Соборное посланіе Петрово, 1.

1 2 3 4 5

Глава, 1.

Зач., 58. Пeтръ апостолъ ісусъ христовъ, избраннымъ пришeльцемъ разсѣянія. понту, галатіи, каппадокіи, асіи, и виѳиніи. По презрѣнію бога и отца, во святыню духа, въ послушаніе и кроплeніе крови ісусъ христовы. благодать вамъ и миръ да умножится.

Зач.* Благословeнъ богъ и отецъ господа нашего ісуса христа, иже по мнозѣй своeй милости, порождeи насъ во упованіе живо воскресeніемъ ісусъ христовымъ отъ мeртвыхъ, въ наслѣдіе нетлѣнно и несквeрно и не увядаемо, соблюдeно на небесѣхъ въ васъ, иже силою божіею соблюдeныхъ вѣрою, во спасeніе готово явитися во время послѣднее. о нeмъ же радуйтеся мало нынѣ, аще лѣпо есть, прискорбни бывше въ различныхъ напастехъ, да искушeніе вашея вѣры, много чcтнѣйше злата гибнуща, огнeмъ же искушeна, обрящется въ похвалу и славу и чeсть, въ откровeніи ісусъ христовѣ. его же невидѣвше любите, на него же нынѣ не зряще, вѣрующе же, радуитеся радостію неизглаголанною и прославленною, пріeмлюще кончину вѣрѣ вашей, спcніе душамъ. о нeмъ же спасeніи взыскаша и испыташа пророцы, иже о вашей благодати прорeкшей, испытающе въ каково или въ кое врeмя являше въ нихъ духъ христовъ прeжде свѣдѣтельствуя о христовыхъ страстехъ, и яже по сихъ славахъ, имъ же открыся яко не имъ самѣмъ, но и намъ же служаху сія, яже нынѣ возвѣстишася вамъ, благовѣствовавшими вамъ духомъ святымъ посланнымъ съ небесе, въ ня же желаютъ ангели приникнути.

Зач.* Тѣмъ же возлюбленіи, препоясавше чресла помы шлeнія вашего, трезвящеся, совершeнѣ уповайте на приносимую вамъ благодать, откровeніемъ ісусъ христовымъ, яко чада послушанію, не преобразующеся пeрвыми не вѣдѣнія вашего похотѣніи, но позвавшему вы святому, и сами святи во всeмъ житіи будѣте. зане писано есть, святи будѣте, яко азъ святъ есмь. и аще отца называете нелицемѣрно судяща комуждо по дѣлу, со страхомъ житія вашего врeмя жительствуете, вѣдяще яко не истлѣннымъ сребромъ или златомъ избавистеся отъ суетнаго вашего житія отецы преданнаго, но честною кровію яко агньца непорочна и несквeрна христа. Предъ увѣдѣна убо прeжде сложeнія мира, явльшажеся въ послѣдняя лѣта васъ ради, иже его ради вѣровавшихъ въ бога, воздвигшаго его изъ мeртвыхъ, и славу ему давша, яко да вѣра ваша, и упованіе будетъ на бога. душа ваша очистивше въ послушаніе истинѣ духомъ, въ братолюбіе нелицемѣрно, отъ чиста сердца другъ друга любите прилѣжно, порождeни не отъ сѣмене истлѣнна, но неистлѣнна, словомъ живаго бога, и пребывающаго во вѣки. Зане всяка плоть яко трава, и всяка слава человѣку яко цвѣтъ травныи. исше трава и цвѣтъ ея отпаде, глаголъ же господень пребываетъ во вѣки. сeй же есть глаголъ благовѣствованыи въ васъ.

Глава, 2.

Отложше убо всяку злобу, и всяку лeсть, и лице мѣріе и зависть, и вся клеветы, яко новорожeни младeнцы, словeсное и нелeстное млеко возлюбите, да о нeмъ возрастeте во спасeніе. Понeже вкусисте яко благъ господь, къ нему же приходяще, камени живу, отъ человѣкъ убо уничижeну, отъ бога же избрану чeстну, и сами яко каменіе живо зиждѣтеся въ храмъ духовенъ, священство свято, вознести жeртвы духовны, благопріятны богови ісусъ христомъ. Зане писано есть въ писаніи, се полагаю въ сіонѣ камень краеуголенъ избранъ, чeстенъ. и вѣруяи вонь, не постыдится. Вамъ убо чeсть вѣрующимъ, а противящимся, камень, его же небрегоша зиждущеи, сeй бысть въ главу углу. и камень претыканію, и камень соблазну, о нeмъ же и претыкаются слову про тивляющеися, о нeмъ же и положeни быша. Вы же родъ избранъ, церкое священіе, языкъ святъ, людіе обновлeнія, яко да добродѣтели возвѣстите, иже изъ тмы васъ призвавшему въ чюдныи его свѣтъ. иже иногоспода не людіе, нынѣ же людіе божіи. иже не помиловани, нынѣ же помиловани бысте.

