MARTYROLOGIUM ROMANUM

20 Augusti     

Tertiodecimo Kalendas Septembris. Luna ...     v. A

In territorio Lingoniensi deposito sancti Bernardi primi Claraevallensis Abbatis, vita, doctrina et miraculis gloriosi, quem Pius Octavus Pontifex Maximus universalis Ecclesiae Doctorem declaravit, et confirmavit.

Romæ deposítio sancti Pii décimi, Papæ et Confessóris, fídei integritáte et ecclesiásticæ libertátis propugnatóris invícti, religionísque zelo insígnis, cuius festum tértio Nonas Septémbris recólitur.

In Judaea sancti Samuelis Prophetae, cujus sancta ossa (ut beatus Hieronymus scribit) Arcadius Augustus Constantinopolim transtulit, et prope Septimum collocavit.

Eodem die sancti Lucii Senatoris, qui perspecta constantia Theodori, Cyrenensis Episcopi in martyrio positi, ad fidem Christi conversus, ad eam etiam Dignianum Praesidem pertraxit; cum quo Cyprum profectus, cum ibi alios Christianos pro confessione Domini coronari videret, ultro se ipsum obtulit, et eamdem martyrii coronam, capitis obtruncatione, promeruit.

In Thracia sanctorum triginta septem Martyrum, qui sub Praeside Apeliano pro Christi fide, manibus pedibusque praecisis, in caminum ardentem injecti sunt.

Item sanctorum Martyrum Severi et Memnonis Centurionis, qui eodem mortis genere consummati, victores abierunt in coelum.

Cordubae sanctorum Martyrum Leovigildi et Christophori Monachorum, qui in Arabum persecutione pro christianae fidei defensione in carcerem conjecti, ac mox, cervicibus abscissis, igni traditi, martyrii palmam adepti sunt.

Romae beati Porphyrii hominis Dei, qui sanctum Martyrem Agapitum erudivit in fide et doctrina Christi.

In Herio insula sancti Philiberti Abbatis.

In castro Cainone sancti Maximi Confessoris, discipuli beati Martini Episcopi.

In Monte Senario Florentinae dioecesis beati Manetii Confessoris ex Septem Fundatoribus Ordinis Servorum beatae Mariae Virginis, qui eidem hymnos dicens expiravit.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.