Къ Тимоѳeю посланіе святаго апостола Павла, 2.

1 2 3 4

Глава, 1.

Зач., 290. Павелъ посланникъ ісусъ христовъ, волею божіею, по обѣтованію жизни, яже о христѣ ісусѣ. тимоѳeю возлюбленному чаду, благодать милость, и миръ отъ бога отца и христа ісуса господа нашего.

Зач.* Благодарю бога, ему же служу отъ прародителей, чистою совѣстію, яко непрестанную имамъ о тебѣ память въ молитвахъ моихъ день и нощь, желая видѣти тя, поминая слeзы твоя, да радости исполнюся, воспоминаніе пріeмля о сущей въ тебѣ нелицемѣрней вѣрѣ, яже вселися прeжде въ бабу твою лоиду, и въ матерь твою евникію. уповаю же яко и въ тебѣ, ея же ради вины воспоминаю тебѣ возгрѣвати даръ божіи, живущіи въ тебѣ, возложeніемъ руку моeю. Нѣсть бо намъ далъ богъ духъ страха, но силы и любве и цѣломудрія.

Зач., 291.* Не постыдися убо святію господа нашего ісуса христа, ни мною юзникомъ его, но постражи благовѣствованію христову, по силѣ бога спасшаго насъ, и призвавшаго званіемъ святымъ, не по дѣломъ нашимъ, но по своему благоволeнію, и благодати даннѣй намъ о христѣ ісусѣ прeжде лѣтъ вѣчныхъ, явльшижеся нынѣ просвѣщeніемъ спасителя нашего ісуса христа. Разрушившаго убо смерть, и восіявшаго жизнь и нетлѣніе благовѣствованіемъ, въ нeже поставленъ быхъ азъ проповѣдникъ и апостолъ, и учитель языкомъ. Ея же ради вины сія стражу, но не постыжуся. вѣмъ бо ему же вѣровахъ, и извѣстихся яко силенъ есть преданіе мое сохранити въ день онъ. образъ имѣй здравыхъ словeсъ, ихъ же отъ мене слышалъ еси въ вѣрѣ и любви яже о христѣ ісусѣ. доброе завѣщаніе соблюди, духомъ святымъ, живущимъ въ насъ. Вѣси ли сіе, яко отвратишася отъ мене вси иже отъ асіи, отъ нихъ же есть фигeлъ и ермогeнъ. да дастъ же милость господь онисифорову дому, яко многажды мя упокои, и веригъ моихъ не устыдѣся, но пришeдъ въ римъ, тощнѣе взыска мя, и обрѣте. да дастъ ему богъ обрѣсти милость отъ господа въ день онъ. и елико во ефeсѣ послужи ми добрѣ ты вѣси.

Глава, 2.

Зач., 292. Ты убо чадо мое тимоѳeе, возмогай о благодати, яже о христѣ ісусѣ. и яже слыша отъ мене, многими свѣдѣтели, сія предаждь вѣрнымъ человѣкомъ, иже доволни будутъ и иныхъ научити. Ты убо постражи яко добръ воинъ ісусъ христовъ. никтоже бо воинъ бывая обязается куплями житeйскими, да воеводѣ угоденъ будетъ. Аще же и постражетъ кто, не вѣнчается, аще незаконно мученъ будетъ. Тружающемуся дѣлателю прeжде подобаетъ отъ плода вкусити. Разумѣй яже глаголю. дастъ бо тебѣ господь разумъ о всeмъ. Поминай господа ісуса христа воставшаго отъ мертвыхъ, отъ сѣмене давыдова, по благовѣствованію моему, въ нeмъ же зло стражу до узъ яко злодѣй, но слово божіе не вяжется. Сего ради вся терплю избранныхъ ради, да и ти спcніе улучатъ, еже о христѣ ісусѣ со славою вѣчною.

Зач., 293.* Вѣрно слово. аще бо съ нимъ умрохомъ, то убо и съ нимъ оживeмъ. Аще терпимъ, то и съ нимъ царствуемъ. аще отвeржемся, и той отвeржется насъ. Аще не вѣруемъ, онъ вѣренъ пребываетъ, отврещибося себе не можетъ. Сія воспоминай засвѣдѣтельствуя прeдъ богомъ. не словесы прѣтися ни на кую же потрeбу, точію на разорeніе слышащимъ. Потщися себе искусна поставити прeдъ богомъ, дѣлателя непостыдна, правяща слово истинное. Сквeрныхъ же тщегласіи отмѣтайся, наипаче бо преспѣютъ въ нечeстіе. и слово ихъ яко гаггрѣна егда жиръ обрящетъ. отъ нихъ же есть именeй и филитъ, иже о истиннѣ погрѣшиста, глаголюще яко воскресeніе уже бысть, и возмущаютъ нѣкоторымъ вѣру. Твeрдое же основаніе божіе стоитъ имыи печать сію, позна господь сущая его, и да отступитъ отъ неправды всякъ именуяи имя господне.

Зач., 294.* Въ велицѣ же дому, нѣсть точію сосуди злати и срeбрени, но и дрeвяни и глинни, и ови убо въ чeсть, ови же нe въ честь. аще же кто очиститъ себе отъ сихъ, будетъ сосудъ въ чeсть освященъ, и благопотрeбенъ владыцѣ, на всяко дѣло благоуготованъ. Похотей юныхъ бѣгай, держижеся правды, вѣры, любве, мира, со всѣми призы вающими господа отъ чистаго сердца. буихъ же и ненаказаныхъ стязаніи отрицайся, вѣдыи яко ражаютъ свары. рабу же господню не подобаетъ сваритися, но тиху быти ко всѣмъ, учителну, незлобиву, съ кротостію наказующу противныя, еда како дастъ имъ богъ покаяніе въ разумъ истины, и возникнутъ отъ діавольскія сѣти, живы уловлeны отъ него въ свою его волю.

