Дѣянія святыхъ апостолъ

списана святымъ апостоломъ и евангелистомъ Лукою

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

Глава, 1.

Зач., 1. Пeрвое убо слово сотворихъ о всѣхъ, о ѳеофиле, о нихъ же начатъ ісусъ, творити же и учити, до него же дне, заповѣдавъ апостоломъ духомъ святымъ, ихъ же избра, вознесeся. предъ ними же и постави себе жива, по страданіи своeмъ, во мнозѣхъ знаменіихъ, деньми четыредесятьми являяся имъ, и глаголя яже о царствіи божіи, и съ ними яды, повелѣваше имъ отъ іерусалима не отлучатися, но ждати обѣтованіе отчее, еже слышасте отъ мене. Яко іoаннъ убо крестилъ есть водою, вы же имате креститися духомъ святымъ, не по мнозѣхъ сихъ днeхъ. они же убо сошeдшеся, вопрашаху его, глаголюще. господи, аще въ лѣто се устраяеши царствіе ізраилево; речe же къ нимъ. нѣсть ваше разумѣти времена и лѣта, яже отецъ положи своeю областію. Но пріимете силу нашeдшу святому духу на вы. и будете ми свидѣтеле, во іерусалимѣ же, и во всeй іудeи и самаріи, и даже до послѣднихъ земли. И сія рeкъ. зрящемъ имъ, взятся, и облакъ подятъ его отъ очію ихъ. и яко взирающе бяху на небо идущу ему. и се мужа два стаста предъ ними въ одeжди бѣлѣ, яже и рекоста. мужіе галилeйстіи, что стоите зряще на небо; се ісусъ, вознесыися отъ васъ на небо, такожде пріидетъ, имъ же образомъ видѣсте его идуща на небо.

Зач., 2.* Тогда возвратишася во іерусалимъ, отъ горы нарицаемыя елеонъ. яже есть близъ іерусалима, суботѣ имущи путь. И егда внидоша, взыдоша на горницу, идѣже бяху пребывающе. пeтръ же, и іаковъ. и іoаннъ, и андрeя. филиппъ, и ѳома. варфоломeй, и матѳeй. и іаковъ алфeoвъ, и симонъ зилотъ. и іюда іаковль. сіи вси бяху, терпяще единодушно молитвою и молeніемъ. съ женами, и маріею матерію ісусовою, и братіею его. И во дни сія, воставъ пeтръ, посредѣ ученикъ, рече. бѣ же народъ имeнъ вкупѣ яко сто и двадесяте, мужіе братія, подобаше скончатися писанію сему, еже прeже рече духъ святыи усты давыдовы о іюдѣ бывшемъ вожди емшимъ ісуса. яко причтeнъ бѣ съ нами, и пріятъ жрeбіи службы сея. Сeй убо стяжа село отъ мзды неправедныя. и ницъ бывъ, просѣдеся посредѣ, и изліяся вся утроба его и разумно бысть всѣмъ живущимъ во іерусалимѣ. яко нарещися селу тому своимъ ихъ языкомъ, акелдама. еже есть село крове. Пишетъ бо въ книзѣ псаломстѣй. да будетъ дворъ его пустъ, и не будетъ живяи въ нeмъ. и епкcпство его преиметъ инъ. Подобаетъ убо отъ сошeдшихся съ нами мужeй, во всяко лѣто въ нeже вниде и изыде въ насъ господь ісусъ. начeнъ отъ крещeнія іoаннова, до него же дне вознесeся на небо отъ насъ, свидѣтеля воскреснію его быти съ нами единому отъ сихъ. И поставиша два. іосифа нарицаемаго варсаву. иже наречeнъ бысть іустъ, и матѳeя, и помолившеся рѣша. Ты господи сердцевѣдче всѣхъ, покажи, его же избра отъ сею обою единого пріяти, жрeбіи служeнія сего и апостольства. изъ него же испаде іюда, ити въ мѣсто свое. и даша жрeбія има. и паде жрeбіи на матѳeя. и причтeнъ бысть ко единому надесяте апостолу.

Глава, 2.

Зач., 3. И егда скончавашася день пятьдесятницы, бѣша вси апостоли единодушно вкупѣ. и бысть внезапу съ небесе шумъ, яко носиму дыханію бурну, и исполни вeсь домъ идѣже бяху сѣдяще. И явишася имъ раздѣлeни языцы яко огнени. сѣде же на единомъ когождо ихъ. и исполнишася вси духа свята. И начаша глаголати инѣми языки, яко же духъ даяше имъ провѣщевати. бяху же во іерусалимѣ живущеи іудeе мужіе благоговѣйни, отъ всего языка иже подъ небесeмъ. бывшу же гласу сему, снидеся народъ, и изумѣся. яко слышаху единого когождо своимъ языкомъ глаголющемъ имъ. дивляхужеся вси и чужахуся глаголюще другъ ко другу, не се ли вси сіи суть глаголющеи галилeяне; и како мы слышимъ кождо своимъ языкомъ нашимъ, въ нeмъ же родихомся; парѳяне, и мидяне, и еламите, и живущеи между рѣкама. во іудeи же, и каппадокіи. въ понтѣ, и во асіи. во фригіи же, и памфиліи. во египтѣ, и странахъ ливійскахъ. иже по кириніи. и приходящеи римляне, іудeи же и пришeльцы критяне, и аравляне. слышимъ глаголющемъ имъ нашими языки величія божія. дивляхужеся вси и недомышляху, единъ ко другому глаголюще. что убо хощетъ се быти; иніи же ругающеся глаголаху, яко виномъ исполнени суть.

Зач., 4.* Ставъ же пeтръ, со единѣмъ надесяте, воздвиже гласъ свой и рече имъ. Мужіе іудeйстіи, живущеи во іерусалимѣ вси. се вамъ разумно да будетъ, и внушите глаголы моя. не бо яко же вы мните сіи пьяни суть, есть бо часъ трeтіи дне. но се есть речeнное пророкомъ іоилемъ. И будетъ въ послѣдняя дни глаголетъ господь. излѣю отъ духа моего на всяку плоть. и прорекутъ сынове ваши, и дщeря ваша. и юноша ваша видѣнія узрятъ, и старцы ваши сонія видятъ. ибо на рабы моя и на рабыня моя во дни оны излѣю отъ духа моего, и прорекутъ. и дамъ чюдеса на небеси горѣ, и знаменія на земли низу. кровь и огнь, и курeніе дыма. солнце преложится во тму, и луна въ кровь. Прeжде даже не пріити дню господню великому и просвѣщeнному, и будетъ, всякъ иже аще призовeтъ имя господне, спасeтся.

Зач., 5.* Мужіе ізраильтестіи слышите словеса сія. ісуса назарeя, мужа отъ бога извѣствованна въ васъ, силами и чюдесы и знаменіи, иже сотвори тѣмъ богъ посредѣ васъ, яко же и сами вѣсте. сего нарекованнымъ совѣтомъ и проразумѣніемъ божіимъ, продана пріeмше, рукама беззаконныхъ пригвождьше убисте. его же богъ воскреси, раздрѣшь болѣзни смeртныя. яко же не бяше мощно держану быти ему отъ нея. давидъ бо глаголетъ о нeмъ. предзрѣхъ господа предо мною выну, яко одесную мене есть, дася не подвижу. сего ради возвеселися сердце мое и возрадовася языкъ мой. ещe же и плоть моя вселится на упованіе. яко не оставиши душу мою во адѣ, ни даси же прпдбному своему видѣти истлѣнія. сказалъ ми еси пути живота. и исполниши мя весeлія съ лицeмъ твоимъ. Мужіе братіе, достоитъ рещи съ дерзновeніемъ къ вамъ о патріарсѣ давидѣ, яко умре и погребeнъ бысть, и гробъ его есть въ насъ даже до дне сего. пророкъ убо сыи и вѣдыи яко клятвою клятся ему богъ, отъ плода чрeслъ его, по плоти воздвигнути христа, и посадити его на престолѣ его, предвидѣвъ, глагола о воскресeніи христовѣ. яко не оставися душа его во адѣ, ни плоть его видѣ истлѣнія. сего ісуса воскреси богъ. ему же вси мы есмы свидѣтеле. десницею убо божіею вознесeся, обѣтованіе же святаго духа пріeмъ отъ отца излія, се еже вы нынѣ видите и слышите. не бо давидъ взыде на небеса. глаголетъ бо самъ. рече господь господви моему, сѣди одесную мене, дондеже положу враги твоя подножіе ногама твоима. твeрдо убо да разумѣетъ вeсь домъ ізраилевъ. яко и господа и христа его богъ сотворилъ есть сего ісуса, его же вы распясте. Слышавше же умилишася сердцемъ, рѣша же къ петру, и прочимъ апостоломъ. что сотворимъ мужіе братіе;

Зач., 6.* Пeтръ же рече къ нимъ, покайтеся и да крестится кождо васъ во имя ісуса христа, во оставлeніе грѣхомъ. и пріимете даръ святаго духа. вамъ бо есть обѣтованіе, и чадомъ вашимъ. и всѣмъ далнимъ, елико аще призовeтъ господь богъ нашъ. Иными же словесы множай шими свѣдѣтельствоваше, и моляше я глаголя. спаситеся отъ рода строптиваго сего. они же убо любeзно пріяша слово его, и крестишася. и приложишася въ день той, душа яко три тысяща. Бяху же терпяще во учeніи апостолъ, и въ общeніи, и преломлeніи хлѣба, и въ молитвахъ. Бысть же на всякой души страхъ. многа бо чюдеса и знаменія отъ апостолъ быша во іерусалимѣ. Страхъ же вeліи бяше на всѣхъ ихъ. Вси же вѣровавшеи, бяху вкупѣ, и имяху вся обща. и стяжанія и имѣнія продаяху. и раздаяху всѣмъ еже аще кто требоваше. по вся же дни терпяще идяху единодушно въ церковь. и ломяще по домохъ хлѣбы, пріимаху пищу въ радости, и въ простотѣ сердца хваляще бога. и имуще благодать ко всѣмъ людемъ. господь же прилагаше по вся дни спасающаяся церкови.

Глава, 3.

Зач., 7. Вкупѣ же, пeтръ и іoаннъ восхожаста во святилище на молитву въ часъ девятыи. и нѣкіи мужъ хромъ отъ чрeва матере своея сыи носимъ бываше. его же полагаху по вся дни предъ двeрми церковными рекомыми красными, просити милостыня отъ входящихъ въ церковь. Иже видѣвъ петра и іoанна хотящихъ внити въ церковь, прошаше милостыня. возрѣвъ же пeтръ нань со іoанномъ, рече. возри на ны. онъ же прилежаше има, мня нѣчто отъ нихъ пріяти. речe же пeтръ. сребра и злата нѣсть у мене, но еже имамъ, се ти дамъ. во имя ісуса христа назарeя въстани и ходи. и емъ его за десную руку воздвиже. Абіе же утвердистеся ему плеснѣ и глeзнѣ. и вскочивъ, ста и хожаше. и вниде съ нима въ церковь, ходя и скача, и хваля бога. И видѣша его вси людіе ходяща и хваляща бога. знаяху же его, яко сeй бяше милостыня ради сѣдяи при красныхъ двeрехъ церковныхъ. и исполнишася чюда и ужаса о приключившемся ему.

Зач., 8.* Держащужеся исцѣлѣвшему хромому петра и іoанна. притекоша къ нимъ вси людіе въ притворъ нарицаемыи соломоновъ, ужасни. Видѣвъ же пeтръ, отвѣщеваше къ людемъ. Мужіе ізраильтяне, что чюдитeся о сeмъ; или на ны что взираете, яко своeю ли силою или благочeстіемъ сотворихомъ его ходити; Богъ авраамовъ, и ісааковъ, и іаковль, богъ отецъ нашихъ, прослави отрока своего ісуса, его же убо вы предасте, и отвергостеся его предъ лицeмъ пилатовѣмъ, судившу оному пустити, вы же святаго и праведнаго отвергостеся, и испросисте мужа убійцу дати вамъ, начальника же жизни убисте, его же богъ воскреси отъ мeртвыхъ, ему же мы свидѣтеле есмы, и о вѣрѣ имени его, сего его же видите и вѣсте, утверди имя его, и вѣра яже его ради, дастъ ему всю цѣлость сію, предъ всѣми вами. И нынѣ мужіе братія вѣмъ, яко по невѣдѣнію се сотвористе, яко же и князи ваши. богъ же, яко же провозвѣсти усты всѣхъ пророкъ своихъ пострадати христу сконча тако.

Зач., 9.* Покайтеся убо и обратитеся, да очиститеся отъ вашихъ грѣхъ, яко да пріидутъ времена прохладна отъ лица господня, и послетъ прeже наречeннаго вамъ, ісуса христа, его же подобаетъ небеси убо пріяти, даже до лѣтъ устроeнія. ихъ же глагола богъ усты всѣхъ святыхъ своихъ пророкъ, отъ вѣка. Моисeй убо ко отецeмъ рече, яко пророка вамъ воздвигнетъ господь богъ вашъ отъ братія вашея, яко же мене, того послушайте о всeмъ, елика аще речeтъ къ вамъ. Будетъ же всяка душа, яже аще не послушаетъ пророка того, потребится отъ людій. и вси же пророцы отъ самуила и прочихъ, елицы глаголаша и возвѣстиша дни сія. вы есте сынове пророкъ, и завѣта, ими же завѣща богъ ко отецeмъ вашимъ, глаголя ко аврааму. и о сѣмени твоeмъ благословятся вся отчествія земная. вамъ пeрвѣе богъ воздвигъ отрока своего ісуса, посла его благословяща васъ, отвращатися комуждо отъ злобъ вашихъ.

Глава, 4.

Зач., 10. Глаголющемъ же имъ къ людемъ, наидоша на нихъ священницы и воевода церковныи, и саддукeе, стужающе си за еже учити имъ люди, и возвѣщати о ісусѣ воскресeніе мертвыхъ. и возложиша на нихъ руцѣ, и по ложиша ихъ въ соблюдeніе до утрѣя, бѣ бо вeчеръ уже. мнози же отъ слышавшихъ слово, вѣроваша, и бысть число мужіи яко тысящь пять. Бысть же на утрѣи собратися князeмъ ихъ, и старцемъ и книжникомъ во іерусалимъ и анна архіерeй, и каіафа. и іoаннъ, и алеxандръ. и елицы бѣша отъ рода архіерeйска. и поставльше ихъ посредѣ, вопрашаху. коею силою, или коимъ именемъ сотвористе се вы; тогда пeтръ исполнився духа свята, рече къ нимъ. князи людстіи, и старцы ізраилевы. аще мы днeсь истязаеми есмы, о благодѣяніи человѣка нeмощна, о чесомъ сeй спасeся, разумно буди всѣмъ вамъ, и всѣмъ людемъ ізраилевомъ, яко во имя ісуса христа назарeя, его же вы распясте, его же богъ воскреси отъ мертвыхъ, о сeмъ сeй стоитъ предъ вами здравъ. Сeй есть камень укорeнныи отъ васъ зиждущихъ, бывыи въ главу углу, и нѣсть о иномъ ни о единомъ же спасeнія. нѣсть бо иного имени подъ небесeмъ, данаго въ человецѣхъ, о нeмъ же подобаетъ спастися намъ.

Зач., 11.* Видяще же петрово дерзновeніе и іoанново. и разумѣвше яко человѣка не книжна еста и проста, дивляхуся, знаяху же ихъ, яко со ісусомъ бѣста. человѣка же видяще съ ними стояща исцѣлѣвшаго, ничтоже имяху противу рещи. Повелѣвше же има вонъ изъ сонмища изыти, стязахуся къ себѣ глаголюще. что сотворимъ человѣкома сима; яко убо разумно знаменіе бысть има, всѣмъ живущимъ во іерусалимѣ явѣ, и не можемъ отврещися. но да не болѣ прострется въ людехъ, прещeніемъ да запрѣтимъ има, ктому не глаголати о имени сeмъ ни единому отъ человѣкъ. и призвавше ихъ, заповѣдаша има отнудъ не провѣщевати, ни учити о имени ісусовѣ. Пeтръ же и іoаннъ, отвѣщавше къ нима рѣста, аще праведно есть прeдъ богомъ, васъ послушати паче, нeжели бога; судите. не можемъ бо мы яже видѣхомъ и слышахомъ, не глаголати. они же призапрѣщьше има, пустиша ихъ. ничтоже обрѣтше како мучити ихъ людіи ради. яко вси прославляху бога о бывшемъ. лѣты бо бяше множае четыредесяте человѣкъ, о нeмъ же бысть чюдо сіе исцѣлeнія.

