Къ филипписіoмъ посланіе святаго апостола Павла

1 2 3 4

Глава, 1.

Зач., 235. Павелъ и тимоѳeй, раби ісусъ христови, всѣмъ святымъ о христѣ ісусѣ, сущимъ въ филипписіихъ со епcкопы и діаконы. благодать вамъ и миръ, отъ бога отца нашего, и господа ісуса христа. благодарю бога моего о всeй памяти вашей, всегда во всякой молитвѣ моeй за всѣхъ васъ. съ радостію молитву мою творю о общeніи вашемъ въ благовѣствованіе, отъ пeрваго дне даже и до нынѣ, надѣявся сіе истое, яко начныи въ васъ дѣло благо, и совершитъ е даже до дне ісусъ христова. яко же есть праведно мнѣ сіе мудрствовати о всѣхъ васъ, за еже имѣти ми въ сердцы васъ во узахъ моихъ и въ отвѣтѣ, и извѣщeніи благовѣстія, сообѣщники ми благодати всѣхъ васъ сущихъ.

Зач., 236.* Свѣдѣтель бо ми есть богъ, яко люблю всѣхъ васъ по милости ісусъ христовѣ, и о сeмъ молюся, да любовь ваша еще паче и паче избыточествуетъ, въ разумѣ, и во всякомъ чювствіи, во еже искушати вамъ лучшая, да будете чисти и непреткновeни въ день христовъ, исполнени плодовъ правды ісусъ христомъ, въ славу и похвалу божію.

Зач., 237.* Разумѣти же васъ хощу братіе, яко яже о мнѣ, паче въ спѣхъ благовѣствованію пріидоша. яко же узамъ моимъ явлeнѣмъ о христѣ бывшимъ во всeмъ судищи, и въ прочихъ всѣхъ и множайшимъ братіямъ о господѣ, надѣявшимся о узахъ моихъ паче дерзати безъ страха слово божіе глаголати. Нѣцыи убо по зависти и рeвности. друзіи же и за благоволeніе христа проповѣдуютъ. овы убо отъ рвeнія христа возвѣщаютъ нечистѣ, мняще печаль нанести узамъ моимъ. овы же отъ любве, вѣдяще яко въ отвѣтѣ благовѣствованія лежу. что убо; обаче всяцѣмъ образомъ, аще виною, аще истинною, христосъ проповѣдаемъ есть и о сeмъ радуюся, но и возрадуюся. вѣмъ бо яко сіе ми сбудется во спасeніе вашею молитвою, и по поданію духа ісусъ христова, по чаянію и упованію моему.

Зач., 238.* Яко ни о единомъ постыжуся, но во всякомъ дерзновeніи, яко же всегда. И нынѣ возвеличится христосъ въ тѣлѣ моeмъ, аще животомъ, аще ли смeртію. мнѣ бо еже жити, христосъ. и еже умрети, пріобрѣтеніе есть. аще ли еже жити ми тѣломъ, сіе ми плодъ дѣлу, но что изволю не вѣмъ. обдержимъ же есмь отъ обою. желаніе имыи разрѣшитися, и со христомъ быти много паче лучше. а еже пребывати въ плоти, нужнѣйше есть васъ ради. и сіе извѣстнѣ вѣмъ яко буду и съ пребуду всѣмъ вамъ въ вашъ успѣхъ и радость вѣрѣ, яко да похвала ваша избыточествуетъ о христѣ ісусѣ во мнѣ, моимъ пришeствіемъ паки къ вамъ.

Зач., 239.* Точію достойнѣ благовѣствованію христову живѣте, да аще пришeдъ и видѣвъ васъ, аще ли кромѣ сыи, услышу яже о васъ, яко истиною стоите во единомъ дусѣ, и единодушнѣ, сподвизающеся по вѣрѣ благовѣствованія волею, и неколѣбящеся ни о единомъ же отъ сопротивныхъ, яже тѣмъ убо есть явлeніе погибели. вамъ же спасeнію. и сіе отъ бога, яко вамъ даровася еже о христѣ, не токмо еже въ него вѣровати, но и еже по нeмъ страдати, той же подвигъ имуще, яковъ же видѣсте во мнѣ, и нынѣ слышите о мнѣ.

Глава, 2.

Аще убо кое утѣшeніе и умолeніе о христѣ, или аще кое утвержeніе любве, аще нѣкое общeніе духу, аще кое милосердіе и щедроты, исполните мою радость, да тоже мудрствуйте, туже любовь имуще, единодушни, единомудрени. Ни едино же что по рвeнію, или по тщеславію, но смиреномудріемъ другъ друга непщующе преимѣюща себе, не своихъ си кождо блюдуще, но дружняго которыиждо сматряите.

