MARTYROLOGIUM ROMANUM

25 Martii     

Octavo Kalendas Aprilis. Luna ...     *. F

Annuntiatio beatissimae Virginis Genitricis Dei Mariae.

Hierosolymis commemoratio sancti Latronis, qui, in cruce Christum confessus, ab eo meruit audire: « Hodie mecum eris in paradiso ».

Romae sancti Quirini Martyris, qui, sub Claudio Imperatore, post facultatum amissionem, post carceris squalorem, post multorum verberum afflictionem, gladio interfectus est et in Tiberim projectus; quem Christiani, cum in insula Lycaonia (quae postea sancti Bartholomaei dicta est) invenissent, in coemeterio Pontiani condiderunt.

Item Romae sanctorum ducentorum sexaginta duorum Martyrum.

Sirmii passio sancti Irenaei, Episcopi et Martyris; qui, tempore Maximiani Imperatoris, sub Praeside Probo, primum tormentis acerrimis vexatus, deinde diebus plurimis cruciatus in carcere, novissime, abscisso capite, consummatus est.

Nicomediae sanctae Dulae, cujusdam militis ancillae, quae, ob castitatem servandam occisa, martyrii coronam promeruit.

Laodiceae, ad Libanum, sancti Pelagii Episcopi, qui, ob fidem catholicam, tempore Valentis, exsilium et alia passus est; ac tandem, in sedem suam restitutus, quievit in Domino.

In Antro, insula Ligeris fluminis, sancti Hermelandi Abbatis, cujus gloriosa conversatio insigni miraculorum praeconio commendatur.

Pistorii, in Tuscia, sanctorum Confessorum Barontii et Desiderii.

Faliscoduni sanctae Luciae Filippini, Fundatricis Instituti Magistrarum Piarum ab ejus cognomine nuncupatarum, de Christiana puellarum et mulierum, praesertim pauperum, eruditione optime meritae, quam Pius Papa Undecimus inter sanctas Virgines retulit.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.