MARTYROLOGIUM ROMANUM

28 Februarii     

Pridie Kalendas Martiii. Luna ...     xxvij. B

Romae natalis sanctorum Martyrum Macarii, Rufini, Justi et Theophili.

Alexandriae passio sanctorum Caerealis, Pupuli, Caji et Serapionis.

Ibidem commemoratio sanctorum Presbyterorum, Diaconorum et aliorum plurimorum; qui, tempore Valeriani Imperatoris, cum pestis saevissima grassaretur, morbo laborantibus ministrantes, libentissime mortem oppetiere, et quos velut Martyres religiosa piorum fides venerari consuevit.

Romae sancti Hilari, Papae et Confessoris.

In territorio Lugdunensi, locis Jurensibus, depositio sancti Romani Abbatis, qui primus illic eremiticam vitam duxit, et, multis virtutibus ac miraculis clarus, plurimorum postea Pater exstitit Monachorum.

Papiae Translatio corporis sancti Augustini Episcopi, Confessoris et Ecclesiae Doctoris, ex Sardinia insula, opera Luitprandi, Regis Longobardorum.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.