MARTYROLOGIUM ROMANUM

28 Martii     

Quinto Kalendas Aprilis. Luna ...     xxvij. B

Sancti Joannis de Capistrano, Sacerdotis ex Ordine Minorum et Confessoris, cujus memoria recolitur decimo Kalendas Novembris.

Caesareae, in Palaestina, natalis sanctorum Martyrum Prisci, Malchi et Alexandri. Hi tres, in persecutione Valeriani, cum in suburbano agello supradictae urbis habitarent, atque in ea caelestes martyrii proponerentur coronae, ultro Judicem, divino fidei calore succensi, adeunt, et cur tantum in sanguinem piorum desaeviret, objurgant; quos ille continuo, pro Christi nomine, bestiis tradidit devorandos.

Tarsi, in Cilicia, sanctorum Martyrum Castoris et Dorothei.

In Africa sanctorum Martyrum Rogati, Successi et aliorum sexdecim.

Apud Niirsiam sancti Spei Abbatis, mirae patientiae viri, cujus anima (ut refert sanctus Gregorius Papa), cum ex hac vita migraret, in columbae specie a cunctis fratribus visa est in caelum ascendere.

Cabillone, in Galliis, depositio sancti Gunthramni, Regis Francorum, qui spiritalibus actionibus ita se mancipavit, ut, relictis saeculi pompis, thesauros suos largiter Ecclesiis et pauperibus erogaret.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.