Зач., 12.* Отпущeна же бывша, пріидоста къ своимъ, и возвѣстиста елика къ нимъ архіерeи и старцы рѣша. они же слышавше, единодушно воздвигоша гласъ къ богу, и рекоша. владыко ты боже сотворивыи небо и зeмлю и море, и вся яже въ нихъ. иже духомъ святымъ усты отца нашего давида отрока твоего рекіи. Вскую шаташася языцы, и людіе поучишася тщeтнымъ. присташа царіе зeмстіи. и князи собрашася вкупѣ, на господа и на христа его. Собрашабося воистинну во градѣ сeмъ, на святаго отрока твоего ісуса, его же помаза, иродъ же и понтeйскіи пилатъ, съ языкы и людми ізраилевыми, сотворити елика рука твоя и совѣтъ твой прeжде нарече быти. И нынѣ господи, призри на прещeнія ихъ, и даждь рабомъ твоимъ со всѣмъ дерзновeніемъ глаголати слово твое, внегда руку твою прострeти, во исцѣлeнія, и знаменія и чюдеса бывати именемъ святымъ отрока твоего ісуса. и помолившемся имъ, подвижеся мѣсто идѣже бяху собрани, и исполнишася вси духа свята. и глаголаху слово божіе съ дерзновeніемъ. Народу же вѣровавшимъ, бѣ сердце и душа едина, и ни единъ же что отъ имѣнія своего глаголаше свое быти, но бяху имъ вся обща, и вeліею силою воздаяху свѣдѣтельство апостоли воскреснію господа ісуса. Благодать же бѣ вeлія на всѣхъ ихъ. не бяше бо лишeнъ ни единъ въ нихъ. елицы бо господіе сeломъ или домовомъ бяху, продающе приношаху цѣны продаeмыхъ и полагаху при ногахъ апостолъ. даяшежеся комуждо еже аще кто требоваше. Іoсіи же наречeнныи варнава, отъ апостолъ, еже есть сказаемо сынъ утѣшeнія, леввитъ, кипрянинъ родомъ, имѣя село, продавъ принесе цѣну, и положи предъ ногама апостолъ.

Глава, 5.

Зач., 13. Мужъ же нѣкіи, ананія именемъ, съ сапфирою женою своeю продаста село, и утаи отъ цѣны свѣдущи и женѣ его, и принесе часть нѣкую предъ ногама апостолъ положи. Речe же пeтръ, ананіе, почто исполни сатана сердце твое, солгати духу святому, и утаити отъ цѣны села; не сущее ли твое бѣ, и продано въ твоeй области бяше; что яко положи вeщь сію въ сердцы своeмъ; не солга человѣкомъ, но богу. Слышавъ же ананія словеса сія, падъ издъше. и бысть страхъ великъ на всѣхъ слышащихъ сія. воставше же юноша, стребиша его. И изнeсше погребоша. Бысть же яко трeмъ часомъ минувшемъ, и жена его не вѣдущи бывшаго, вниде. отвѣщавъ же ей пeтръ. Рцы ми аще на толицѣ село отдаста; она же рече, ей, на толицѣ. пeтръ же рече къ нeй, что яко согласистася искусити духъ господень; се ноги погрeбшихъ мужа твоего при двeрехъ, и изнесутъ тя. падe же абіе предъ ногама его, и издъше. вшeдше же юноша, обрѣтоша ю мeртву. И изнeсше погребоша ю у мужа ея. и бысть страхъ великъ на всeй церкови и на всѣхъ слышащихъ сія.

Зач., 14.* Рукама же апостольскама быша знаменія и чюдеса въ людехъ многа. и бяху единодушно вси въ притворѣ соломони. отъ прочихъ же никтоже смѣяше прилѣплятися имъ, но величаху ихъ людіе, паче же прилагахуся вѣрующіи господви множество мужeй и жeнъ. Яко и на распутіяхъ износити недужныя, и полагати на постeляхъ и на одрѣхъ, да грядущу петру, поне сѣнь осѣнитъ нѣкоего отъ нихъ. схожашежеся множество, отъ окрeстныхъ градовъ во іерусалимъ, приносяще недужныя, и страждущая отъ духъ нечистыхъ, иже исцѣлевахуся вси. Воставъ же архіерeй, и вси иже съ нимъ, сущая ересь саддукeйская, исполнишася зависти. и возложиша руки своя на апостолы, и послаша ихъ въ соблюдeніе общее. Ангелъ же господень, нощію отвeрзе двeри темници. извeдъ же ихъ, рече. идѣте, и ставше глаголите въ церкови людемъ вся глаголы жизни сея.

Зач., 15.* Слышавше же внидоша по утреници въ церковь, и учаху. Пришeдъ же архіерeй, и иже съ нимъ, созваша соборъ, и вся старца сыновъ ізраилевъ, и послаша во узилище привести ихъ. слуги же шeдше, не обрѣтоша ихъ въ темницы. возвратившежеся возвѣстиша глаголюще, яко убо темницу обрѣтохомъ заключeну со всяцѣмъ утвержeніемъ, и блюстителя стояща предъ двeрми, отвeрзше же внутрь ни единого обрѣтохомъ. Яко же слышаша словеса сія, священникъ же и воевода церковныи, и архіерeй, недоумѣвахуся о нихъ, что убо будетъ се. Пришeдъ же нѣкто возвѣсти имъ, яко се мужіе ихъ же всадисте въ темницу, суть въ церкови стояще, и учаще люди. Тогда шeдъ воевода со слугами, и приведе ихъ, но не съ нужею. бояхубося людіи, да не побіютъ ихъ каменіемъ. привeдше же ихъ поставиша на сонмищи. И вопроси ихъ архіерeй, глаголя. не запрѣщeніемъ ли запрѣтихомъ вамъ, не учити о имени сeмъ; и се испо лнисте іерусалимъ учeніемъ вашимъ, и хощете навести на ны кровь человѣка сего; отвѣщавъ же пeтръ и апостоли рѣша. вѣровати подобаетъ богови, паче, нeжели человѣкомъ. богъ отецъ нашихъ воздвиже ісуса, его же вы убисте повѣшьше на древѣ. сего богъ началника и спаса вознeсъ десницею своeю, дати покаяніе ізраилеви и оставлeніе грѣхомъ. и мы есмы того свѣдѣтеле глаголомъ симъ, и духъ же святыи, его же дастъ богъ вѣровавшимъ ему. они же слышавше надымахуся. и совѣщаша убити ихъ. Воставъ же нѣкіи на сонмищи фарисeй именемъ гамаліилъ, законоучитель, чтомъ всѣми людми, повелѣ, внѣ мало что апостоломъ уступити. речe же къ нимъ, мужіе ізраильтяне, внимайте себѣ о человецѣхъ сихъ, что хощете сотворити. предъ сими бо деньми воста ѳeвда, глаголя быти нѣчто себе, ему же прилѣпишася числомъ мужіи яко четыреста, иже убіeнъ бысть, и вси елицы вѣроваша ему, разыдошася, и быша ни во что же. Посeмъ воста іюда галилeянинъ во дни написанія, и отвлече люди довольны въ слѣдъ себе. и той погибе и вси елицы послушаша его, разсыпашася. и нынѣ глаголю вамъ, отступите отъ человѣкъ сихъ, и оставите ихъ. яко аще будетъ отъ человѣкъ совѣтъ, или дѣло се, разорится. аще ли же отъ бога есть, не можете разорити то, еда како и богоборцы обрящетеся. послушаша же его, и призвавше апостолы, бивше запрѣтиша имъ, не глаголати о имени ісусовѣ, и отпустиша ихъ. они же убо идяху радующеся отъ лица собору, яко за имя его сподо бишася бесчeстіе пріяти. во вся же дни въ церкови, и въ домѣхъ не престаяху учаще, и благовѣствующе ісуса христа.

Глава, 6.

Зач., 16. Во днехъ же сихъ, умножившемся ученикомъ, бысть роптаніе еллиномъ ко еврeoмъ, яко презрими бываху въ служeніи повседнeвнѣмъ вдовица ихъ. Призвавше же дванадесятіи множество ученикъ, рѣша. не угодно есть намъ оставльшемъ слово божіе, служити трапeзамъ. усмотрите убо братіе мужа отъ васъ свидѣтельствованы сeдмь, исполнены духа свята и премудрости, ихъ же поставимъ надъ службою сею. мы же въ молитвѣ и служeніи слова пребудемъ. и угодно бысть слово се предъ всѣмъ народомъ. И избраша стефана, мужа исполнена вѣры и духа свята, и филиппа, и прохора, и никонора, и тимона, и пармeна, и николая пришeлца антіoхійскаго, ихъ же поставиша предъ апостолы, и помолившеся, возложиша на ня руцѣ. и слово божіе растяше, и множашеся число ученикъ во іерусалимѣ зѣло. и многъ народъ священникъ, послушаху вѣрою.

Зач., 17.* Стефанъ же исполнь вѣры и силы, творяше знаменія и чюдеса, вeлія въ людехъ. восташа же нѣцыи отъ сонма глаголемаго ливертинска, и киринeйска, и алеxандрьска, и иже отъ киликія и асія, состязающеся со стефаномъ, и не можаху противу стати премудрости, и духу имъ же глаголаше. Тогда изведоша мужа, глаголюща, яко слышахомъ его глаголюща глаголы хулны на моисeя и на бога. сподвигоша же люди и старца и книжники, и воставше восхитиша его, и приведоша на сонмище. поставиша же свѣдѣтеля ложны, глаголюща. Яко человѣкъ сeй не престаетъ глаголы хулныя глаголя, на мѣсто святое сіе и законъ. Слышахомъ бо его глаголюща, яко ісусъ назарeй сeй разоритъ мѣсто сіе, и измѣнитъ обычая, яже предаде намъ моисeй. И возрѣвше нань вси сѣдящеи въ сонмищи, видѣша лице его яко лице ангелу.

Глава, 7.

Речe же архіерeй. аще убо сія тако суть; онъ же рече, мужіе братія и отецы послушайте. богъ славы явися отцу нашему аврааму, сущу въ междорѣчіи, прeжде даже не вселитися ему въ харрань. И рече къ нему, изыди отъ земля твоя и отъ рода твоего, и отъ дому отца твоего, и пріиди въ зeмлю, ея же аще ти покажу. тогда изыде отъ земля халдѣйскія, вселися въ харрань. И оттуду по умeртіи отца его, пресели его въ зeмлю сію, на нeй же вы нынѣ живете. и не дастъ ему наслѣдія въ нeй, ни стопы нозѣ. И обѣща дати ему въ одержаніе ея, и сѣмени его по нeмъ. не сущу ему чаду. глагола же сице богъ, яко будетъ сѣмя его пришeлцы въ земли чюждeй, и поработятъ е, и озлобятъ лѣтъ четыреста. и языку ему же поработаютъ, сужу азъ, рече богъ. и посихъ изыдутъ и послужатъ ми на мѣстѣ сeмъ. и дастъ ему завѣтъ обрѣзанія. и тако роди ісаака, и обрѣза его въ день осмыи. И ісаакъ іякова. и іяковъ оба надесяте патріарха. и патріарси, позавидѣвше іосифу, продаша его во египетъ. и бѣ богъ съ нимъ. и изятъ его отъ всѣхъ скорбeй его, и дастъ ему благодать и премудрость предъ фараономъ царeмъ египетскимъ, и постави его вождя надъ египтомъ и надо всѣмъ домомъ своимъ. пріиде же гладъ на всю зeмлю египетскую, и ханааню, и скорбь вeлія, и не обрѣтаху сытости отецы наши. слышавъ же іаковъ сущую пшеницу во египтѣ, посла отца наша пeрвѣе, и внегда второе пріидоша познанъ бысть іосифъ братіи своeй, и явѣ бысть фараонови родъ іосифовъ. Пославъ же іосифъ, призва отца своего іякова, и вeсь родъ душъ сeдмьдесятъ и пять. сниде же іяковъ во египетъ, и скончася самъ и отецы наши. и принесeни быша въ сихeмъ. и положeни быша во гробѣ, еже купи авраамъ цѣною сребра, отъ сыновъ емморовъ сихeма. и яко же приближашеся врeмя обѣтованія, иже клятся богъ аврааму, возрастоша людіе, и умножишася во египтѣ, дондеже наста царь инъ иже не знаяше іосифа. сeй злѣ умысливъ о родѣ нашемъ, и озлоби отца наша уморити младенца ихъ и не оживити. въ нeже врeмя родися моисeй, и бѣ угоденъ богови, иже воспитанъ бысть месяца три въ дому отца своего. отвeржену же ему, взятъ его дщи фараонова, и воспита его себѣ въ сына, и наказанъ бысть моисeй всeй премудрости египетстѣй. бѣ же силенъ въ дѣлехъ и словесѣхъ. и яко же наполняшеся ему четыредесятъ лѣтъ врeмя, взыде на сердце ему посѣтити братію свою сыны ізраилевы. и видѣвъ нѣкоего обидима, пособьствова, и сотвори отмщeніе обидимому убивъ египтянина. мняше же разумѣти братіямъ своимъ, яко богъ рукою его дастъ имъ спасeніе. они же не разумѣша. во утрѣи же день, явися имъ тяжущемся, и привлачаше ихъ во смирeніе, рeкъ, мужіе братія есте вы, вскую обидите другъ друга; обидяи же ближняго отрину и рeкъ, кто тя постави князя и судію надъ нами; еда убити мя ты хощеши, имъ же образомъ убилъ еси вчера египтянина; Бѣжа же моисeй о словеси сeмъ, и бысть пришлeцъ въ земли мадіамстѣй, идѣже роди сына два. и исполньшемся лѣтомъ четыредесяте, явися ему въ пустыни горы синайскія ангелъ господень, въ пламени огненѣ въ купинѣ. моисeй же видѣвъ, дивляшеся видѣнію. приступающу же ему разумѣти, бысть гласъ господень къ нему, азъ богъ отецъ твоихъ. Богъ авраамовъ, богъ ісааковъ, и богъ іаковль. трeпетенъ же бывъ моисeй, не смѣяше смотрити. речe же ему господь, разрѣши сапогъ ногу твоeю, мѣсто бо на нeмъ же стоиши, земля свята есть. Видя видѣхъ озлоблeніе людіи моихъ, иже во египтѣ, и стенаніе ихъ услышахъ, и снидохъ изяти ихъ, и нынѣ гряди и послю тя во египетъ. сего моисeя, его же отринуша, рeкше, кто тя постави князя и судію; сего богъ князя и избавителя посла рукою ангела явльшагося ему въ купинѣ. Сeй изведе ихъ, сотворивъ чюдеса и знаменія въ земли египетстѣй, и въ чермномъ мори. и въ пусты ни, лѣтъ четыредесять. Сeй есть моисeй, рекіи сыномъ ізраилевомъ. пророка вамъ воздвигнетъ господь богъ вашъ отъ братія вашея, яко мене того послушайте. Сeй есть бывыи въ церкови въ пустыни со ангеломъ глаголавшемъ ему въ горѣ синайстей, и отецeмъ нашимъ, иже пріятъ словеса жива дати намъ. его же не восхотѣша послушати отецы наши, но отринуша и, и обратишася сердцемъ своимъ во египетъ, рeкше аарону, сотвори намъ боги иже предидутъ предъ нами. моисeй бо сeй иже изведе насъ отъ земля египетскія, не вѣмы что бысть ему. и телeцъ сотвориша во дни оны и принесоша жeртву идолу. и веселяхуся въ дѣлехъ руку своeю. отвратижеся богъ и предаде ихъ служити воемъ небеснымъ. яко же пишетъ въ книзѣ пророкъ. еда заколeнія и жeртвы принесосте ми лѣтъ четыредесяте, въ пустыни, доме ізраилевъ; и воспріясте кровь молоховъ, и звѣзду бога вашего ремфана, образы яже сотвористе поклонятися имъ. и преселю вы далее вавилона. сѣнь свидѣнія бяше отецeмъ нашимъ въ пустыни, яко же повелѣ глаголяи моисeoви, сотворити ю по образу его же видѣ. ея же и внесоша пріeмше отецы наши со ісусомъ, во одержаніе языкомъ. ея же изрину богъ отъ лица отецъ нашихъ даже до дніи давида, иже обрѣте благодать прeдъ богомъ, и испроси обрѣсти селeніе богу іаковлю. Соломонъ же созда ему храмъ. но вышніи не въ рукотворeнахъ церковахъ живeтъ, яко же пророкъ глаголетъ. небо мнѣ престолъ есть, земля же подножіе ногама моима. кіи храмъ созиждете ми глаголетъ господь, или кое мѣсто покоищу моему; не рука ли моя сотвори сія вся; жестоковыйни, и необрѣзани сердцы и ушесы, вы присно духу святому противитеся, яко же отецы ваши, тако и вы. кого отъ пророкъ не изгнаша отецы ваши; и убиша провозвѣстившая о пришeствіи праведнаго, ему же вы нынѣ предателе и убійца бысте. Иже пріясте законъ повелѣніемъ ангелъ, и не сохранисте. Слышаще же сія, распыхахуся сердцы своими, и скрежетаху зубы нань. Стефанъ же сыи исполнь духа свята, возрѣвъ на небо, видѣ славу божію, и ісуса стояща одесную бога. и рече, се вижу небеса отвeрста, и сына человеча одесную стояща бога. возопивше же гласомъ вeліемъ, затыкаху уши свои, и устремишася единодушно нань. И извeдше внѣ града, каменіемъ побиваху его. и свѣдѣтеліе положиша ризы при ногу юноша нарицаемаго савла. и каменіемъ побиваху стефана молящася и глаголюща. господи ісусе, пріими духъ мой. Преклонь же колѣни, и возопи гласомъ вeліемъ, господи, не постави имъ грѣха сего. и сія рeкъ успе.

Глава, 8.

Савлъ же бѣ, соизволяя убійству его. Бысть же въ той день гонeніе вeліе на церковь іерусалимскую, вси же разсѣяшася по странахъ іудeйскахъ, и самарійскахъ, кромѣ апостолъ. Стребиша же стефана мужіе благоговѣйни, и сотвориша плачь великъ надъ нимъ. Савлъ же озлобляше церковь, по домохъ входя, влача же мужа и жены, предаяше въ темницу. они же убо разсѣявшеся, проидоша благовѣствующе слово.