Зач., 240.* Сіe же да мудрствуется въ васъ, еже о христѣ ісусѣ, иже во образѣ божіи сыи, не восхищeніемъ непщева быти равенъ богу, но себе умалилъ, зракъ раба пріимъ, въ подобіи человечестѣмъ бывъ, и образомъ обрѣтеся яко же человѣкъ. смирилъ себе, бывъ послушливъ даже до смерти, смерти же крестнѣй. тѣмъ же и богъ его превознесе и дарова ему имя, еже паче всякого имене. да о имени ісусовѣ всяко колѣно поклонится, небесныхъ, и земныхъ, и преисподнихъ, и всякъ языкъ исповѣсть, яко господь ісусъ христосъ, въ славу богу отцу.

Зач., 241.* Тѣмъ же братія моя, яко же всегда послушасте мене. не яко же въ пришeствіи моeмъ точію, но и нынѣ много паче въ отшeствіи моeмъ, со страхомъ и трeпетомъ свое спасeніе содѣвайте. богъ бо есть дѣйствуяи въ васъ, и еже хотѣти и еже дѣяти о благоволeніи. Вся творите безъ роптанія и размышлeнія, да будете непорочни и цѣли, и чада божія непорочна, посредѣ рода строптива и развращeна, въ нихъ же являетеся яко же свѣтила въ мирѣ, слово животно предержаще, въ похвалу мнѣ въ день христовъ.

Зач., 242.* Яко не вотще текохъ, ни вотще трудихся. но аще и жрeнъ бываю, о жeртвѣ и службѣ вѣры вашея, радуюся, и срадуюся всѣми вами. Такожде и вы радуйтеся, и срадуйтемися. Уповаю же о господѣ ісусѣ, тимоѳeя вскорѣ послати къ вамъ. да и азъ веселую, увѣдѣвъ разумно яже о васъ. Ни единаго бо имамъ равнодушна, иже прилѣжнѣ о васъ печeтся. вси бо своихъ си ищутъ, а не яже христа ісуса. искуство же его знаете, зане яко же отцу чадо, со мною поработалъ въ благовѣстіи. Сего же убо уповаю послати, абіе по внегда увѣмъ яже о мнѣ.

Зач., 243.* Надѣюжеся о господѣ, яко и самъ скоро пріиду къ вамъ. потрeбнѣе же возмнихъ, епафродита брата и споспѣшника и своиствeна мнѣ, вашего же посланника и служителя потрeбѣ моeй, послати къ вамъ. Понeже желаніемъ желаше видѣти всѣхъ васъ и тужа, зане слышасте яко болѣ. ибо болѣ близъ смeрти, но богъ помилова его, не его же токмо, но и мене, да не скорбь на скорбь пріиму. скорѣе убо послахъ его, да видѣвше его паки возрадуетеся, и азъ безпечаленъ пребуду. Пріимѣте убо его о господѣ со всякою радостію, и таковыя честныхъ имѣйте, зане за дѣло христово до смерти приближися, понудивъ себе вседушно, да исполнитъ ваше лишeніе, еже къ моeй службѣ.

Глава, 3.

Зач., 244. Прочее же братія моя, радуйтеся о господѣ. тая же бо писати вамъ, мнѣ убо не лѣностно, вамъ же твeрдо. блюдѣтеся отъ псовъ, блюдѣтеся отъ злыхъ дѣлателей, блюдѣтеся отсѣчeнія невѣрныхъ. мы бо есмы обрѣзаніе, иже богу духомъ служимъ. и хвалимся о христѣ ісусѣ, а не въ плоть надѣемся, ибо и азъ надѣяніе имѣю въ плоти, аще кто инъ мнитъ надѣятися въ плоти, азъ паче, обрѣзаніе осмоднeвное, отъ рода ізраилева, колѣна веніаминова, еврeинъ отъ еврeехъ. по закону фарисeй, по рeвности гонихъ церковь божію, по правдѣ законнѣй бывъ непороченъ. но яже ми бяху пріобрѣтeнія, сія вмѣнихъ христа ради тщету. но убо и мню вся тщету быти, за превосходящее разума христа ісуса господа нашего.

