MARTYROLOGIUM ROMANUM

20 Septembris

Duodecimo Kalendas Octobris. Luna ...     v. A

Vigilia sancti Matthaei, Apostoli et Evangelistae.

Romae passio sanctorum Martyrum Eustachii et Theopistis uxoris, cum duobus filiis Agapito et Theopisto, qui, sub Hadriano Imperatore, damnati ad bestias, sed Dei ope ab iis nullatenus laesi, tandem, in bovem aeneum candentem inclusi, martyrium consummarunt.

Cyzici, in Propontide, natalis sanctorum Martyrum Faustae Virginis, et Evilasii, sub Maximiano Imperatore; e quibus Fausta, ab eodem Evilasio, idolorum sacerdote, decalvata et ad turpitudinem rasa, suspensa et torta est. Deinde, cum eam vellet mediam secare, et carnifices laedere non valerent, stupens credidit in Christum Evilasius; et, dum ipse quoque, Imperatoris jussu, fortiter torqueretur, Fausta, capite terebrata, clavis toto corpore confixa et sartagini ignitae imposita, tandem, cum eodem Evilasio, illam voce de cadis vocante, transivit ad Dominum.

In Phrygia sanctorum Martyrum Dionysii et Privati.

Item sancti Prisci Martyris, qui, punctim pugionibus transverberatus, capite plexus est.

Perge, in Pamphylia, sanctorum Theodori, et Philippae matris, ac Sociorum Martyrum, sub Antonino Imperatore.

Carthagine sanctae Candidae, Virginis et Martyris; quae, sub Maximiano Imperatore, plagis toto corpore dilacerata, martyrio coronatur.

Mediolani sancti Clicerii, Episcopi et Confessoris.

Romae Translatio corporis sancti Agapiti Primi, Papae et Confessoris, ex urbe Constantinopoli, in qua Pontifex decimo Kalendas Maji obdormierat in Domino.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.