1. Kur eisumā ir uzskaiteitas patiseibas, kuras mums pyrmā kōrtā ir jōzyna un kurom ir jōtic?

Tōs atsarūn apostolu ticeibas 12 punktūs (gobolūs).

2. Kōpēc tū sauc par apostolu ticeibu?

Tōpēc, ka tys nu apostolu laikim ir pōrnōcis leidz mums.

Pyrmais „Es tycu“ punkts:

„Es tycu uz Dīvu, vysvareigū Tāvu, dabasu un zemes Radeitōju“.

3. Kas ir Dīvs?

Dīvs ir bezgaleigi piļneigs Gors, dabasu un zemes vysaugstōkais Kungs un vysa loba Radeitōjs.

4. Kōpēc mes sokom, ka Dīvs ir „Gors“?

Tōpēc, ka Jam ir prōts un breiva gryba, bet nav mīsas.

„Dīvs ir Gors“ (Jņ. 4:24).

5. Kōpēc mes sokom, ka Dīvs ir bezgaleigi piļneigs?

Tōpēc, ka Dīvā ir vysas lobōs īpašeibas bez kaida māra, īrūbežojuma un skaita.

6. Kaidas ir Dīva golvonōs īpašeibas voi piļneibas?

Tōs ir taidas: Dīvs ir myužeigs un namaineigs, vysur klōtasūšs, vysuzynōtōjs, vysgudrais, vysvareigs; Jys ir bezgaleigi svāts un taisneigs, bezgaleigi lobs, žālsirdeigs un pacīteigs, bezgaleigi patīss un taisneigs.

7. Kū zeimoj vōrdi: „Dīvs ir myužeigs“?

Tī zeimoj tū, ka Dīvs ir vīnmār, ka Jam nav bejis īsōkuma un nabyus gola.

„Pyrms nakai kolni rodōs, voi zeme un pasauļs tyka veidōti: nu myužeibas uz myužeibu Tu esi, Dīvs“ (Ps. 89:2).

8. Kū zeimoj: „Dīvs ir namaineigs“?

Tys zeimoj, ka Dīvs nu myužeibas ir tys pats, bez kaidas pōrmaiņas Pats sevī voi sovūs lāmumūs.

„Kurā (t. i. Dīvā) nav pōrmaiņas, ni pōrgrūzeibu ānas“ (Jk. 1:17). „Muns lāmums pastōvēs un muna gryba pīsapiļdeis“ (Izaj. 46:10).

9. Kaids ir myusu pīnōkums pret myužeigū un namaineigū Dīvu?

Myusu pīnōkums ir Jū pīlyugt, Jam kolpōt un Jū mīļōt.

„Tu esi munas sirds Dīvs un muna daļa Dīvs par myužim“ (Ps. 72:26).

10. Kū zeimoj: „Dīvs ir vysur klōtasušs“?

Tys zeimoj, ka Dīvs ir vysur: dabasūs, vērs zemes un vysōs vītos.

„Voi tod na Es aizpyldu dabasūs un zemi? — soka Kungs“ (Jer. 23:24) „Dīvs nav tōli nu mums kotra, jo Jymā mes dzeivōjam, kustamēs un asam“ (Ap. d. 17: 27—28). Nasaskotūt uz tū, ka Dīvs aizpylda vysu telpu, Jys vysur ir piļneigi vyss. Telpa Jū naspēj apjimt, tōpēc ka Jys ir bezgaleigs un naaptverams.

11. Kū zeimoj: „Dīvs ir vysuzynūšs“?

Tys zeimoj, ka Dīvs nu myužim piļneigi zyna vysas lītas. Jys zyna vysu, kas beja, ir un byus; zyna pat vysnūslāptōkōs myusu dūmas.

„Kunga acis spūdrokas par sauli, tōs pōrredz vysus cylvāka ceļus, vysus bezdibiņu dziļumus, īsaver vysnūslāptōkajōs cylvāka sirds daļōs“ (Ecclus. 23:28—29). Verīs ari vysu 138. psalmu. Dīva vysuzyōšonas pīmāri ir Kristus un pravīšu īprīkš sludynōjumi.