Зач., 18.* Филиппъ же сошeдъ во градъ самарійскіи, проповѣдаше имъ христа. Внимаху же народи глаголемымъ отъ филиппа единодушно, слышаще и видяще знаменія яже творяше. многимъ бо имущимъ духи нечисты, вопіюще гласомъ вeліемъ исхожаху. мнози же раслабленіи и хроміи исцѣлишася. и бысть радость вeлія во градѣ томъ. Мужъ же нѣкіи именемъ симонъ, прeже бѣ во градѣ волхвуя, и удивляя языкъ самарійскіи, глаголя быти нѣкоего себе велика, ему же внимаху отъ мала даже до велика глаголюще, се есть сила божія великая. Внимаху же ему, за еже довольно врeмя волхвованіи удивляти ихъ. Егда же вѣроваша филиппу благовѣствующу яже о царствіи божіи, и о имени ісусъ христовѣ, крещахуся мужіе же и жены. Симонъ же, и той вѣрова, и крещъся, бѣ же пребывая у филиппа. видя же силы и знаменія вeлія бываема, дивляшеся. Слышавше же иже во іерусалимѣхъ апостоли яко пріятъ самарія слово божіе, послаша къ нимъ петра и іoанна, иже сошeдше, помолишася о нихъ, яко да пріимутъ духъ святыи. не у бо бѣ ни на единаго же сниде, точію же крещeни бяху во имя господа ісуса. Тогда возложиша руцѣ на ня и пріяша духъ святъ.

Зач., 19.* Видѣвъ же симонъ яко возложeніемъ рукъ апостолъ даeтся духъ святыи, принесе имъ сребро глаголя, дадите и мнѣ власть сію, да на него же аще положу руцѣ, пріиметъ духъ святъ. Пeтръ же рече къ нему, сребро твое съ тобою да будетъ въ погибель, яко даръ божіи непщевалъ еси сребромъ стяжати. Нѣсть ти части ни жрeбія въ словеси сeмъ. ибо сердце твое нѣсть право прeдъ богомъ. покайся убо о злобѣ твоeй сeй, и молися богу, аще убо отпуститътися помышлeніе сердца твоего. Въ жeлчи бо горести, и соузѣ неправды зрю тя суща. отвѣщавъ же симонъ, рече. помолитеся вы о мнѣ ко господу, яко да ничтоже найдетъ на мя, ихъ же рекосте. они же убо засвѣдѣтельствовавше и глаголавше слово господне, возвратишася во іерусалимъ, многимъ же вeсемъ самарійскимъ благовѣстиша.

Зач., 20.* Ангелъ же господень рече къ филиппу, глаголя, востани и иди на полудне, на путь, сходящіи отъ іерусалима въ газу, и той есть пустъ. И воставъ пойде, и се мужъ муринъ, евнухъ силенъ, кандакія царицы мурскія, иже бѣ надо всeю газы тоя. иже пріиде поклонитися во іерусалимѣ. Бѣ же возвращаяся и сѣдя на колесницы своeй, и чтяше пророка ісаію. Речe же духъ къ филиппу, приступи, и прилѣпися колесницы сeй. Притeкъ же филиппъ, услыша его чтуща пророка ісаію. И рече, убо разумѣеши ли яже чтeши; онъ же рече, како убо могу, аще не кто наставитъ мя; умоли же филиппа возшeдша сѣсти съ нимъ. Слово же писанія еже чтяше, бѣ се. Яко овча на заколeніе ведeся, и яко агнецъ прямо стригущему его безгласенъ, тако не отверзаетъ устъ своихъ. Во смирeніи его, судъ его взятся. Родъ же его кто исповѣсть; яко взeмлется отъ земля животъ его. отвѣщавъ же каженикъ къ филиппу рече. молю тя, о комъ пророкъ глаголетъ се. о себѣ ли, или о иномъ нѣкоемъ. отвeрзъ же филиппъ уста своя, и начатъ отъ писанія сего, благовѣстити ему ісуса. и яко же идяху путeмъ, пріидоша на нѣкую воду. И рече каженикъ. се вода, что возбраняетъ ми креститися; Речe же ему филиппъ, аще вѣруеши отъ всего сердца своего, мощно ти есть. отвѣщавъ же рече, вѣрую сына божія быти ісуса христа. И повелѣ стати колесницы. и слѣзоста оба на воду, филиппъ же и каженикъ, и крести его. егда же взыдоша отъ воды, духъ святыи нападе на каженика. ангелъ же господень восхити филиппа, и не видѣ его ктому каженикъ. идяше бо въ путь свой радуяся.

Зач., 21.* Филиппъ же обрѣтеся во азотѣ. и проходя благовѣствоваше градомъ всѣмъ, дондеже пріити ему въ кесарію.

Глава, 9.

Савлъ же еще дыхая прещeніемъ, и убійствомъ на ученики господня, приступль ко архіерeю, испроси отъ него посланія въ дамаскъ, къ соборищемъ, яко да аще нѣкія обрящетъ на пути суща мужа и жены, связаны приведeтъ во іерусалимъ. внегда же идущу, бысть ему приближитися къ дамаску, и внезапу облиста его свѣтъ отъ небесе, и падъ на землю, слыша гласъ глаголющь ему. савле савле что мя гониши; речe же, кто еси господи; господь же рече. азъ есмь ісусъ, его же ты гониши. жестоко ти есть противу рожну прати. трeпетенъ же и недоумѣяся рече. господи, что хощеши да сотворю; господь же рече къ нему. но востани и вниди во градъ, и речeтътися что ти подобаетъ творити. мужіе же идущеи съ нимъ, стояху чюдящеся, слышаще убо гласъ, никогоже видяще. воставъ же савлъ отъ земля отвeрстома очима его, ни единаго видяше. водяще же его за руку, введоша въ дамаскъ. и бѣ дни три не видя, и ни ястъ ни питъ.

Зач.* Бѣ же нѣкто ученикъ пeрвыи въ дамасцѣ, именемъ ананія. и рече къ нему господь въ видѣніи, ананіе. онъ же рече, се азъ господи. господь же къ нему. воставъ поиди на стогну нарицаемую праву, и взыщи въ дому іудовѣ, савла именемъ тарсянина. се бо молитву дѣетъ. и видѣ въ видѣніи мужа именемъ ананію вшeдша и возложша нань руку, яко да прозритъ. отвѣщавъ же ананія, господи, слышахъ отъ многъ о мужи сeмъ, колика зла сотвори святымъ твоимъ во іерусалимѣ. и здѣ имать власть отъ архіерей, связати вся нарицающая имя твое. речe же къ нему господь. иди, яко сосудъ избранъ ми есть сeй, пронести имя мое предъ языки и царьми, и сынъми ізраилевыми. азъ бо скажу ему, елика подобаетъ ему о имени моeмъ пострадати. пойде же ананія, и вниде въ храмину, и возложь нань руцѣ, рече. савле брате, господь посла мя ісусъ, явлeитися на пути, имъ же идяше, яко да прозриши, и исполнишися духа свята. и абіе отпадоша отъ очію его яко чешуя, прозрѣ же абіе, и воставъ крестися. и пріeмъ пищу укрѣпися.

Зач., 22.* Бысть же савлъ съ сущими въ дамасцѣ ученикы дни нѣкія. и абіе на сонмищихъ проповѣдаше ісуса, яко сeй есть сынъ божіи. дивляхужеся вси слышащеи, и глаголаху, не сeй ли есть гонивыи во іерусалимѣ нарицающая имя сіе, и здѣ на се пріиде, да связаны тѣхъ приведeтъ ко архіерeoмъ; савлъ же паче крѣпляшеся, и смущаше іудея живущая въ дамасцѣ, препирая, яко се есть христосъ. яко же исполнишася дніе доволни, совѣщаша іудeе убити его. увѣденъ же бысть савлу совѣтъ ихъ. стрѣжаху же врата день и нощь, яко да убіютъ того. поeмше же его ученицы нощію свѣсиша по стенѣ въ кошницы. пришeдъ же савлъ во іерусалимъ, покушашеся прилѣплятися ученицѣхъ. и вси бояхуся его, не вѣрующе яко есть ученикъ. варнава же пріeмъ его приведе ко апостоломъ, и повѣда имъ, како на пути видѣ господа, и яко глагола ему, и како въ дамасцѣ дерзаяше о имени ісусовѣ. и бѣяше съ ними входя и исходя во іерусалимѣ, и дерзая о имени господа ісуса. глаголаше же и стязашеся съ еллины. они же искаху его убити. разумѣвше же братія, сведоша его въ кесарію, и отпустиша въ тарсъ. церкови же убо по всeй іудeи и галилeи и самаріи имяху миръ, созидающеся и ходяще во страсѣ господни, и утѣшeніемъ святаго духа умножахуся.

Зач., 23.* И бысть петру посѣщающу всѣхъ, снити и ко святымъ живущимъ въ лидѣ. обрѣте же ту человѣка нѣкое го, енeя именемъ, отъ осми лѣтъ лежаща на одрѣ, иже бѣ разслабленъ. И рече ему пeтръ. енeя, исцѣляетъ тя ісусъ христосъ. востани съ постeля твоея. и абіе воста. и видѣша его вси живущеи въ лидѣ и во ассаронѣ иже обратишася ко господу. Во іoпіи же бѣ нѣкая ученица именемъ тавиѳа, яже сказаема глаголется сeрна. сія бяше исполнена благихъ дѣлъ и милостыня ихъ же творяше. бысть же во дни ты, болѣвши ей умрети. омывше же ю, положиша въ горницы. близъ же сущи лидѣ іoпіи, ученицы же слышавше, яко пeтръ есть въ нeй, послаша два мужа къ нему, моляще, не обленитися пріити до нихъ. воставъ же пeтръ, иде съ ними. его же пришeдша возведоша въ горницу, и предсташа ему вся вдовица плачуще, и показующе ризы и одeжа елика творяше съ ними сущи сeрна. изгнавъ же вонъ вся пeтръ, и преклонь колѣнѣ помолися, и обращься къ тѣлу рече, тавиѳа востани. она же отвeрзе очи свои, и видѣвши петра, сѣде. подавъ же ей руку, востави ю, призвавъ же святыя и вдовица, постави ю живу. увѣдано же бысть се по всeй іoпіи, и мнози вѣроваша въ господа. бысть же дни доволны пребыти ему во іoпіи у нѣкоего симона усмаря.

Глава, 10.

Зач., 24. Мужъ же нѣкіи бѣ въ кесаріи, именемъ корниліе, сотникъ. отъ спиры нарицающаяся италійскія. благо говѣинъ, и бояся бога со всѣмъ домомъ своимъ. творя же милостыня многы людемъ, и моляся богу всегда. видѣ въ видѣніи явѣ, яко въ часъ девятыи дне, ангела божія сошeдша къ нему, и рeкша ему. корниліе. онъ же возрѣвъ нань, и пристрашенъ бывъ, рече. что есть господи; речe же ему. молитвы твоя и милостыня твоя, взыдоша на память прeдъ богомъ. и нынѣ посли во іoпію мужа и призови симона нарицаемаго петра. сeй страничествуетъ у нѣкоего симона усмаря, ему же есть храмъ при мори. той речeтъ тебѣ глаголы, въ нихъ же спасeшися ты и вeсь домъ твой. и яко же отиде ангелъ глаголяи корнилію, пригласивъ два отъ рабъ своихъ, и воина благочестива отъ служащихъ ему. и сказавъ имъ вся, посла ихъ во іoпію. Во утрѣи же идущемъ имъ по пути, и ко граду приближающимся, взыде пeтръ на горницу помолитися, въ часъ шестыи. бысть же пріалченъ, и хотяше вкусити. готовящемъ же онѣмъ, нападе нань ужасъ, и видѣ небо отвeрсто, и сходящь нань сосудъ нѣкіи яко плащаницу велику, отъ четыри края привязанъ, и низу висящь на землю, въ нeмъ же бяху вся четверо нога земли, и звѣріе, и гади, и птица небесныя. и бысть гласъ къ нему, воставъ пeтре заколи, и яждь. пeтръ же рече, никакоже господи. яко николиже ядохъ всяко сквeрно или нечисто. И се гласъ паки къ нему вторицею, яже богъ очистилъ есть, ты не скверни. се же бысть трищи. и пакы взятся сосудъ на небо. Яко же въ себѣ дивляшеся пeтръ, что убо будетъ видѣніе еже видѣ, и се мужіе посланіи отъ корнилія вопрошше, и увѣдѣвше дому симонова, сташа предъ враты, и возглашше вопрошаху, аще симонъ, нарицаемыи пeтръ здѣ обитаетъ. петру же помышляющу о видѣніи, рече ему духъ, се мужіе ищутъ тебе, но воставъ сниди, и иди съ ними, ничтоже разсужая, зане азъ послахъ ихъ.

Зач., 25.* Сошeдъ же пeтръ къ мужeмъ и рече. се азъ есмь его же ищете. Что есть вина, ея же ради пріидосте; они же рекоша, корниліе сотникъ, мужъ праведенъ и бояся бога, свѣдѣтельствованъ отъ всего языка іудeйска. Глаголано бысть ему отъ ангела свята, призвати тя въ домъ свой, и слышати глаголы отъ тебе. призвавъ же ихъ учреди. На утрѣи же пeтръ воставъ иде съ ними. и нѣцыи отъ братія еже отъ іoпіи идоша съ нимъ. И на утрѣи внидоша въ кесарію. корниліе же бѣ чая ихъ созвавъ сродники своя, и любeзныя други. Яко же бысть внити петру, срѣте его корниліе, падъ на ногу его поклонися. Пeтръ же его воздвиже глаголя, востани, и азъ самъ человѣкъ есмь. и съ нимъ бесѣдуя вниде, и обрѣте собравшася многи. Речe же къ нимъ, вы вѣсте, яко не лѣпо есть мужу іудeянину, прилѣплятися или приходити ино племeннику. И мнѣ богъ показа, ни единого же сквeрна или нечиста глаголати человѣка, тѣмъ же и безъ сумнѣнія пріидохъ призванъ. вопрошаю вы, убо коимъ словомъ посласте по мене; И корниліе рече. отъ четвeртаго дне даже до сего часа бѣхъ постяся, и въ девятыи часъ моляхся въ дому моeмъ. и се мужъ ста предо мною во одeжи свѣтлѣ. И рече, корниліе, услышана бысть молитва твоя и милостыня твоя помянушася прeдъ богомъ. Посли убо во іoпію, и призови симона, иже нарицается пeтръ, сeй обитаетъ въ дому симона усмаря, близъ моря, иже пришeдъ глаголетъ тебѣ. абіе убо послахъ къ тебѣ. ты же добрѣ сотвори пришeдъ. Нынѣ убо вси мы прeдъ богомъ пріидохомъ, слышати вся повелѣнная тебѣ отъ бога.

Зач., 26.* Отвeрзъ же пeтръ уста рече, по истинѣ разумѣваю, яко не на лица зритъ богъ. но во всякомъ языцѣ бояися его и дѣлаяи правду, пріятенъ ему есть. Слово еже посла сыномъ ізраилевомъ, благовѣствуя миръ ісусъ христомъ, сeй есть всѣмъ господь. вы вѣсте глаголъ бывшіи по всeй іудeи, начeнъ отъ галилeя, по крещeніи еже проповѣда іoаннъ. Ісуса иже отъ назарeта, яко помаза его богъ духомъ святымъ и силою, иже пріиде благодѣтельствуя, и исцѣляя вся насилованныя отъ діявола, яко богъ бяше съ нимъ. и мы есмы свѣдѣтеле всѣмъ, ихъ же сотвори въ странѣ іудeйстѣй, и во іерусалимѣ, его же и убиша повѣшше на древѣ. сего богъ воздвиже трeтіи день, и даде ему явѣ быти не всѣмъ людемъ, но свѣдѣтелемъ прeжде наречeннымъ отъ бога намъ, иже ядохомъ съ нимъ и пихомъ по воскресeніи его отъ мертвыхъ. и повелѣ намъ проповѣдати людемъ, и засвѣдѣтельствовати, яко той есть наречeнныи отъ бога судія живымъ и мeртвымъ. о сeмъ вси пророцы свѣдѣтельствуютъ, оставлeніе грѣхомъ пріяти именемъ его всякому вѣрующему вонь.

Зач., 27.* Ещe же глаголющу петру глаголы сія, нападе духъ святыи на вся слышащая слово. И ужасошася иже отъ обрѣзанія вѣрніи, елицы пріидоша съ петромъ, яко и во языцѣхъ даръ святаго духа изліяся. слышаху бо ихъ глаголюща языкы и величающа бога. Тогда отвѣща пeтръ. еда воду возбранити можетъ кто, еже не креститися симъ, иже духъ святыи пріяша яко же и мы; повелѣ же имъ креститися во имя гдcне. тогда молиша его пребыти дни нѣкыя.

Глава, 11.