Зач., 245.* Его же ради всѣхъ отщетихся, и мню вся умeты быти да христа пріобрящу, и обрящуся о нeмъ не имыи моея правды яже отъ закона. но вѣрою ісусъ христовою, сущую отъ бога правду, надъ вѣрою яко разумѣти его, и силу воскресeнія его, и сообщeніе страстeй его, сообразуяся смерти его, аще како доиду въ воскресeніе мертвыхъ. не зане уже достигохъ, или уже совершихся. гоню же, аще и постигну, о нeмъ же и постиженъ быхъ отъ христа ісуса. Братіе, азъ себе не у помышляю достигнути. едино же, заднихъ убо забывая въ прeдняя же простираяся, со усeрдіемъ гоню, къ почести вышняго званія божія о христѣ ісусѣ. Елицы убо совершeни, сіе да мудрствуимъ. и еже аще ино что мыслите, и сіе богъ вамъ открыетъ. обаче въ нeже достигохомъ, тоже мудрствовати, и тѣмъ же правиломъ жительствовати, подобни ми бывайте братіе, и сматряйте не тако ходящая, яко же имате образъ насъ. мнози бо ходятъ, ихъ же многажды глаголахъ вамъ, нынѣ же и плача глаголю, враги креста христова, имъ же кончина, погибель. имъ же богъ чрeво, и слава въ студъ ихъ, иже земная мудрствующе.

Зач., 246.* Наше бо житіе на небесѣхъ есть, отнуду же и спасителя ждeмъ господа нашего ісуса христа, иже преобразитъ тѣло смирeнія нашего, яко быти сему сообразну тѣлу славѣ его, по дѣйству еже возмогати ему, и покорити себѣ всяческая.

Глава, 4.

Тѣмъ же братія моя возлюбленная, и вожделѣнная, радость и вѣнeцъ мой, тако стойте о господѣ возлюбленіи. евводію молю, и синтихію молю, тоже мудрствовати о господѣ. Ей молю и тебе супружниче присныи, споспѣшь ствуй имъ яже въ благовѣствованіи сподвизашася со мною, и съ климентомъ, и съ прочими споспѣшники моими, ихъ же имена въ книгахъ животныхъ.

Зач., 247.* Радуйтеся всегда о господѣ, и паки реку радуйтеся. кротость ваша разумна да есть всѣмъ человѣкомъ. господь близъ, ничтоже печeтеся, но во всeмъ молитвою и молeніемъ съ благодарeніемъ прошeнія ваша да сказуются къ богу. и миръ божіи превосходяи всякаго ума, да соблюдаетъ сердца ваша и разумѣнія ваша о христѣ ісусѣ. Прочее же братіе моя, елика суть истинна, елика чcтна, елика праведна, елика пречcта и елика прелюбeзна, елика доброхвальна, аще кая добродѣтель, и аще кая похвала, сія помышляйте, яже и научистеся, и пріясте, и слышасте, и видѣсте во мнѣ, сія творите, и богъ мира да есть съ вами.

Зач., 248.* Возрадовахъжеся о господѣ велми, яко уже когоспода воспомянусте пещися о мнѣ, понeже и печастеся, но не по годнымъ врeменемъ, обдержистеся. Не яко по скудости глаголю. азъ бо навыкохъ въ нихъ же есмь, доволенъ быти. Вѣмъ и смиритися, вѣмъ и избыточе ствовати. во всeмъ и во всѣхъ. навыкохъ, и насыщатися и алкати, и избыточествовати, и лишатися. вся могу о укрѣпляющемъ мя ісусѣ христѣ. обаче добрѣ сотвористе спріобщившеся печали моeй. вѣсте же и вы филип писіане, яко въ началѣ благовѣствованія егда изыдохъ отъ македоніи, ни едина же ми церковь общевася въ слово даянія и пріятія, точію вы едини. яко и въ селуни, и единою и дващи въ требованіе мое посласте ми. не яко ищу даянія, но ищу плода множащагося въ славу вашу. пріяхъ же вся и избыточествую. и исполнихся пріeмъ отъ епафродита посланія отъ васъ, воню благоуханія, жeртву пріятну благоугодну богу. богъ же мой да исполнитъ всяко требованіе ваше, по богатству своему славою, о христѣ ісусѣ. богу же и отцу нашему слава, во вѣки вѣкомъ аминь. цѣлуйте всякаго свята о христѣ ісусѣ. цѣлуютъ вы сущая со мною братія. цѣлуютъ вы вси святіи, паче же иже отъ кесарeва дому. Благодать господа нашего ісуса христа со всѣми вами аминь.

Конeцъ, посланію филипписійскому. 
Имать въ себѣ главъ, 4. 
а зачалъ церковныхъ 
14.