Зач.* Возлюбленіи, молю яко пришeлца и странники, огребатися отъ плотьскихъ похотіи, яже воюютъ на душу, житіе ваше имуще добро во языцѣхъ, да о нeмъ же клевeщутъ васъ яко злодѣя, отъ добрыхъ дѣлъ видѣвше, прославятъ бога въ день посѣщeнія. повинитеся убо всякому человечю созданію господа ради. Аще же царю, яко преобладающу. аще ли же князeмъ, яко отъ него посланомъ, во отмщeніе убо злодѣемъ, въ похвалу же благотворцемъ. Яко тако есть воля божія, благо творящемъ, обуздовати безумныхъ человѣкъ невѣждьство. яко свободни, а не яко прикровeніе имуще злобѣ свободу, но яко раби божіи, всѣхъ почитайте, братство возлюбите. Бога бойтеся, царя чтите. раби повинуйтеся во всякомъ страсѣ владыкамъ. Не токмо благимъ и кроткимъ, но и строптивымъ. се бо есть угодно прeдъ богомъ, аще совѣсти ради божія терпитъ кто скорби стражда бесправды. Кая бо хвала, аще согрѣшающе и мучими терпите; но аще добро творяще и страждуще терпите, сіе угодно прeдъ богомъ. на сіe бо и звани бысте.

Зач., 59.* Зане и христосъ пострада по насъ, намъ оставль образъ, да послѣдуемъ стопамъ его, иже грѣха не сотвори, ни обрѣтеся лeсть во устѣхъ его. иже укаряемъ противу не укаряше, стражда, не прѣщаше, предаяше же судящему праведно, иже грѣхи наша самъ вознесе на тѣлѣ своeмъ на древо, да отъ грѣхъ избывше, правдою поживeмъ, его же язвою исцѣлѣсте. Бѣсте бо яко овца заблужшая, не имуще пастыря. но возвра тистеся нынѣ къ пастырю, и посѣтителю душъ вашихъ.

Глава, 3.

Такожде же и жены повинующеся своимъ мужeмъ, да и аще нѣцыи не повинуются слову, жeнскимъ житіемъ, безъ слова плѣнeни будутъ, видѣвше еже со страхомъ чисто житіе ваше. Имъ же да есть не внѣшнее плетeніе власъ, и обложeніе злата, или одѣяніемъ ризъ лѣпота, но потаeныи сердца человѣкъ, въ неистлѣніе кроткаго и молчаливаго духа, еже есть прeдъ богомъ многоцѣнно. Тако бо иногоспода и святыя жены уповающая на бога, украшаху себе, повинующеся своимъ мужeмъ. яко же сарра послушаше авраама, господина того зовущи. ея же бысте чада благотворяще, и не боящеся ни единого страха. Мужіе такожде вкупѣ живуще со своими женами по разуму яко немощнѣйшу сосуду жeнскому, воздающе чeсть, яко и снаслѣдницы благодатнѣй жизни, во еже не прекращатися молитвамъ вашимъ. Конeцъ же, вси единомудрени, милостиви, братолюбцы, милосeрди, благоутробни, мудролюбцы, смиреномудри, не воздающе зла за зло или досаждeніе за досаждeніе, супротивно же, благословяще. вѣдяще яко на се звани бысте, да благословeніе наслѣдите.

Зач., 60*. Хотяи бо животъ любити, и видѣти дни благи, да удержитъ языкъ свой отъ зла, и устнѣ свои не глаголати льсти. да уклонится отъ зла и да сотворитъ благо. да взыщетъ смирeніе, и да держится его, зане очи господни на праведныя, и уши его въ молитву ихъ. лицe же господне на творящая злая. еже потребити ихъ отъ земля. И кто озлобитъ васъ аще благому подобницы будете; но аще и стражете правды ради блажeни. страха же ихъ не убойтеся, ниже смущайтеся. Господа же бога святите въ сердцыхъ вашихъ. готовы же присно къ отвѣту всякому вопрашающему вы слово, о вашемъ упованіи, съ кротостію и страхомъ, совѣсть имуще благу, да о нeмъ же клевeщутъ васъ яко злодѣя, постыдятся злословящеи ваше благое о христѣ житіе. Лучше бо есть благо творящимъ, аще хощетъ воля божія, пострадати, нeжели зло творящимъ. Зане и христосъ единою о грѣсѣхъ пострада, праведникъ за неправедники, да приведeтъ ны богови, умерщвeнъ убо плотію, оживъ же духомъ. о нeмъ же и сущимъ въ темницы духомъ сошeдъ проповѣда, противльшемся иногоспода, егда ожидаше божіе долготерпѣніе, во дни ноевы дѣлаему ковчeгу, въ нeмъ же мало, сирѣчь, осмь душъ спасошася отъ воды. его же воображeніе нынѣ и насъ спасаетъ крещeніе, не плотьскія отложeніе сквeрны, но совѣсти благи вопрошeніе у бога, воскресніемъ ісусъ христовымъ, иже есть одесную бога, возшeдъ на небо, покоршемся ему ангеломъ и властемъ и силамъ.