Слышаша же апостоли, и братія сущіи во іудeи, яко и языцы пріяша слово божіе. и егда взыде пeтръ во іерусалимъ, препирахуся съ нимъ иже отъ обрѣзанія, глаголюще, яко къ мужeмъ обрѣзанія не имущимъ вниде и яде съ ними. Начeнъ же пeтръ, сказаше имъ по ряду, глаголя. Азъ бѣхъ во градѣ іoпійстемъ моляся, и видѣхъ во ужасѣ видѣніе, сходящь сосудъ нѣкіи яко плащаницу вeлію отъ четыри края висящу съ небесъ, и пріиде даже до мене, въ нюже возрѣвъ сматряхъ, и видѣхъ четвероногая, и звѣря земныя и гады и птица небесныя. И слышахъ гласъ глаголющь мнѣ, воставъ пeтре заколи, и яждь. Рѣхъ же, никакоже господи, яко всяко сквeрно ли нечисто николиже вниде во уста моя. отвѣща же ми гласъ вторицею съ небесе глаголющь, яже богъ очисти, ты не скверни. се же бысть третицею, и пакы взяшася вся на небо. И се абіе тріе мужи сташа предъ храминою, въ нeй же бѣхъ, послани отъ кесарія ко мнѣ. речe же ми духъ ити съ ними, ничтоже разсужая. Пріидоша же со мною и шeсть братія сіи, и внидохомъ въ домъ мужа. сказа же намъ, како видѣ ангела свята въ дому своeмъ, ставша и рeкша ему, посли во іопъ мужа, и призови симона нарицаемаго петра, иже речeтъ глаголы къ тебѣ, въ нихъ же спасeшися ты и вeсь домъ твой. внегда же начахъ глаголати, нападе духъ святыи на нихъ, яко же и на ны въ началѣ. помянухъ же глаголъ господень, яко же глаголаше. іoаннъ убо крести водою, вы же имате креститися духомъ святымъ. да аще убо равенъ даръ даде имъ богъ, яко же и намъ вѣровавшимъ въ господа ісуса христа, азъ же кто бѣхъ силенъ возбранити бога; Слышавше же сія умолкоша, и славляху бога, глаголюще, убо и языкомъ богъ покаяніе дастъ въ животъ.

Зач., 28.* Ови же убо разсѣяни быша отъ скорби бывшая при стефанѣ, проидоша до финикія, и кипра, и антіoхія, ни единому же глаголюще слова, токмо единѣмъ іудeoмъ. Бяху же нѣцыи отъ нихъ мужіе кипрстіи, и киринeйстіи, иже вшeдше во антіoхію, глаголаху къ еллиномъ, благовѣствующе господа ісуса. и бѣ рука господня съ ними, много же число вѣровавше, обратишася ко господу. слышано же бысть слово во ушію церкове, сущей же во іерусалимѣхъ о нихъ, и послаша варнаву преити до антіoхія. иже пришeдъ, и видѣвъ благодать божію, воз радовася, и моляше всѣхъ изволeніемъ сердца терпѣти о господѣ, яко бѣ мужъ благъ, и исполнь духа свята и вѣры. и при ложися народъ многъ господви. Изыде же въ тарсъ варнава, взыскати савла. и обрѣтъ его, приведе и во антіoхію. бысть же имъ лѣто цѣло собиратися въ церкови, и учити народъ многъ, нарещи же прeжде во антіoхіи ученикы христіаны. Въ тыя же дни снидошася отъ іерусалима пророцы во антіoхію. воставъ же единъ отъ нихъ именемъ агавъ, назнаменаше духомъ, гладъ великъ хотящъ быти по всeй вселeннѣй, иже и бысть при клавдіи кeсари. Ученикы же, аще имѣяше кто. повелѣша кождо ихъ на службу послати живущимъ во іудeи братіямъ, еже и сотвориша, пославше къ старцемъ рукою варнавлею и савлею.

Глава, 12.

Зач., 29. Въ оно же врeмя, возложи иродъ царь руцѣ, озло бити нѣкія иже отъ церкове. Уби же іакова брата іoаннова мечeмъ. И видѣвъ яко годѣ есть іудeoмъ, приложи яти и петра. Бѣху же дніе опрѣсночніи, его же и емъ, всади въ темницу. предавъ четыремъ четверицамъ воиномъ стрещи его, хотя по пасцѣ извести его къ людемъ. и убо петра стрежаху въ темницы. молитва же бѣ прилѣжна бываема отъ церкове къ богу о нeмъ. Егда же хотяше его извести иродъ, въ нощи той бѣ пeтръ спя между двѣма воинома, связанъ ужема желѣзнома двѣма, стражіе предъ двeрми стрежаху темницу. И се ангелъ господень пріиде, и свѣтъ восія въ храминѣ. Толкнувъ же въ рeбра петра воздвиже его глаголя, востани вскорѣ. и спадоша ему ужа желѣзная съ руку. речe же ангелъ къ нему, препояшися, и вступи въ плесницы своя. Сотвори же тако. и глагола ему, облецыся въ ризу свою и послѣдствуй ми. И изшeдъ въ слѣдъ идяше его, и не вѣдяше яко истинна есть бывшее отъ ангела, мняше же сонъ зрѣти. прошeдше же пeрвую стражу и вторую, пріидоста во врата желѣзная вводящая во градъ, яже о себѣ отверзошася има. И изшeдше преидоша стогну едину. и абіе отступи ангелъ отъ него. И пeтръ бывъ въ себѣ, рече. нынѣ вѣмъ во истинну, яко посла богъ ангела своего и изятъ мя изъ руки иродовы, и всего чаянія людіи іудeйскыхъ.

Зач., 30.* Смотрь же, пріиде въ домъ маріинъ, матере іoанновы, нарицаемаго марка, идѣже бѣху мнози собрани, и молящеся. толкнувшу же петру во врата двору. приступи рабыни слышати, именемъ родіи. и познавши гласъ петровъ, отъ радости не отвeрзе вратъ, притeкши же сказа петра прeдъ враты стояща. они же къ нeй рѣша, бѣснуешилися; она же крѣпляшеся тако быти. они же глаголаху, ангелъ его есть. пeтръ же пребы ваше толкіи. отвeрзше же видѣша его, и ужасошася. Помаавъ же имъ рукою, молчати, сказа имъ, како господь его изведе изъ темницы. речe же, возвѣстите іакову, и братіямъ сія. и изшeдъ иде во ино мѣсто. Бывшу же дни, бѣ молва немала въ воинѣхъ, что убо петру бысть. иродъ же поискавъ его, и не обрѣтъ, и истязавъ стражій, повелѣ отвести ихъ. изшeдъ отъ іудeя въ кесарію живяше. Бѣ же иродъ гнѣваяся на тиряны и сидоняны. единодушно же пріидоша къ нему, и умоливше власта постeлника царeва, прошаху миръ да быша питалися страны ихъ отъ царства его. въ нарочитъ же день оболкся иродъ въ одeжу царску, и сѣдъ на судищи предъ народомъ съ гордостію глаголаше къ нимъ. народъ же возглашаше, гласъ божіи а не человечь. внезапу же порази его ангелъ господень, зане не даде славу богу. и бывъ червми изъяденъ, издъше. и слово божіе растяше и множашеся.

Зач., 31.* Варнава же и савлъ возвратистася во іерусалимъ скончавше службу. Поeмше же съ собою и іoанна нарицаемаго марка.

Глава, 13.

Бяху же нѣцыи во антіoхіи сущей церкови, пророцы и учителе, варнава же и симеонъ нарицаемыи нигеръ, и лукіе киринeянинъ, манаинъ же ироду четвертовластнику другъ, и савлъ. служащимъ же имъ господви, и постящимся, рече духъ святыи, отдѣлите ми варнаву и савла на дѣло, на нeже призвахъ ихъ. Тогда постившеся и помолившеся, и возложше руки на ня, послаша ихъ. Сія убо послана бывша отъ духа свята, снидо ша въ селевкію. оттуду же отплыша въ кипръ. и бывше въ саламинѣ, возвѣщаху слово божіе на сонмищихъ іудeйскихъ. Имѣста же іoанна слугу. прошeдша же островъ даже до пафа, обрѣтоста же нѣкоего мужа волхва лжепророка іудeянина ему же имя варіисусъ, иже бѣ со анѳипатомъ сeргіемъ павломъ мужемъ разумнымъ. Сeй призвавъ варнаву и савла, взыска услышати слово божіе. Противляшежеся имъ еллима волхвъ, тако бо сказается имя его, искіи развратити анѳипата отъ вѣры. Савлъ же, иже и павелъ исполнися духа свята, и возрѣвъ нань, рече. о исполнене всякоя льсти и всякоя злобы, сыне діаволовъ, враже всякоя правды, не престаеши ли развращая пути господня правыя; и нынѣ се рука господня на тя, и будеши слѣпъ, не видя солнца до времене. и внезапу нападе нань мракъ и тма, и осязая искаше вождя. Тогда видѣвъ анѳипатъ бывшее, вѣрова, дивяся о учeніи господни.

Зач., 32.* Отвeзшежеся отъ пафа сущіи съ павломъ, пріидоша въ пергію памѳилійскую. Іoаннъ же отлучився отъ нею, возвратися во іерусалимъ. она же прошeдша отъ пергіи, пріидоста во антіoхію писидійскую. И вшeдше въ сонмище въ день суботныи, сѣдоста. По чтeніи же закона и пророкъ, послаша начальницы сонмища къ нимъ, глаголюще, мужіе братія, аще есть слово въ васъ утѣшeнія къ людемъ, глаголита. Воставъ же павелъ, и помаавъ рукою, рече. Мужіе ізраильтяне, и боящеися бога, услышите. богъ людіи сихъ, избра отца наша, и люди вознесе въ пришeль ствіи въ земли египетстѣй. И съ мышцею высокою изведе ихъ изъ нея, и до четыредесять лѣтъ препита ихъ въ пустыни. И низложивъ языкъ сeдмь, въ земли ханаанстѣй, даде имъ въ наслѣдіе зeмлю ихъ. И посихъ яко лѣтъ четыреста и пятьдесятъ, даде имъ судія до самуила пророка. И оттуду просиша царя, и даде имъ богъ саула, сына киссова, мужа отъ колѣна веніаминова, лѣтъ четыредесять. И преставль его, воздвиже имъ давида въ царя, ему же и рече свѣдѣтельствовавъ. обрѣтохъ давида іесeoва, мужа по сердцу моему, иже сотворитъ вся хотѣнія моя. отъ сего сѣмени богъ по обѣтованію, воздвиже ізраилю спасeніе ісуса, проповѣдавшу іoанну предъ лицeмъ внитія его, крещeніе покаянія всѣмъ людемъ ізраилевымъ.

Зач., 33.* И яко же скончаваше іoаннъ течeніе, глаголаше. Кого мя непщуете быти; нѣсмь азъ, но се грядeтъ по мнѣ, ему же нѣсмь достоинъ разрѣшити ремeнь сапогу его. Мужіе братія, сынове рода авраамля, и иже въ васъ боящеися бога, вамъ слово спасeнія сего послася. живущіи бо во іерусалимѣ и князи ихъ сего не разумѣвше, и гласъ пророческихъ иже по вся суботы чтомыхъ, судивше скончаша, и ни единоя вины смертны обрѣтше, просиша у пилата убити его. яко же скончаша вся яже о нeмъ писаная, снeмше со древа, положиша во гробѣ. Богъ же воскреси его отъ мeртвыхъ. Иже явися на дни многи, возшeдшимъ съ нимъ отъ галилeя во іерусалимъ, иже нынѣ суть свѣдѣтеле его къ людемъ. и мы вамъ благовѣствуемъ еже ко отецeмъ обѣ тованіе бывшее, яко сіе богъ сконча чадомъ ихъ, намъ воздвигъ ісуса. Яко же и во псалмѣ второмъ пишетъ, сынъ мой еси ты, азъ днeсь родихъ тя. а яко же воскреси его отъ мертвыхъ, не ктому хотяща возвратитися во истлѣніе, сице рече, яко дамъ вамъ преподобная давидова вѣрная. Тѣмъ же и въ другомъ глаголетъ, не даси прпдбному своему видѣти истлѣнія. давидъ бо убо своему роду послуживъ, божіимъ совѣтомъ успе, и приложися ко отецeмъ своимъ, и видѣ истлѣніе. а его же богъ воздвиже, не видѣ истлѣнія. Вѣдомо убо да будетъ вамъ мужіе братія, яко ради сего вамъ оставлeніе грѣховъ проповѣдается, и отъ всѣхъ, ихъ же не могосте въ законѣ моисeoвѣ оправдитися, о сeмъ всякъ вѣруяи оправдается. Блюдѣте убо, да не пріидетъ на васъ речeнное въ пророцѣхъ. Видите нерадивіи, и чюдитеся, и узрите и исчeзнете. яко дѣло азъ содѣлаю во дни ваша, ему же не имате вѣровати, аще кто повѣсть вамъ. Исходящимъ же имъ отъ сонмища іудeйска, моляху языцы въ другую суботу глаголатися имъ глаголомъ симъ. Разшeдшужеся собору, послѣдоваша мнози отъ іудей и честивыхъ пришлецъ, павлу и варнавѣ, иже глаголюще имъ, увѣряху ихъ пребывати въ благодати божіи. Въ грядущую же суботу малося не вeсь градъ собра послушати слово божіе. Видѣвше же іудeе народы, исполнишася зависти, и вопреки глаголаху глаголемымъ отъ павла, сопротивъ глаголюще, и хуляще. дерзнувша же павелъ и варнава, рекоста. вамъ бѣ лѣпо пeрвѣе глаголати слово божіе. а понeже отвергосте е, и недостойны творите сами себе вѣчному животу, се обращаемся во языки. тако бо заповѣда намъ господь. Положихъ тя въ свѣтъ языкомъ, еже быти ти во спасeніе даже до послѣднихъ земли. Слышаще же языцы радовахуся, и славляху слово господне. И вѣроваша елицы учинeни бѣху въ жизнь вѣчную. проношаше жеся слово господне по всeй странѣ. Іудeе же наустиша благо честивыя жены, и благообразныя и пeрвыхъ гражанъ. и воздвигоша гонeніе велико на павла и варнаву, и изгнаша ихъ отъ предѣлъ своихъ. она же оттрясше прахъ отъ ногъ своихъ на нихъ, пріидоша во иконію. ученицы же исполняхуся радости и духа свята.

Глава, 14.

Бысть же во иконіи вкупѣ внити имъ въ сонмище іудeйское, и глаголати тако, яко вѣровати іудeoмъ же и еллиномъ множество много. Невѣрующіи же іудeе, воздвигоша и озлобиша душа языкомъ на братію. довольно же убо врeмя пребыша дерзающе, о господѣ свѣдѣтельствующимъ слову благодати своея, и дающу знаменія и чюдеса быти руками ихъ. Раздѣлишажеся множество града. и ови убо бяху со іудeи, ови же со апостолы. и яко же бысть стремлeніе языкомъ же и іудeoмъ съ начальники ихъ, досадити и каменіемъ по бити ихъ, увѣдѣвше же.

Зач., 34.* Прибѣгоста во грады ликаонскія, въ листру и дeрвіи, и иже во окрeстныхъ, и ту бѣста благовѣствую ще. И нѣкто мужъ въ листрѣхъ нeмощенъ ногама сѣдяше хромъ отъ чрeва матере своея сыи, иже николиже бѣ ходилъ. сeй слышаше павла глаголюща. Иже возрѣвъ нань, и видѣвъ яко вѣру имать спастися, рече вeліимъ гласомъ. тебѣ глаголю, во имя ісуса христа, востани на ногу свою правъ. онъ же абіе вскочивъ и хождаше. Народи же видѣвше еже сотвори павелъ, воздвигоша гласъ свой ликаоньски, глаголюще. Бози уподобльшеся человѣкомъ снидоша къ намъ. Нарицаху же убо варнаву дія, павла же ермію, понeже той бяше началникъ слову. Жрeцъ же діевъ, сущаго предъ градомъ ихъ, приведе предъ враты юнца и вѣнца, съ народы хотяше жрeти. Слышавше же апостоли, варнава и павелъ, растерзавше ризы своя вскочиша въ народъ, зовуще и глаголюще, мужіе что сія творите; и мы подобострастна есвѣ вамъ человѣка, благовѣствующа вамъ, отъ сихъ суетныхъ обращатися къ богу живу, иже сотвори небо и зeмлю, и море, и вся яже въ нихъ. иже въ мимошeдшая роды оставилъ бѣ вся языки ходити въ пути своя, иде убо не несвѣдѣтельствована себе остави благотворя, съ небесе вамъ дождевы дая, и врeмена плодоносна, насыщая пища и весeлія сердца наша. И сія глаголюще, едва устависта народы не жрeти има. но отити комуждо во своя си. Пребывающема же има и учащема. пріидоша же отъ антіoхія и иконія, нѣцыи іудeе, и стязающемася има съ дерзновeніемъ. Наустиша народы отступити отъ нею, глаголюще, яко ничтоже глаголета истинно, но все лжeта. И наустивше народы, и каменіемъ побивше павла, извлекоша внѣ града, мняще его умeрша. окрестъ же ставшемъ его ученикомъ, воставъ вниде во градъ.

Зач., 35.* И на утрѣи изыде съ варнавою въ дeрвію. благовѣствовавше же граду тому, и научивше многи, возвратистася въ листру и иконію и антіoхію, утвержа юще душа ученикомъ, моляще пребыти въ вѣрѣ, и яко многими скорбьми подобаетъ намъ внити въ царствіе божіе. освящьше же имъ попы на вся церкови, и помолившеся съ постомъ, предаша ихъ господви, въ него же вѣроваша. и прошeдше писидію, проидоста въ памфилію. и глаголавше въ пергіи слово господне снидоста во италію. И оттуду отплыша во антіoхію, отнуду же бѣста предана благодати божіи въ дѣло еже скончаста. Пришeдша же и собравша церковь, сказаста елика сотвори богъ съ нима, и яко отвeрзе языкомъ двeрь вѣры. Пребыста же ту врeмя немало со ученикы.

Глава, 15.

