MARTYROLOGIUM ROMANUM

11 Decembris

Tertio Idus Decembris. Luna ...     xiv. F

Romae sancti Damasi Primi, Papae et Confessoris; qui Apollinarem haeresiarcham damnavit, et Petrum, Episcopum Alexandrinum, fugatum restituit; multa etiam sanctorum Martyrum corpora invenit, eorumque memorias versibus exornavit.

Item Romae passio sancti Trasonis, qui, cum Christianos laborantes in thermis, aliisque operibus publicis fatigatos, et in carcere positos, de suis facultatibus aleret, jussu Maximiani tentus est, et cum aliis duobus, id est Pontiano et Praetextato, martyrio coronatus.

Ambiani, in Gallia, sanctorum Martyrum Victorici et Fusciani, sub eodem Imperatore, in quorum naribus et auribus jussit Rictiovarus Praeses immitti tarinchas, et clavis ardentibus tempora transfigi, deinde oculos evelli, ac postmodum eorum corpora jaculari; sicque, una cum sancto Gentiano, eorum hospite, capitibus amputatis, migraverunt ad Dominum.

In Perside sancti Barsabae Martyris.

In Hispania sancti Eutychii Martyris.

Placentiae sancti Sabini Episcopi, miraculis clari.

Constantinopoli sancti Danielis Stylitae.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.