MARTYROLOGIUM ROMANUM

12 Februarii   

Pridie Idus Februarii. Luna ...    xiij. G

Sanctorum septem Fundatorum Ordinis Servorum beatae Mariae Virginis, Confessorum, quorum depositio respectivis diebus recolitur. Quos autem in vita unus verae fraternitatis spiritus sociavit, et indivisa post obitum veneratio populi prosecuta est, eos Leo Decimus tertius, Pontifex Maximus, una pariter Sanctorum fastis accensuit.

In Africa sancti Damiani, militis et Martyris.

Carthagine sanctorum Martyrum Modesti et Juliani.

Alexandriae sanctorum Martyrum Modesti et Ammonii infantum.

Barcinone, in Hispania, sanctae Eulaliae Virginis, quae, tempore Diocletiani Imperatoris, equuleum, ungulas flammasque perpessa, demum, cruci affixa, gloriosam martyrii coronam accepit.

Constantinopoli sancti Meletii, Episcopi Antiocheni, qui, pro fide catholica saepe exsilium passus, demum in eadem urbe migravit ad Dominum. Ejus virtutes sanctus Joannes Chrysostomus et sanctus Gregorius Nyssenus summis laudibus celebrarunt.

Item Constantinopoli sancti Antonii Episcopi, tempore Leonis sexti Imperatoris.

Veronae sancti Gaudentii, Episcopi et Confessoris.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.