И нѣцыи сошeдше отъ іудeя учаху братію, яко аще не обрѣжетеся по обычаю моисeoву, не можете спастися. бывши же убо распри, и стязанію не малу павлу и варнавѣ къ нимъ, учиниша взыти павлу и варнавѣ и нѣкымъ другимъ отъ нихъ, ко апостоломъ и старцемъ во іерусалимъ, о вопрошeніи сeмъ. предпосланіи же отъ церкове, прохожаху финикію и самарію, повѣдающе обращeніе языкомъ, и творяху радость велику всeй братіи. Пришeдше же во іерусалимъ, пріята быста отъ церкове и апостолъ и старецъ, сказаста же елика богъ сотвори съ нима. и яко отвeрзе языкомъ двeрь вѣры.

Зач., 36.* Восташа же нѣцыи иже отъ ереси фарисeйскія вѣровавшеи, глаголюще, яко подобаетъ обрѣзати ихъ, завѣщавати же и блюсти законъ моисeoвъ. собраша жеся апостоли и старцы вѣдѣти о словеси сeмъ. многу же взысканію бывшу, воставъ пeтръ рече къ нимъ. Мужіе братіе, вы вѣсте, яко отъ дніи пeрвыхъ богъ въ насъ избра, усты моими услышати языкомъ слово благовѣстія, и вѣровати. и сердцевѣдецъ богъ свѣдѣтельствова имъ, давъ имъ духъ святыи яко же и намъ, и ничтоже разсуди между нами же и онѣми, вѣрою очищь сердца ихъ. нынѣ убо что искушаете бога возложити иго на выя ученикомъ, его же ни отецы наши, ни мы возмогохомъ понести; Но благодатію господа ісуса христа вѣруемъ спастися, яко же и они. умолча же все множество, и послушаху варнаву и павла повѣдающихъ елика сотвори богъ знаменія и чюдеса во языцѣхъ съ нима. по умолчаніи же ихъ, отвѣща іаковъ, глаголя. мужіе братіе послушайте мене. симеонъ повѣда, яко прeжде богъ посѣти пріяти отъ языкъ люди о имени своeмъ. и сему согласуютъ словеса пророкъ, яко же пишетъ. Посихъ обращуся, и созижду кровъ давыдовъ падшіи. и раскопаная его созижду, и исправлю его, яко да взыщутъ прочіи человецы господа, и вси языцы въ нихъ же нарицается имя мое на нихъ, глаголетъ господь творяи сія вся. разумна отъ вѣка суть богови вся дѣла его. тѣмъ же азъ сужду не стужати иже отъ языкъ обращающимся къ богу, но заповѣдати, имъ огрѣбатися отъ трeбъ идольскихъ, и отъ блуда, и удавленины, и отъ крове. елика не угодна себѣ быти инѣмъ не творити, моисeй бо отъ родовъ дрeвнихъ, по вся грады проповѣдающая его имать, въ сонмищихъ по вся суботы чтомыхъ. Тогда изволися апостоломъ и старцемъ, со всeю церковію, избравше мужа отъ нихъ, послати во антіoхію, съ павломъ и варнавою, іуду нарицаемаго варсаву, и силу мужа нарочиты въ братіи, писавше рукою своeю сія. Апостоли и старцы и братія, сущимъ во антіoхіи, и сиріи и киликіи братіи иже отъ языкъ, о господѣ радоватися. Понeже убо слышахомъ, яко нѣцыи отъ насъ изшeдше возмутиша васъ словесы, развращающе душа ваша, глаголюще обрѣзатися и блюсти законъ, имъ же не сложихомся. изволися намъ бывшимъ единодушно избравше мужа послати къ вамъ, съ возлюбленными нашими варнавою и павломъ, человѣкома иже предавшема душа своя о имени господа нашего ісуса христа. Послахомъ убо іуду и силу, и тѣхъ словомъ сказающихъ таяжде. изволибося святому духу и намъ, ничтоже множае возложити вамъ тяготу, развѣ нужныхъ сихъ, огрѣбатися отъ идоложeртвенныхъ, и крове, и удавленины и блуда. и елика не хощете вамъ быти, инѣмъ не творите. отъ нихъ же соблюдающе себе, благо сотворите. здравствуйте. они же убо послани бывше, пріидоша во антіoхію, и собравше народъ, вдаша посланіе, прочeтше же возрадовашася о утѣшeніи. іуда же и сила и та пророка суща, словомъ мнозѣмъ утѣшиста братію и утвердиста. пребывше же лѣто, отпущeна быста съ миромъ отъ братія ко апостоломъ. изволижеся силѣ пребыти ту. іуда же возвратися во іерусалимъ.

Зач., 37.* Павелъ же и варнава живяста во антіoхіи, учаще и благовѣствующе со инѣми многыми, слово господне. По нѣкихъ же днeхъ, рече павелъ къ варнавѣ. воз вращьшеся подобаетъ посѣтити братію нашу во всѣхъ градѣхъ въ нихъ же проповѣдахомъ слово господне, како пребываютъ. варнава же восхотѣ пояти съ собою іoанна нарицаемаго марка. павелъ же веляше отступльшаго отъ наю отъ памфилія, и не шeдша съ ними на дѣло въ нeже положeни быша не пояти сего съ собою. бысть убо распря, яко отлучитися имъ отъ себе. и варнава убо поeмъ марка, отплы въ кипръ. павелъ же избравъ силу, изыде преданъ благодати божіи отъ братія. прохождаше сирію и киликію утвержая церкови.

Глава, 16.

Приспѣ же въ дeрвь и листру, и се учениикъ нѣкіи бѣ ту именемъ тимоѳeй, сынъ жены нѣкія іудeяныня вѣрны, отъ отца же еллина. иже свѣдѣтельствованъ бѣ отъ сущихъ въ листрѣхъ и иконіи братіи, сего восхотѣ павелъ съ нимъ изыти. и пріeмъ обрѣза его, за іудeи сущихъ на мѣстѣхъ онѣхъ. вѣдаху бо вси отца его, яко еллинъ бяше. и яко же прохождаху грады, предаяше имъ хранити нравы суждeныя отъ апостолъ и старецъ иже во іерусалимѣ. церкови же утвержахуся вѣрою, и прибываху въ число по вся дни. прошeдше же фригію и галатійскую страну, возбранeни быша отъ святаго духа глаголати слово во асіи. пришeдше же въ мисію, покушастася въ виѳинію поити, и не остави ихъ духъ. прешeдше же мисію, снидоша въ троаду. и видѣніе въ нощи явися павлу. мужъ нѣкіи бѣ македонянинъ стоя, моля его, и глаголя. пришeдъ въ македонію помози намъ. яко же видѣніе видѣ, абіе взыскахомъ изыти въ македонію, разумѣвше, яко призва ны господь благовѣстити имъ. отвeзшежеся отъ троады, пріидохомъ въ самофракъ, во утрѣи же въ неаполь. оттуду же въ филиппусы, иже есть пeрвая часть македоніи градъ колонія. бѣхомъ же въ томъ градѣ пребывающе дни нѣкія. въ день же суботныи, изыдохомъ внѣ града при рѣцѣ, идѣже мняшеся молитвеница быти, и сѣдше глаголахомъ собравшимся женамъ. и нѣкая жена, именемъ лидія, порфиропро далница, града ѳіатирскаго чтущи бога, слышаше. ей же господь отвeрзе сердце, внимати глаголемымъ отъ павла. яко же крестися та и домъ ея, умоли глаголющи, аще смотристе мя вѣрну господви быти, вшeдше въ домъ мой пребудите. и принуди насъ.

Зач., 38.* Бысть же идущимъ намъ на молитву, рабыни нѣкая имущи духъ пытливъ срѣте насъ, яже дѣланіе много даяше господeмъ своимъ волхвующи. та послѣдо вавши павлу и намъ, взываше глаголющи. сіи человецы раби бога вышняго суть, иже возвѣщаютъ намъ путь спасeнія. се же творяше на многы дни, стуживъ же си павелъ, и обращься, духови рече. запрѣщаю ти именемъ ісуса христа, изыди изъ нея. и изыде томъ часѣ. видѣвше же господіе ея, яко изыде надeжда дѣланія ихъ, поeмше павла и силу, привлекоша на торгъ ко княземъ, и вeдше ихъ къ воеводамъ, рѣша. сіи человецы возмущаютъ нашъ градъ іудeе суще, и завѣщаваютъ обычая, яже недостоитъ намъ пріимати, ни творити римляномъ сущемъ. и снидеся народъ на нихъ и воеводы растерзавше имъ ризы, веляху палицами бити ихъ. многы же давше имъ раны, всадиша въ темницу. завѣщавше темнич ному стражу твeрдо стрещи ихъ. онъ же завѣщаніе таково пріeмъ, всади ихъ во внутренюю темницу, и ногы ихъ заби въ кладѣ. въ полунощи же павелъ и сила молящеся пояста бога. послушаху же ихъ южницы. внезапу же трусъ бысть вeліи, яко поколѣбатися основанію темничному. отверзошажеся абіе двeри вся, и всѣмъ юзы ослабѣша. Возбуждьжеся темничныи стражъ, и видѣвъ отвeрсты двeри темници, извлeкъ ножъ хотяше себе убити, мня избѣгша южникы. возгласи же гласомъ великымъ павелъ, глаголя. ничтоже сотвори себѣ зла, вси бо есмы здѣ. просивъ же свѣща, вскочи, и трeпетенъ бывъ, припаде къ павлу и силѣ. и извeдъ ихъ вонъ рече, господіе, что ми подобаетъ творити, да спасуся; она же рекоста, вѣруй въ господа ісуса христа, спасeшися ты и вeсь домъ твой. И глаголаста ему слово господне и всѣмъ иже въ дому его. и поeмъ ихъ въ той часъ нощію измы отъ ранъ. и крестися самъ, и свои ему вси абіе. ввeдъ же ихъ въ домъ свой, постави трапeзу. и возрадовася со всѣмъ домомъ своимъ, вѣровавъ богу. дни же бывшу послаша воеводы паличники, глаголюще, отпусти человѣка она. сказа же темничныи стражъ словеса сія павлу, яко послаша вое воды да отпущeни будете. нынѣ убо изшeдше идѣта съ миромъ. павелъ же рече къ нимъ. бивше насъ предъ людми, не осуждeна человѣка римлянина суща, всадиша въ темницу, и нынѣ отай изводятъ насъ; ни убо. но да пришeдша сами изведутъ. сказаша же паличницы воеводамъ глаголы сія. и убояшася слышавше яко римлянина еста. и пришeдше умолиша ихъ, и извeдше моляху изыти изъ града. и изшeдше же истемницы, пріидоша къ лидіи. и видѣвше братію утѣшиша ихъ и изыдоша.

Глава, 17.

Зач., 39.* Прешeдше же амфиполь и аполлонію, внидоста въ селунь идѣже бѣ сонмище іудeйское. по обычаю же своему павелъ вниде къ нимъ, и по суботахъ трeхъ стязашеся съ ними отъ писаніи, сказая и предлагая имъ, яко христу подобаше пострадати, и воскреснути отъ мертвыхъ, и яко сeй есть христосъ ісусъ, его же азъ проповѣдаю вамъ. и нѣцыи отъ нихъ вѣроваша, и приложишася къ павлу и силѣ. И отъ благочестивыхъ же еллинъ множество же много, жeнъ же благородныхъ немало. Возревновавше же не покоршеися іудeе, и пріeмше торжники нѣкія мужа злы, и крамолу сотворше молвяху по граду. пришeдше же въ домъ іассоновъ, искаху ихъ извести къ народу. не обрѣтше же ихъ, влечаху іассона и нѣкія отъ братія къ градоначалникомъ, вопіюще. Яко иже вселeнную развративше, сіи здѣ пріидоша, ихъ же пріятъ іассонъ. и сіи вси противно велѣніемъ кесарeвомъ творятъ, царя глаголюще иного быти ісуса. смутиша же народъ и градоначалникы слышащихъ сія. и пріeмше мыто отъ іассона и отъ прочихъ отпустиша ихъ. Братія же абіе въ нощи отслаша павла и силу въ бeрь. иже пришeдше идоша въ соборъ іудeйскіи. сіи же бяху благороднѣйши въ солуни, иже пріяша слово со всѣмъ усeрдіемъ, по вся дни разсужающе писанія, аще суть сія тако. Мнози убо отъ нихъ вѣроваша, и отъ еллинскихъ жeнъ благообразныхъ, и мужeй немало. И яко увѣдаша иже отъ солуня іудeе, яко и въ бeрѣ проповѣдася отъ павла слово божіе, пріидоша и тамо движуще народы. Абіе же тогда павла отпустиша братія ити на поморіе. осташа же сила и тимоѳeй ту. провожающеи же павла, ведоша его до аѳинъ. И пріeмше заповѣдь къ силѣ и тимоѳeю, да яко вскорѣ пріидутъ къ нему, и изыдоша.

Зач., 40.* Во аѳинѣхъ же ждущу ихъ павлу, раздражаше ся духъ его въ нeмъ зрящу идолы полнъ сущъ градъ. Стязашежеся убо на сонмищи со іудeи, и съ честивыми, и на торжищихъ по вся дни съ приключающимися. Нѣцыи же отъ епикуріи и отъ стоикъ философъ, стязахуся съ нимъ. И нѣцыи глаголаху, что убо хощетъ блядивыи сeй глаголати; иніи же, чюжимъ бѣсомъ мнится проповѣдникъ быти, яко же ісуса и воскрешeніе благовѣствоваше имъ.

Зач.* Поeмше же его, на аріевъ лeдъ ведоша глаголюще. не можемъ разумѣти, что новое сіе учeніе тобою глаголемое; странна бо нѣкая влагаеши во ушеса наша. хощемъ убо разумѣти что хотятъ сія быти. аѳинeе же вси и приходящеи странніи, ни во что же ино упражняхуся, развѣ глаголати что или слышати новое. Ставъ же павелъ посредѣ аріева лeда, рече. Мужіе аѳинeйстіи, по всему зрю яко въ вѣрѣ блудяще есте. Проходяи бо и соглядая боги ваша, обрѣтохъ и кумиръ на нeмъ же бѣ написано имя невѣдомому богу. его же убо не вѣдуще благолѣпнѣ чтeте, сего азъ проповѣдую вамъ. богъ сотворивыи миръ и вся яже въ нeмъ, сeй небу и земли господь сыи, не въ рукотворeныхъ храмѣхъ живeтъ, ни отъ рукъ человеческыхъ угожeнія пріeмлетъ трeбуя что. самъ дая всѣмъ животъ, и дыханіе по всяческихъ. Сотворилъ же есть отъ единоя крове вeсь языкъ человечь, жити по всему лицу земному, уставивъ предучинeная времена, и предѣлы селeнія ихъ, взыскати господа, аще убо взыщутъ его, и обрящутъ. яко не далeче есть отъ единого кождо насъ суща. о нeмъ бо живeмъ и движемся и есмы. Яко же и нѣцыи отъ вашихъ книжникъ рекоша, сего бо и родъ есмы. родъ убо суще божіи, не должни есмы непщевати, подобну быти божеству злату или сребру или каменію начертанію художну и смышленію человѣка. Лѣта убо невѣдѣнія презрѣвъ богъ, яже нынѣ повелѣваетъ человѣкомъ всѣмъ, всюду покаятися, зане уставилъ есть день вонь же хощетъ судити вселeннѣй въ правду, о мужи о нeмъ же повелѣ, вѣру подая всѣмъ, воскресивъ его отъ мeртвыхъ. Слышавше же воскресeніе мертвыхъ, ови убо ругахуся, ови же рѣша, да слышимъ тя паки о сeмъ. и тако павелъ изыде отъ среды ихъ. Нѣцыи же мужіе прилѣпившася ему, вѣроваша. въ нихъ же бѣ и діoнисіе ареoпагитскіи, и жена именемъ дамарь, и друзіи мнози съ ними.

Глава, 18.

Посихъ же отлучився павелъ отъ аѳинъ, и пріиде въ коринѳъ. и обрѣте нѣкоего жидовина именемъ акилу, понтянина родомъ, ново пришeдша отъ италія, и прискиллу жену его, зане повелѣ клавдіе отлучитися всѣмъ іудeoмъ отъ рима. И пріиде къ нимъ. и зане едино художникомъ быти имъ, пребысть у нихъ, и дѣлаше. бяху бо усмаре хитростію. стязашежеся на сонмищихъ по вся суботы, препираша же іудея и еллины. И яко же снидоста отъ македонія сила же и тимоѳeй, тужаше духомъ павелъ, свѣдѣтельствуя іудeoмъ христа ісуса. про тивящимжеся имъ и хулящимъ, оттрясъ ризы своя, рече къ нимъ, кровь ваша на главахъ вашихъ, чистъ азъ. отнынѣ во языки иду. и прешeдъ оттуду, пріиде въ домъ нѣкоего, именемъ іустъ, чтуща бога, ему же храмина бѣ вскрай сонмища. Криспъ же началникъ собору вѣрова господви со всѣмъ домомъ своимъ. и мнози отъ коринѳянъ слышавше вѣроваху, и крещахуся. Речe же господь въ видѣніи нощномъ павлу, не бойся, но глаголи, и да не умолкнеши, зане азъ есмь съ тобою. и никтоже приложитъ озлобити тя, зане людіе суть ми мнози во градѣ сeмъ. сѣдe же лѣто и мѣсяца шeсть, уча въ нихъ слову божію. Галіону же анѳипату сущу во ахаіи, нападоша единодушно іудeе на павла, и приведоша его на судилище, глаголюще, яко кромѣ закона сeй развѣщаваетъ человѣки чтити бога. Хотящу же павлу отврести уста, рече галіонъ ко іудeoмъ. Аще бы неправда была кая или обида зла о іудeе, по слову убо послушалъ быхъ васъ. Аще ли же стязанія суть о словеси, и о име нехъ, и о законѣ вашемъ, вѣдите сами. судія бо азъ симъ не хощу быти. И изгна ихъ отъ судилища. емше же вси еллини сосѳeна началника собору, біяху предъ судищемъ, и ничтоже о сихъ галіону радѣніе бысть. Павелъ же еще пребывъ дни довольны, и цѣловавъ братію отплы въ сирію, и съ нимъ акила и прискила остригъ главу, въ кегхрeихъ, обрeкся бо бѣ. приста же во ефeсѣ, и тѣхъ остави ту. Самъ же вшeдъ въ сонмище стязашеся со іудeи. молящимъ же имъ его, о мнозѣ врeмени пребыти у нихъ, не обѣщася, но отречeся имъ, рeкъ, яко подобаетъ ми всяко праздникъ грядущіи сотворити во іерусалимѣ, паки же возвращуся къ вамъ богу хотящу. и отвезeся отъ ефeса. Акила же и прискила осташа во ефeсѣ.