12. Kaids lobums nu tō, ka mes paturam prōtā Dīva vysur klōtasameibu un vysuzynōšonu?

1. Tys vīnmār (pat dūmōs) myus attur nu ļauna un pamudynōj dareit lobu kai ari 2. dūd mums drūsmi un mīrynōjumu gryuteibōs un bādōs.

„Lobōk tū nadorūt īkrist jyusu rūkōs, nakai dareit grāku Kunga acīs“ (Dan. 13:23). „Lai palīk tova dōvona nūslāpumā, un tovs Tāvs, kas redz nūslāpumus, atolgōs tevi“ (Mt. 6:4). „Lai es staigōtu nōves ānā, es ļaunuma nasabeišu, jo Tu esi ar mani“ (Ps. 22:4). „Redz, muns līcinīks ir dabasūs un Tys, kas zyna munu sirdsapziņu, ir augšā“ (Job. 16:20).

13. Kū zeimoj: „Dīvs ir vysgudrōkais“ ?

Tys zeimoj, ka Dīvs prūt vysas lītas izkōrtōt vyslobōkā veidā, lai tōs sasnāgtu Jō spraustus mērķus.

„Cik leli ir Tovi dorbi, Kungs! Tu vysas lītas esi darejis ar gudreibu“ (Ps. 103:24). Pīmāri: Moizeša izglōbšona; Jezupa paaugstynošona; Amana pazamynošona.

14. Kū zeimoj: „Dīvs ir vysuvareigs“?

Tys zeimoj, ka Jys spēj veikt vysu. Jam pīteik tikai gribēt, un ar sovas grybas aktu Jys vysu veic.

„Vysu, kū Dīvs ir gribējis, ir izdarejis dabasūs, vērs zemes, jyurā un vysūs bezdibiņūs“ (Ps. 134:6). „Jo Dīvam nivīna līta nav naispējama“ (Lk. 1:37). Pīmāri: Pasauļa radeišona; breinumi Egiptē un tuksnesī.

15. Uz kū skubynoj myusu ticeiba Dīva vysvareibai un vysuzynōšonai?

Tei myusus skubynoj: 1. piļneigi pasaļaut uz Dīvu un 2. sasamīrynōt ar Jō izkōrtōjumim.

„Napasaļaunit uz vaļdinīkim, uz cylvāku bārnim, kurūs nav glōbīņa“. „Svēteigs ir tys, kura cereiba ir jo Dīvā“ (Ps. 145:3, 5). Pīmārs: Gedeons. — „Uztic Kungam sovu ceļu, pasaļaun uz Jū, un Jys izdareis“ (Ps. 36:5). Pīmārs: Jobs.

16. Kū zeimoj: „Dīvs ir svāts“?

Tys zeimoj, ka Dīvs mīļōj un grib tikai tū, kas ir lobs, tys ir, kas atbylst Jō piļneibom, un ka Jys nairedz ļaunu.

„Tu mīļōji taisneigumu un īneidi nakrītneibu“ (Ps. 44:8). Pīmārs: Sinaja kolna lykumi resp. bausleibas.

17. Kū zeimoj: “Dīvs ir taisneigs“?

Tys zeimoj, ka Dīvs atolgōj voi strōpej cylvākus samārā ar jūs nūpalnim.

„Jys kotram atleidzynōj saskaņā ar tō dorbim, ... jo Dīvs nasaver uz cylvāka personu“ (Rom. 2:6, 11). Pīmāri: Pasauļs tyka strōpāts ar yudiņa plyudim; Sodoma un Gomora tyka iznycynōtas ar guni nu dabasim, bet Noess un Lots tyka glōbti.

18. Kod cylvāks sajam piļneigu atmoksu?

Piļneiga atmoksa nōks tikai pēc nōves, bet ari šymā pasaulī grēcinīkim nav eistōs laimes, ni ari taisneigajim eistōs nalaimes.

Leidzeibas par kvīšim un nazōli (Mt. 13:30), par ļaunū bogōtnīku un nabadzeigū Lazaru.
„Mes pīkusom uz nalīteibas un izniceibas ceļa, mes staigōjom gryutus ceļus, bet Kunga ceļus napazynom“ (Gudr. 5:7).
Pīmāri: Kains, Absoloms, Achabs, Antiochs.
„Taisneigūs dvēseles ir Dīva rūkā“ (Gudr. 3:1). Pīmāri: Jezups, Tobijs, Zuzana, Danieļs, (Sal. 2. kor. 7:4).