Глава, 3.

Зач., 295.* Сіe же вѣждь, яко въ послѣдняя дни настанутъ времена люта. будутъ бо человецы самолюбцы, сребролюбцы, величави, горди, хулницы, родителемъ противящеся, неблагодарни, неправедни, нелюбовни, непримирителни, продeрзиви, возносливи. прелагатае, клеветники, невоз дeржницы, некротецы, неблаголюбцы, предателе, нагли, напыщeни, сластолюбцы паче, нeжели боголюбцы. имуще образъ благочeстія, силы же его отвeргшеся. и сихъ отвращайся. отъ сихъ бо суть поныряющеи въ домы, и плѣняюще женишца собраны грѣхи, и водима похотьми различными, всегда учащася, и николиже въ разумъ истинныи пріити могуща. яко же іанній и амврій противистася моисeю, тако же и сіи противляются истинѣ, человецы растлѣни умомъ, и неискусни о вѣрѣ, но не преуспѣютъ паче на мнозѣ, безуміе бо ихъ, явлeно будетъ всѣмъ, яко же и онѣхъ бысть.

Зач., 296.* Ты же послѣдовалъ ми еси учeнію, житію, привѣту, вѣрѣ, долготерпѣнію, любви, терпѣнію, изгна ніемъ, страданіемъ, якова же ми быша во антіoхіи, и во иконіи, и въ листрехъ. и якова изгнанія пріяхъ и отъ всѣхъ мя избавилъ есть господь. и вси хотящеи благо вѣрно жити о христѣ ісусѣ гоними будутъ. лукавіи же человецы, и чародѣе преуспѣютъ на горшее, прельщающе и прельщаеми. Ты же пребывай въ нихъ же научeнъ еси и вѣренъ бысть, вѣдыи отъ кого научился. и яко измлада священная писанія умѣеши, могущая тя умудрити во спcніе, вѣрою яже о христѣ ісусѣ.

Зач., 297.* Всяко писаніе богодухновeно и полeзно есть, ко учeнію, ко обличeнію, ко исправлeнію, къ наказанію еже въ правду, да совершeнъ будетъ божіи человѣкъ, на всяко дѣло благоуготованъ.

Глава, 4.

Засвѣдѣтельствую же азъ прeдъ богомъ и господемъ нашимъ ісусъ христомъ, хотящимъ судити живымъ и мeртвымъ, въ явлeніи его и царствіи его, проповѣдуй слово, настой, понуди, благовремeннѣ и безвремeннѣ. обличи, запрѣти, умоли, со всякимъ долготерпѣніемъ и учeніемъ. Будетъ бо врeмя, егда здраваго учeнія не послушаютъ. но по своихъ похотѣхъ изберутъ себѣ учителя чeшеми слухомъ, и отъ истинны слухъ отвратятъ, и къ баснемъ уклонятся.

Зач., 298.* Ты же трезвися о всeмъ, зло постражи, дѣло сотвори благовѣстника. служeніе свое извѣстно сотвори. Азъ бо уже жрeнъ бываю, и врeмя моего отшeствія наста. подвигомъ добрымъ подвизахся. течeніе скончахъ, вѣру соблюдохъ. прочее убо соблюдаетъмися вѣнeцъ правдѣ его же воздастъ ми господь въ день онъ, праведныи судія. не токмо же мнѣ, но и всѣмъ возлюбльшимъ явлeніе его.

Зач., 299.* Потщися скоро пріити ко мнѣ. димасъ бо мене остави возлюбивъ нынѣшніи вѣкъ, и иде въ солунь. криспъ въ галатію. Титъ въ далматію. лука единъ есть со мною. марка поeмъ приведи съ собою, есть бо ми благопотрeбенъ въ службу. тихика же послахъ во ефeсъ. фелонь его же оставихъ въ троадѣ у карпа, грядыи принеси, и книги, паче же кожныя. алеxандръ ковачь многа ми зла сотвори, да воздастъ ему господь по дѣломъ его, отъ него же и ты себе блюди, зѣло бо противится словесeмъ нашимъ. въ пeрвыи мой отвѣтъ никтоже пріиде со мною, но вси мя оставиша. и да не вмѣнится имъ. господь же мнѣ предста, и укрѣпи мя, да мною проповѣданіе извѣстно будетъ, и услышатъ вси языцы. и избавленъ быхъ отъ устъ львовъ. и избавитъ мя господь отъ всякаго дѣла лукава, и спасeтъ во царствіи своeмъ небeснѣмъ, ему же слава во вѣкы вѣкомъ, аминь. цѣлуй прискиллу и акила, и онисифоровъ домъ. ерастъ оста въ коринѳѣ, трофима же оставихъ въ милитѣ боляща. потщися прeжде зимы пріити. цѣлуютъ тя еввулъ, и пудъ. и линъ и клавдіе, и братія вся. господь ісусъ христосъ со духомъ твоимъ. благодать со всѣми вами аминь.

Конeцъ второму посланію иже
къ тимоѳeю, святаго апостола
павла. Имать въ
себѣ, главъ, 4,
а зачалъ
церков
ных,
10.