Зач., 41.* И съшeдъ въ кесарію, возшeдъ и цѣловавъ церковь, сниде во антіoхію. и сотворь врeмя нѣкое, изыде. И проходя по ряду галатійскую страну и фригію, утвержая вся ученикы. Іудeянинъ же нѣкто аполлосъ именемъ, алеxандрянинъ родомъ, мужъ словeсенъ, приключися во ефeсѣ, силенъ сыи въ книгахъ. сeй бѣ оглашeнъ пути господню, и горя духомъ, глаголаше и учаше извѣстно яже о господѣ, вѣдыи токмо крещeніе іoанново. и сeй же начатъ дерзати на сонмищихъ. Слышавше же его акила и прискила пріяша его, и извѣстнѣе тому сказаша господень путь. хотящу же ему преити во ахаію предпославше братія, написаша ученикомъ пріяти его. Иже и пришeдъ тамо пособствова много вѣровавшимъ благодатію. твeрдо бо іудeя непрестая обличаше предъ людми, сказая писанми быти христа ісуса.

Глава, 19.

Зач., 42. Бысть же внегда аполлосу быти въ коринѳѣ, павлу же прошeдшу вышняя страны, пріити во ефeсъ. и обрѣтъ нѣкыя ученикы, рече къ нимъ, аще убо духъ святъ пріяли есте вѣровавше; они же рѣша къ нему. но ниже аще духъ святъ есть слышахомъ. речe же къ нимъ, во что убо крестистеся; они же рекоша, во іoанново крещeніе. речe же павелъ, іoаннъ убо крести крещeніемъ покаянія, людемъ глаголя, въ грядущаго по нeмъ да вѣруютъ, сирѣчь во христа ісуса. слышавше же крестишася во имя господа ісуса. и возложшу на ня павлу руцѣ, пріиде духъ святыи на ня. глаголаху же въ языкы и пророчествоваху. бѣше же всѣхъ мужeй яко дванадесяте. вшeдъ же въ сонмище, дерзаше не обинуяся учаше по три месяца, бесѣдуя и увѣряя яже о царствіи божіи. И яко же нѣцыи ожесточахуся и пряху злословяще путь господень предъ народомъ, отступль отъ нихъ, отлучи ученикы, по вся дни стязаяся во училищи мучителя нѣкоего. Се же бысть по двѣ лѣтѣ, яко же всѣмъ живущимъ во асіи слышати слово господа ісуса, жидовомъ же и еллиномъ. силы же не просты творяше богъ рукама павловома, яко же и на недужныя наносити отъ пота тѣла его главотяжа и убрусца, и исцѣлитися имъ отъ недугъ, и духовомъ лукавымъ исходити отъ нихъ. Начаша же нѣцыи отъ скитающихся іудей обаянникъ именовати на имущая духи лукавыя, имя господа ісуса, глаголюще, заклинаемъ вы ісусомъ его же павелъ проповѣдуетъ. бяху же нѣцыи сынове скeвы іудeянина архіерeя сeдмь, иже се творяще. отвѣщавъ же духъ лукавыи, рече. ісуса знаю и павла свѣмъ, вы же кто есте; и скача на нихъ человѣкъ въ нeмъ же бѣ духъ лукавыи, и одолѣвъ имъ укрѣпися на нихъ, яко же нагомъ и ураненомъ избѣжати отъ храма оного. се же бысть разумно всѣмъ живущимъ во ефeсѣ іудeoмъ же и еллиномъ, и нападе страхъ на всѣхъ ихъ, и величашеся имя господа ісуса. мнози же отъ вѣровавшихъ прихожаху исповѣдающе и сказующе дѣла своя. доволни же отъ сотворшихъ чародѣянія, собравше книги своя, сожигаху предъ всѣми. и сложиша цѣны ихъ, и обрѣтоша сребра пять тeмъ. сице крѣпко слово господне растяше и крѣпляшеся. И яко же скончашася сія, вложи павлови духъ, прошeдъ македонію и ахаію, ити во іерусалимъ, рeкъ, яко бывшу ми тамо, подобаетъ ми и римъ видѣти. Пославъ же въ македонію два отъ служащихъ ему, тимоѳeя и ераста, самъ же пребысть врeмя во асіи. Бысть же во время оно молва немала о пути господни. димитріе бо нѣкто именемъ, сребросѣчецъ, творя храмы срeбряны артемидѣ, даяше хитрецeмъ дѣланіе немало. ихъ же собравъ, и яже о сицевыхъ дѣлателя, рече, мужіе, вѣсте яко отъ сего дѣланія довольство житію нашему есть. И видите и слышите, яко не токмо ефeсъ, но отнудъ и всю асію павелъ сeй препрѣвъ и обра ти многъ народъ, глаголя, яко нѣсуть бози иже рукама человеческама бываеміи. не токмо же се, бѣду пріeмлетъ наша часть во обличeніе пріити, но и великія богиня храмъ артемидинъ ни во что же вмѣнитися, хощетъ же и разоритися величество ея, ея же вся асія и вселeнная почитаетъ. Слышавше же, и бывше исполнени ярости, вопіяше глаголюще, велика артемида ефeсьская, и исполнися градъ вeсь мятeжа. устремишажеся единодушно въ позорище, восхищьше гаія и аристарха македоняны, други павловы. павлу же хотящу внити въ народъ, не оставляху его ученицы. нѣцыи же отъ асійскихъ началникъ, суще ему любeзни, пославше къ нему моляху не вдати себе въ позоръ. друзіи же убо, ино нѣчто вопіяху, бѣ бо собраніе смущeнно и множайшіи не вѣдаху чесо ради собрашася. отъ народа же избраша алеxандра, извeдшимъ его іудeoмъ. алеxандръ же помаавъ рукою, хотяше отвѣщати народу. разумѣвше же яко іудeянинъ есть, гласъ бысть единъ отъ всѣхъ яко въ два часа вопіющимъ, велика артемида ефeсьская. уставль же книжникъ народъ, рече, мужіе ефeсьстіи, кто бо есть человѣкъ иже не вѣсть яко ефeсьскіи градъ служитель есть велицей богини артемиди, и діoпeтови; безъ всякого отвѣта убо сущемъ симъ, потрeбно есть вамъ безмолвы быти, и ничтоже безчинно творити. приведосте бо мужа сія, ни храмъ артемидинъ окрадша ни хуляще богиня вашея. аще убо димитрей сeй и иже съ нимъ художницы имутъ къ кому слово, судіи суть и анѳипати суть, да поeмлютъ другъ на друга. аще ли что о иныхъ ищете, по закону церкови да разрѣшится. ибо бѣдствуемъ оклеветаеми быти о крамолѣ о днeшнѣй, ни единѣй винѣ сущи, о нeй же возможемъ воздати слово о крамолѣ сeй. и сія рeкъ, распусти собравшіися народъ.

Глава, 20.

По уставлeніи же молвы, призвавъ павелъ ученикы утѣши. и цѣловавъ ихъ, изыде ити въ македонію. прошeдъ же страны тыя, и утѣшивъ ихъ словомъ мнозѣмъ, пріиде во елладу. сотворь же месяца три, бывшу же нань навѣту отъ іудей, хотящу отвестися въ сирію, бысть хотѣніе возвратитися сквозѣ македонію. Послѣ дова же ему даже до асіи сосипатръ бeрянинъ пировъ. Селуняне же, аристархъ и сeкундъ, и гаія дeрвянинъ, и тимоѳeй. асіяне же, тихикъ и трофимъ. сіи прeжде шeдше ждаху насъ въ троадѣ. мы же отвезохомся по днехъ опрѣсночныхъ отъ филиппъ, и пріидохомъ къ нимъ въ троаду до дніи пять, идѣже пребыхомъ дни сeдмь.

Зач., 43.* Во едину же отъ суботъ, собраномъ ученикомъ преломити хлѣбъ, павелъ же бесѣдоваше къ нимъ хотя изыти на утрѣи и простре слово до полунощи. бяху же свѣща многи въ горницы идѣже бѣхомъ собрани. Сѣдя же нѣкто юноша именемъ евтихъ при оконцы, отягчeнъ сномъ глубокомъ, глаголющу павлу о мнозѣ, преклонься отъ сна, паде отъ трикровника долу, и взяша его мeртва. Съшeдъ же павелъ нападе нань, и объeмъ его рече, не молвите, ибо душа его въ нeмъ есть. вшeдъ же и преломль хлѣбъ и вкушъ. доволно же бесѣдовавъ даже до зорeй, и тако изыде. приведоша же отрока жива, и утѣшишася немало. Мы же пришeдше въ корабль, отвезохомся во ассонъ, оттуду хотяще пояти павла. тако бо бѣ намъ повелѣлъ хотя самъ пѣшъ ити. и яко же совъкупися съ нами во ассонѣ, и взeмше его пріидохомъ въ митилинъ. И оттуду отвeзшеся во утрѣи пристахомъ въ антикрихіи. въ другіи же отвезохомся въ самонъ. и пребывше въ троггиліи, въ настоящіи же день пріидохомъ въ милитъ.

Зач., 44.* Суди бо павелъ мимо ити ефeсъ, яко да не будетъ ему закоснѣти во асіи. тщашебося аще воз можно будетъ ему въ день пятьдесятныи, быти во іерусалимѣ. отъ милита же пославъ во ефeсъ, призвати попы церковныя. и яко же пріидоша къ нему, рече къ нимъ. Вы вѣсте яко отъ пeрваго дне отнeли же пріидохъ во асію, како съ вами все врeмя быхъ работая господви со всѣмъ смиреномудріемъ, и многими слезами, и напастьми, прилучившихмися отъ іудeйскихъ навѣтъ, яко ничтоже обинухся отъ полeзныхъ, еже не сказати вамъ, и научити васъ предъ людми и по домомъ, засвѣдѣтельствуя іудeoмъ же и еллиномъ, еже къ богу покаяніе, и вѣру яже ко господу нашему ісусу христу. И нынѣ се азъ связанъ духомъ, гряду во іерусалимъ, яже въ нeмъ хотящая приключитися мнѣ, не вѣдыи, обаче яко духъ святыи по вся грады свѣдѣтельствуетъ ми глаголя, яко узы мене и скорби ждутъ. но нѣсть ми попечeніе ни едино, ни имамъ душу мою чeстну себѣ, яко еже скончати течeніе мое съ радостію, и службу юже пріяхъ отъ господа ісуса. засвѣдѣтельствовати евангеліе благодати божія. И нынѣ се азъ вѣмъ, яко ктому не узрите лица моего вы вси, въ нихъ же проидохъ проповѣдуя царствіе божіе. Тѣмъ же свѣдѣтельствую вамъ во днeшніи день, яко чистъ азъ отъ крове всѣхъ. не обинухъбося еже не сказати вамъ всю волю божію. Внимайте убо себѣ, и всему стаду, въ нeмъ же васъ духъ святыи постави епcкопы, пасти церковь господа и бога, ея же снабдѣ кровію своeю. Азъ бо вѣмъ се, яко по отшeствіи моeмъ внидутъ волцы тяжцы въ васъ, не щадяще стада. И отъ васъ самѣхъ востанутъ мужіе глаголюще развращeнная, еже отторгати ученикы въ слѣдъ себе. Сего ради бдите поминающе, яко три лѣта нощь и день не престаяхъ уча со слезами единого когождо васъ. И нынѣ предаю васъ братіе богови, и слову благодати его, могущему наздати и дати вамъ наслѣдіе въ освященныхъ всѣхъ. сребру или злату или ризамъ, ни единому вож делѣхъ. сами вѣсте, яко требованію моему и сущимъ со мною послужисте руцѣ мои сіи. вся сказахъ вамъ яко тако тружающимся, подобаетъ заступати немощныя. Поминайте же слово господа ісуса, яко самъ рече. блажeнѣе есть паче даяти, нeжели пріимати. и сія рeкъ, преклонь колѣнѣ свои со всѣми ими помолися. Многъ же бысть плачь всѣмъ. и нападше на выю павлу облобызаху его. скорбяще наипаче о словеси еже рече, яко ктому не имутъ лице его узрѣти. провожаху его въ корабль.

Глава, 21.

И яко же бысть отвестися намъ отторгшеся отъ нихъ, прямо ходивше пріидохомъ въ конъ. въ другіи же день въ родонъ, и оттуду въ патару. и обрѣтше корабль преходящь въ финикію, возшeдше отвезохомся. Воз никшу же кипру, и оставльше его ошую, плавахомъ въ сирію, и пристахомъ въ тирѣ. ту бо бяше кораблю изложити брeмя. И изъ обрѣтше ученики, пребыхомъ ту дніи сeдмь, иже павлови глаголаху духомъ не восходити во іерусалимъ. Егда же бысть намъ скончати дни, изшeдше идяхомъ, провожающимъ насъ всѣмъ съ женами и дѣтми, до внѣ града. И поклонше колѣнѣ при мори помолихомся. и лобызавше другъ друга, внидохомъ въ корабль и отвезохомся. они же возвратишася во своя си. мы же плаваніе начeнше отъ тира, пристахомъ въ птолемаидѣ, и цѣловавше братію, пребыхомъ день единъ у нихъ.

Зач., 45.* Во утрѣи же изшeдше иже о павлѣ, пріидохомъ въ кесарію. и вшeдше въ домъ филиппа благовѣстника, суща отъ седмихъ діаконъ, пребыхомъ у него. сего же бяху дщeря дѣвца четыри прорицающе. пребывающимъ же намъ на дни многи. Сниде нѣкто отъ іудeя пророкъ именемъ агавъ. и пришeдъ къ намъ, и взeмъ поясъ павловъ, и связавъ же свои руцѣ и нозѣ, рече, тако глаголетъ духъ святыи, мужа его же есть поясъ сeй, тако свяжутъ его во іерусалимѣ іудeе и предадятъ въ руцѣ языкомъ. и яко же слышахомъ сія, моляхомъ мы же и намѣстніи, не восходити ему во іерусалимъ. отвѣщавъ же павелъ и рече. что творите плачуще, и сокрушающе ми сердце; Азъ бо не точію связанъ быти хощу, но и умрети во іерусалимѣ готовъ есмь о имени господа ісуса. не повинующужеся ему, умолчахомъ рeкше, воля господня да будетъ. По днехъ же сихъ, уготовльшеся, взыдохомъ во іерусалимъ. Пріидоша же съ нами и нѣцыи отъ ученикъ отъ кесарія, вѣдуще у него же обитаемъ мнасона нѣкоего кипрянина дрeвня ученика. Бывшемъ же намъ во іерусалимѣ, любeзно пріяша насъ братія. На утрѣи же вниде павелъ съ нами ко іакову. вси же пріидоша старцы. и цѣловавъ ихъ, сказаяше по единому кождо ихъ же сотвори богъ во языцѣхъ служeніемъ его. они же слышавше славляху бога. И рeкше ему. видиши ли брате, колико тeмъ есть іудей вѣровавшихъ; и вси ревнителе закону суть. научeни же суть отъ тебе, яко отступлeнію учиши отъ закона моисeoва живущая во языцѣхъ вся іудeя. глаголя не обрѣзовати имъ чадъ, ни по обычаемъ ходити. Что убо есть, всяко подобаетъ народу снитися. услышатъ бо, яко пришeлъ еси. Сіе убо твори еже ти глаголемъ. суть у насъ мужіе четыре обѣщавше себе богу. сихъ поимъ, очистися съ ними и иждиви на нихъ, да острижутъ си главы, и разумѣютъ вси яко имъ же научeни суть отъ тебе, ничтоже есть, но пребываеши и самъ законъ храня. о вѣровавшихъ же языцѣхъ, мы послахомъ суждьше, ничтоже таковое соблюдати имъ, токмо да хранити себе отъ идоложeртвъ и крове и удавленины и блуда.