19. Uz kū myus skubynoj dūma par Dīva svātumu un taisneigumu?

Tei myus skubynoj 1. ryupeigi sorgōtīs nu ļauna un arvīn vairōk ceņstīs uz svātumu kai ari 2. nasaceļt lepneibā un napīkūpt poštaisneigumu.

„Nasabeistōt nu tō, kas nūkaun mīšu, bet dvēseli naspēj nūnōvēt. Bet beistatēs nu tō, kas spēj dvēseli un mīsu pazudynōt elnē“ (Mt. 16:28).
„Es asmu jyusu Kungs Dīvs: asat svāti, jo Es asmu svāts“ (Lev. 11:44).
„Es gon nikō naapsazynōju, bet tys mani vēļ naattaisnōj. Tys Kungs ir muns tīsnesis“ (1. kor. 4:4). 

20. Kū zeimoj: „Dīvs ir lobs “ ?

Tys zeimoj, ka Jys dora lobu vysim radejumim un mums dōvynoj naskaitamus lobumus.

„Tu mīļōj vysu, kas ir un naineisti nikō, kū esi darejis“ (Gudr. 11:25).
„Tai soka Kungs: voi var sīvīte aizmērst sovu bārnu? Un jo jei ari aizmērstu, Es tevi nikod naaizmērsšu“ (Izaj. 49:15).

21. Kamā vysvairōk pasarōda Dīva mīlesteiba un labsirdeiba?

Tymā, ka Jys sovu vīndzymušū Dālu atdeve nōvei grēcinīku pesteišonas dēļ.

„Dīvs ir mīlesteiba. Tymā atsakloja Dīva mīlesteiba myusūs, ka Dīvs atsyuteja pasaulī sovu vīndzymušū Dālu, lai mes dzeivōtu caur Jū‘‘ (1. Jņ. 4:8—9).

22. Kū zeimoj: „Dīvs ir žālsirdeigs“?

Tys zeimoj, ka Dīvs vīnmār ir gotovs nūvērst kotru ļaunumu nu sovim radejumim un labprōt pīdūd tim, kas patīši nūžālōj sovus grākus.

Dīva žālsirdeiba ir par kotru mīsu“ (Ecclus. 18:12). „Kai Es dzeivōju, soka Kungs Dīvs, Es nagrybu grēcinīka nōves, bet gon lai grēcinīks atsagrīztu un dzeivōtu" (Ecclus. 33:11). Pīmāri: Ninivīši, leidzeiba par pazudušū dālu (Lk. 15).

23. Kū zeimoj: „Dīvs ir ļūti pacīteigs“?

Tys zeimoj, ka Jys nareti ļūti ilgi gaida pyrms nakai strōpej grēcinīku, Jys dūd laiku nūžālōšonai par grākim.

„Tu naivāroj cylvāku grākus nūžālōšonas dēļ (Gudr. 11:24). Pīmārs: leidzeiba par figes kūku (Lk. 13).

24. Kas mums ir jōdora sakarā ar tū, ka Dīvs ir ļūti lobs, žālsirdeigs un pacīteigs?

Mums ir: 1. jōpasateic Dīvam, Jys jōmīļoj nu vysas sirds;

2. kod asam sagrākōjuši, ar paļōveibu jōlyudz pīdūšona un

3. mums jōbyun lobim un žālsirdeigim atteiceibā uz myusu tyvōkim.

„Slavejit Kungu, tōpēc, ka Jys ir lobs; tōpēc, ka Jō žālsirdeiba pastōv par myužim“ (Ps. 106:1). „Es ceļšūs un īsu pi sova Tāva“ (Lk. 15:13).
„Tōpēc esit žālsirdeigi, kai ari jyusu Tāvs ir žālsirdeigs“ (Lk. 6:36).
Leidzeiba par nažālsirdeigū kolpu (Mt. 18).

25. Kū zeimoj: „Dīvs ir patīss“?

Tys zeimoj, ka Dīvs atkloj tikai patīseibu, tōpēc, ka Jys navar ni malōt, ni maļdeitīs.

„Dīvs maldynot navar“ (Ebr. 6:18).

