MARTYROLOGIUM ROMANUM

27 Julii   

Sexto Kalendas Augusti. Luna ...     xxviij. A

Nicomediae passio sancti Pantaleonis medici, qui, pro fide Christi, a Maximiano Imperatore tentus, et equulei poena ac lampadarum exustione afflictus, sed inter haec, Domino sibi apparente, refrigeratus, gladii tandem ictu martyrium consummavit.

Vigiliis, in Apulia, sanctorum Martyrum Mauri Episcopi, Pantaleemonis et Sergii; qui passi sunt sub Trajano.

Nicomediae sancti Hermolai Presbyteri, cujus doctrina beatus Pantaleon ad fidem conversus est; itemque sanctorum Hermippi et Hermocratis fratrum, qui, post multas poenas sibi illatas, capitali sententia, ob confessionem Christi, a Maximiano Imperatore puniti sunt.

Cordubae, in Hispania, sanctorum Martyrum Georgii Diaconi, Aurelii et uxoris Nataliae, Felicis et uxoris Liliosae, in persecutione Arabica.

Nolae, in Campania, sanctorum Martyrum Felicis, Juliae et Jucundae.

Apud Homeritas, in Arabia, commemoratio sanctorum Martyrum, qui, sub Dunaan tyranno, ob Christi fidem, incendio traditi sunt.

Ephesi natalis sanctorum septem Dormientium, scilicet Maximiani, Malchi, Martiniani, Dionysii, Joannis, Serapionis et Constantini.

Romae sancti Caelestini Papae Primi, qui damnavit Constantinopolitanum Episcopnm Nestorium, Pelagiumque fugavit; cujus etiam auctoritate universalis sancta Synodus Ephesina adversus eumdem Nestorium celebrata est.

Antisiodori depositio beati Aetherii, Episcopi et Confessoris.

Constantinopoli beatae Anthusae Virginis, quae, sub Constantino Copronymo, ob cultum sanctarum Imaginum, verberibus caesa et exsilio relegata, quievit in Domino.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.