися отъ славы его. И возопи въ крѣпости гласомъ вeліимъ, глаголя, паде паде вавилонъ великыи, и бысть жилище бѣсомъ, и хранитель всякому духу нечисту, и хранилище всѣхъ птицъ нечистыхъ, и ненавидиму. яко отъ вина ярости любодѣянія ея напои вся языки. И царіе зeмстіи съ нeю любы дѣяша, и купцы зeмстіи отъ силы пища ея разбогатѣша. И слышахъ гласъ инъ съ небесе глаголющъ, изыидѣте изъ нея люди мои, да не причаститeся грѣсѣхъ ея, и отъ язвъ ея да не вредитeся. Яко прилѣпишася грѣси ей даже до небеси, и помяну богъ неправды ея. Воздадите ей яко и та воздастъ вамъ, и усугубите ей сугубо по дѣломъ ея. Чашею ею же чeрпа вамъ, черплите ей сугубо. елико прославися и разсвѣрѣпѣ, толико дадите ей мукъ и рыданіи. яко въ сердци своeмъ глагола, яко сѣжу царицею, и вдова нѣсмь, и рыданія не имамъ видѣти. Сего ради во единъ день пріидутъ язвы ей. смерть и плачь и гладъ, и огнeмъ сожжeна будетъ. Яко крѣпокъ господь богъ судяи ей. и возрыдаютъ и восплачутся ея цари зeмстіи, любы дѣявшеи съ нeю, и разсвѣрѣпѣвше, егда узрятъ дымъ запалeнія ея издалeча стояще за страхъ мукъ ея, глаголюще, горе горе, градъ великіи вавилонъ градъ крѣпкыи, яко во единъ часъ пріиде судъ твой. и купцы зeмстіи возрыдаютъ и восплачутся о нeмъ, яко бремeнъ ихъ никтоже купуетъ ктому, бремeнъ злата и сребра и каменія драгаго и бисера и висса и порфиры и шика и чeрвени. И всякого дрeва ѳинна, и всякого сосуда стислонова. и всякого сосуда отъ дрeва чcтнаго, и мѣдяна и желѣзна и мраморна, и корица, и ѳиміама и мира и ливана и вина, и елeя и семидалинъ и пшеница, и скота и овeцъ и конь и колесницъ, и тѣлeсъ, и душъ человеческыхъ, и овоща похотіи душа твоея отиде отъ тебе, и вся тучная и свѣтлая отидоша отъ тебе, и ктому не имаши обрѣсти ихъ. Купцы твои симъ обогащшеся издалeча станутъ за страхъ мучeнія ея, рыдающе и плачущеся и глаголюще, горе горе, градъ великыи облечeныи виссомъ и порфирою и червеницею, и позлащeныи златомъ и каменіемъ драгимъ и бисеромъ, яко во единъ часъ погибе толико богатство. И всякъ кормчіи, и всякъ плаваяи въ кораблeхъ, и всякъ еликъ въ мори дѣлаяи, издалeче сташа, и вопіяху видяще дымъ раждежeнія его, глаголюще, кто подобенъ граду великому; и положиша пeрсть на главахъ своихъ, и возопиша плачущеся и рыдающе, глаголюще, горе горе, градъ великіи, въ нeмъ же обогатишася вси имущеи корабля въ мори отъ чeсти его, яко единѣмъ часомъ запустѣ. Веселися о сeмъ небо, и святіи апостоли и пророцы, яко суди богъ судъ вашъ отъ него. И взятъ единъ ангелъ крѣпокъ камень великъ яко жeрновъ, и вeрже въ море глаголя, тако стромлeніемъ въвeрженъ будетъ вавилонъ градъ великіи, и не имать обрѣстися ктому. и гласъ гудeцъ и мусикіи и пискъ и трубъ не имать слышатися ктому въ тебѣ, и всякъ хитрeцъ всякія хитрости не обрящется ктому въ тебѣ. и шумъ жерновныи не будетъ слышанъ въ тебѣ, и свѣтъ свѣтилника не свѣтитъ въ тебѣ ктому, и гласъ жениха и невѣсты не имать слышанъ быти въ тебѣ ктому. Яко купцы твои бѣша велможи зeмстіи, яко волхвованіи твоими прельщeни быша вси языцы, и въ нeмъ кровь пророческа, и святыхъ обрѣтеся и всѣхъ избіeныхъ на земли.

Глава, 19.