26. Kū zeimoj: „Dīvs ir uizticeigs“?

Tys zeimoj, ka Jys drūši tur sūlejumus un izpylda draudus.

„Tev jōzyna, ka tovs Kungs Dīvs ir styprys un uzticeigs, tur leigumus un ir žālsirdeigs tim, kas pylda Jō pavēles un tim, kas Jū īneist, atmoksoj ar izniceibu“ (Deut. 7:9—10).

27. Kaidu pīnōkumu mums uzlīk Dīva patīseigums un uzticeigums?

1. Mums līk stypri ticēt Dīva vōrdam un nalūkami cerēt uz Jō sūlejumim; kai ari 2. vīnmār runōt patīseibu un piļdeit dūtūs sūlejumus.

„Svēteigi tī, kas nav redzējuši, bet ir ticējuši“ (Jņ. 20:29). Pīmāri: Abrahams; Ananija un Safiras strōpe (Ap. d.).

28. Voi mes varim redzēt Dīvu?

Nā, ar mīseigom acim mes navarim Dīvu redzēt, tōpēc ka Jys ir Gors.

29. Kai tod mes varim kū zynōt par Dīvu un Jō piļneibom, jo mes navarim Jū redzēt?

Dīvs dareja sevi zynomu cylvākam dabyskā un pōrdabyskā ceļā.

30. Kai Dīvs dareja sevi zynomu dabyskā ceļa?

1. Jys tū dareja caur radzamū pasauli, kuru Jys ir radejis un napōrtraukti uztur, jo nivīns saprateigi navar pījimt, ka pasauļs byutu radīs pats nu sevis, voi, ka tei apbreinōjamō kōrteiba, kaida vārējama pasaulī, byutu rodusēs un pastōvātu poša nu sevis. Tikai „nagudrais pasaceja sovā sirdī: Dīva nav“. (Ps. 13:1).

Tōpēc sv. Pōvuls soka par pogōnim, ka jī nav attaisnōjami, ka natic Dīvam, „jo tys, kas Jymā naradzams — Jō myužeigais spāks un dīveiba — nu pasauļa radeišonas ir aptverams ar prōtu Jō dorbūs“ (Rom. 1:20). „Jys naatstōja sevi bez aplīcynōjuma, dareidams labi nu dabasim, dūdams leitu un augleigus laikus, piļdeidams myus ar bareibu, bet myusu sirdis ar prīcu“ (Ap. d. 14:16; sal. ari: Gudr. 13).

2. Dīvs dora sevi zynomu cylvākim ari caur sirdsapziņas bolsu, kas skubynoj myusus beitīs nu brīsmeigō ļaunuma, par kaidu ir grāks un Dīva strōpes par tū, kai ari cerēt uz tykuma atolgōtōju — Dīvu.

Sirdsapziņu nav izveidōjis cylvāks. Tōs darbeiba dažkōrt ir tik sōpeiga, ka cylvākam lobōk grybātūs, ka tōs pavysam nabyutu. Dīvs myusu dobā tū ir īlicis, kai naatjamamu myusu ciļvēceigōs dobās daļu, lai tōs bolss myusus mōceitu par tū, kas ir lobs un kas nav lobs.

31. Kai Dīvs dora sevi zynomu pōrdabyskā ceļā?

Jys tū dora caur atklōsmi, kaidu Jys mums deve caur pravīšim un beidzūt caur sovu Dālu.

„Dīvu nivīns nikod nav redzejis: vīndzymušais Dals, kas ir Dīva klēpī, tū atklōja“ (Jņ. 1:18).

32. Voi ir vairōk Dīvu?

Nā. Ir tikai vīns Dīvs.

„Es asmu Dīvs, un nav Dīva sūplōk Maņ, ni leidzeiga Maņ“ (Izaj. 46:9).

33. Kas mums ir jōdora sakarā ar myusu ticeibu uz Dīvu?

Mums ir na tikai jōtic tam, ka Dīvs ir, bet ari tam, ka vyss, kū Jys ir sacejis, ir patīseiba. Pi kam mums ir jōatsadūd Dīvam ar mīlesteibu un paļōveibu, un Jys jōpīlyudz, jo Jys ir vysaugstōkais myusu Kungs, nu kura mes vysi asam atkareigi.