MARTYROLOGIUM ROMANUM

14 Martii     

Pridie Idus Martii. Luna ...     xj. B

Romae, in agro Verano, sancti Leonis, Episcopi et Martyris.

Item Romae natalis sanctorum quadraginta septem Martyrum, qui baptizati sunt a beato Apostolo Petro, cum teneretur in custodia Mamertini cum Coapostolo suo Paulo, ubi novem menses detenti sunt; qui omnes, sub devotissima fidei confessione, Neroniano gladio consumpti sunt.

In Provincia Valeriae sanctorum duorum Monachorum, quos Longobardi suspendio necaverunt in arbore; in qua Martyres, licet defuncti, ab hostibus ipsis auditi sunt psallere.

In ea etiam persecutione Diaconus Ecclesiae Marsicanae, in confessione fidei, capite truncatus est.

In Africa sanctorum Martyrum Petri et Aphrodisii, qui, in persecutione Wandalica, martyrii coronam perceperunt.

Carrhis, in Mesopotamia, sancti Eutychii patricii, et Sociorum, qui ab Evelid, Arabum Rege, ob fidei confessionem, interempti sunt.

Halberstatti, in Germania, dormitio beatae Mathildis Reginae, matris Othonis Primi, Romanorum Imperatoris, humilitate et patientia conspicuae.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.