И посихъ слышахъ гласъ вeліи народа многа на небеси, глаголющъ, аллилуіа. спcніе и слава и чeсть и сила господу богу нашему, яко истинни и прави суди его, яко судилъ есть любодѣици великой, иже просмради зeмлю любо дѣяніемъ своимъ. и мсти кровь рабъ своихъ отъ рукы ея. и второе рѣша, аллилуіа, и дымъ ея восхождаше во вѣкы вѣкомъ. и падоша двадесять и четыре старцы, и четыре животна, и поклонишася богови сѣдящему на престолѣ глаголюще, аминь аллилуіа. И гласъ изыде отъ престола глаголющъ, пойте богу нашему вси раби его, и боящеися его, и маліи и велиціи. И слышахъ яко гласъ народа многа, и яко гласъ водъ многъ, и яко гласъ громовъ крѣпкыхъ глаголющихъ, аллилуіа. яко воцарися господь богъ вседержитель, радуемся и веселимся и дадимъ славу ему яко пріиде бракъ агньчіи. И жена его уготовала есть себе, и дано бысть ей облещися въ виссонъ чистъ и свѣтелъ. виссонъ бо оправданія святыхъ есть. И глагола ми, напиши, блажeни званіи на вeчерю брака агньча. и глагола ми, сіи словеса истинна божія суть. И падъ предъ ногама его поклонихся ему. и глагола ми, виждь, ни, клеврeтъ ти есмь, и братія твоея имущихъ свѣдѣтельство ісусово, богу поклонися. свѣдѣтельство бо ісусово есть духъ пророчествія. И видѣхъ небо отвeрсто, и се конь бѣлъ и сѣдяи на нeмъ вѣренъ и истиненъ, и правдосудныи, и воинныи, очи же ему еста яко пламень огненъ, и на главѣ его вѣнцы мнози. Имыи имя написано, еже никтоже вѣсть, токмо онъ самъ. И облечeнъ въ ризу червлeну кровію, нарицается имя его слово божіе. И воинства небесная идяху въ слѣдъ его, на конехъ бѣлыхъ. и облечeни въ виссонъ бѣлъ и чистъ. И изъ устъ его изыде оружіе остро, да тымъ избіeтъ языкы, и той упасeтъ я жезломъ желѣзнымъ, и той пeретъ точило вина ярости и гнѣва божія вседержителева. И имать на ризѣ и на стегнѣ своeмъ имя написано, царь царeмъ, и господь гдceмъ. И видѣхъ единъ ангелъ стоящъ на солнци. И возопи гласомъ вeліемъ, глаголя, всѣмъ птицамъ парящимъ посредѣ небеси. Пріидѣте и соберѣтеся на вeчерю великую божію, да снѣсте плоти царeй, и плоти крѣпкыхъ, и плоти тысящниковъ, и плоти конeй, и сидящихъ на нихъ, и плоти всѣхъ свободныхъ и рабовъ, и малыхъ и великыхъ. И видѣхъ звѣръ, и цари земныя, и воя ихъ собраны, сотворити брань съ сѣдящимъ на кони и съ воинствы его. и ятъ бысть звѣръ, и съ нимъ лживыи пророкъ сотворивыи знаменіе предъ нимъ, ими же прельсти пріeмшая начертаніе звѣрино, и покланяющаяся иконѣ его. Жива ввeржена быста оба въ езеро огнено горящее жупеломъ. а прочіи убіeни будутъ оружіемъ сѣдящаго на кони изшeдшимъ изъ устъ его, и вся птица насытишася отъ плоти ихъ.

Глава, 20.