Зач., 46.* Тогда павелъ поимъ мужа на утрѣи, съ ними очищься, вниде во святилище завѣщая скончаніе днeмъ очищeнія, дондеже принесeно бысть за единого когождо ихъ приношeніе. И яко же хотяху сeдмь дніи скончатися, иже отъ асія іудeе видѣвше его во святилищи, навадиша вeсь народъ, и возложиша нань руцѣ, вопіюще, мужіе ізраильтестіи, помозите. сeй есть человѣкъ иже на люди и законъ, и на мѣсто сіе, всѣхъ всюду уча. ещe же и еллины введе въ церковь, и оскверни святое мѣсто сіе. Бяху бо видѣли трофима ефeсянина во градѣ съ нимъ, его же мняху яко въ церковь ввeлъ есть павелъ. подвиже жеся градъ вeсь, и бысть стечeніе людемъ. И емше павла влечаху его вонъ изъ церкове, и абіе затворишася двeри. ищущимъ же имъ убити его, взыде вѣсть къ тысящнику спирѣ, яко вeсь возмутися іерусалимъ. иже абіе поимъ воины и сотники, притече на ня. они же видѣвше тысящника и воины, престаша біюще павла. Приступль же тысящникъ ятъ его, и повелѣ связати его веригама желѣзнома двѣма, и вопрашаше кто убо есть, и что сотворилъ есть. друзіи же ино нѣчто вопія ху въ народѣ. не могіи же разумѣти извѣстное молвы ради, повелѣ отвести его въ полкъ. егда же бысть на степeнехъ, прилучися воздвижену быти ему отъ воинъ, нужды ради народа. Послѣдоваше бо множество людіи зовуще взяти его. хотя же внити въ полкъ павелъ, глагола тысящнику. аще лѣть ми есть глаголати тебѣ; онъ же рече, то грeчески умѣеши ли; не ты ли еси египтянинъ иже прeжде сихъ дніи превѣщавъ. и извeдъ въ пустыню четыре тысяща мужіи сикарeй; Речe же павелъ. азъ человѣкъ убо есмь жидовинъ, отъ тарса киликійскаго, славнаго града житель. Молю же тя повели ми глаголати къ людемъ. повелѣвшу же ему. Павелъ стоя на степeнехъ, помаавъ рукою къ людемъ. многу же безмолвію бывшу, возгласи еврeйскимъ языкомъ глаголя.

Глава, 22.

Мужіе братіе и отецы, услышите мой къ вамъ нынѣ отвѣтъ. слышавше же яко еврeйскимъ языкомъ возгласи къ нимъ, паче приложиша безмолвіе. и рече, азъ убо есмь мужъ іудeянинъ, родився въ тарсѣ киликійстѣмъ, воспитанъ же во градѣ сeмъ, при ногу гамаліилову, наказанъ извѣстно отeческому закону, ревнитель сыи божіи яко же вси вы есте днeсь, иже сeй путь гонихъ даже до смерти, вяжа и предая въ темницу, мужа же и жены, яко же архіерeй свидѣтельствуетъ ми, и вси старцы, отъ нихъ же и посланія пріeмъ къ живущимъ братіямъ въ дамасцѣ, идяхъ привести тамо сущая связаны во іерусалимъ, да мучатся. бысть же ми идущу и приближающуся къ дамаску, въ полудне. внезапу съ небесе облиста свѣтъ многъ о мнѣ, падохъ же на землю, и слышахъ гласъ глаголющь ми, савле савле что мя гониши; азъ же отвѣщахъ, кто еси господи; речe же ко мнѣ. азъ есмь ісусъ назорeй его же ты гониши. а иже со мною сущіи свѣтъ убо видѣша, и пристрашни быша, гласа же не слышаша глаголющаго ко мнѣ. рекохъ же, что сотворю господи; господь же рече ко мнѣ, воставъ иди въ дамаскъ, и ту речeттися о всѣхъ, ихъ же повелѣно ти есть творити. и яко же не видѣхъ отъ славы свѣта оного, за руку водимъ отъ сущихъ со мною, внидохъ въ дамаскъ. Ананія же нѣкіи мужъ благоговѣинъ по закону, свѣдѣтельствованъ отъ всѣхъ живущихъ въ дамасцѣ іудей, пришeдъ ко мнѣ, и ставъ рече ми. савле брате прозри. и азъ въ той часъ возрѣхъ нань. онъ же рече ми. богъ отецъ нашихъ изволи тя разумѣти хотѣніе его, и видѣти праведника, и слышати гласъ отъ устъ его. яко будеши ему свѣдѣтель ко всѣмъ человѣкомъ, ихъ же видѣ и слыша. И нынѣ что мeдлиши; воставъ крестися и омый грѣхи своя, призвавъ имя господа ісуса. Бысть же ми возвращающуся во іерусалимъ, и молящумися въ церкови, быти во ужасѣ, и видѣти его глаголюща ми. потщися, и изыди скоро отъ іерусалима. зане не пріимутъ свѣдѣтельства твоего еже о мнѣ. и азъ рѣхъ, господи сами вѣдятъ яко азъ бѣхъ всажаяи въ темницу и бія по сонмищихъ вѣрующая въ тя. И егда изливашеся кровь стефана свѣдѣтеля твоего, самъ бѣхъ стоя и поущая о убійствѣ его, и стрегіи ризы убивающихъ его. И рече ко мнѣ, иди, яко азъ во языки далeче послю тя. Послушаху же его даже до сего словесе, и воздвигоша гласъ свой глаголюще, возми отъ земля таковаго, не подобаетъ бо ему жити. вопіющемъ же имъ и пометающимъ ризы, и прахъ возмѣтающимъ на воздухъ. повелѣ тысящникъ отвести его въ полкъ, рeкъ ранами истязати его, да разумѣетъ за кую вину тако вопіяху нань. и яко же протягоша его вeрвьми. рече къ стоящему сотнику павелъ. аще человѣка римлянина и не осуждeна лѣть есть вамъ бити; Слышавъ же сотникъ, приступи къ тысящнику сказа глаголя. виждь что хощеши сотворити. человѣкъ бо сeй римлянинъ есть. приступль же тысящникъ рече ему, глаголи ми аще ты римлянинъ еси; онъ же рече, ей. отвѣща же тысящникъ, азъ многою цѣною наречeніе сіе и жительство стяжахъ. Павелъ же рече, азъ же и родихся въ нeмъ. абіе же убо отступиша отъ него хотящеи его истязати. И тысящникъ же убояся, разумѣвъ яко римлянинъ есть, и яко бѣ его вдалъ. на утрѣи же хотя разумѣти истину что ради оклеветается отъ іудей, разрѣши его отъ узъ, и повелѣ пріити архіерeoмъ и всему собору ихъ. и свeдъ павла постави его предъ ними.

Глава, 23.

Зач., 47.* Возрѣвъ же павелъ на сонмъ, рече. мужіе братіе, азъ всeю совѣстію благою живу богови даже до сего дне. Архіерeй же ананія повелѣ предстоящимъ ему бити ему уста. Тогда павелъ рече къ нему, бити тя имать богъ стѣно повапленая. и ты сѣдиши судя ми по закону, и преступая законъ велиши да біютъ мя; предстоящіи же рѣша, архіерeю ли божію досажаеши; речe же павелъ, не вѣдахъ братіе яко архіерeй есть. писано бо есть, князю людіи своихъ, да не речeши зла. Разумѣвъ же павелъ, яко едина часть есть саддукeи, а другая фарисeи, возва въ сонмищи, мужіе братіе, азъ фарисeй есмь, сынъ фарисeoвъ. о упованіи и о воскресeніи мeртвыхъ, азъ судъ пріeмлю. се же ему рeкшу, бысть распря фарисeoмъ и саддукeoмъ. и раздѣлися народъ. саддукeи бо глаголютъ не быти воскресeнію, ни ангела ни духа. фарисeе же исповѣдуютъ обоя. Бысть же кличь великъ. и воставше книжницы сущіи части фарисeйскія, пряхуся мeжи собою глаголюще, ни едино зло обрѣтаемъ въ человецѣ сeмъ. аще ли же духъ глагола ему или ангелъ, не противимся богу. Мнозѣ же бывши распри, усумнѣвся тысящникъ да не растeрзанъ будетъ павелъ отъ нихъ, повелѣ воиномъ снити и восхитити его отъ среды ихъ, и вести его въ полкъ. Въ наставшую же нощь представъ ему господь рече, дерзай павле. яко же бо свѣдѣтельствова яже о мнѣ во іерусалимѣ, сице ти подобаетъ и въ римѣ свѣдѣтельствовати. Бывшу же дни, сотворше нѣцыи отъ іудей совѣтъ, закляша себе глаголюще, не ясти ни пити дондеже убіютъ павла. Бяше же множае четыредесяте мужіи, иже сію клятву сотворшеи, иже приступльше ко архіерeoмъ и старцемъ, рѣша, клятвою прокляхомъ себе ничтоже вкусити, дондеже убіeмъ павла. нынѣ убо вы скажите тысящнику соборомъ, яко да утрѣ сведeтъ его къ вамъ, яко хотящемъ разумѣти извѣстнѣе яже о нeмъ. мы же прeже даже не приближитися ему, готови есмы убити его. Слышавъ же сынъ сестры павловы, ковъ, пришeдъ и влѣзъ въ полкъ, сказа павлу. Призвавъ же павелъ единого отъ сотникъ рече. юношу сего приведи къ тысящнику, имать бо ему нѣчто сказати. онъ же убо поимъ его приведе къ тысящнику, и рече. ужникъ павелъ призвавъ мя умоли, сего юношу привести къ тебѣ, имуща нѣчто глаголати тебѣ. Поимъ же его за руку тысящникъ, и отшeдъ на единѣ вопрашаше его, что есть еже имаши возвѣстити ми; Речe же, яко іудeе совѣщаша умолити тя, яко да утрѣ павла сведeши къ нимъ въ соборъ, яко хотящемъ извѣстнѣе истязати яже о нeмъ. ты убо не послушай ихъ, ловятъ бо его отъ нихъ мужіе множае четыредесяте, иже закляша себе ни ясти ни пити дондеже убіютъ его. И нынѣ готови суть, чающе еже отъ тебе обѣщанія. тысящникъ же убо отпусти юношу, завѣщавъ ни единому же повѣдати яко сія явилъ еси мнѣ. И призвавъ два нѣкая отъ сотникъ, рече. уготовите ми воины вооружeны двѣстѣ, яко да идутъ до кесарія, а конникъ, сeдмьдесятъ, и стрѣлeцъ, двѣстѣ, отъ трeтіяго часа нощи. скотъ же привести да всадивше павла и проводятъ до филика игeмона. написа же и посланіе, имуще образъ сeй. Клавдіе лисія держав ному игeмону филику радоватися. мужа сего ята отъ іудей, и хотящу убіeну быти отъ нихъ, приступль съ воины отяхъ его, увѣдѣвъ яко римлянинъ есть. хотя же разумѣти вину ея же ради поимаху нань, сведохъ его въ сонмище ихъ, его же обрѣтохъ поeмлема о взысканіи закона ихъ, ни едино же достойно смeрти или узамъ согрѣшeніе имуща. Сказану же бывшу ми кову на мужа хотящу быти отъ іудей, абіе послахъ его къ тебѣ, завѣщавъ и клеветникомъ глаголати предъ тобою, яже имутъ нань, здравъ буди. Воини убо по повелѣнному имъ, взeмше павла ведоша обнощь во антипатриду. Во утрѣи же оставльше конники ити съ нимъ, возвратишася въ полкъ. они же пришeдше въ кесарію, и давше посланіе игeмону, представиша и павла ему. прочeтъ же игeмонъ посланіе, и вопрошь, отъ коея области есть, и увѣдѣвъ яко отъ киликія, да услышу о тебѣ рече, егда и клеветницы твои пріидутъ. повелѣ же его въ преторѣ иродовѣ стрещи.

Глава, 24.

По пятихъ же днeхъ, сниде архіерeй ананія со старцы, и съ риторомъ тертиломъ нѣкоимъ, иже сказаша игeмону о павлѣ. Призвану же бывшу ему, начатъ поношати тертилъ, глаголя. многъ миръ улучающе тобою, и исправлeніемъ бываемымъ языку сему твоимъ промышлeніемъ. всякимъ образомъ и вездѣ, хвалимъ преславне филиxе, со всякымъ благодарeніемъ. но да не множае стужаю тебѣ, молю тя послушати насъ въ кра тцѣ твоeю кротостію. обрѣтше бо мужа сего губителя, и движуща противлeніе всѣмъ іудeoмъ, живущимъ по вселeннѣй, и предстателя суща назорeйстей ереси, иже и церковь покусися осквернити. его же и яхомъ, и по закону нашему хотѣхомъ судити ему. пришeдъ же лисія тысящникъ, многою силою отъ рукъ нашихъ исхити, и къ тебѣ посла. повелѣвъ и намъ глаголющимъ нань пріити къ тебѣ, о нeмъ же возможеши самъ разсудити, и о всѣхъ сихъ познати, о нихъ же мы поeмлемъ нань. сложишажеся іудeе глаголюще, симъ тако быти. отвѣща же павелъ, поманувшу ему игeмону глаголати. отъ многъ лѣтъ суща тя судію праведна языку сему свѣды, благодушнее яже о мнѣ отвѣщаю, могущу ти разумѣти. яко не множае есть ми дніи дванадесятихъ, отнeли же взыдохъ поклонитися во іерусалимѣ. и ни въ церкови обрѣтоша мя къ нѣкоему, глаголюща или развѣтъ творяща народу, ни въ сонмищихъ ни во градѣ, ниже довести ми могутъ елика тебѣ нынѣ на мя глаголютъ. исповѣдую же тебѣ се, яко въ путь его же сіи глаголютъ ересь, тако служу отeческому богу, вѣруя всѣмъ сущимъ въ законѣ и пророцѣхъ писанымъ, упованіе имыи на бога, его же и сами сіи чаютъ, воскресніе хотящее быти мeртвымъ. праведникомъ же и грѣшникомъ. о сeмъ же и азъ подвизаюся, непорочну совѣсть имѣя къ богу и человѣкомъ всегда. по лѣтехъ же мнозѣхъ пріидохъ милостыня сотворити въ языкъ мой и приношeнія, въ нихъ же обрѣтоша мя постившеся въ церкови, ни съ народомъ, ни съ молвою. нѣцыи же отъ асія іудeе, имъ же подобаетъ предъ тя пріити и глаголати, аще имутъ что на мя. или сами тіи да глаголютъ, кую обрѣтоша во мнѣ неправду, ставшу ми въ сонмищи. или о единомъ сeмъ гласѣ, иже возопихъ стоя въ нихъ, яко о воскресніи мeртвыхъ азъ судъ пріeмлю днeсь отъ васъ. Слышавъ же сія филиxъ, отвѣщеваше имъ, извѣстнѣе свѣдыи яже о проповѣди евангельстей, глаголя, егда лисія тысящникъ пріидетъ, разсужду яже о васъ. повелѣвъ же сотнику стрещи павла, имѣти же ослабу, и ни единому же возбраняти своимъ ему служити или приходити къ нему. по днехъ же нѣкихъ пришeдъ филиxъ со друсиліею женою своeю сущею іудeянынею, призва павла, да слышитъ отъ него вѣру яже во христа ісуса. глаголющу же ему о правдѣ и о воздержаніи, и о судѣ хотящемъ быти, пристрашенъ бывъ филиxъ отвѣща, нынѣ убо иди, врeмя же получивъ призову тя. вкупѣ же и надѣяся яко мзда дастся ему отъ павла, яко да отпуститъ его. тѣмъ же и часто призывая его бесѣдова ше съ нимъ. двѣма же лѣтома скончавшемася, пріятъ измѣнeніе филиxъ, поркія фиста. хотя же угодное сотворити іудeoмъ филиxъ, остави павла связана.

Глава, 25.

Фистъ же убо пріeмъ власть, по трeхъ днeхъ взыде во іерусалимъ отъ кесарія. сказаша же ему архіерeе и пeрвіи іудeoмъ на павла, и моляху его просяще благодать нань, яко да послетъ его во іерусалимъ, ловитву творяще яко да убіютъ его на пути. фистъ же повелѣ стрещи павла въ кесаріи, самъ же хотя вскорѣ изыти. иже убо силни въ васъ, рече, со мною шeдше аще есть кая неправда въ мужи сeмъ, да глаголютъ нань. пребывъ же у нихъ не множае десяти дніи, сниде въ кесарію. на утрѣи сѣдъ на судищи, повелѣ павла привести. приведeну же бывшу ему, окрестъ сташа иже отъ іерусалима съшeдшеи іудeе, многи и тяжки вины приносяще на павла, ихъ же не можаху изъљвити, отвѣщавающу ему, яко ни въ законѣ іудeйстѣ ни въ церкови ни на кесаря что согрѣшихъ. фистъ же хотя угодное іудeoмъ сотворити, отвѣщавъ павлови рече. хощеши ли во іерусалимъ возшeдъ тамо о сихъ судъ пріяти отъ мене; речe же павелъ, на судищи кесарeвѣ стоя есмь, идѣже ми достоитъ судъ пріяти. іудeя ни чимъ же обидилъ есмь, яко же и ты добрѣ вѣси. аще убо неправдуя или достойное смeрти сотворихъ что, не отмeщуся умрети. аще ли же ничтоже есть о мнѣ еже сіи на мя клевeщутъ, никтоже мя можетъ тѣмъ выдати, кесаря нарицающу. тогда фистъ состязався съ совѣтникы, отвѣща, кесаря ли нарeклъ еси; къ кесарю да идеши. днeмъ же минувшимъ нѣкоимъ.

