Соборное посланіе Іоанново, 1.

1 2 3 4 5

Глава, 1.

Зач., 68.* Е же бѣ испeрва, еже слышахомъ, еже видѣхомъ очима нашима, еже узрѣхомъ, и руки наша осязаша о словеси животнѣмъ, и животъ явися, и видѣхомъ, и свѣдѣтельствуемъ, и возвѣщаемъ вамъ животъ вѣчныи, иже бѣ у отца, и явися намъ. Еже видѣхомъ и слышахомъ, повѣдаемъ вамъ, да и вы общeніе имате съ нами. И пріобщeніе же наше со отецeмъ и съ сыномъ его ісусомъ христомъ. И сія пишемъ вамъ, да и радость ваша будетъ исполнена. И сіе есть обѣтованіе, еже слышахомъ отъ него, и повѣдаемъ вамъ, яко богъ свѣтъ есть, и тмы въ нeмъ нѣсть ни единоя. Аще речeмъ, яко причастіе имамы съ нимъ, и во тмѣ ходимъ, лжeмъ, и не творимъ истины. Аще ли же во свѣтѣ ходимъ, яко самъ есть во свѣтѣ, причастіе имамы другъ ко другу, и кровь ісуса христа сына его очиститъ насъ отъ всякого грѣха.

Зач., 69.* Аще речeмъ, яко грѣха не имамы, себе прель щаемъ и истины нѣсть въ насъ. аще исповѣдаемъ грѣхи наша, вѣренъ есть и праведенъ, да оставитъ намъ грѣхи, и очиститъ насъ отъ всякія неправды. аще речeмъ яко не согрѣшихомъ, лжа творимъ его, и слово его нѣсть въ насъ.

Глава, 2.

Чадца моя, сія пишу вамъ, да не согрѣшаите. и аще кто согрѣшитъ, ходатая имамы ко отцу, ісуса христа праведника. и той оцѣщeніе есть о грѣсѣхъ нашихъ. не о нашихъ же точію, но и о всeмъ мирѣ. и о сeмъ разумѣемъ, яко познахомъ его, аще заповѣди его соблюдаемъ. глаголяи яко познахъ его, и заповѣди его не соблюдаетъ, ложъ есть, и въ сeмъ истины нѣсть. иже бо аще соблюдeтъ слово его, по истинѣ въ сeмъ любы божія совершeна есть. о сeмъ разумѣемъ, яко въ нeмъ есмы. глаголяи въ нeмъ пребывати, долженъ есть, яко же онъ ходилъ есть, и сeй тако же да ходитъ.

Зач., 70.* Возлюбленіи, не заповѣдь нову пишу вамъ, но заповѣдь вeтху, ея же имате испeрва. заповѣдь вeтха, есть слово еже слышасте испeрва. Паки заповѣдь нову пишу вамъ, еже есть по истинѣ въ нeмъ и въ васъ, яко тма мимо ходитъ, и свѣтъ истинныи сeй сіяетъ. Глаголяи во свѣтѣ быти, а брата своего ненавидитъ, во тмѣ есть досeлѣ. любяи брата своего, во свѣтѣ пребываетъ, и соблазна въ нeмъ нѣсть. а ненавидяи брата своего, во тмѣ есть, и во тмѣ ходитъ, и не вѣсть камо идетъ, яко тма ослѣпи очи ему. Пишу вамъ чадца, яко оставляются вамъ грѣси именемъ его. пишу вамъ отецы, яко познасте безначалнаго. пишу вамъ юноша, яко побѣдисте лукаваго. пишу вамъ дѣти, яко познасте отца. писахъ вамъ отецы, яко познасте исконнаго. писахъ вамъ юноша, яко крѣпцы есте, и слово божіе въ васъ пребываетъ, и побѣдисте лукаваго. Не любите мира, ни яже въ мирѣ. аще кто любитъ миръ, нѣсть любве отча въ нeмъ. яко все еже есть въ мирѣ, похоть плотьская, и похоть очима, и гордость житeйская, нѣсть отъ отца, но отъ мира сего есть. и миръ сeй преходитъ и похоть его, а творяи волю божію пребываетъ во вѣки.

