Соборное посланіе Іюдино

Глава, 1.

Зач., 77. Іуда ісусу христу рабъ, братъ же іакову. Сущимъ о бозѣ отеци освященнымъ, ісусъ христомъ соблюдeнымъ, званымъ, милость вамъ и миръ и любы да умножится. Возлюбленіи, всяко тщаніе творя писати вамъ, о общемъ спасeніи вашемъ, нужда ми бысть писати вамъ, моля подвизатися о преданнѣй вѣрѣ святымъ единою. привнидоша бо нѣцыи человецы, иже дрeвле предуставлени на сіе осуждeніе нечeстія. бога нашего благодать прелагающе въ сквeрну. и единого владыки бога и господа нашего ісуса христа отмѣтающеся. Воспомянути же вамъ хощу, вѣдущимъ и вамъ единою се, яко господь люди отъ земля египетскія спасе, послѣди невѣровавшихъ погуби. Ангелехъ же не соблюд шихъ своего начальства, но оставльшихъ свое жилище, на судъ великаго дне узами вѣчными подъ мракомъ соблюде. Яко же содома и гомора, и окрeстныя ихъ грады подобнымъ ихъ образомъ преблудивше, и ходивше въ слѣдъ плоти иныя. предлежатъ въ показаніе огню вѣч ному, судъ пріeмше. такожде убо и сіи, сонія видяще, плоть убо сквернятъ. господьства же отмѣтаются. славы же хуляще не трепeщутъ. Михаилъ же архангелъ, егда со діаволомъ разсужая глаголаше о моисeoвѣ тѣлеси, не смѣя суда навести хульна, но рече, да запрѣтитъ тебѣ господь. сіи же елика убо невѣдятъ хулятъ, елика же по естеству яко безсловeсная животная вѣдятъ въ сихъ сквернятся.

Зач., 78.* Горе имъ, яко въ путь каиновъ ходиша, и въ лeсть валаамовы мзды проліяшася, и въ прерѣканіе коррeoвѣ погибоша. Сіи суть въ любвахъ вашихъ сквернителе съ вами ядуще, безъ боязни себе пасуще. облацы безводни отъ вѣтръ преносими, древеса есeнна безплодна, дважды умeрша искоренeна. волны сверѣпыя моря воспѣняющи своя струя, звѣзды прелeстныя, имъ же мракъ тмы во вѣки блюдeтся. Прѣрочествова же и о сихъ седмыи отъ адама енохъ глаголя, се пріидетъ господь во святыхъ тмахъ ангелъ своихъ, сотворити судъ о всѣхъ и изъобличити всѣхъ нечестивыхъ о всѣхъ дѣлехъ нечeстія ихъ, ими же нечeствоваша, и о всѣхъ жесто кыхъ словесѣхъ ихъ, ихъ же глаголаша нань грѣшницы нечестивіи. сіи суть ропотницы, укорителе часть порочна, въ похотѣхъ своихъ ходяще, нечeстіемъ и законопре ступлeніемъ, и уста ихъ глаголютъ прегордая, чюдящеся лицeмъ ползы ради. Вы же возлюбленіи, поминайте глаголы прежеречeнныя отъ апостолъ господа нашего ісуса христа, зане глаголаху вамъ, яко въ послѣднее врeмя будутъ ругателе, по своихъ похотѣхъ ходяще и нечeстіихъ. сіи суть отдѣляюще себе отъ единости вѣры, и суть тѣлeсни, духа не имуще. Вы же возлюбленіи, святою вашею вѣрою назидающе себе, духомъ святымъ и молящеся, сами себе въ любви божіи соблюдайте, ждуще милости господа нашего ісуса христа въ жизнь вѣчную. И овѣхъ убо милуйте разсужающе, овѣхъ же страхомъ спасайте отъ огня восхищающе. обличайте же съ боязнію. ненавидяще и яже отъ плоти осквернeную ризу. Могущему же вы сохранити безъ грѣха и безъ сквeрны, и поставити предъ славою своeю непорочны въ радость, единому премудрому богу, и спасу нашему, ісусъ христомъ господемъ нашимъ. слава, и величіе, держава и область, прeжде всего вѣка и нынѣ и во вся вѣки аминь.

Конeцъ посланію іюдину.
Имать въ себѣ главъ, 1,
а зачалъ, церковныхъ,
2.