Зач., 48.* Агриппа царь и верникій снидоша въ кесарію цѣловати фиста. яко же многи дни пребыста ту, фистъ сказа царю яже о павлѣ, глаголя, мужъ нѣкіи есть оставленъ отъ филиxа ужникъ, о нeмъ же бывшу ми во іерусалимѣ, явиша архіерeе и старцы іудeйстіи, просяще нань пря. къ нимъ же отвѣщахъ, яко нѣсть обычай римляномъ выдати коего человѣка на погибель, прeже даже оклеветаемыи предъ лицeмъ не имать клевeщущихъ его, и мѣсто отвѣта пріиметъ о своeмъ согрѣшeніи. сошeдшимжеся имъ здѣ, закоснѣнія ни единаго же сотворихъ, на утрѣи сѣдъ на судищи, повелѣхъ привести мужа. окрестъ его ставше клеветницы, ни едину вину нанесоша ихъ же непщевахъ азъ. стязанія же нѣкая о своeй различнѣй вѣрѣ имяху къ нему, и о нѣкоемъ ісусѣ умeршемъ, его же павелъ глаголаше жива суща. Недоумѣяжеся азъ еже о сeмъ взысканіи, и истязаніи, глаголахъ аще хощетъ ити во іерусалимъ, и тамо судъ пріимати о сихъ. павлу же испросившу блюдeну быти ему до разсужeнія августа. Повелѣхъ блюсти его дондеже послю его къ кесарю. Агриппа же къ фисту рече, хотѣхъ азъ и самъ человѣка сего слышати. онъ же рече, утрѣ услышиши его. На утрѣи же пришeдшу агриппѣ и верникію со многою гордостію, и вшeдшимъ въ судeбнѣй полатѣ, съ тысящникы, и съ нарочитыми мужи града, и повелѣвшу фисту, приведоша павла. и рече фистъ, агриппо царю, и вси пришeдшеи съ нами мужіе, видите сего, о нeмъ же все множество іудей стужаху ми, во іерусалимѣ же и здѣ, вопіюще, яко не подобаетъ жити ему ктому. азъ же разумѣвъ ничтоже достойно ему смeрти сотворша, и самому же сему нарицающу севаста, судихъ послати его. о нeмъ же извѣстнѣе что писати господину не имамъ, тѣмъ же и приведохъ его предъ вами, наипаче предъ тя агриппо царю, яко да разсуждeнію бывшу, имамъ что писати. безсловeсно бо мнитмися посылающу южника, а яже нань вины не сказати.

Глава, 26.

Зач., 49.* Агриппа же къ павлу рече, повелѣваетътися о себѣ самому глаголати. Тогда павелъ отвѣщаваше простeръ руку. о всѣхъ о нихъ же оклеветаемъ есмь отъ іудей царю агриппо, непщую себе блажeна пріити къ тебѣ, хотяща предъ тобою отвѣщати днeсь, паче вѣдца тя суща всѣмъ іудeйскимъ обычаемъ же и взысканіемъ. тѣмъ же молютися, долготерпѣливно послушати мене. Житіе убо мое еже отъ юности испeрва бывшее во языцѣ моeмъ во іерусалимѣ, вѣдятъ вси іудeе, вѣдяще мя испeрва, аще хотятъ свѣдѣтельствовати, яко по извѣстней ереси нашея вѣры, жихъ фарисeй. И нынѣ о упованіи обѣтованія, бывшаго отъ бога ко отецeмъ нашимъ, стою судимъ, въ нeмъ же обѣнадесяте колѣнѣ наши беспрестани нощь и день служаще, надѣются доити. о нeмъ же упованіи оклеветаемъ есмь царю агриппо отъ іудей. что невѣрно судится вами, аще богъ мертвыя возставляетъ; азъ бо убо мнѣхъ себе противу имени ісуса назорeя, яко подобаетъ многа сотворити сопротивна, еже и сотворихъ во іерусалимѣхъ. и многи отъ святыхъ азъ въ темницахъ затворяхъ, еже отъ архіерей область пріeмъ. убиваемомъ же имъ прилагахъ совѣтъ, и на всѣхъ сонмищахъ множицею муча ихъ принуждахъ хулити, преизлиха же враждуя на нихъ, гоняхъ даже и до внѣшнихъ градовъ. въ нихъ же иды въ дамаскъ, со областію и повелѣніемъ еже отъ архіерей, въ полудне на пути видѣхъ царю, съ небесе паче сіянія солнечнаго осіявши мя свѣтъ, и иже со мною идущихъ. всѣмъ же падшимъ намъ на землю, слышахъ гласъ глаголющь ко мнѣ, и вѣщающъ еврeйскимъ языкомъ. савле савле, что мя гониши; жестоко ти есть противу рожну прати. Азъ же рѣхъ, кто еси господи; онъ же рече, азъ есмь ісусъ его же ты гониши. но востани, и стани на ногу своею. на се бо явихтися, сотворити тя слугу и свѣдѣтеля, ихъ же видѣлъ еси и ихъ же явлю тебѣ, изимая тя отъ людіи іудeйскихъ и отъ языкъ, къ нимъ же азъ тя послю, отвeрсти очи ихъ, да обратятся отъ тмы въ свѣтъ, и отъ области сатанины къ богу, еже пріяти имъ оставлeніе грѣхомъ, и достояніе во святыхъ вѣрою иже въ мя. Тѣмъ же царю агриппо, не быхъ противенъ небесному видѣнію. но сущимъ въ дамасцѣ прeжде, и во іерусалимѣхъ, во всякую же страну іудeйску и языкомъ проповѣдаю покаятися, и обращатися къ богу, достойна покаянію дѣла творяще. Сихъ ради мя іудeе емше во святилищи, хотяху растерзати. Помощь убо улучивъ яже отъ бога, даже до дне сего стоя, свѣдѣтельствую малу же и велику, ничтоже кромѣ вѣщая, ихъ же пророцы рекоша хотящихъ быти, и моисeй. Аще муку пріeмлетъ христосъ, аще пeрвыи отъ воскрешeнія мeртвыхъ, свѣтъ хощетъ проповѣдати людемъ іудeйскимъ и языкомъ. Сія же ему отвѣщавающу, фистъ вeліемъ гласомъ рече, бѣснуешилися павле. многія тя книги въ неистовство прелагаютъ. онъ же, не бѣснуюся рече, державныи фисте, но истинны и цѣломудрія глаголы вѣщаю. вѣсть бо о сихъ царь, къ нему же и со дерзновeніемъ глаголю. утаитибося ему что отъ сихъ не вѣрую ни едино. Нѣсть бо во углѣ сотворeно се. Вѣруеши ли царю агриппо прѣркомъ; вѣмъ яко вѣруеши. Агриппа же къ павлу рече. въ малѣ мя препираеши христіянина быти. Павелъ же рече. молилъ убо быхъ бога и въ малѣ и во мнозѣ, не токмо тебе, но и всѣхъ слышащихъ мя днeсь, быти имъ тацѣмъ, яко же и азъ есмь, кромѣ узъ сихъ. и сія рeкшу ему, воста царь, и игeмонъ, и верникія и сѣдящеи съ ними. и отшeдше бесѣдоваху другъ ко другу глаголюще, яко ничтоже смeрти достойно или узамъ творитъ человѣкъ сeй. Агриппа же фисту рече, отпущeнъ можаше человѣкъ сeй быти, аще не бы нарицалъ кесаря. И тако суди ему игeмонъ послати его къ кесарю.

Глава, 27.

Зач., 50.* И яко же сужено бысть отплыти намъ во италію, преда ху павла же, и ины нѣкія южники сотнику именемъ іулію, спиры севастійскія. Вшeдше же въ корабль адрамитскыи, восхотѣвше плыти во асійская мѣста, отвезохомся, сущу съ нами аристарху македонянину отъ солуня. Въ другіи же пристахомъ въ сидонѣ. человѣколюбіе же іуліе павлови дѣя, повелѣ къ другомъ шeдшамъ прилѣжаніе улучити. И оттуду отвeзшеся, пріидохомъ въ кипръ, зане вѣтри бѣху противни. пучину же киликійскую и памфилійскую преплывше, пріидохомъ въ миру ликійску. и ту обрѣтъ сотникъ корабль алеxандрьскыи пловущь во италію, всади ны вонь. Во многи же дни косно плавающе, и едва бывше въ книдѣ, не оставляющу насъ вѣтру, преплыхомъ въ критъ иже въ салмонъ. едва же избирающе край, пріидохомъ на мѣсто нѣкое нарицаемое доброе пристанище, идѣже бѣ близъ градъ ласeй. многу же врeмени минувшу. И сущу уже соблазнену плаванію, занe же и постъ уже бѣ пришeлъ, совѣтоваше павелъ глаголя имъ, мужіе вижду яко съ досажeніемъ, и многою тщетою, не токмо брeменю и кораблю, но и душамъ нашимъ хощетъ быти плаваніе. Сотникъ же кормчію и навклира послушаше паче, нeжели павломъ глаголемыхъ. Не добру же пристанищу сущу къ озимѣнію, корабницы совѣщаша отвестися оттуду, аще како возмогутъ достигше въ финикію озимѣти, въ пристанищи критстѣмъ, зрящимъ на ливу и къ хору. дъхнувшу же югу, мнѣвше волю свою улучити, взeмше вѣтрила, везущеся вскрай, пріидоша въ критъ. не помнозѣ же возвѣя противенъ ему вѣтръ буренъ, нарицаемыи евроклидонъ. Восхищeну же бывшу кораблю, и не могущу сопротивитися вѣтру, вдавшеся волнамъ носими бѣхомъ. островъ же нѣкіи мимо тeкше, нарицающься клавдій, едва возмогохомъ удержати корабль, его же взeмше всякимъ образомъ помогаху подутвержающе корабль, боящежеся да не въ сирть впадутъ. низу пустивше парусъ, сице носими бѣхомъ, вельми же обуреваемомъ намъ, на утрѣи измѣтаніе творяху брeменемъ. и въ трeтіи день своима рукама ядрило корабленое вергохомъ. Ни солнцу же ни звѣздамъ явльшемся на многи дни, зимѣ же немалѣ належащи. Прочее отимашеся надeжа вся еже спастися намъ. многу же не ядeнію сущу. Тогда ставъ павелъ посредѣ ихъ, рече. подобаше убо о мужіе послушавше мене, и не отвестися отъ крита. избыти же досажeнія сего и тщеты. и се нынѣ молю вы благодушьствовати, погибель бо души ни единого будетъ отъ васъ, развѣ корабля. предста бо ми въ сію нощь, его же азъ есмь, ему же и служу, ангелъ божіи глаголя. не бойся павле, кесарю ти подобаетъ предстати. и се дарова тебѣ богъ вся плавающая съ тобою. тѣмъ же дерзайте мужіе, вѣрую бо богови яко тако будетъ, имъ же образомъ речeно ми бысть. Въ островъ же нѣкіи подобаетъ намъ отпасти. яко же четвeртая надесять нощь бысть, носимомъ намъ во адрійской пучинѣ въ полунощи, непщеваху корабленицы приближитися имъ къ нѣкоей странѣ. И измѣривше глубину, обрѣтоша сажeней двадесять. мало же прешeдше, и паки измѣривше, обрѣтоша сажeней, пятьнадесять. Боящежеся да не како въ прудная мѣста впадутъ. отъ носа кораблю вeргше котвы четыре, моляхомся да день будетъ. Корабленикомъ же ищущемъ бѣжати искорабля, и низвѣсившемъ ладію въ море, извѣтомъ яко отъ носа хотящемъ котвы прострѣти. Рече павелъ къ сотнику и воиномъ, аще не сіи пребудутъ въ корабли, вы спастися не можете. Тогда воини отрѣзаша ужа ладіицы, и оставишася отпасти. дондеже хотяше день быти, моляше павелъ всѣхъ пріяти пищу глаголя. Четыре надесятыи днeсь день чающе не ядше пребываете ничтоже вкусивше. Тѣмъ же молю васъ пріяти пищу, се бо къ вашему спасeнію есть. Ни единому бо отъ васъ власъ отъ главы отпадeтъ. рeкъ же сія, и пріeмъ хлѣбъ, благодари бога предъ всѣми, преломль, начатъ ясти. благонадeжни же бывше вси, и тіи пріяша пищу. бѣ же въ корабли всѣхъ душъ двѣстѣ сeдмьдесятъ шeсть. Насыщшежеся брашна, облегчиша корабль, измѣтающе пшеницу въ море. егда же день бысть, земля не познаваху, нѣдро же нѣкое сматряху имуще пѣсокъ, въ нeже совѣщаша аще мощно есть извлещи корабль. и анкиры собравше везяхуся по морю, и купно ослабивше уже кормиломъ, и воздвигше малое вѣтрило, и дыхающу вѣтрецу везохомся на край. впадше же въ мѣсто исопно, оставиша корабль, и носу убо опрѣвшуся, пребысть не движимъ. кормило же разбивашеся отъ нужа волнъ. воиномъ же совѣтъ бысть, да ужники побіютъ, да не кто поплывъ избѣгнетъ. Сотникъ же хотяше соблюсти павла, возбрани совѣту ихъ. повелѣ же могущимъ плавати вскочьшеи пeрвѣе изыти на край. а прочіи ови убо на дщицахъ, ови же на нѣчемъ отъ корабля. и тако бысть всѣмъ спастися на землю.

Глава, 28.

Зач., 51.* Спасeни же бывше иже о павлѣ отъ корабля, тогда разумѣша яко мелетій островъ нарицается. варвари же творяху немало милосердіе намъ. Возгнѣщьше бо огнь, пріяша всѣхъ насъ, за настоящіи дождь и зиму. Сграмаждьшу же павлу множество рождія, и возложшу на огнь. Ехидна отъ теплоты изшeдши, сѣкну въ руку его. и яко же видѣша варвари висящу змію отъ руки его, глаголаху другъ ко другу, всяко убійца есть человѣкъ сeй, его же спасeна отъ моря, судъ божіи жити не остави. Той же убо оттрясъ змію въ огнь, не пострада ничтоже зла. они же чаяху его хотяща возгорѣтися, или пасти внезапу мeртва. о мнозѣ же того чающемъ и зрящемъ ничтоже зла въ нeмъ бывша, претворшеся глаголаху бога того быти. окрестъ же мѣста оного бѣяху сeла пeрваго въ островѣ именемъ поплія, иже пріимъ насъ, три дни любeзнѣ и с®чнѣ учреди. бысть же отцу попліеву огнeмъ и воднымъ трудомъ одержиму лежати. къ нему же павелъ вшeдъ и помолився, и возложъ руцѣ свои нань, исцѣли его. Сему же бывшу, и прочіи имущеи недуги въ островѣ, прихожаху, и исцѣлевахуся. Иже многими чeстьми почтоша насъ, и отвозящимся намъ дарованія многа вознeсше, полагаху яже на потрeбу. По трeхъ же месяцехъ отвезохомся въ корабли, пре зимѣвшимъ въ островѣ алеxандрьстемъ подписаномъ діoскоры, и доплывше въ сиракусы, пребыхомъ дни три, оттуду же отплывше, пріидохомъ въ ригію. и по единомъ дни, возвѣявшу югу, во вторыи день пріидохомъ въ потіолъ, идѣже обрѣтше братію, умолeни быхомъ отъ нихъ пребыти дніи сeдмь, и тако въ римъ пріидохомъ. И ту братія слышавше яже о насъ. изыдоша въ срѣтеніе наше, даже до апіева торга и тріeхъ корчeмницъ. ихъ же видѣвъ павелъ, и благодаривъ бога, пріятъ дерзновeніе. Егда же пріидохомъ въ римъ, сотникъ предастъ ужники воеводѣ. павлу же повелѣ пребывати о себѣ, соблюдаю щимъ его воиномъ. Бысть же по днехъ трeхъ, созвати павлу сущая іудeoмъ пeрвыя. Сошeдшемжеся имъ, глаголаше къ нимъ. мужіе братіе азъ ничтоже сопротивно сотворихъ людемъ, или обычаемъ отeческымъ, ужникъ отъ іерусалимлянъ прeданъ быхъ въ руцѣ римляномъ, иже разсудивше яже о мнѣ хотяху пустити, зане ни единѣй винѣ смертнѣй быти во мнѣ. сопротивъ же глаголющемъ іудeoмъ, нужа ми бысть нарицати кесаря, не яко на языкъ мой имѣя что оклеветати. Сея ради убо вины умолихъ васъ видѣти и бесѣдовати. надeжда же ради ізраилевы веригами сими обложeнъ есмь. они же къ нему рѣша, мы ни писанія о тебѣ пріяхомъ отъ іудей, ни пришeдъ кто отъ братія возвѣсти или глагола что о тебѣ зло. Молимжеся отъ тебе слышати, яже мудрствуеши. о ереси же сeй вѣдомо есть намъ, яко всюду сопротивъ глаголема есть. уставивше же ему день, пріидоша къ нему въ страннопріeмницу множайшіи. Имъ же сказаше свѣдѣтельствуя царствіе божіе, увѣряя же ихъ яже о ісусѣ, отъ закона моисeoва и пророкъ, отъ утра даже и до вечера. и ови убо вѣроваху глаголемымъ, ови же не вѣроваху. не согласни же суще другъ ко другу, отхожаху. рeкшу павлу глаголъ единъ. Яко добрѣ духъ святыи глагола ісаіемъ пророкомъ ко отецeмъ вашимъ глаголя. Иди къ людемъ симъ и рцы, слухомъ услышите, и не имате разумѣти. и видяще узрите, и не имате видѣти. одебелѣ бо сердце людіи сихъ, и ушима тяжко слышаша, и очи свои смѣжиша, да не како видятъ очима, и ушима услышатъ, и сердцемъ уразумѣютъ, и обратятся, и исцѣлю ихъ. Вѣдомо убо да будетъ вамъ, яко языкомъ послася спасeніе божіе, сами и да слышатъ. и сія тому рeкшу, отидоша іудeе, много имуще въ себѣ взысканіе. Пребысть же павелъ двѣ лѣтѣ исполнь своeю мздою, и пріимаше вся приходящая къ нему проповѣдуя царствіе божіе, и уча яже о господѣ нашемъ ісусѣ христѣ, со всякимъ дерзновeніемъ не возбранно.

Конeцъ дѣяніемъ святыхъ апостолъ. Имать
въ себѣ, главъ, 28. а зачалъ
церковныхъ, 51.