Глава, 4.

Зач., 61. Христу убо пострадавшу за ны плотію, и вы въ туже мысль вооружитеся, зане пострадавыи плотію преста отъ грѣха, во еже не ктому въ человеческія похоти, но въ волю божію прочее во плоти жити врeмя. довлѣетъ бо вамъ мимошeдшее врeмя житія волю языческую творити, хождьшемъ въ нечистотахъ, въ похотехъ, въ мужеложъ ствѣ, въ скотоложъствѣ, въ помыслохъ, въ піянствѣ, въ козлогласованіихъ, въ лихоиманіихъ, и богомeрскихъ идолослужeніихъ, о нeмъ же дивятся не исходящимся вамъ въ тоже блуда разліяніе, хуляще, иже воздадятъ слово готову сущему судити живымъ и мертвымъ. На се бо и мертвымъ благовѣстися, да судъ убо пріимутъ плотію по человѣку, поживутъ же по бозѣ духомъ. всѣмъ же кончина приближися. Уцѣломудритеся убо и трезвитеся въ молитвахъ, прeжде же всѣхъ яже къ себѣ любовь прилѣжну имуще. зане любовь покрываетъ множество грѣховъ. Страннолюбцы другъ ко другу безъ роптаніи, кождо яко же пріятъ дарованіе между себе сіе служаще, яко добріи строителіе различнѣй благодати божіи. Аще кто глаголетъ, яко словеса божія. аще кто служитъ, яко отъ крѣпости, яко же подастъ богъ, да о всeмъ славится богъ ісусъ христомъ, ему же есть слава и держава во вѣки вѣкомъ, аминь.

Зач., 62.* Возлюбленіи, не дивитеся иже въ васъ раждежeнію, ко искушeнію вамъ бываему, яко чюжду вамъ случающуся, но понeже пріобщаетеся христовымъ святeмъ, радуйтеся, яко да и въ явлeніе славы его возрадуетеся веселящеся. аще укаряеми бываете о имени христовѣ, блажeни есте. Яко славы и божіи духъ, на васъ почіетъ. онѣми убо хулится, а вами прославляется. да не кто убо отъ васъ постражетъ яко убійца, или яко тать, или яко злодѣй, или яко чюжъ посѣтитель. Аще ли же якы христіанинъ, да не стыдится. но да прославляетъ же бога въ части сeй. яко врeмя начати суда отъ дому божія. Аще ли прeже отъ васъ, что кончина противящимся божію евангелію; и аще праведникъ едва спасается, нечестивыи и грѣшныи гдѣ явится; тѣмъ же и страждущеи по воли божіи, яко вѣрну зиждителю да предадятъ душа своя, въ благотворeніе.

Глава, 5.

Старца яже въ васъ молю, яко старецъ сыи, и свѣдѣтель христовымъ страстeмъ, иже и хотящей явитися славѣ обѣщникъ, пасите еже въ васъ стадо божіе, посѣщающе не нуждею, но волею, и по бозѣ, ниже неправедными прибытки, но усeрдно. ни яко силою обладающе ряду, но образи бывайте стаду. и явльшуся пастырей началнику, пріимете неувядаемыи славы вѣнeцъ. Тако же юніи, повинитеся старцемъ, вси же другъ другу повинующеся, смиреномудріе стяжите. зане богъ гордымъ противится, смирeнымъ же даeтъ благодать.

Зач., 63.* Смиритеся убо подъ крѣпкую руку божію, да вы вознесeтъ во время, всю печаль вашу возвeргше нань, яко той печeтся о васъ. Трезвитеся, бодрствуйте, зане супостатъ вашъ діаволъ яко лeвъ рыкая ходитъ искы кого поглотити. ему же противитеся твeрди вѣрою, вѣдяще яко тѣже страсти случаются вашему братству еже въ мирѣ. Богъ же всякія благодати призвавыи васъ въ вѣчную свою славу о христѣ ісусѣ, мало пострадавшемъ, той да совершитъ вы, да утвердитъ, да укрѣпитъ, да основeтъ. тому слава и держава во вѣки вѣкомъ, аминь. Силуаномъ вамъ вѣрнымъ братомъ, яко непщую, въмалѣ написахъ, моля и засвѣдѣтельствуя, сeй быти истиннѣй благодати божіи въ нeй же стоите. цѣлуетъ вы яже въ вавилонѣ соизбранная, и марко сынъ мой. цѣлуйте другъ друга лобзаніемъ любви. Миръ всѣмъ вамъ о христѣ ісусѣ. аминь.

Конeцъ, соборному посланію пeрвому 
святаго апостола петра. Имать въ себѣ
главъ, 5, а зачалъ
церковныхъ,
6.