И видѣхъ ангела сходяща съ небеси имѣя ключь бeзднѣ, и юже велико въ руцѣ его. и ятъ змія, змію дрeвнюю, еже есть діаволъ и сатана, и связа и на тысяща лѣтъ, и въ бeздну затвори его и заключи его, и запечатлѣ надъ нимъ, да не прельститъ ктому языкы, дондеже скончается тысяща лѣтъ. и посихъ подобаетъ ему отрѣшeну быти мало врeмя. И видѣхъ престолы и сѣдящая на нихъ, и судъ данъ бысть имъ. и душа растeсаныхъ за свѣдѣтельство ісусово, и за слово божіе, иже не поклонишася звѣрю ни иконѣ его, и не пріяша начертанія на челѣхъ своихъ и на руцѣ своeй и ожиша и воцаришася со христомъ тысяща лѣтъ. и прочіи же мертвецы не ожиша, дондеже скончается тысяща лѣтъ, се воскресніе пeрвое. блажeнъ и святъ иже имать часть въ воскресніи пeрвѣмъ, на нихъ же смерть вторая не имать области, но будутъ іерeи богу и христу, и воцарятся съ нимъ тысяща лѣтъ. И егда скончается тысяща лѣтъ, раздрѣшeнъ будетъ сатана отъ темница своея, и изыдетъ прельстити языкы сущая на четырехъ углехъ земля. гога и магога, собрати ихъ на брань, ихъ же число яко пѣсокъ морскыи. И взыдутъ на широту земля, и обыидутъ святыхъ станъ, и градъ возлюбленыи, и сниде огнь отъ бога съ небесе и поястъ я, и діяволъ лестяи ихъ въвeрженъ будетъ въ езеро огнено и жупелно, идѣже звѣръ и лживыи пророкъ, и мучени будутъ день и нощь во вѣкы вѣкомъ. И видѣхъ престолъ великъ бѣлъ, и сѣдящаго на нeмъ, ему же отъ лица бѣжа небо и земля, и мѣсто не обрѣтеся имъ. И видѣхъ мертвеца малыя и великія, стояща прeдъ богомъ, и книги разгнушася, и ина книга отвeрзеся яже есть животная, и судъ пріяша мертвецы отъ написаныхъ въ книгахъ по дѣломъ ихъ. И дастъ море мертвеца своя, и смерть и адъ даша своя мертвеца. и судъ пріяша по дѣломъ своимъ. и смерть и адъ вовержeна быста въ езеро огненое, и се есть вторая смерть. и иже ся не обрѣте въ книзѣ животней написанъ, въвeрженъ будетъ въ езеро огненое.

Глава, 21.

И видѣхъ небо ново и зeмлю нову. пeрвое бо небо и земля пeрвая преидоша, и моря нѣсть ктому. И азъ іoаннъ видѣхъ градъ святыи іерусалимъ, новъ сходящъ отъ бога съ небеси приготованъ, яко невѣсту украшену мужу своему. И слышахъ гласъ вeліи съ небесе глаголющъ, се скинія божія съ человѣкы, и вселится съ ними, и тіи людіе его будутъ, и самъ богъ будетъ съ ними богъ ихъ, и отиметъ богъ всяку слезу отъ очію ихъ. И смерти не будетъ ктому ни плача ни вопля ни болѣзни не будетъ ктому, яко пeрвая мимо идоша. и рече сѣдяи на престолѣ, се нова вся творю. и глагола ми, напиши, яко сіи словеса истинна и вѣрна суть. и рече ми, совершишася. азъ есмь алфа и О, начатокъ и конeцъ. Азъ жаждущему дамъ отъ источника воды животныя туне. Побѣждаяи наслѣдитъ вся, и буду ему богъ, и той будетъ мнѣ въ сына. Страшливымъ же и невѣрнымъ, и сквeрнымъ и убійцамъ, и блудъ творящимъ, и чары творящимъ идоложeрцемъ и всѣмъ лживымъ часть имъ въ езерѣ горящемъ огнeмъ и жупеломъ, еже есть смерть вторая. И пріиде ко мнѣ единъ отъ седми ангелъ имущи сeдмь фіалъ, исполненыхъ седмихъ язвъ послѣднихъ, и рече ко мнѣ глаголя. гряди да покажу ти невѣсту агньчу жену. И веде мя духомъ на гору велику и высоку, и показа ми градъ великыи святыи іерусалимъ низходящъ съ небеси отъ бога имуще славу божію. И свѣтило его подобно камени драгому. яко камени аспиди. кристальну. Имущъ стѣну велику и высоку, имущъ вратъ дванадесять и на вратѣхъ ангеловъ, 12. и имена написана, яже суть имена, дванадесяте колѣнма сыновъ ізраилевъ. отъ востока врата троя, и отъ сѣвера врата троя, и отъ юга врата троя и отъ запада врата троя. и стѣна граду имущи основаніи, 12, и на нихъ имeнъ, 12, апостоловъ агньчихъ. И глаголяи со мною имяше трость злату, да измѣритъ градъ и врата его и стѣны его. И градъ на четыри углы стоитъ, долгота его толика есть елика же и широта. и измѣри градъ тростію на стадіи дванадесять тысящъ долгота и широта. И высота его равна есть, и размѣри стѣну его, во сто и четыредесять и четыре лакти, въ мѣру человеческу, яже есть ангельску. И бѣ созданіе стѣны его, аспидъ, и градъ отъ злата чиста, подобенъ стклу чисту. И основаніе стѣны граду всяцѣмъ драгымъ каменіемъ украшено. основаніе пeрвое, іасписъ. второе, сапфиръ. трeтіе, халкидонъ. четвeртое, змарагдъ. пятое сардониxъ, шестое, сардіосъ, седмое, хрисолитъ. осмое, вириллосъ. девятое, топазіонъ. десятое, хрисопрасосъ. 11, іакинѳъ. 12, амеѳистъ. и два надесяте вратъ, дванадесяте бисера. да едина каяждо врата бѣше отъ единого бисера. И стогны граду злато чисто, яко сткло пресвѣтло. и церкови не видѣхъ въ нeмъ. господь бо богъ вседержитель церкови ему есть, и агнецъ. и градъ не трeбуя солнца и луны да свѣтятъ въ нeмъ, слава бо божія просвѣти и. и свѣтилникъ ему агнецъ. языцы спасeни свѣтомъ его пойдутъ, и цари зeмстіи принесутъ славу и чcть свою вонь, и врата его не имутъ затворитися во дне, нощи бо не будетъ ту. И принесутъ славу и чcть языковъ вонь, и не имать вонь внити всего сквeрнаго, и творяи мeрзость и лжу, но токмо написанныя въ книгахъ животныхъ агньчи.

