MARTYROLOGIUM ROMANUM

18 Septembris

Quartodecimo Kalendas Octobris. Luna ...     vij. F

Auximi, in Piceno, sancti Josephi a Cupertino, Sacerdotis ex Ordine Minorum Conventualium et Confessoris; quem Clemens Papa Decimus tertius in Sanctorum numerum retulit.

In Chalcide Graeciae natalis sancti Methodii, qui prius Olympii, in Lycia, et postea Tyri, in Phoenicia, exstitit Episcopus, sermonis nitore ac doctrina clarissimus; atque, ad extremum novissimae persecutionis (ut scribit sanctus Hieronymus), martyrio coronatus est.

In territorio Viennensi sancti Ferreoli Martyris, qui, cum esset tribuniciae potestatis, jussu impiissimi Praesidis Crispini tentus, et primo crudelissime verberatus, deinde, gravi catenarum pondere onustus, in teterrimum carcerem trusus est; unde, solutis Dei nutu vinculis et januis carceris patefactis, exiens, ab insequentibus iterum est captus, ac martyrii palmam obtruncatione capitis percepit.

Item sanctarum Martyrum Sophiae et Irenes.

Mediolani sancti Eustorgii Primi, ejusdem civitatis Episcopi, beati Ambrosii testimonio celebris.

Gortynae, in Creta, sancti Eumenii, Episcopi et Confessoris.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.