Зач., 71.* Дѣти, послѣдняя година есть. и яко же слышасте, яко антихристъ грядeтъ, и нынѣ антихристи мнози быша. и отъ сего разумѣваемъ яко послѣдніи часъ есть. отъ насъ изыдоша, но не бѣша отъ насъ. аще бо быша отъ насъ, пребыли убо быша съ нами. но да явятся яко не бѣша вси отъ насъ. и вы помазаніе имате отъ святаго, и вѣсте вся. не писахъ вамъ, яко не вѣсте истину, но яко вѣсте ея. И яко всяка лжа отъ истины нѣсть. кто есть лживыи, точію отмѣтаяися, яко ісусъ, нѣсть христосъ. сeй есть антихристъ, отмѣтаяися отца и сына. всякъ отмѣтаяися сына, ни отца имать. а исповѣдаяи сына, и отца имать. Вы убо еже слышасте испeрва, въ васъ да пребываетъ. и аще въ васъ пребудетъ еже слышасте испeрва, и вы въ сынѣ и отецы пребудете. и сіе есть обѣтованіе, еже самъ обѣща намъ животъ вѣчныи. Сія писахъ вамъ о льстящихъ васъ. и вы помазаніе еже пріясте отъ него, въ васъ пребываетъ. и не трeбуете да кто учитъ вы, но яко то помазаніе учитъ вы о всeмъ, и истинно есть, и нѣсть ложно. И яко же научи васъ, пребывайте въ нeмъ. И нынѣ чадца пребывайте о нeмъ, да егда явится, имамы дерзновeніе, и не посрамимся отъ него въ пришeствіе его. Аще вѣсте яко праведникъ есть, разумѣйте, яко всякъ творяи правду, отъ него родися.

Глава, 3.

Видите, какову любовь далъ есть отецъ намъ да чада божія наречeмся, и есмы. сего ради миръ не вѣсть васъ, зане не позна его. Возлюбленіи, нынѣ чада божія есмы, и не у явися что будемъ. вѣмы же яко аще явит ся, подобни ему будемъ, и узримъ его яко же есть. И всякъ имѣяи надeжду свою нань, очищаетъ себе, яко же онъ чистъ есть. всякъ творяи грѣхъ, и беззаконіе творитъ, и грѣхъ есть беззаконіе. И вѣсте, яко онъ явися, да грѣхи наша возметъ. и грѣха въ нeмъ нѣсть. Всякъ иже о нeмъ пребываяи, не согрѣшаетъ. всякъ согрѣшаяи не видѣ его, ни разумѣ его. Чадца, никтоже да льститъ васъ. творяи правду, праведникъ есть. яко же онъ праведенъ есть. творяи грѣхъ, отъ непріязни есть, яко отъ испeрва непріязнь согрѣшаетъ. сего ради явися сынъ божіи, да разрушитъ дѣла непріязнена. Всякъ рожeныи отъ бога, грѣха не творитъ. яко сѣмя его въ нeмъ пребываетъ, и не можетъ согрѣшати, яко отъ бога родися. Сего ради явлeна суть чада божія, и чада непріязнена.