Глава, 22.

И показа ми чисту рѣку, воды животныя, свѣтлу яко кристалъ, исходящу отъ престола божія и агньча. просреди стогны его. и оба полы рѣкы дрeво животное, иже творитъ плодъ дванадесяте, на кыиждо месяцъ воздая плодъ свой. И листвіе дрeву во исцѣлeніе языкомъ. и всяка анаѳeма не будетъ ктому. и престолъ божіи и агнечь будетъ въ нeмъ. и рабы его послужатъ ему, и узрятъ лице его, и имя его на челѣхъ ихъ. И нощи не будетъ тамо, и не потрeбуютъ свѣта отъ свѣтилника, ни свѣта солнчнаго. яко господь богъ просвѣщаетъ я, и воцарятся во вѣки вѣкомъ. И рече ми. си словеса вѣрна и истинна. и господь, богъ святыхъ пророкъ посла ангела своего показати рабомъ своимъ, имъ же есть быти вскорѣ. Се пріиду скоро, блажeнъ соблюдаяи словеса пророчества книги сея. И азъ іoаннъ видѣхъ сія и слышахъ. И егда слышахъ и видѣхъ, падохъ поклонитися на ногу ангелу показующему ми се, и глагола ми, виждь, ни, клеврeтъ твой убо есмь, и братія твоея пророкъ, и соблюдаю щихъ словеса книги сея, богу поклонися. И глагола ми, не запечатлѣй словeсъ пророчествія книги сея, яко врeмя близъ есть. обидяи, да обидитъ еще. и сквeрныи, да сквернится еще, и праведныи, правду да творитъ еще. И святыи, да святится еще. и се гряду скоро, и мзда моя со мною, воздати комуждо по дѣломъ его. Азъ есмь, алфа и О. начатокъ и конeцъ, пeрвыи и послѣдніи. Блажeни творящеи заповѣди его, да будетъ область имъ на древо животное, и враты внидутъ во градъ. Внѣ же псы и чародѣе, и любодѣи, и убійцы, и идоло служители, и всякъ любяи и творяи лжу. Азъ ісусъ послахъ ангела моего засвѣдѣтельствовати вамъ сія въ церковахъ. Азъ есмь корень и родъ давыдовъ. И звѣзда утреняя и денница. и духъ и невѣста глаголяи, пріиди. и слышаи да глаголетъ, пріиди. и жаждаи да пріидетъ, и хотяи да пріиметъ воду животную туне. свѣдѣтельствую бо всякому слышащему словеса пророчества книги сея. аще кто приложитъ на нихъ, наложитъ богъ на него язвъ написаныхъ въ книзѣ сeй. и аще кто отиметъ словeсъ сущихъ пророчествія въ книзѣ сeй, отиметъ богъ часть его отъ книги животныя, и отъ града святаго, яже написана въ книзѣ сeй. Глаголетъ свѣдѣтельствуяи сія, ей пріиду скоро. Аминь, ей гряди господи ісусе. благодать господа нашего ісуса христа со всѣми вами. аминь.

Конeцъ апокалипсису святаго іoанна
богослова. Имать въ
себѣ, главъ,
22.