MARTYROLOGIUM ROMANUM

18 Martii     

Quintodecimo Kalendas Aprilis. Luna ...     vij. F

Hierosolymis sancti Cyrilli Episcopi, Confessoris et Ecclesiae Doctoris; qui, ab Arianis multas pro fidei causa perpessus injurias et ex Ecclesia sua saepe depulsus, tandem, sanctitatis gloria clarus, in pace quievit. Ipsius porro intemeratam fidem prima Constantinopolitana Synodus oecumenica, sancto Damaso Papae scribens, praeclaro testimonio commendavit.

Caesareae, in Palaestina, natalis beati Alexandri Episcopi, qui de Cappadocia, ex propria civitate, ubi erat Episcopus, sanctorum locorum desiderio Hierosolymam petiit; atque ibi, cum a Narcisso, ejusdem urbis Episcopo, jam sene, illa regeretur Ecclesia, ipsius gubernacula, divina edoctus revelatione, suscepit. Postmodum vero, in persecutione Decii, cum jam longaevae aetatis veneranda canitie praefulgeret, ductus est Caesaream, et clausus in carcere, ob confessionem Christi, martyrium complevit.

Augustae sancti Narcissi Episcopi, qui primus in Rhaetia Evangelium praedicavit; deinde in Hispaniam profectus est, et, cum Gerundae multos ad Christi fidem convertisset, ibidem, in persecutione Diocletiani Imperatoris, una cum Felice Diacono, martyrii palmam accepit.

Nicomediae sanctorum decem millium Martyrum, qui, pro Christi confessione, gladio percussi sunt.

Ibidem sanctorum Martyrum Trophimi et Eucarpii.

In Britannia sancti Eduardi Regis, qui, dolis novercae necatus, multis miraculis claruit.

Lucae, in Tuscia, natalis sancti Frigdiani Episcopi, virtiite miraculorum illustris.

Mantuae sancti Anselmi, Episcopi Lucensis et Confessoris.

Carali, in Sardinia, sancti Salvatoris ab Horta, Confessoris, ex Ordine Fratrum Minorum, qui, virtutibus et singulari miraculorum dono claruit, et a Pio Papa Undecimo inter sanctos Caelites adnumeratus est.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.