Зач., 72.* Всякъ не творяи правду, нѣсть отъ бога, и не любяи брата своего. яко се есть обѣтованіе еже слы шасте испeрва, да любимъ другъ друга. Не яко же каинъ, отъ непріязни бѣ, и закла брата своего. и за кую вину закла его; яко дѣла его лукава бѣша, а брата его праведна. Не чюдитеся братія моя, аще ненавидитъ васъ миръ. мы вѣмы яко преидохомъ отъ смeрти въ животъ, яко любимъ братію. не любяи бо брата, пребываетъ въ смeрть. всякъ ненавидяи брата своего, человѣкоубійца есть. И вѣсте яко всякъ человѣкоубійца не имать живота вѣчнаго въ себѣ пребывающа. о сeмъ познахомъ любовь, яко онъ по насъ душу свою положи, и мы должни есмы по братіи душа полагати. Иже убо имать богатство мира сего, и видитъ брата своего трeбующа и затворитъ утробу свою отъ него, како любы божія пребываетъ въ нeмъ; чадца моя, не любимъ словомъ и языкомъ, но дѣломъ и истиною. и о сeмъ разумѣемъ яко отъ истины есмы, и предъ нимъ смиряемъ сердца наша. зане аще зазираетъ намъ наше сердце яко боліи есть богъ сердца нашего и вѣсть вся.

Зач., 73.* Возлюбленіи, аще сердце наше не зазритъ намъ, дерзновeніе имамы къ богу. его же аще просимъ, пріeмлемъ отъ него, аще заповѣди его соблюдаемъ, и угодная предъ нимъ творимъ. и сія есть заповѣдь его, да вѣруемъ во имя сына его ісуса христа, и любимъ другъ друга, яко же далъ есть заповѣдь намъ. И соблюдаяи заповѣди его, въ нeмъ пребываетъ, и той въ нeмъ. и о сeмъ разумѣемъ яко пребываетъ въ насъ отъ духа, его же далъ есть намъ.

Глава, 4.

Возлюбленіи не всякому духу вѣруйте, но искушайте духи аще отъ бога суть. Яко мнози лживи пророцы изыдоша въ миръ. о сeмъ разумѣйте духъ божіи, и духъ льстeчь. Всякъ духъ иже исповѣдуетъ ісуса христа въ плоть пришeдша, отъ бога есть. и всякъ духъ иже не исповѣдуетъ ісуса христа въ плоть пришeдша, божіи нѣсть. и сeй есть антихристовъ его же слышасте яко грядeтъ. и нынѣ въ мирѣ есть уже. Вы отъ бога есте чадца, и побѣдисте тѣхъ, яко боліи есть иже въ васъ, нeжели иже въ мирѣ. они отъ мира суть, сего ради отъ мира глаголютъ, и миръ тѣхъ послушаетъ. мы отъ бога есмы. разумѣваяи бога, послушаетъ насъ. иже нѣсть отъ бога, не послушаетъ насъ. о сeмъ разумѣваемъ духъ истинныи, и духъ льстeчь.

Зач.* Возлюбленіи, возлюбимъ другъ друга, яко любы отъ бога есть. и всякъ любяи, отъ бога рождeнъ есть, и разумѣетъ бога. а не любяи, не позна бога, яко богъ любы есть. о сeмъ явися любы божія въ насъ, яко сына своего единороднаго посла богъ въ миръ, да живи будемъ имъ, о сeмъ есть любы. не яко мы возлюбихомъ бога, но яко той возлюби насъ, и посла сына своего оцыщeніе о грѣсѣхъ нашихъ.

Зач.* Возлюбленіи, аще сице возлюбилъ есть насъ богъ, и мы должни есмы другъ друга любити.

Зач.* Бога никтоже нигдѣже видѣ. аще любимъ другъ друга, богъ въ насъ пребываетъ, и любы его совершeна есть въ насъ. о сeмъ разумѣемъ яко въ нeмъ пребываемъ, и той въ насъ, яко отъ духа своего далъ есть намъ. и мы видѣхомъ и свѣдѣтельствуемъ, яко отецъ посла сына спасителя миру. иже аще исповѣсть яко ісусъ есть сынъ божіи, богъ въ нeмъ пребываетъ, и той въ бозѣ. и мы познахомъ и вѣровахомъ, любовь юже имать богъ въ насъ. богъ любы есть. И пребываяи въ любви, въ бозѣ пребываетъ, и богъ въ нeмъ пребываетъ. о сeмъ совершается любы съ нами, да дерзновeніе имамы въ день судныи, зане яко же онъ есть, и мы есмы въ мирѣ сeмъ. Страха нѣсть въ любви, но совершeна любы, вонъ изгоняетъ страхъ. яко страхъ муку имать. Бояижеся не совершается въ любви. мы любимъ его, яко той пeрвѣе возлюбилъ есть насъ.

Зач., 74.* Аще кто речeтъ яко люблю бога, а брата своего ненавидитъ, ложъ есть, ибо не любяи брата своего его же видѣ, бога, его же не видѣ, како можетъ любити; и сію заповѣдь имамы отъ него. да любяи бога, любитъ и брата своего.

Глава, 5.

Всякъ вѣруяи, яко ісусъ есть сынъ божіи, отъ бога рождeнъ есть и всякъ любяи рождьшаго, любитъ и рождeннаго отъ него. о сeмъ вѣмы яко любимъ чада божія, егда бога любимъ, и заповѣди его соблюдаемъ. сія бо есть любы божія, да заповѣди его соблюдeмъ, и заповѣди его тяжки не суть. яко всякъ рождeнныи отъ бога, побѣждаетъ миръ. и сія есть побѣда побѣждьшія миръ, вѣра наша. кто есть побѣждаяи мира, токмо вѣруяи, яко ісусъ есть сынъ божіи; Сeй есть пришeдыи водою и кровію, и духомъ, ісусъ христосъ, не водою точію, но водою и кровію. и духъ есть свѣдѣтельствуяи, яко духъ есть истина. Яко тріе суть свѣдѣтельствующеи духъ и вода и кровь, и тріе во едино суть. аще свѣдѣтельство человеческо пріeмлемъ, свѣдѣтельство божіе боле есть. яко сіе есть свѣдѣтельство божіе еже свѣдѣтельствова о сынѣ своeмъ. вѣруяи въ сына божія, имать свѣдѣтельство о нeмъ. не вѣруяи богови, лжа сотворилъ есть его, яко не вѣрова во свѣдѣтельство, еже свѣдѣтельствова богъ о сынѣ своeмъ. и сіе есть свѣдѣтельство, яко животъ вѣчныи далъ есть намъ богъ, и сeй животъ въ сынѣ его есть. имѣяи сына божія, имать животъ, а не имыи сына божія, живота не имать. Сія писахъ вамъ вѣрующимъ во имя сына божія, да вѣсте яко животъ вѣчныи имате, и да вѣруете во имя сына божія. и се есть дерзновeніе еже имамы къ нему. Яко аще чесо просимъ по воли его, послушаетъ насъ. И аще вѣмы яко услышитъ насъ, его же аще просимъ, вѣмы яко имамы прошeнія ихъ же просихомъ отъ него. Аще кто узритъ брата согрѣшающа грѣхъ не къ смeрти, да проситъ, и дастъ ему животъ согрѣшающимъ не къ смeрти. есть грѣхъ къ смeрти, не о томъ глаголю да помолится. всяка неправда грѣхъ есть, и есть грѣхъ не къ смeрти. Вѣмы же яко всякъ рождeныи отъ бога, не согрѣшаетъ, но рождeныи отъ бога блюдeтъ себе, и лукавыи не прикасается ему. вѣмы яко отъ бога есмы, и миръ вeсь во злѣ лежитъ. Вѣмы же яко сынъ божіи пріиде, далъ есть намъ свѣтъ и разумъ, да познаемъ бога истиннаго. и да будемъ во истинѣмъ сынѣ его ісусѣ христѣ. Сeй есть истинныи богъ, и животъ вѣчныи. Чадца храните себе отъ трeбъ идольскыхъ. аминь.

Конeцъ, соборному посланію іoаннову 
пeрвому. Имать въ себѣ
главъ 5. а церковныхъ
зачалъ
6.